Ang Nagakalayo nga Kahoykahoy

Nag-istar si Moises sa Midian sing 40 ka tuig. Didto sia nakapangasawa kag may mga kabataan sila. Isa ka adlaw samtang ginabantayan niya ang iya mga karnero sa Bukid Sinai, may nakita sia nga makatilingala. Nagakalayo ang tunukon nga kahoykahoy, pero wala nagakasunog! Sang ginpalapitan ini ni Moises para tan-awon kon ngaa, may nabatian sia nga tingog halin sa kahoykahoy nga nagasiling: ‘Moises! Indi ka magpalapit. Ubaha ang imo sandalyas kay balaan nga lugar ang imo ginatindugan.’ Si Jehova ang nagahambal sa iya paagi sa anghel.

Hinadlukan si Moises, gani gintabunan niya ang iya guya. Ang tingog nagsiling: ‘Nakita ko ang pag-antos sang mga Israelinhon. Luwason ko sila sa mga Egiptohanon kag dal-on sa maayo nga duta. Ikaw ang manguna sa akon katawhan paggua sa Egipto.’ Sa banta mo, nakibot bala sa sini si Moises?

Si Moises namangkot: ‘Ano ang isiling ko kon mamangkot ang katawhan kon sin-o ang nagpadala sa akon?’ Ang Dios nagsabat: ‘Hambala sila nga si Jehova, ang Dios ni Abraham, ang Dios ni Isaac, kag ang Dios ni Jacob ang nagpadala sa imo.’ Dayon nagsiling si Moises: ‘Paano kon indi mamati sa akon ang katawhan?’ Ginhatagan ni Jehova si Moises sing pamatuod nga buligan Niya sia. Ginsilingan niya si Moises nga ihaboy ang iya baston sa duta. Dayon nangin man-ug ang baston! Sang gin-uyatan ni Moises ang ikog sang man-ug, nangin baston ini liwat. Si Jehova nagsiling: ‘Kon ipakita mo ini nga tanda, magapamatuod ini nga ginpadala ko ikaw.’

Si Moises nagsiling: ‘Indi ako maayo maghambal.’ Nagpromisa si Jehova sa iya: ‘Tudluan ko ikaw sang imo isiling, kag paupdon ko ang imo utod nga si Aaron para magbulig sa imo.’ Bangod nahibaluan ni Moises nga kaupod niya si Jehova, gindala niya ang iya asawa kag kabataan pabalik sa Egipto.