Ginbuligan ni Jehova si Jehosapat

Ginpangguba ni Jehosapat, nga hari sang Juda, ang mga halaran para kay Baal kag ang mga diosdios sa pungsod. Gusto niya nga mahibaluan sang katawhan ang mga kasuguan ni Jehova. Gani nagpadala sia sing mga pangulo kag mga Levinhon sa bilog nga Juda para itudlo sa katawhan ang mga kasuguan ni Jehova.

Ang mga pungsod nga malapit sa Juda nahadlok magsalakay sa ila kay nakahibalo sila nga si Jehova nagabulig sa iya katawhan. Naghatag pa gani sila sing mga regalo kay Hari Jehosapat. Pero ginsalakay sang mga Moabnon, Ammonhon, kag sang mga naghalin sa Seir ang Juda. Nahibaluan ni Jehosapat nga kinahanglan niya ang bulig ni Jehova. Ginpatipon niya ang tanan nga lalaki, babayi, kag kabataan sa Jerusalem. Dayon nangamuyo sia sa atubangan nila: ‘Jehova, kon indi mo kami pagbuligan, indi gid kami magdaug. Palihug sugiri kami kon ano ang amon himuon.’

Ginsabat ni Jehova ini nga pangamuyo: ‘Indi kamo mahadlok. Buligan ko kamo. Magtindog kamo sa inyo puesto, magpahimunong kamo, kag tan-awa ninyo kon paano ko kamo luwason.’ Paano sila ginluwas ni Jehova?

Pagkaaga, nagpili si Jehosapat sang mga manug-amba kag ginsilingan nga maglakat sa atubangan sang mga soldado. Naglakat sila halin sa Jerusalem pakadto sa Tekoa, diin sila makig-away.

Samtang ang mga manug-amba nagadayaw kay Jehova sing malipayon kag sa matunog nga tingog, si Jehova nagpakig-away para sa iya katawhan. Ginpasalasala niya ang mga Ammonhon kag ang mga Moabnon gani nagpinatyanay sila, kag wala sing bisan isa nga nakaluwas sa ila. Pero ginproteksionan ni Jehova ang katawhan sang Juda, ang mga soldado, kag ang mga saserdote. Nabatian sang tanan nga katawhan sa katupad nga mga pungsod ang ginhimo ni Jehova, kag nahibaluan nila nga ginabuligan gihapon ni Jehova ang iya katawhan. Paano ginluwas ni Jehova ang iya katawhan? Sa madamo nga paagi. Indi niya kinahanglan ang bulig sang tawo para himuon ini.