Nakighambal si Jehova kay Samuel

Ang mataas nga saserdote nga si Eli may duha ka bata nga lalaki nga nagaalagad sa tabernakulo bilang mga saserdote. Ang ila ngalan amo si Hofni kag si Finehas. Wala nila ginasunod ang mga kasuguan ni Jehova, kag malain gid ang ila ginahimo sa mga tawo. Kon magdala ang mga Israelinhon sang mga halad para kay Jehova, ginakuha ni Hofni kag ni Finehas ang pinakamanami nga karne. Nabal-an ni Eli ang ginahimo sang iya mga bata, pero wala sia sing may ginhimo. Pasugtan ayhan ni Jehova nga magpadayon ini?

Bisan mas bata si Samuel sangsa kay Hofni kag kay Finehas, wala niya sila ginsunod. Nalipay si Jehova kay Samuel. Isa ka gab-i, sang nagahigda na si Samuel, may nagatawag sa iya ngalan. Nagbangon sia kag nagdalagan pakadto kay Eli, kag nagsiling: ‘Ari na ako!’ Pero nagsiling si Eli: ‘Wala ko ikaw gintawag. Maghigda ka liwat.’ Gani, naghigda liwat si Samuel. Dayon amo gihapon ang natabo. Sang nabatian ni Samuel ang tingog sa ikatlo nga tion, nabal-an ni Eli nga si Jehova ang nagatawag kay Samuel. Ginsilingan niya si Samuel nga kon mabatian niya liwat ang tingog, magsiling sia: ‘Maghambal ka Jehova. Ang imo alagad nagapamati.’

Naghigda liwat si Samuel. Dayon nabatian niya: ‘Samuel! Samuel!’ Nagsabat sia: “Maghambal ka, Ginuo ko, kay nagapamati ang imo alagad.” Si Jehova nagsiling sa iya: ‘Hambala si Eli nga silutan ko sia kag ang iya pamilya. Nahibaluan niya ang malain nga ginahimo sang iya mga bata sa tabernakulo, pero wala sia sing may ginhimo sa sini.’ Pagkaaga, ginbuksan ni Samuel ang puertahan sang tabernakulo, pareho sang pirme niya ginahimo. Nahadlok sia nga isugid sa mataas nga saserdote ang ginhambal ni Jehova. Pero gintawag sia ni Eli kag ginpamangkot: ‘Anak ko, ano ang ginsiling ni Jehova sa imo? Isugid ang tanan sa akon.’ Gani ginsugid ni Samuel ang tanan kay Eli.

Samtang nagadaku si Samuel, si Jehova padayon nga nagbulig sa iya. Sa bilog nga pungsod, ang tanan nga Israelinhon nakahibalo nga gintangdo ni Jehova si Samuel para mangin manalagna kag hukom.