Magpangamuyoay sa Isa kag Isa
“Magpangamuyo kamo tungod sa amon.”—2 TESALONICA 3:1
1-3. (a) Ngaa ang katawhan ni Jehova masinaligon nga makapalapit sa iya sa pangamuyo? (b) Ngaa ang mga Saksi ni Jehova dapat nga mangin mapangamuyuon nga katawhan?
SI Jehova amo ang daku nga “Manugpamati sang pangamuyo.” (Salmo 65:2) Busa, ang iya maunungon nga mga alagad masinaligon nga makapalapit sa iya upod ang ila mapainubuson nga pangabay kag mga pulong sang pagpasalamat. Sa pagkamatuod, ang mga Saksi ni Jehova madamu sing rason agod mangin katawhan sang pangamuyo.
2 Una, gintudloan ni Jesucristo ang iya mga sumulunod nga mangamuyo. Ginsilingan niya sila: “Kon magpangamuyo kamo, magsiling, ‘Amay namon nga yara sa langit pakabalaanon ang imo ngalan. Magkari ang imo ginharian. Hatagi kami sa adlaw-adlaw sang amon kalan-on sa inadlaw. Kag patawara kami sang mga sala namon, kay nagapatawad man kami sa tagsatagsa nga nakautang sa amon; kag dili kami pagdalha sa panulay.’” (Lucas 11:2-4) Ina nga pangamuyo makatarunganon nga nagauna sa Dios kag nagalakip sa personal nga mga pangabay. Ining Modelo nga Pangamuyo nagpakita man nga ang aton mga pangamuyo indi dapat magpasapayan sa iban nga katawhan.
3 Ginlaygayan man sang mga apostoles ni Jesus ang masigka tumuluo nga mangin katawhan sang pangamuyo. Halimbawa, si apostol Pablo nagsiling: “Magpadayon sing malig-on sa pangamuyo” kag, “Magpangamuyo sa walay langan.” (Roma 12:12; 1 Tesalonica 5:17) Kag si apostol Pedro nagsiling: “Ang katapusan sang tanan nga butang malapit na. Magmaayo kamo sing hunahuna kag magbut-anan sa inyo mga pangamuyo.” (1 Pedro 4:7) Daw ano ka ekselente nga laygay!
Kon Ano ang Mahimu sang Pangamuyo sa Aton
4. Ano ang ginakinahanglan agod ang mga pangamuyo sang dedikado nga mga alagad sang Dios pamatian?
4 Ang kilala nga manugbinalaybay nga si Alfred Tennyson nagsulat: “Mas madamu ang mahimu sang pangamuyo sang sa madamgo sini nga kalibutan.” Matuod gid! Apang agod pamatian ang dedikado nga mga alagad sang Dios, ang ila mga pangamuyo dapat nga ipatuhoy kay Jehova paagi kay Jesucristo sa pagtuo, dapat nga nahisuno sa kabubut-on sang Dios kag dapat nga ipabutyag sa husto nga paagi. (Juan 14:6; 1 Juan 5:13-15) Sing makawiwili, ginsiling anay: “Wala ginatan-aw sang Dios ang kaayo sa paghambal sa imo pangamuyo, kon daw ano ini ka elegante; ni ang geometriya sang imo pangamuyo, kon daw ano ini metodiko; kundi ang kahanuot sini ang iya ginatan-aw.”—Ika-17 ka siglo nga Ingles nga Puritano nga ministro nga si Thomas Brooks.
5. (a) Ano ang mahimu sang pangamuyo sa aton? (b) Nahanungod sa pangamuyo, ano nga pamangkot ang pagabinagbinagon naton?
5 Ang tayuyon nga pagpangamuyo, nga may kahanuot sing tagipusuon, magapasuod sa aton kay Jehova. Ang mapainubuson, hanuot nga pangamuyo nagabulig sa aton nga tumanon ang aton komisyon sa pagbantala. (Mateo 24:14; 28:19, 20; 2 Corinto 2:17) Nagabulig ini sa aton nga makahimu sing desisyon nga ginakahamut-an sang langitnon nga Amay. Ang pangamuyo nagabulig man sa aton nga batason ang paghingabot kag huptan ang integridad sa Dios. (Salmo 109:3, 4; 119:86) Nagahatag ini sa aton sing kahigayunan nga ipabutyag ang tinagipusuon nga pagpasalamat kay Jehova. Kag magpangamuyoay man kamo sa isa kag isa. Apang nahanungod sa naulihi, paano ina nga mga pangamuyo makabenepisyo sa aton kag sa aton mga masigka tumuluo?
