KAPITULO 11
Pagkatapos sang Kasal
“Ang gugma wala sing katapusan.”—1 CORINTO 13:8.
1, 2. Kon may mga kabudlayan, buot bala silingon nga napaslawan ang pag-asawahay? Ipaathag.
ANG pag-asawahay isa ka regalo halin kay Jehova. Puede mangin mas malipayon ang kabuhi sang tawo bangod sini. Pero, ang kada pag-asawahay may mga problema gid. Kon kaisa ang mga problema daw wala sing katapusan, kag ang magtiayon mahimo magbatyag nga indi na sila pareho kasuod sang una.
2 Indi kita dapat matingala nga kon kaisa ang aton pag-asawahay may mga kabudlayan. Kon may mga kabudlayan, indi buot silingon nga napaslawan ang aton pag-asawahay. Bisan ang magtiayon nga nakaeksperiensia sang serioso nga mga problema nakakita sang mga paagi para mabalik ang ila maayo nga kaangtanan kag mapabakod ang ila pag-asawahay. Paano?
MAKIGSUOD SA DIOS KAG SA IMO TIAYON
3, 4. Ano kon kaisa ang nagakatabo sa pag-asawahay?
3 Ang pag-asawahay nagatingob sang duha ka tawo nga lainlain ang gusto kag indi gusto, mga ideya, kag pamaagi sa paghimo sang mga butang. Ang magtiayon mahimo lainlain man ang gindak-an kag kultura. Kinahanglan sang tion kag pagpanikasog para makilala kag mahangpan sing maayo sang magtiayon ang isa kag isa.
4 Pagligad sang tion, mahimo nga unahon sang kada tiayon ang iya personal nga mga ginakabalak-an kag mangin rason ini sang ila paglayuay sing buot. Daw wala sila sing labot sa isa kag isa. Ano ang makabulig sa ila nga magsuod?
Ang laygay sang Biblia importante para sa maayo nga pag-asawahay
5. (a) Ano ang makabulig sa isa ka Cristiano nga magsuod sa iya tiayon? (b) Base sa Hebreo 13:4, paano naton dapat tamdon ang pag-asawahay?
5 Naghatag si Jehova sang pinakamaayo nga laygay nga makabulig sa inyo nga magsuod sa iya kag sa isa kag isa. (Salmo 25:4; Isaias 48:17, 18) Nagsiling sia sa aton: “Dapat padunggan sang tanan ang pag-asawahay.” (Hebreo 13:4) Kon ginapadunggan naton ang isa ka butang, ginatamod naton ini nga hamili kag bilidhon. Ginaamligan mo ini kag wala ginapabay-an. Amo sini ang luyag ni Jehova nga pagtamod naton sa pag-asawahay.
ANG GUGMA KAY JEHOVA MAKABULIG SA INYO PAG-ASAWAHAY
6. Ano ang matun-an naton sa Mateo 19:4-6 parte sa pagtamod ni Jehova sa pag-asawahay?
6 Si Jehova ang nagkasal sa una nga mag-asawa. Ang iya Anak nga si Jesus nagsiling: “Wala bala ninyo mabasahi nga sa ginsuguran gintuga niya sila nga lalaki kag babayi kag nagsiling: ‘Bangod sini bayaan sang lalaki ang iya amay kag ang iya iloy kag magahiusa sa iya asawa, kag sila nga duha mangin isa ka unod’? Gani indi na sila duha, kundi isa ka unod. Gani, ang gintingob sang Dios, indi pagbulagon sang tawo.” (Mateo 19:4-6) Halin sa ginsuguran, gintuyo ni Jehova nga mangin permanente ang pag-asawahay. Luyag niya nga ang pamilya mangin suod, malipayon, kag magkaupod.
7. Paano mapabakod sang magtiayon ang ila pag-asawahay?
7 Pero nagadamo ang ginahalinan sang stress kag kabudlayan sang mga magtiayon subong. Kon kaisa bangod sang tuman nga kabudlayan, nagahunahuna ang magtiayon nga mas maayo pa nga magbulagay na lang sila. Mapabakod ang aton pag-asawahay kon mahangpan naton ang pagtamod ni Jehova.—1 Juan 5:3.
8, 9. (a) Bisan pa mabudlay, ngaa dapat sundon ang panuytoy ni Jehova sa pag-asawahay? (b) Paano naton mapakita nga ang aton pag-asawahay hamili sa aton?
8 Ang panuytoy ni Jehova para gid sa aton kaayuhan. Subong sang nahibaluan na naton, ginalaygayan niya kita: “Dapat padunggan sang tanan ang pag-asawahay.” (Hebreo 13:4; Manugwali 5:4) Kon sundon naton ang panuytoy ni Jehova bisan pa mabudlay, makabenepisyo gid kita.—1 Tesalonica 1:3; Hebreo 6:10.
9 Bangod ang aton pag-asawahay importante sa aton, indi naton luyag nga maghimo ukon maghambal sang bisan ano nga makaguba sa sini. Sa baylo, luyag naton nga magbakod ang aton kaangtanan sa aton tiayon. Paano naton ini himuon?
