Ang mga Pader sang Jerusalem

Balikan naton ang nagligad nga pila ka tuig. Si Nehemias, nga alagad ni Hari Artajerjes, isa ka Israelinhon nga nagaistar sa Susan nga siudad sang Persia. Ang utod ni Nehemias halin sa Juda nag-abot nga may malain nga balita: ‘Delikado ang kabuhi sang mga tawo nga nagbalik sa Jerusalem. Ang mga pader kag mga geyt sang siudad nga ginguba sang mga Babilonianhon wala pa nakay-o.’ Naglalain si Nehemias. Gusto niya magkadto sa Jerusalem para magbulig, gani nangamuyo sia nga kuntani pasugtan sia sang hari nga maglakat.

Sang ulihi, nakita sang hari nga masinulub-on si Nehemias. Nagsiling sia: ‘Wala ko pa ikaw nakita nga amo sini. Ano ang natabo?’ Si Nehemias nagsabat: ‘Masinulub-on ako bangod ang akon siudad, ang Jerusalem, guba gihapon.’ Namangkot ang hari: ‘Ano ang gusto mo nga himuon ko para sa imo?’ Hipos dayon nga nangamuyo si Nehemias. Dayon nagsabat sia: ‘Palihug, pasugti ako nga magkadto sa Jerusalem para patindugon liwat ang mga pader.’ Nagsiling si Hari Artajerjes kay Nehemias nga puede sia makalakat, kag ginsigurado sang hari nga wala sing malain nga matabo sa iya malawig nga paglakbay. Ginhimo man niya si Nehemias nga gobernador sang Juda kag ginhatagan sia sing kahoy para sa mga geyt sang siudad.

Sang nag-abot si Nehemias sa Jerusalem, gintan-aw niya ang mga pader sang siudad. Dayon gintipon niya ang mga saserdote kag mga manuggahom kag ginsilingan sila: ‘Makaluluoy ang aton kahimtangan. Kinahanglan naton ini obrahon.’ Nagsugot ang katawhan, kag ginsugdan nila ang pagkay-o sang mga pader.

Pero ang pila ka kaaway sang mga Israelinhon naghikay sa ila kag nagsiling: ‘Marumpag sang ido nga talunon ang pader nga inyo ginatukod.’ Wala ginsapak sang mga nagaobra ang ila pagpang-insulto kag padayon sila nga nagtrabaho. Gani nagtaas kag nagbakod pa gid ang pader.

Nagdesisyon ang mga kaaway nga salakayon sing hinali ang Jerusalem halin sa lainlain nga direksion para indi sila makapreparar. Sang nabatian sang mga Judiyo ang ila plano, hinadlukan sila. Pero si Nehemias nagsiling: ‘Indi kamo magkahadlok. Si Jehova magabulig sa aton.’ Nagbutang sia sing mga guardia nga magaamlig sa mga nagaobra, gani wala sila masalakay sang mga kaaway.

Sa sulod lamang sang 52 ka adlaw, natapos ang mga pader kag ang mga geyt. Dayon, ginpatawag ni Nehemias ang tanan nga Levinhon kag ginpakadto sa Jerusalem para iselebrar ini. Gintunga niya sila sa duha ka grupo sang mga manug-amba. Nagsaka sila sa pader nga nagaagi sa mga hagdanan sa Gawang sang Tuburan dayon nagbulagay sila kag nagmartsa sa magtimbang nga direksion palibot sa siudad. Nagpatunog sila sing mga trumpeta, mga simbal, kag mga arpa kag nagkanta para kay Jehova. Nag-upod si Esdras sa isa ka grupo, kag sa pihak nga grupo si Nehemias, asta nga nagtabuay sila sa templo. Ang tanan nga katawhan—mga lalaki, mga babayi, kag mga kabataan—naghalad kay Jehova kag nagkasadya. Ang ila malipayon nga mga tingog mabatian asta sa malayo.