Nag-ayo Paagi sa Pagtandog sa Bayo ni Jesus

Naglab-ot ang balita sang pagbalik ni Jesus halin sa Decapolis sa mga Judiyo nga nagapuyo sa aminhan-katundan sang baybayon sang Dagat sang Galilea. Mahimo nga madamo ang nakabati nga ginpatinong ni Jesus ang unos nga bag-o lang nag-agi, kag mahimo nahibaluan sang iban nga gin-ayo niya ang mga tawo nga ginsudlan sang mga demonyo. Gani, nagtipon “ang madamo gid nga tawo” sa higad sang dagat, nga mahimo sa lugar sang Capernaum, para sug-alawon sia. (Marcos 5:21) Sang pagdungka niya, nalipay sila kag nalangkag.

Ang isa nga luyag gid makita si Jesus amo si Jairo, ang nagadumala nga opisyal sang sinagoga, nga mahimo sa Capernaum. Naghapa sia sa tiilan ni Jesus kag nagpakiluoy sia sa iya sing madamo nga beses: “Tagumatayon na ang akon anak nga babayi. Kari ka palihug kag itungtong ang imo mga kamot sa iya agod mag-ayo sia kag mabuhi.” (Marcos 5:23) Ano ang reaksion ni Jesus sa pangabay ni Jairo nga buligan ang iya bugtong nga dalagita, nga mga 12 anyos pa lang kag palangga gid niya?—Lucas 8:42.

Sang nagapakadto sia sa balay ni Jairo, ginsugata si Jesus sang makapasubo nga kahimtangan. Madamo sang mga kaupod ni Jesus ang nalangkag, kon bala magahimo sia liwat sing milagro. Pero may isa ka babayi sa kadam-an nga nabalaka gid sa iya malubha nga balatian.

Ining Judiyo nga babayi ginatagasan sing dugo sa sulod sang 12 ka tuig. Nagpabulong sia sa madamo nga doktor kag naubos ang tanan niya nga kuarta sa ginrekomendar nila nga mga bulong. Pero wala gid sia mag-ayo. Ang matuod, “naglubha pa gid ang iya balatian.”—Marcos 5:26.

Mahimo nahangpan mo nga luwas sa makapaluya ang iya balatian, makahuluya man ini. Wala ini ginahambalan. Dugang pa, suno sa Mosaikong Kasuguan, ang paggua sang dugo nagapahigko sa babayi. Ang bisan sin-o nga nagatandog sa iya ukon sa may dugo niya nga panapton dapat manghugas kag indi mangin matinlo asta sa gab-i.—Levitico 15:25-27.

“Sang nabatian [sini nga babayi] ang tuhoy kay Jesus,” ginpangita niya sia. Bangod indi matinlo, hipos sia nga nagsimpon sa kadam-an, nga nagahunahuna: “Kon matandog ko lang ang iya bayo, magaayo gid ako.” Sang natandog na niya ang sidsid sang bayo ni Jesus, nabatyagan niya dayon nga nag-untat ang pagtagas sang dugo! “Nag-ayo sia sa iya malubha nga balatian.”—Marcos 5:27-29.

Nagsiling dayon si Jesus: “Sin-o ang nagtandog sa akon?” Ano ayhan ang ginbatyag sang babayi pagkabati niya sini? Nagprotesta si Pedro paagi sa pagsaway kay Jesus: “Ang mga tawo nagaginutok kag nagadinaguso sa imo.” Ti ngaa namangkot si Jesus, “Sin-o ang nagtandog sa akon?” Si Jesus nagpaathag: “May nagtandog sa akon, kay nabatyagan ko nga may gahom nga naggua sa akon.” (Lucas 8:45, 46) Huo, ang pag-ayo nagbuhin sang kusog ni Jesus.

Ang babayi naghapa sa atubangan ni Jesus, nga nagakurog sa kahadlok kay nahibaluan niya nga may nakahibalo sang natabo sa iya. Ginsugid niya sa atubangan sang tanan ang parte sa iya balatian kag nga bag-o lang sia nag-ayo. Ginlugpayan sia ni Jesus: “Anak, ang imo pagtuo nag-ayo sa imo. Lakat ka nga may paghidait. Nag-ayo ka na sa imo balatian.”—Marcos 5:34.

Maathag nga ang Isa nga ginpili sang Dios nga maggahom sa duta mapinalanggaon kag maluluy-on, nga nagaulikid sa mga tawo kag may gahom man sa pagbulig sa ila!