Ngaa Magpangamuyoay Kamo sa Isa kag Isa?
6. Tungod kay sin-o nangamuyo si Jesus, kag busa tungod kay sin-o kita makapangamuyo?
6 Si Jesus, ang aton Halimbawa, nangamuyo tungod sa iya mga disipulo. Sing hanuot, nangabay sia kay Jehova: “Ako nagapangabay tungod sa ila; ako wala nagapangabay tungod sa kalibutan, kundi tungod sa mga nahatag mo sa akon; kay imo sila.” Bisan pa nga si Jesus napatay tungod sa kalibutan sang katawhan, wala sia nangamuyo tungod sa “kalibutan” sa kahulugan sang tawhanon nga katilingban nga napain sa Dios. Apang, nangamuyo si Jesus tungod sa mga nagguwa sa sina nga kalibutan kag nagtuo sa iya. (Juan 3:16, 17; 17:8, 9; ipaanggid ang 2 Pedro 2:5; 3:6.) Bangod sang halimbawa ni Jesus, nian, nagakaigo nga makapangamuyo kita tungod sinang diosnon nga mga indibiduwal.
7. Anong mga halimbawa sang apostoles ang nagapahulag sa katawhan ni Jehova nga magpangamuyo sa isa kag isa?
7 Si apostol Pablo nangamuyo nahanungod sa mga masigka tumuluo. Halimbawa, ginsilingan niya ang mga Cristiano sa Efeso: “Sa sining kabangdanan, bangod nga ako nakabati sang inyo pagtuo sa kay Ginuong Jesus kag sang inyo gugma sa tanan nga balaan, wala ako nagauntat sa pagpasalamat tungod sa inyo. Ginadumdum ko kamo pirme sa akon mga pangamuyo.” (Efeso 1:15, 16) Dugang pa, wala mangalag-ag si Pablo nga ipalig-on ang pangamuyo sa iya kaugalingon kag sa iban. Sa tapos malaygayan ang mga taga-Efeso nga ‘isuklub ang bug-os nga hinganib sang espirituwal nga hinganiban’ kag batunon ang ‘espada sang espiritu, ang Pulong sang Dios,’ nagdugang sia: “Magpangamuyo sa tanan nga tion sa espiritu, sa bug-os nga pangamuyo kag pag-ampo. Kag sa sining katuyoan magbantay sa bug-os nga pagpadayon nga nagaampo tungod sa tanan nga balaan, kag tungod man sa akon, nga sa pagtikab sang akon baba mahatag sa akon ang pagmitlang sa pagpakilala nga may kasidla sang tinago sang maayong balita.” (Efeso 6:11-19) Ini man nga apostoliko nga halimbawa nagatiklod sa katawhan ni Jehova nga mangamuyo sa isa kag isa.
8. Ngaa nagakaigo nga ang hinaplas nga mga Cristiano kag ang mga sa “dakung kadam-an” magpangamuyo sa isa kag isa?
8 Ang mga Saksi ni Jehova nagahuman sa bug-os kalibutan nga pag-ululutod. Ang ginpanganak sang espiritu nga mga sumulunod ni Cristo sa tunga nila may “pagpakig-ambit,” ukon “paghiambitay,” upod sa Dios, sa iya Anak kag sa masigka hinaplas nga mga Cristiano. (1 Juan 1:3, 7; ipaanggid ang An American Translation.) Apang, ginapakita ni Jesus nga tanan nga mga disipulo niya dapat maghigugmaanay sa isa kag isa, kag si apostol Pedro nagsiling: “Higugmaa ang paghiliutod.” (1 Pedro 2:17; Juan 13:34, 35) Daw ano ka nagakaigo, nian, nga ang hinaplas nga mga Cristiano kag ang ila mga kaupdanan, ang “dakung kadam-an,” magpangamuyoay sa isa ka isa! (Bugna 7:9) Apang ano ang mahimu nga kaundan sina nga mga pangamuyo?
