TULUN-AN 15

Pagpabutyag nga may Kombiksion

1 Tesalonica 1:5

KON ANO ANG HIMUON: Ipakita nga nagapati ka gid nga ang imo ginahambal matuod kag importante.

Maghanda sing maayo. Hangpa sing maayo ang panguna nga mga ideya kag kon paano ini ginapamatud-an sang Biblia. Ipabutyag ang panguna nga mga punto sang imo presentasyon sa malip-ot kag simple nga mga tinaga. Magpokus kon paano ini makabulig sa imo mga tagpalamati. Mangamuyo nga hatagan ka sang balaan nga espiritu.

Praktisa sing matunog ang imo presentasyon para ang mga ideya mangin maathag sa imo hunahuna kag mapauswag ang imo pagpresentar sang bahin.
Maggamit sang mga tinaga nga nagapabutyag sang kombiksion. Gamita ang imo kaugalingon nga mga tinaga sa baylo nga suliton ang mga tinaga nga yara sa materyal. Gamita ang mga tinaga nga nagapakita nga sigurado ka sa imo ginahambal.
Ipakita nga kumbinsido ka kag sinsero. Maghambal sa nagakaigo nga kabaskugon. Kon wala man lang sing malain, tuluka sa mata ang imo mga tagpalamati.

Dumduma nga ang pagpakita sang kombiksion lain sangsa paghambal nga wala nagahalong, pagbatyag nga ikaw lang ang husto, ukon pagpamilit. Bisan pa nagahambal nga may kombiksion dapat himuon gihapon ini sa mahigugmaon nga paagi.