Ginsugo ni Jehova si Jeremias nga Magbantala

Ginpili ni Jehova si Jeremias nga mangin manalagna sang katawhan sang Juda. Ginsugo niya sia nga magbantala sa katawhan kag hambalon sila nga dapat nila untatan ang paghimo sing malain. Si Jeremias nagsiling: ‘Pero Jehova, bata pa ako. Indi ako kabalo kon ano ang ihambal ko sa mga tawo.’ Si Jehova nagsiling sa iya: ‘Indi ka mahadlok. Tudluan ko ikaw kon ano ang ihambal mo. Buligan ko ikaw.’

Ginsilingan ni Jehova si Jeremias nga tipunon ang mga gulang sang katawhan, buk-on ang tibod sa atubangan nila, kag magsiling: ‘Buk-on man ang Jerusalem pareho sini.’ Sang ginhimo ni Jeremias ang ginsiling ni Jehova, naakig gid ang mga gulang. Ginbakol sang saserdote nga si Pasur si Jeremias kag gingapos ang iya mga tiil kag kamot paagi sa kahoy. Bilog nga gab-i nga indi makahulag si Jeremias. Ginbuy-an sia ni Pasur pagkaaga. Si Jeremias nagsiling: ‘Indi na gid ako makaagwanta. Untatan ko na ang pagbantala.’ Pero nag-untat gid man bala sia? Wala. Sang ginpamensaran ini sing maayo ni Jeremias, sia nagsiling: ‘Ang mensahe ni Jehova daw pareho sa kalayo sa sulod ko. Indi ko mauntatan ang pagbantala.’ Padayon nga ginpaandaman ni Jeremias ang mga tawo.

Pagligad sang mga tinuig, may bag-o naman nga hari sa Juda. Akig gid ang mga saserdote kag butig nga mga manalagna sa mensahe ni Jeremias. Ginsilingan nila ang mga prinsipe: ‘Dapat patyon ini nga tawo.’ Si Jeremias nagsiling: ‘Kon patyon ninyo ako, inosente nga tawo ang mapatay ninyo. Ginasugid ko ang mga pulong ni Jehova, indi ang akon.’ Sang nabatian ini sang mga prinsipe, nagsiling sila: ‘Ini nga tawo indi dapat pagpatyon.’

Padayon nga nagbantala si Jeremias kag naakig gid ang mga prinsipe. Ginsilingan nila ang hari nga ipapatay si Jeremias. Ang hari nagsiling nga puede nila himuon kay Jeremias ang tanan nila nga gusto himuon sa iya. Gindakop nila si Jeremias kag ginhulog sa madalom kag lunangon nga bubon, kag ginapaabot nila nga mapatay na sia didto. Amat-amat nga naglubong si Jeremias sa lunang.

Dayon ang opisyal sang palasyo nga si Ebed-melec nagsiling sa hari: ‘Ginhulog sang mga prinsipe si Jeremias sa bubon! Kon pabay-an naton sia didto, mapatay sia.’ Ginsugo sang hari si Ebed-melec nga updon ang 30 ka lalaki para batakon si Jeremias sa bubon. Ilugon man bala naton si Jeremias, nga wala sing makapauntat sa iya sa pagbantala?