Ginpakaon ni Jesus ang Linibo ka Tawo

Antes sang Paskua sang tuig 32 C.E., nagpauli ang mga apostoles halin sa ila pagbantala sa lainlain nga lugar. Kapoy sila, gani ginpasakay sila ni Jesus sa sakayan pakadto sa Betsaida para makapahuway didto. Pero sang malapit na magdungka ang sakayan, nakita ni Jesus nga linibo ka tawo ang nagsunod sa ila didto. Bisan gusto kuntani ni Jesus nga silahanon lang sang iya mga apostoles, gin-abiabi gihapon niya ang mga tawo. Gin-ayo niya ang mga masakiton kag gintudluan sila. Bilog nga adlaw sila nga gintudluan ni Jesus parte sa Ginharian sang Dios. Sang nagadulom na, ang iya mga apostoles nagpalapit sa iya kag nagsiling: ‘Gutom gid ang mga tawo. Palakta sila para makapangita sila sang pagkaon.’

Si Jesus nagsiling: ‘Indi na kinahanglan nga maglakat sila. Hatagi ninyo sila sing makaon.’ Ang mga apostoles namangkot: ‘Gusto mo bala nga maglakat kami para magbakal sing tinapay para sa ila?’ Si Felipe, nga isa sa mga apostoles, nagsiling: ‘Bisan madamo kita sing kuarta, indi naton masarangan magbakal sing tinapay para sa sini nga mga tawo.’

Si Jesus namangkot: ‘Daw ano kadamo ang aton pagkaon?’ Si Andres nagsabat: ‘May lima kita ka tinapay kag duha ka gamay nga isda. Indi gid ina makaigo.’ Si Jesus nagsiling: ‘Dal-a ninyo sa akon ang tinapay kag ang isda.’ Ginsilingan niya ang mga tawo nga magpungko sa hilamon kag maggrupo sing tig-50 kag tig-100. Ginkuha ni Jesus ang tinapay kag isda, nagtangla sa langit, kag nangamuyo. Dayon ginhatag niya ang pagkaon sa mga apostoles, kag ginpanagtag nila ini sa mga tawo. Ang tanan nga 5,000 ka lalaki kag mga babayi kag mga kabataan nakakaon kag nabusog. Dayon, gintipon sang mga apostoles ang sobra para wala sing mauyang. Dose pa ka buta nga basket ang nabilin! Makatilingala gid ini nga milagro, indi bala?

Nagdayaw gid ang mga tawo amo nga gusto nila himuon si Jesus nga ila hari. Pero nahibaluan ni Jesus nga indi pa ini ang tion nga himuon sia ni Jehova nga hari. Gani ginpalakat niya ang mga tawo kag ginsilingan ang iya mga apostoles nga magkadto sa tabok sang Dagat sang Galilea. Nagsakay sila sa ila sakayan, pero si Jesus nagtaklad sa bukid nga sia lang isa. Ngaa? Kay gusto niya nga may tion sia sa pagpangamuyo sa iya Amay. Bisan ano pa kasako si Jesus, may tion gid sia pirme sa pagpangamuyo.