Si Abraham kag si Sara Nagtuman sa Dios

Malapit sa Babel ang siudad nga ginatawag nga Ur, kag ang mga tawo diri nagasimba sa madamo nga dios kag indi kay Jehova. Pero may tawo sa Ur nga si Jehova lang ang iya ginasimba. Sia si Abraham.

Ginsilingan ni Jehova si Abraham: ‘Bayai ang imo balay kag ang imo mga paryente, kag kadto ka sa duta nga ipakita ko sa imo.’ Dayon nagpromisa ang Dios: ‘Himuon ko ikaw nga daku nga pungsod, kag himuon ko ang maayo nga mga butang sa mga tawo sa bilog nga duta bangod sa imo.’

Wala nakahibalo si Abraham kon sa diin sila pakadtuon ni Jehova, pero nagsalig sia kay Jehova. Nagtuman si Abraham, ang iya asawa nga si Sara, ang iya tatay nga si Tera, kag ang iya hinablos nga si Lot, gani nanghimos sila sang ila mga gamit kag nagsugod sa ila malawig nga paglakat.

Si Abraham 75 anyos sang sia kag ang iya pamilya nag-abot sa duta nga gusto ipakita ni Jehova sa ila. Gintawag ini nga duta sang Canaan. Diri nakig-istorya ang Dios kay Abraham kag nagpromisa: ‘Ining duta nga nakita mo, ihatag ko ini sa imo mga kabataan.’ Pero tigulang na si Abraham kag si Sara kag wala sila sing bata. Gani, paano tumanon ni Jehova ang iya ginpromisa?