Kon Paano Gin-organisar kag Ginadumalahan ang Kongregasyon

SA IYA nahauna nga sulat sa taga-Corinto, ginhambal ni apostol Pablo ang importante nga kamatuoran parte sa Dios. Nagsulat sia: “Ang Dios indi Dios sang kagamo, kundi sang paghidait.” Dayon nagsiling sia parte sa mga miting sang kongregasyon: “Himua ninyo ang tanan sing nagakaigo kag suno sa kahimusan.”—1 Cor. 14:33, 40.

² Sa pamuno sini man nga sulat, ang apostol nagpaandam parte sa pagbinahinbahin sa sulod sang kongregasyon sa Corinto. Naglaygay sia sa kauturan didto nga ‘maghilisugot sila sa ila ginahambal’ kag ‘maghiliusa sila sing bug-os sa isa ka panghunahuna kag katuyuan.’ (1 Cor. 1:10, 11) Dayon ginlaygayan niya sila parte sa lainlain nga butang nga nagaapektar sa paghiusa sang kongregasyon. Paagi sa paggamit sing ilustrasyon tuhoy sa lawas sang tawo, ginpakita niya nga kinahanglan ang paghiusa kag pagkooperar. Ginpalig-on niya ang tanan sa Cristianong kongregasyon, ano man ang ila katungdanan, nga mag-ulikid sa isa kag isa sa mahigugmaon nga paagi. (1 Cor. 12:12-26) Ang kooperasyon sa tunga sang mga yara sa kongregasyon nagapakita nga kinahanglan naorganisar ini.

³ Apang paano dapat organisahon ang Cristianong kongregasyon? Sin-o ang magaorganisar sini? Ano ang mga bahin sini? Sin-o ang tangduan sa mga katungdanan? Paagi sa pagpagiya sa Biblia, matigayon naton ang maathag nga mga sabat sa sini nga mga pamangkot.—1 Cor. 4:6.

GIN-ORGANISAR SING TEOKRATIKO

⁴ Ang Cristianong kongregasyon gintukod sang Pentecostes 33 C.E. Ano ang matun-an naton tuhoy sa kongregasyon sang unang siglo? Gin-organisar kag gindumalahan ini sing teokratiko, buot silingon, sa idalom sang paggahom (Griego, kraʹtos) sang Dios (the·osʹ). Ining duha ka tinaga mabasa sa 1 Pedro 5:10, 11. Ang inspirado nga rekord parte sa natabo sa Jerusalem sang nagligad nga halos 2,000 ka tuig maathag nga nagpakita nga ang kongregasyon sang hinaplas nga mga Cristiano gintukod sang Dios. (Binu. 2:1-47) Iya ini tinukod, iya panimalay. (1 Cor. 3:9; Efe. 2:19) Ang pag-organisar kag pagpanghikot nga ginpasad sang unang siglo ginsunod sang Cristianong kongregasyon karon.

⁵ Ang una nga kongregasyon nagsugod nga may mga 120 ka disipulo. Una nga ginpasagahay sa ila ang balaan nga espiritu, bilang katumanan sang Joel 2:28, 29. (Binu. 2:16-18) Apang sadto man nga adlaw, mga 3,000 pa ang ginbawtismuhan sa tubig kag ginpasulod sa kongregasyon sang mga ginpanganak sa espiritu. Ginbaton nila ang mensahe tuhoy sa Cristo kag “padayon sila nga nag-ukod sa pagtuon sang mga ginatudlo sang mga apostoles.” Pagkatapos sina, “padayon nga gindugang sa ila ni Jehova adlaw-adlaw ang mga tawo nga iya ginaluwas.”—Binu. 2:41, 42, 47.

⁶ Tuman kadasig ang pag-uswag sang kongregasyon sa Jerusalem amo nga ang mataas nga saserdote sang mga Judiyo nagreklamo nga ginpuno sang mga disipulo ang Jerusalem sang ila panudlo. Ang bag-o nga mga disipulo sa Jerusalem naglakip sa madamo nga Judiyo nga mga saserdote nga nangin bahin sang kongregasyon.—Binu. 5:27, 28; 6:7.

