Paano ang Aton Pagsimba Makapalipay sa Dios?

Natun-an naton sang nagligad nga indi tanan nga relihion nagapalipay sa Dios. Pero puede naton masimba ang aton Manunuga sa paagi nga malipay sia. Ano nga “porma sang pagsimba [ukon, relihion]” ang nagapalipay sa iya? (Santiago 1:27, footnote) Binagbinaga kon ano ang ginatudlo sang Biblia.

1. Sa diin dapat nabase ang aton pagsimba?

Ang aton pagsimba dapat nabase sa Biblia. Si Jesus nagsiling sa Dios: “Ang imo pulong kamatuoran.” (Juan 17:17) Ginabalewala sang iban nga relihion ang kamatuoran nga makita sa Pulong sang Dios, ang Biblia. Gin-islan nila ini sang mga panudlo kag tradisyon sang mga tawo. Wala gid nalipay si Jehova sa mga ‘nagasikway sa mga sugo sang Dios.’ (Basaha ang Marcos 7:9.) Pero mapalipay naton sia, kon ginabase naton ang aton pagsimba sa Biblia kag ginasunod ang laygay sini.

2. Paano naton dapat simbahon si Jehova?

Si Jehova ang aton Manunuga, gani sia lang ang aton simbahon. (Bugna 4:11) Dapat palangga naton sia kag indi kita maggamit sang bisan ano nga imahen ukon santos sa pagsimba sa iya.—Basaha ang Isaias 42:8.

Dapat ang aton pagsimba “balaan kag kalahamut-an” kay Jehova. (Roma 12:1) Buot silingon, sundon naton ang iya mga sugo. Halimbawa, ginapabaloran kag ginasunod sang mga nagapalangga kay Jehova ang iya mga sugo sa pag-asawahay. Kag wala sila nagahimo sing makahalalit nga mga bisyo pareho sang pagpanigarilyo, pagdroga, ukon pagpahubog.a

3. Ngaa dapat naton simbahon si Jehova upod sa iban nga nagasimba man sa iya?

Sa mga miting kada semana ‘madayaw naton si Jehova sa katilingban,’ ukon sa kongregasyon. (Salmo 111:1, 2) Ang isa ka paagi nga mahimo naton ini amo ang pagkanta para dayawon ang Dios. (Basaha ang Salmo 104:33.) Gusto ni Jehova nga magtambong kita sa mga miting kay palangga niya kita kag kabalo sia nga makabulig ini sa aton nga mabaton ang kabuhi nga wala sing katapusan. Sa mga miting, mapalig-on naton ang iban kag mapalig-on man nila kita.

USISAA PA GID

4. Indi kita dapat maggamit sang mga santos sa aton pagsimba

VIDEO: Gusto Bala sang Dios nga Maggamit Kita sing mga Imahen sa Aton Pagsimba? (3:26)

• Sang panahon sang Biblia, ano ang natabo sang naggamit ang katawhan sang Dios sang mga diosdios para simbahon sia?

Nagahunahuna ang iban nga kon maggamit sila sang mga santos mangin malapit sila sa Dios. Pero indi ayhan magapalayo pa gid sia sa ila? Basaha ang Exodo 20:4-6 kag Salmo 106:35, 36, dayon binagbinaga ini nga mga pamangkot:

• Ano nga mga butang ukon santos ang nakita mo nga ginagamit sang mga tawo sa ila pagsimba?

• Ano ang ginabatyag ni Jehova sa sini?

• Ano ang ginabatyag mo sa sini?

5. Ang pagsimba lamang kay Jehova ang makahilway sa aton sa butig nga mga panudlo

VIDEO: Ginhilway sang Kamatuoran (5:16)

Basaha ang Salmo 91:14, dayon binagbinaga ini nga pamangkot:

• Ano ang ginapromisa ni Jehova sa aton kon ginapalangga naton sia kag sia lamang ang aton ginasimba?

6. Ginasimba naton ang Dios sa mga miting sa kongregasyon

Ginadayaw naton si Jehova kag ginapalig-on ang iban kon nagakanta kita kag nagakomento sa mga miting. Basaha ang Salmo 22:22, dayon binagbinaga ini nga mga pamangkot:

• Nanamian ka bala sa mga komento sa miting?

• Gusto mo man bala maghanda para makakomento ka?

7. Nalipay si Jehova kon ginasugid naton sa iban ang aton natun-an

Madamo sing paagi nga masugid naton sa iban ang kamatuoran sa Biblia. Basaha ang Salmo 9:1 kag 34:1, dayon binagbinaga ini nga pamangkot:

• Ano ang natun-an mo sa Biblia nga gusto mo isugid sa iban?

SUMARYO

Mapalipay naton ang aton Manunuga kon sia lamang ang aton simbahon, kon dayawon naton sia sa mga miting sa kongregasyon, kag kon ginasugid naton sa iban ang aton natun-an.

Rebyu

• Para batunon sang Dios ang aton pagsimba, sa diin ini dapat nabase?

• Ngaa si Jehova lamang ang dapat naton simbahon?

• Sa aton pagsimba, ngaa dapat makig-upod kita sa iban nga gusto man mapalipay ang Dios?

DUGANG NGA IMPORMASYON

Sa eksperiensia nga “Indi Na Ako Ulipon sang mga Imahen,” hibalua kon paano nahilway ang isa ka babayi sa pagsimba sa imahen.

“Ang Biblia Nagapabag-o sang Kabuhi” (Ang Lalantawan, Hulyo 1, 2011)

Hibalua kon ano ang makabulig sa imo para makakomento ka sa mga miting.

“Dayawa si Jehova sa Kongregasyon” (Ang Lalantawan, Enero 2019)

Tan-awa kon paano ang isa ka lalaki nakabenepisyo sa mga miting sang kongregasyon bisan pa indi mahapos sa iya ang pagtambong.

Nagaulikid si Jehova sa Akon (3:07)

Madamo ang nagapati nga ang krus simbulo sang mga Cristiano, pero dapat bala naton ini gamiton sa pagsimba?

“Ngaa Wala Kamo Nagagamit sing Krus sa Inyo Pagsimba?” (Artikulo sa website)