Si David kag si Goliat

Si Jehova nagsiling kay Samuel: ‘Kadto ka sa balay ni Jesse. Isa sa iya mga bata amo ang masunod nga hari sang Israel.’ Gani, nagkadto si Samuel sa balay ni Jesse. Sang nakita niya ang subang nga bata, nagpensar sia: ‘Sigurado ako nga sia ang ginpili.’ Pero ginsilingan ni Jehova si Samuel nga indi sia ang ginpili. Si Jehova nagsiling: ‘Mahibaluan ko kon ano gid nga klase sang tawo ang isa, indi lang kon ano ang iya hitsura.’

Ginpaatubang ni Jesse ang anom pa niya ka bata nga lalaki kay Samuel. Pero si Samuel nagsiling: ‘Wala sing may ginpili si Jehova sa ila. May bata ka pa bala nga lalaki?’ Si Jesse nagsabat: ‘May isa pa, ang agot ko nga bata nga si David. Wala sia diri kay nagabantay sia sang amon mga karnero.’ Sang nagsulod si David, si Jehova nagsiling kay Samuel: “Amo na ina sia!” Ginbubuan ni Samuel sing lana ang ulo ni David, kag ginhaplasan sia para mangin masunod nga hari sang Israel.

Sang nakig-away ang mga Israelinhon sa mga Filistinhon, ang higante nga soldado nga si Goliat nagapakig-away para sa mga Filistinhon. Adlaw-adlaw niya nga ginapakanubo ang mga Israelinhon. Nagsinggit sia: ‘Magpili kamo sing tawo nga magapakig-away sa akon. Kon magdaug sia, mangin ulipon ninyo kami. Pero kon magdaug ako, mangin ulipon namon kamo.’

Nagkadto si David sa kampo sang mga Israelinhon para magdul-ong sing pagkaon sa iya mga magulang nga soldado. Nabatian niya si Goliat kag nagsiling: ‘Ako ang magapakig-away sa iya!’ Si Hari Saul nagsiling: ‘Pero, bata ka pa.’ Nagsabat si David: ‘Buligan ako ni Jehova.’

Ginpagamit ni Saul kay David ang iya mga gamit sa inaway, pero si David nagsiling: ‘Indi ako makapakig-away kon amo sini ang gamiton ko.’ Ginkuha ni David ang iya labyog kag nagkadto sa suba. Nangita sia sing lima ka mahining nga bato kag ginsulod ini sa iya suludlan. Dayon nagdalagan si David pakadto kay Goliat. Ang higante nagsinggit: ‘Palapit ka diri sa akon bata. Ipakaon ta ka sa mga pispis kag sa mabangis nga mga sapat.’ Wala nahadlok si David. Nagsinggit man sia: ‘Magapakig-away ka paagi sa imo espada kag bangkaw, pero magapakig-away ako sa ngalan ni Jehova. Wala ka nagapakig-away sa amon, kundi sa amon Dios. Makita sang tanan nga ari diri nga mas gamhanan si Jehova sangsa espada ukon bangkaw. Ihatag kamo tanan ni Jehova sa amon.’

Nagkuha si David sing isa ka bato sa iya suludlan kag ginbutang ini sa labyog kag ginlabyog ini sing tudotudo. Paagi sa bulig ni Jehova, ang bato nag-igo kag nagdulot sa agtang ni Goliat. Natumba ang higante kag napatay. Gani nagpinalagyo ang mga Filistinhon. Nagasalig ka man bala kay Jehova, pareho kay David?