Para sa Paghiusa, Pagtuytuy kag Kaalam
9. Ngaa dapat naton ipangamuyo ang paghiusa sang aton Cristianong paghiliutod?
9 Dapat kita mangamuyo para sa mahigugmaon nga paghiusa sa aton Cristiano nga paghiliutod. Nangamuyo si Jesus nga ang iya mga sumulunod mahiusa sa iya kag sa iya Amay, kag ginlaygayan ni Pablo ang masigka sumilimba ni Jehova nga ‘nagakaigo nga mahiusa sa isa ka hunahuna kag kaisipan.’ (1 Corinto 1:10; Juan 17:20, 21) Ang matuodtuod nga espiritu sang paghiliutod amo pirme ang tanda sadtong debotado kay Jehova. ‘Daw ano katahom sang mag-ulutod nga magpuyo sing tingob sa paghiliusa!” (Salmo 133:1-3) Kag ang isa ka paagi nga makaamot sa sina nga paghiusa amo ang pagpangamuyo para sa sini.
10. Ngaa mangamuyo tungod sa pagtuytuy kag pagsakdag sang balaan nga espiritu?
10 Dapat kita mangamuyo nga paagi sa iya espiritu tuytuyan kag sakdagon ni Jehova ang mga hilikuton sang iya katawhan. Ang iban mahimu nga may tuman kabudlay nga mga asaynment sa pag-alagad sa Dios—mga butang nga ayhan indi gid mahimo sa kusog lamang sang tawo. Busa ining maunungon nga mga Cristiano, kag kita mismo, nagakinahanglan sang bulig ni Jehova paagi sa iya balaan nga espiritu.—Zacarias 4:6; ipaanggid ang Lucas 11:13; Binuhatan 8:14, 15.
11. Nahanungod sa ila, paano kita makapangamuyo sing nagakaigo?
11 Sarang kita makapangamuyo nga ang aton mga kautoran hatagan sing kaalam gikan sa Dios. Si Pablo nangamuyo nga ang mga Cristiano sa Colosas “mapun-an sang sibu nga ihibalo sang kabubut-on [sang Dios] sa bug-os nga espirituhanon nga kaalam kag paghangop, sa paggawi sing takus kay Jehova sa bug-os nga pagpahamuot sa iya.” (Colosas 1:9, 10) Nagakaigo man ipangamuyo nga yadtong nagatuytuy sa hilikuton nga pagbantala kag nagahanda sang aton mga publikasyon makatigayon sing “espiritu sang kaalam.” (Efeso 1:15-17) Nagapangamuyo ka bala tungod sadtong nagadumala sa hilikuton nga pagbantala sang Ginharian kag sa nagahanda sang mga publikasyon nga nagaaman sang espirituwal nga “pagkaon sa nagakaigo nga tion”?—Mateo 24:45-47.
Para sa Madinalag-on nga Pagbantala Walay Sapayan sang Paghingabot
12. Paano ang 2 Tesalonica 3:1 may kaangtanan sa pagpangamuyo tungod sa iban?
12 Dapat man kita mangamuyo nga ang mga masigka sumilimba magmadinalag-on sa pagpalapnag sa mensahe sang Ginharian. Si Pablo naglaygay: “Mga kautoran, magpangamuyo kamo tungod sa amon, agod nga ang pulong ni Jehova maglapnag kag magdaug subong sa inyo.” (2 Tesalonica 3:1; ipaanggid ang Efeso 6:18, 19) Huo, ginpangabay ni Pablo ang mga masigka tumuluo nga ipangamuyo nga sia kag ang iya mga kaupdanan magmadinalag-on sa pagpahayag sang “pulong ni Jehova.” Kita, man, dapat mangamuyo para sa madasig nga paglapnag sang Pulong sang Dios kag sa pag-uswag sang intereses sang Ginharian. Sa pagkamatuod, ina nga mga pangamuyo nagadalahig sa iban—ang tanan nga nagahimu sing makugi sang kabubut-on ni Jehova sa sining “katapusan nga mga adlaw.”—2 Timoteo 3:1-5.
13. Ano ang ginapakita sang 1 Timoteo 2:1, 2 nahanungod sa pagpangamuyo tungod sa kalibutanon nga mga opisyales? (b) Tungod sa ano kita makapangamuyo kon ginahingabot kita subong mga manugbantala sang Ginharian?