PADUNGGI ANG INYO PAG-ASAWAHAY PAAGI SA IMO GINAHAMBAL KAG GINAHIMO
10, 11. (a) Ano nga serioso nga problema ang nagakatabo sa pila ka magtiayon? (b) Ngaa importante ang paagi sang aton paghambal sa aton tiayon?
10 Madamo sing paagi nga masakit sang isa ang iya tiayon. Nahibaluan naton nga indi dapat pagsakiton sang mga Cristiano ang ila tiayon ukon maghimo sang bisan ano nga makahalit sa ila sa pisikal. Pero mahimo naton masakit ang aton tiayon sa aton ginahambal. Makasakit ang mga tinaga. Ang isa ka babayi nagsiling: “Masakit maghambal ang akon bana. Wala ako tuod sing lagob, pero ang iya masakit nga mga tinaga, pareho sang ‘Pabug-at ka lang sa akon!’ kag ‘Wala ka sing pulos!’ nagpilas sang akon tagipusuon.” Ang isa ka bana nagsiling nga pirme sia ginapakanubo kag ginainsulto sang iya asawa. Nagsiling sia: “Indi ko maistorya sa iban ang ginapanghambal niya sa akon. Para indi ko sia maistorya, nagapagab-i na lang ako sa ulubrahan. Mas maayo ini sangsa magpauli sa balay.” Ang masakit nga hambal pareho sang paghambal sing maparas kag indi maayo, kinaandan na lang subong.
11 Kon ang magtiayon maparas maghambal sa isa kag isa, nagaresulta ini sa pilas sa balatyagon nga madugay mag-ayo. Maathag nga indi amo sina ang luyag ni Jehova. Pero posible nga masakit mo ang balatyagon sang imo tiayon nga wala mo mahibaluan. Ayhan para sa imo indi ka maparas maghambal, pero amo bala sina ang iya ginabatyag? Kon indi, handa ka bala nga magbag-o?—Galacia 5:15; basaha ang Efeso 4:31.
12. Kon ang isa minyo, ano ang makaapekto sa iya kaangtanan kay Jehova?
12 Ang paagi sang imo paghambal sa imo tiayon, sa publiko man ukon pribado, importante kay Jehova. (Basaha ang 1 Pedro 3:7.) Ang Santiago 1:26 nagapahanumdom sa aton: “Kon ang bisan sin-o nagahunahuna nga sia sumilimba sang Dios, apang wala nagarenda sang iya dila, ginadaya niya ang iya tagipusuon, kag ang iya pagsimba wala sing pulos.”
13. Ano ang iban pa nga paagi nga masakit sang isa ang balatyagon sang iya tiayon?
13 May iban pa nga paagi nga masakit sang isa ang balatyagon sang iya tiayon. Halimbawa, ano ang batyagon sang imo tiayon kon nagahatag ka sang daku nga tion sa iban? Bisan pa may maayo ka nga rason, pareho sang pag-upod sa ministeryo ukon pagbulig sa mga kauturan, masakitan bala ang imo tiayon? Ang isa ka Cristiano nga asawa nagsiling: “Nasakitan gid ako nga ang akon bana nagahatag sang daku nga tion kag atension sa isa ka utod nga babayi sa kongregasyon. Naganubo ang panan-aw ko sa akon kaugalingon.”
14. (a) Ano ang matun-an naton sa Genesis 2:24? (b) Ano ang dapat naton ipamangkot sa aton kaugalingon?
14 Bilang mga Cristiano, may responsibilidad kita sa aton mga ginikanan kag kauturan sa kongregasyon. Pero kon minyo na kita, ang aton panguna nga responsibilidad amo ang aton tiayon. Si Jehova nagsiling nga ang bana ‘magahiusa sa iya asawa.’ (Genesis 2:24) Dapat pabaloran gid naton ang balatyagon sang aton tiayon. Pamangkuta ang imo kaugalingon: ‘Ginahatagan ko bala ang akon tiayon sang tion, atension, kag pagpalangga nga kinahanglan niya kag nagakadapat sa iya?’
15. Ngaa ang minyo nga mga Cristiano indi dapat tama ka suod sa indi niya tiayon?
15 Kon tama kita ka suod sa indi naton tiayon, magapabudlay ini sa aton pag-asawahay. Puede mahulog ang aton buot, kag sa ulihi ang aton balatyagon sa sina nga tawo. (Mateo 5:28) Posible nga magbaskog ina nga balatyagon kag magresulta sa paghimo sing butang nga indi makapadungog sa pag-asawahay.
“ANG BANA KAG ASAWA DAPAT MANGIN MATUTOM SA ISA KAG ISA”
16. Ano ang sugo sang Biblia parte sa pag-asawahay?
16 Pagkatapos mahambal sang Biblia: “Dapat padunggan . . . ang pag-asawahay,” nagsiling ini: “Ang bana kag asawa dapat mangin matutom sa isa kag isa, kay hukman sang Dios ang mga nagahimo sang seksuwal nga imoralidad kag ang mga makihilahion.” (Hebreo 13:4; Hulubaton 5:18) Paano naton tahuron ang pag-asawahay kag malikawan nga indi ini mapadunggan?
