Nagtuo Gid ang Isa ka Senturion

Pagkatapos sang Sermon sa Bukid ni Jesus, nagkadto sia sa siudad sang Capernaum. Ginpalapitan sia sang pila ka gulang sang mga Judiyo didto. Ginpadala sila sang tawo nga lain ang ginhalinan—ang Romano nga opisyal sang mga soldado nga ginatawag senturion.

Ang palangga nga alagad sang opisyal sang mga soldado may grabe nga balatian kag nagatagumatayon na. Bisan pa Gentil ang senturion, nangayo sia sing bulig kay Jesus. Ginsilingan sang mga Judiyo si Jesus nga ang alagad sang tawo “nagahigda na lang sa balay kay paralisado sia, kag nagaantos sia sing tuman,” mahimo sa grabe nga kasakit. (Mateo 8:6) Ginpasalig sang Judiyo nga mga gulang si Jesus nga ining senturion takus nga buligan, nga nagapaathag: “Ginahigugma niya ang aton pungsod kag ginpatindugan niya kami sang sinagoga.”—Lucas 7:4, 5.

Dayon naglakat si Jesus upod sa mga gulang pakadto sa balay sang opisyal sang mga soldado. Sang malapit na sila, ginsugo sang opisyal ang iya mga abyan nga isiling: “Ginuo, indi na pagpabudlayi ang imo kaugalingon, kay indi ako takus nga kadtuan mo sa akon balay. Amo gani nga wala ako nagkadto sa imo.” (Lucas 7:6, 7) Pagpaubos gid ini sang isa nga naanad sa pagmando sa iban! Kag ini nagapakita kon daw ano ka tuhay ining tawo sa mga Romano nga mapintas sa ila mga ulipon.—Mateo 8:9.

Nahibaluan man sang senturion nga wala nagapakig-upod ang mga Judiyo sa indi Judiyo. (Binuhatan 10:28) Ginahunahuna ini, ginpadala sang opisyal ang iya mga abyan para mangabay kay Jesus: “Magsugo ka lang, kag ang akon alagad magaayo.”—Lucas 7:7.

Nagdayaw si Jesus sang mabatian niya ini kag nagsiling sia: “Ginasiling ko sa inyo, wala pa ako sing nakita sa Israel nga may subong sini kadaku nga pagtuo.” (Lucas 7:9) Nahibaluan sang mga abyan sang senturion sang pagbalik nila sa balay sini nga nag-ayo na ang nagbalatian nga ulipon.

Sang ginhimo ni Jesus ang pagpang-ayo, gingamit niya ang higayon para pat-uron nga ang nagatuo nga mga indi Judiyo pagapakamaayuhon, nga nagasiling: “Madamo halin sa sidlangan kag katundan ang magakari kag magasalo sa lamesa upod nanday Abraham, Isaac, kag Jacob sa Ginharian sang langit.” Kamusta ang wala nagatuo nga mga Judiyo? Si Jesus nagsiling nga “ihaboy [sila] sa kadudulman sa gua. Didto magahibi sila kag magapabagrot sang ila mga ngipon.”—Mateo 8:11, 12.

Gani pagasikwayon ang kinaugali nga mga Judiyo nga wala nagbaton sang kahigayunan nga gintanyag anay sa ila nga mangin bahin sang Ginharian upod sang Cristo. Pero agdahon ang mga Gentil nga magpungko sa iya lamesa, “sa Ginharian sang langit.”