Ang katawhan ni Jehova nagakaigo nga makapangamuyo tuhoy sa kalibutanon nga mga opisyales. Si Pablo nagsiling: “Nian, nahauna sa tanan, nagapangabay ako nga ang mga pag-ampo, mga pangamuyo, mga pagpakiluoy, mga pagpasalamat himuon tungod sa tanan nga tawo, tungod sa mga hari kag sa tanan nga yara sa kagamhanan.” Ang dugang nga pinamulong ni Pablo nagapakita nga ining mga pangamuyo tungod gid sa katawhan sang Dios, kon sayoron, “agod nga magkabuhi kita sing malinong kag makidaiton, diosnon kag talahuron sa tagsa ka bagay.” (1 Timoteo 2:1, 2) Sing makawiwili, ang Judiyong mga tinapok sa Babilonia ginsilingan nga mangamuyo para sa paghidait sina nga siudad, ‘kay sa iya paghidait may paghidait kamo.’ (Jeremias 29:7) Busa, subong mga Saksi ni Jehova, nagakaigo nga mangamuyo kita tuhoy sa kalibutanon nga mga opisyales agod nga kita kag ang aton espirituwal nga mga kautoran magkabuhi sing malinong kag mahidaiton agod matuman naton ang aton komisyon subong mga manugbantala sang Ginharian. Apang kon kita ginahingabot, masinaligon nga sarang kita makapangamuyo nga kita kag ang aton mga masigka Saksi hatagan sing balaan nga bulig nga kinahanglan agod mapamulong ang pulong sang Dios nga may kaisog sa idalom sina nga mga kahimtangan. Kag makapat-od kita nga ina nga mga pangamuyo pagasabton.—Binuhatan 4:29-31; 5:29.
14. Ano ang aton Makasulatanhon nga sadsaran nga magpangamuyo agod ang aton ginahingabot nga kautoran makabaton sang bulig kag paumpaw sang Dios?
14 Nagakaigo gid nga ipangamuyo nga ang aton kautoran nga ginahingabot makabaton sang paumpaw kag bulig ni Jehova. Sa distrito sang Asia, diin nahamtang ang siudad sang Efeso, si apostol Pablo ‘nabug-atan sing lakas, nga wala sing paglaum bisan sa pagkabuhi.’ Ti, mahimu nga nakig-away sia sa sapat nga mapintas sa arena sa Efeso! Ano man ang hitabo, ginsilingan ni Pablo ang mga Cristiano sa Corinto: “Kamo man magbulig gid sa amon paagi sa inyo pangamuyo, agod nga madamu ang magpasalamat tungod sa amon bangod sang pagpakamaayo nga ginhatag sa amon nga sabat sa madamu nga pangamuyo.” (2 Corinto 1:8-11; Binuhatan 19:23-41; 1 Corinto 15:32) Nian, sing walay duhaduha, dapat kita mangamuyo nga ang aton nagaantos nga mga kautoran nga lalaki kag babayi makatigayon sing bulig kag paumpaw ni Jehova karon.—2 Corinto 1:3-7.
15. Ano ang mahimu naton tungod sa aton ginahingabot nga mga masigka tumuluo bisan pa nga kita mismo nabilanggo?
15 Ang mga masigka alagad ni Jehova pat-od nga nagakinahanglan sang aton mga pangamuyo kon ginaatubang sang paghingabot, kasakit ukon katalagman. Sa sina, nga tion, mahimu nga malayo kita sa ila kag indi makabulig sa ila sa iban nga paagi. Ti, mahimu nga kita mismo nabilanggo! Apang, madamu kita sing mahimu nga maayo paagi sa pagpangamuyo para sa aton mga masigka tumuluo. Tubtob nga kita buhi, indi mapunggan sang aton mga kaaway ina nga pangamuyo. Mahimu ini mangin hipos, apang epektibo gid.—Ipaanggid ang Nehemias 2:4-6.