17. (a) Paano ginatamod sang pila ka tawo subong ang pagpakighilahi? (b) Paano dapat tamdon sang mga Cristiano ang pagpakighilahi?
17 May pila ka tawo subong nga nagahunahuna nga wala sing malain kon indi sila matutom sa ila tiayon. Indi kita dapat maimpluwensiahan sina nga panimuot. Maathag nga ginadumtan ni Jehova ang seksuwal nga imoralidad kag pagpakighilahi. (Basaha ang Roma 12:9; Hebreo 10:31; 12:29) Kon makigsekso kita sa indi naton tiayon, indi naton mapadunggan ang pag-asawahay. Ginapakita naton nga wala naton ginatahod ang mga talaksan ni Jehova, kag ginaguba naton ang aton kaangtanan sa iya. Gani dapat indi naton paghimuon ang una nga tikang padulong sa pagpakighilahi. Nagalakip ini sang indi nagakaigo nga panghunahuna sa indi naton tiayon.—Job 31:1.
18. (a) Ngaa ang pagpakighilahi pareho sa pagsimba sa butig nga mga dios? (b) Paano ginatamod ni Jehova ang pagpakighilahi?
18 Sa Israel sadto sa Kasuguan ni Moises, ang pagpakighilahi tuman ka serioso nga sala, pareho ka serioso sa pagsimba sa butig nga mga dios. Ang silot sa sini nga mga sala amo ang kamatayon. (Levitico 20:2, 10) Paano ang pagpakighilahi pareho sa pagsimba sa butig nga mga dios? Kon ang isa ka Israelinhon magsimba sa butig nga mga dios, wala niya gintuman ang iya saad nga mangin matutom kay Jehova. Kon magpakighilahi sia, wala niya gintuman ang iya saad nga mangin matutom sa iya tiayon. (Exodo 19:5, 6; Deuteronomio 5:9; basaha ang Malaquias 2:14.) Maathag nga sang una, ginatamod ni Jehova ang pagpakighilahi nga tuman ka serioso nga sala.
19. Ano ang makabulig sa aton nga mangin determinado nga indi gid magpanghilahi?
19 Kamusta subong? Bisan wala na kita sa idalom sang Kasuguan ni Moises, wala magbag-o ang pagtamod ni Jehova sa pagpakighilahi. Sigurado nga indi gid kita magsimba sa butig nga dios, gani dapat mangin matutom gid kita sa aton tiayon. (Salmo 51:1, 4; Colosas 3:5) Kay kon indi kita matutom sa aton tiayon, indi naton mapadunggan ang aton pag-asawahay kag ang aton Dios, si Jehova.—Tan-awa ang Endnote 26.
KON PAANO PABAKURON ANG INYO PAG-ASAWAHAY
20. Paano ang kaalam makabulig sa pag-asawahay?
20 Paano mo pabakuron ang inyo pag-asawahay? Ang Pulong sang Dios nagsiling: “Paagi sa kaalam ginapatindog ang balay, kag paagi sa paghangop ginapabakod ini.” (Hulubaton 24:3) Ang pag-asawahay daw pareho sang balay, puede nga may seguridad kag komportable kag puede man nga wala. Ginasiguro sang maalamon nga tawo nga may seguridad kag makalilipay ang iya pag-asawahay.
21. Paano mapabakod sang ihibalo ang pag-asawahay?
21 Parte sa sina nga balay, ang Biblia nagpadayon: “Paagi sa ihibalo ang mga hulot sini ginapuno sang tanan nga sahi sang bilidhon kag matahom nga mga butang.” (Hulubaton 24:4) Ang natun-an mo sa Pulong sang Dios makabulig nga mangin mas maayo ang inyo pag-asawahay. (Roma 12:2; Filipos 1:9) Kon nagabasa kamo nga magtiayon sang Biblia kag sang aton mga publikasyon, binagbinaga kon paano ninyo maaplikar ang inyo natun-an. Mangita sang paagi para mapakita ang gugma kag pagtahod sa isa kag isa, lakip ang kaayo kag pag-ulikid. Pangabaya si Jehova nga buligan ka nga palambuon ang mga kinaiya nga magapabakod sa inyo pag-asawahay kag para palanggaon ka pa gid sang imo tiayon.—Hulubaton 15:16, 17; 1 Pedro 1:7.
Mangamuyo kay Jehova sa tion sang pangpamilya nga pagsimba
22. Ngaa dapat naton ipakita ang gugma, pagtahod, kag pagpadungog sa aton tiayon?
22 Dapat naton himuon ang tanan para mapakita ang gugma, pagtahod, kag pagpadungog sa aton tiayon. Bilang resulta, ang aton pag-asawahay mangin mas malipayon kag mas mabakod. Kag labaw sa tanan, mapahalipay naton si Jehova.—Salmo 147:11; Roma 12:10.