⁷ Si Jesus nagsiling: “Mangin saksi ko kamo sa Jerusalem, sa bug-os nga Judea kag Samaria, kag tubtob sa pinakamalayo nga bahin sang duta.” (Binu. 1:8) Kag amo gid ang natabo sang nag-utwas ang grabe nga paghingabot sa Jerusalem sa tapos sang kamatayon ni Esteban, gani ang mga disipulo nga nagapuyo didto naglinapta sa bug-os nga Judea kag Samaria. Apang bisan diin sila nagakadto, padayon nila nga ginabantala ang maayong balita kag nagahimo sing madamo nga disipulo, lakip na ang pila ka taga-Samaria. (Binu. 8:1-13) Sang ulihi pa gid, madinalag-on nga ginbantala ang maayong balita sa mga wala matuli, sa indi Judiyo nga mga pungsod. (Binu. 10:1-48) Bangod sini nga mga pagbantala, madamo ang nangin disipulo, kag nakatukod sing bag-o nga mga kongregasyon sa gua sang Jerusalem.—Binu. 11:19-21; 14:21-23.

⁸ Ano nga mga kahimusan ang ginhimo agod mapat-od nga ang tagsa ka bag-o nga natukod nga kongregasyon naorganisar kag nadumalahan suno sa paagi sang Dios, buot silingon sing teokratiko? Paagi sa pagpanghikot sang espiritu sang Dios, naghimo sing kahimusan para may kabulig nga mga manugbantay nga magaatipan sa panong. Sa mga kongregasyon nga ginduaw nanday Pablo kag Bernabe sa ila nahauna nga paglakbay subong mga misyonero, nagtangdo sila sing mga gulang. (Binu. 14:23) Ang manunulat sang Biblia nga si Lucas nagsugid parte sa pagpakigsapol ni Pablo sa mga gulang sa kongregasyon sang Efeso. Si Pablo nagsiling sa ila: “Bantayi ninyo ang inyo kaugalingon kag atipana ang bug-os nga panong, nga sa ila gintangdo kamo sang balaan nga espiritu subong mga manugtatap, agod bantayan ang kongregasyon sang Dios, nga ginbakal niya paagi sa dugo sang iya Anak.” (Binu. 20:17, 28) Nangin kalipikado sila nga mga gulang bangod nalab-ot nila ang mga kinahanglanon sa Kasulatan. (1 Tim. 3:1-7) Ang masigkamanugpangabudlay ni Pablo nga si Tito ginhatagan sing awtoridad nga magtangdo sing mga gulang sa mga kongregasyon sa Creta.—Tito 1:5.

⁹ Samtang nagadamo ang kongregasyon, ang mga apostoles kag mga gulang sa Jerusalem nagpadayon sa pag-alagad subong panguna nga mga manugtatap sa nangin internasyonal nga Cristianong kongregasyon sang unang siglo. Nag-alagad sila subong nagadumala nga hubon sini.

¹⁰ Sa sulat ni apostol Pablo sa kongregasyon sang Efeso, ginpaathag niya nga paagi sa pagpanghikot suno sa espiritu sang Dios, ang Cristianong kongregasyon magapabilin nga nahiusa paagi sa pagpasakop sa pagkaulo ni Jesucristo. Ginpalig-on sang apostol ang mga Cristiano didto nga palambuon ang pagkamapainubuson kag huptan ang ‘paghiusa nga nabaton nila paagi sa balaan nga espiritu’ sa mahidaiton nga pagpakig-upod sa tanan nga yara sa kongregasyon. (Efe. 4:1-6) Dayon ginkutlo niya ang Salmo 68:18 kag gin-aplikar ini sa aman ni Jehova nga kalipikado sa espirituwal nga mga lalaki nga nagaalagad sa kongregasyon subong mga apostoles, manalagna, ebanghelisador, manugbantay, kag manunudlo. Ini nga mga lalaki, subong mga dulot halin kay Jehova, magapabakod sang bug-os nga kongregasyon para mangin hamtong sa espirituwal kag kalahamut-an sa Dios.—Efe. 4:7-16.