Para sa Maayo Espirituwal nga Kapagros
16. Nahisuno sa 2 Corinto 13:7, paano kita makapangamuyo tungod sa masigka Cristiano?
16 Nagakaigo man naton nga ipangamuyo nga ang mga masigka Cristiano ‘indi makahimu sing malaut, kundi makahimu sing matarong.’ (2 Corinto 13:7) Inang mahigugmaon, dimakagud nga pangamuyo nagapakita nga luyag gid naton sila nga magpadayon sa pagkabuhi nga nahamut-an sang Dios. Si apostol Pablo nagsulat: “Nagapangamuyo man kami sing dayon tungod sa inyo, nga ang aton Dios magpakatakus sa inyo sa iya pagtawag kag magtuman sang tagsa ka maayong pagtapat kag buhat sang pagtuo sa iya gahom.” (2 Tesalonica 1:11) Si Epafras nangamuyo nga kabay nga ang taga-Colosas nga mga Cristiano “magtindog nga hamtong kag napasalig sing bug-os sa tanan nga kabubut-on sang Dios.” (Colosas 4:12) Bisan pa nga inang mga pinamulong ginpatuhoy sa hinaplas nga mga Cristiano, ang aton mga pangamuyo karon makatarunganon nga makapabutyag sing kaanggid nga balatyagon tungod sa tanan nga debotado kay Jehova.
17. Ano nga mga pangamuyo ang nagakaigo nahanungod sa espirituwal nga kapagros sang aton mga kautoran?
17 Sarang kita makapangamuyo nahanungod sa espirituwal nga kapagros sang aton mga masigka sumilimba. Kon ang iban magbalatian sa espirituwal, ang gintangdoan nga mga gulang nagakaigo nga magapangamuyo tungod sa ila kag upod sa ila, nagapangabay nga magbaskog sila uli. Si disipulo Santiago nagsulat: “Ang pangamuyo sang pagtuo magaayo sang nagamasakit, kag si Jehova magabangon sa iya.” (Santiago 5:13-16; 1 Samuel 12:18-25) Sa aton pribado nga mga pangamuyo sarang naton masambit sa ngalan ang mga masigka tumuluo kag mapabutyag ang pangabay nga magpabilin sila nga “mapagros sa pagtuo.” (Tito 1:13; 2:1, 2) Sa pagkamtuod, sayop nga ipangamuyo yadtong hungod nga nagasikway sa nagatumbas nga aman sang Dios.—Hebreo 10:26-29.
Mga Benepisyo sang Pagpangamuyo sa Isa kag Isa
18, 19. Ano ang pila sang personal nga mga benespisyo sang pagpangamuyo sa isa kag isa?
18 Makasalig kita nga mahimu ang madamung mga benepisyo kon magpangamuyoay kita sa isa kag isa. Halimbawa, ang aton mga pangamuyo mangin mas makahulugan. Walay duhaduha nga ang pagpangamuyo tungod sa mgamasigka tumuluo magapauswag sang aton panimuot sa ila. Sa pagkamatuod, ina nga mga pangamuyo magahimu sa aton nga labi nga mapailubon, labi nga dimakagud, labi nga mahigugmaon, labi nga maulikdon sa iban. Dugang pa, ang pagpangamuyo tungod sa aton espirituwal nga kautoran nga lalaki kag babayi magapakita kay Jehova nga interesado kita sa iya organisasyon, sa iya mga hilikuton kag sa kaayohan sini.
19 Daku ang kalipay sa paghibalo nga ang aton espirituwal nga kautoran nga lalaki kag babayi nagapangamuyo tungod sa aton, subong nga kita man nagapangamuyo tungod sa ila. Daw ano ka makalilipay ang paghibalo nga ang aton mga pangamuyo tungod sa mga kaupod nga mga Saksi ni Jehova ginapamatian sang “Manugpamati sang pangamuyo”! Busa, agod ipauswag ang intereses sang Ginharian samtang ginapadaku ang gugma kag paghiusa sa tunga naton, magpangamuyoay kita sa isa kag isa.
Ano ang Imo Sabat?
□ Ngaa ang mga Saksi ni Jehova mangin katawhan sang pangamuyo?
□ Ano ang mahimu sang pangamuyo sa aton?
□ Ngaa dapat ipangamuyo ang isa kag isa?
□ Nahanungod sa mga masigka tumuluo, tuhoy sa ano kita makapangamuyo?
□ Ano ang pila ka benepisyo sang pagpangamuyo sa isa ka isa?
[Piktyur sa pahina 14]
Ginapangamuyo mo bala nga ang kaupod nga mga Saksi ni Jehova magmadinalag-on sa pagpalapnag sa mensahe sang Ginharian?
[Piktyur sa pahina 15]
Daw ano kasunsun kamo nagapangamuyo tungod sa ginahingabot nga mga Cristiano?