Ang Kaisog ni Jehoiada

Si Jezebel may bata nga babayi nga si Atalia, nga malain gid pareho sa iya. Si Atalia nangin asawa sang hari sang Juda. Sang napatay ang iya bana, nangin hari ang iya bata nga lalaki. Pero sang napatay ang iya bata, gin-agaw ni Atalia ang paggahom sa Juda. Dayon gintinguhaan niya nga patyon ang bisan sin-o nga puede maggahom bilang hari, bisan ang iya mga apo. Nahadlok gid ang tanan sa iya.

Ang mataas nga saserdote nga si Jehoiada kag ang iya asawa nga si Jehoseba nakahibalo nga malain gid ang ginahimo ni Atalia. Bisan pa mahimo sila patyon, gintago nila ang isa ka apo ni Atalia, ang bata nga si Jehoas. Ginpadaku nila sia sa templo.

Sang pito ka tuig si Jehoas, gintipon ni Jehoiada ang tanan nga pangulo kag Levinhon kag ginsilingan sila: ‘Bantayi ninyo ang mga puertahan sang templo, kag indi ninyo pagpasudla ang bisan sin-o.’ Dayon ginhimo ni Jehoiada si Jehoas nga hari sang Juda kag ginbutang ang korona sa iya ulo. Ang mga tawo sa Juda nagsinggit: “Mabuhi ang hari!”

Nabatian ni Rayna Atalia ang singgit sang mga tawo gani dalidali sia nga nagkadto sa templo. Sang nakita niya ang bag-o nga hari, nagsinggit sia: ‘Mga traidor! Mga traidor!’ Dayon gindakop sang mga pangulo ang malain nga rayna, gindala palayo, kag ginpatay. Pero ano ang natabo sa malain niya nga impluwensia sa pungsod?

Ginbuligan ni Jehoiada ang pungsod nga makigkatipan kay Jehova. Nagpromisa sila nga si Jehova lamang ang ila simbahon. Ginpaguba ni Jehoiada ang templo ni Baal kag gindugmok ang mga diosdios. Ginsugo niya ang mga saserdote kag mga Levinhon nga magbalik sa templo para makasimba liwat ang mga tawo didto. May mga ginpabantay sia sa templo para wala sing indi matinlo nga makasulod. Dayon gindala ni Jehoiada kag sang mga pangulo si Jehoas sa palasyo kag ginpapungko sia sa trono. Nagkalipay ang mga tawo sa Juda. Maalagad na nila si Jehova, kag nahilway na sila sa malain nga si Atalia kag sa pagsimba kay Baal. Nakita mo bala kon paano ang kaisog ni Jehoiada nakabulig sa madamo nga tawo?