Nagrebelde Sila kay Jehova

Sang ara na ang mga Israelinhon sa kamingawan, si Kora, si Datan, si Abiram, kag ang 250 ka lalaki nagrebelde kay Moises. Nagsiling sila kay Moises: ‘Sobra na kamo! Ngaa ikaw gid ang amon lider kag si Aaron ang mataas nga saserdote? Si Jehova ara sa tunga naton tanan, indi lang sa inyo ni Aaron.’ Wala nalipay si Jehova sa ila ginhimo. Para sa iya, isa ini ka pagrebelde sa iya!

Ginsilingan ni Moises si Kora kag ang mga nagasuporta sa iya: ‘Magkadto kamo sa tabernakulo buas, kag dal-a ninyo ang inyo mga incensario nga may mga incienso. Kay ipakita ni Jehova sa aton kon sin-o ang iya ginpili.’

Pagkadason nga adlaw, si Kora kag ang 250 ka lalaki nagkadto sa tabernakulo para makigkita kay Moises. Nagsunog sila sing mga incienso didto nga daw mga saserdote man sila. Si Jehova nagsiling kay Moises kag kay Aaron: ‘Magpalayo kamo kay Kora kag sa iya mga kaupod.’

Nagkadto si Kora kay Moises sa tabernakulo, pero si Datan, si Abiram, kag ang ila mga pamilya wala nagkadto. Ginsilingan ni Jehova ang mga Israelinhon nga magpalayo kanday Kora, Datan, kag Abiram. Nagpalayo dayon ang mga Israelinhon. Si Datan, si Abiram, kag ang ila mga pamilya nagtindog sa gua sang ila mga tolda. Gulpi lang nagnganga ang duta kag ginlamon sila! Sa tabernakulo, nanaug ang kalayo halin sa langit kag nagsunog kay Kora kag sa 250 ka lalaki nga nagdampig sa iya.

Dayon ginsilingan ni Jehova si Moises: ‘Magkuha ka sing sungkod halin sa lider sang kada tribo, kag isulat sa sini ang ngalan niya. Pero sa sungkod sang tribo ni Levi, isulat ang ngalan ni Aaron. Ibutang ini sa sulod sang tabernakulo, kag ang sungkod sang tawo nga akon pilion magapamulak.’

Pagkadason nga adlaw, gindala ni Moises ang tanan nga sungkod, ukon baston, sa gua kag ginpakita ini sa mga lider. Ang sungkod ni Aaron namulak kag namunga sing luto nga mga almendra. Paagi sini, ginpakita ni Jehova nga si Aaron ang iya ginpili nga mangin mataas nga saserdote.