ANG MGA KONGREGASYON KARON GIN-ORGANISAR PAREHO SANG UNANG SIGLO

¹¹ Sa karon, ang kaanggid nga pag-organisar ginasunod sang tanan nga kongregasyon sang mga Saksi ni Jehova. Subong grupo, nahiusa ang kongregasyon sa bug-os nga kalibutan, nga nasentro sa hubon sang mga hinaplas sang espiritu. (Zac. 8:23) Ginpaposible ini ni Jesucristo. Gintuman niya ang iya saad nga magaupod sia sa iya hinaplas nga mga disipulo “sa tanan nga tion tubtob sa hingapusan sang sistema sang mga butang.” Ang mga tawo nga gindala sa nagauswag nga kongregasyon nagbaton sang maayong balita sang Dios, nagdedikar sing bug-os tagipusuon kay Jehova, kag nagpabawtismo subong mga disipulo ni Jesus. (Mat. 28:19, 20; Mar. 1:14; Binu. 2:41) Ginkilala nila “ang maayo nga manugbantay,” si Jesucristo, subong Ulo sang bug-os nga panong, nga ginahuman sang hinaplas nga mga Cristiano kag sang “iban nga mga karnero.” (Juan 10:14, 16; Efe. 1:22, 23) Nagpabilin nga nahiusa ining “isa ka panong” paagi sa padayon nga pagkilala sa pagkaulo sang Cristo kag pagpasakop sa gintangdo sang Cristo nga palaagyan, “ang matutom kag mainandamon nga ulipon.” Kabay nga padayon naton nga saligan sing bug-os ining matutom nga ulipon.—Mat. 24:45.

PAGGAMIT SA RELIHIOSO NGA MGA KORPORASYON

¹² Agod maaman ang espirituwal nga pagkaon sa nagakaigo nga tion kag mabantala ang maayong balita sang Ginharian antes mag-abot ang katapusan, gintukod ang pila ka korporasyon. Ining legal nga mga korporasyon ginkilala sang mga kasuguan sang lainlain nga pungsod, kag nagakooperar ini sa isa kag isa. Nagabulig ini para mabantala ang maayong balita sa bilog nga duta.

PAG-ORGANISAR SANG SANGA

¹³ Sa tion nga matukod ang sanga talatapan, ginatangdo ang isa ka Komite sang Sanga nga ginatapuan sang tatlo ukon kapin pa ka gulang sa pag-atipan sang mga hilikuton sa pungsod ukon mga pungsod nga sakop sina nga sanga. Ang isa ka katapo sang komite nagaalagad subong koordenitor sang Komite sang Sanga.

¹⁴ Ang mga kongregasyon nga sakop sang tagsa ka sanga talatapan gin-organisar sa mga sirkito. Indi palareho ang kadakuon sang mga sirkito, depende sa lugar kag lenguahe subong man sa kadamuon sang kongregasyon sa lugar nga sakop sang sanga. Ginatangdo ang manugtatap sang sirkito para mag-alagad sa mga kongregasyon sa tagsa ka sirkito. Nagahatag ang sanga talatapan sang direksion kon paano himuon sang manugtatap sang sirkito ang iya mga responsibilidad.

¹⁵ Ginakilala sang mga kongregasyon ang mga kahimusan sang organisasyon nga ginbalay para makabenepisyo ang tanan. Ginabaton nila ang pagtangdo sa mga gulang, nga nagatatap sa hilikuton sa mga sanga, sirkito, kag mga kongregasyon. Nagasalig sila sa matutom kag mainandamon nga ulipon para sa espirituwal nga pagkaon sa nagakaigo nga tion. Ang matutom nga ulipon karon nagapasakop gid sa pagkaulo sang Cristo, nga nagasunod sa mga prinsipio sang Biblia, kag nagapagiya sa balaan nga espiritu. Samtang nagapanghikot kita tanan nga may paghiusa, mangin matuod sa aton ang naeksperiensiahan sang mga Cristiano sang unang siglo: “Padayon nga naglig-on sa pagtuo ang mga kongregasyon kag nagdugang ang ila kadamuon adlaw-adlaw.”—Binu. 16:5.