Ang Ulipon nga Nagtuman sa Dios

Si Jose isa sa mga bata ni Jacob. Nakita sang iya mga magulang nga paborito gid sang ila amay si Jose. Ano sa banta mo ang ginbatyag nila bangod sina? Nahisa sila kay Jose kag naakig sila sa iya. Sang ulihi, may mga damgo si Jose kag ginsugid niya ini sa iya mga magulang. Naghunahuna sila nga basi sa pila ka adlaw magayaub sila sa iya. Gani naakig na gid sila sa iya!

Isa ka adlaw, ang mga utod ni Jose nagabantay sing mga karnero malapit sa siudad sang Siquem. Ginpakadto didto ni Jacob si Jose para kamustahon sila. Sang nakita nila nga nagapalapit si Jose nagsiling sila sa isa kag isa: ‘Ari na ang paladamgo. Patyon naton sia!’ Gindakop nila sia kag ginhulog sa madalom nga bubon. Pero ang isa nila ka utod nga si Juda nagsiling: ‘Indi sia pagpatya! Ibaligya na lang naton sia bilang ulipon.’ Gani ginbaligya nila si Jose sing 20 ka bilog nga pilak sa Midianhon nga mga negosyante nga nagapakadto sa Egipto.

Dayon ginsawsaw sang mga utod ni Jose ang iya bayo sa dugo sang kanding, ginpadala ini sa ila tatay, kag nagsiling: ‘Indi bala bayo ini sang imo bata?’ Gani naghunahuna si Jacob nga ginpatay si Jose sang mabangis nga sapat. Grabe gid ang iya kasubo. Wala gid sing makapaumpaw sa iya.

Sa Egipto, ginbaligya si Jose bilang ulipon sa isa ka mataas nga opisyal nga si Potifar. Pero si Jehova nangin kaupod ni Jose. Nakita ni Potifar nga maayo gid mag-obra si Jose kag masaligan. Gani sang ulihi, si Jose ang ginsaligan ni Potifar sang tanan niya nga pagkabutang.

Nakita sang asawa ni Potifar nga guapo si Jose kag makusog. Adlaw-adlaw niya nga ginahagad si Jose nga maghulid sa iya. Ano ang himuon ni Jose? Wala sia nagpasugot nga nagasiling: ‘Indi ako! Sala ina. Ginasaligan ako sang akon agalon, kag asawa ka niya. Kon maghulid ako sa imo, makasala ako sa Dios!’

Isa ka adlaw, ginpilit sang asawa ni Potifar si Jose nga maghulid sa iya. Gin-uyatan niya ang bayo ni Jose, pero nagdalagan si Jose. Sang nagpauli si Potifar, ginsugid sa iya sang iya asawa nga ginlugos kuno sia ni Jose. Wala niya ginsugid ang matuod. Naakig gid si Potifar, gani ginpapriso niya si Jose. Pero wala malipatan ni Jehova si Jose.