Isa ka “Espesyal nga Teritoryo”
MADAMUNG Cristianong pamatan-on ang nag-adoptar sa pagtamod nga ang eskwelahan amo ang ila “espesyal nga teritoryo,” kag gani alisto sa mga kahigayunan nga makapanaksi sa mga maunudlo kag mga kabutho. Talupangda ang maayong mga resulta nga natigayon ni Susan, isa ka 13-anyos ang edad nga bata sa Canada.
“Sang Disiembre ginpangabay sang akon manunudlo ang klase nga magsulat sing sugilanon sa Paskua para sa ‘matinugahon nga pagsulat.’ Ginpili ko nga akon topiko ang ‘Report sa Ginhalinan sang Paskua.’ Gingamit ko ang ensayklopedia sang eskwelahan kag ang mga artikulo sang Magmata! nga mga reperensia kag nakahimu ako sang puno sing impormasyon nga report.” Ano ang opinyon sang manunudlo sa sini?
“Pagkatapos sang akon report amo sini ang komento sang manunudlo: ‘Maayo ang pagkasulat mo, Susan! Ginadayaw ko ang imo kabunayag kag ginatahod ko ang imo pagtuo. Bangod sang imo pagkamadinumdumon kag sang imo pagkamahangpunon, pirme ikaw pagatahuron. Ginalauman ko nga sa palaabuton ipabilin mo ang dalayawon nga mga kinaiya nga ginapanag-iyahan mo karon. Sa paghingapos, makapapagsik kag makapaladya gid ang magbasa ukon makighambal sa isa nga pareho mo sing edad nga nakapalambo kag nakahupot sang kaisog sa iya pagtuo.’
“Sa tapos niya mismo mabasa ang report, ginpabasa niya ini sa tanan nga mga manunudlo sa hulot sang staff. Gani sila tanan nakabaton sing panaksi! Naghatag ini sa akon sing kaisog kag determinasyon nga ihambal ang kamatuoran sang Biblia sa iban pa sa eskwelahan.
“Siempre, nahibaloan sang tanan ko nga kabutho nga Saksi ni Jehova ako, kag, sang mahibal-an nila ang ginsulat ko, luyag man nila nga basahon ang akon report. Daw interesado gid sila katama amo kon ngaa ginasiling ko nga dalhan ko ang kada isa sa ila sang guwa sang Awake!, nga may artikulo nahanungod sa Paskua. Disiembre 22, 1979 nga guwa yadto, kag may artikulo man ini sa ‘disco.’
“Sang gindala ko ang mga kopya sinang guwa sang Awake! sa eskwelahan, nakita ini sang iban pa kag nangabay man sila sing kopya. Daku gid nga interes ang ginpakita nila sa artikulo sa ‘disco’ amo kon ngaa namat-od ako nga dalhan ang kada isa sa ila sang kopya sang Marso 22, 1979, nga Awake! nga may serye sang mga artikulo nahanungod sini. Subong resulta, nakapahamtang ako sing 26 ka magasin sa katulad ko nga mga estudyante.
“Sang ulihi pa nga okasyon, sadtong magpaguwa ang amon nars sa eskwelahan sing pelikula nahanungod sa personal nga pagtubo, gindal-an ko ang madamu nga estudyante sang libro nga Your Youth—Getting the Best out of It kada isa. Ginsilingan ko sila nga nabuligan gid ako sini nga libro nga mahangpan ang mga pagbag-o kag mga problema nga kaupod sa pagdaku.
“Sa liwat, sang makita sang iban sa akon klase nga ginabasa kag ginahambalan nila ang libro, ginpangabay nila ako kon madalhan ko man sila sing kopya—kag lakip ang mga lalaki. Gani, sing tingob, nakapahamtang ako sing 17 ka libro nga Youth sa sina nga okasyon. . .
“Sang isa pa ka bes ginsugiran ako sang isa ka bata nga babayi nga nagatambong sia sa Sunday school kag nagabasa sang Biblia, apang indi niya ini mahangpan. Ginsilingan ko sia nga may Biblia ako nga madali basahon kag malipay ako nga dalhan sia sing isa. Indi lamang New World Translation ang dala ko sa iya kundi pati na ang My Book of Bible Stories kag ginpakita ko sa iya kon paano ini nga libro makabulig gid sa iya nga mahangpan ang Biblia. Nalipay gid sia sa sini.”
Ano ang balatyagon ni Susan tuhoy sa pagpanaksi sa eskwelahan? “Nalipay gid ako magpanaksi sa akon mga abyan sa eskwelahan kag ginkabig nga isa ka pribilehiyo ang matigayon ining espesyal nga teritoryo.”
Nagaeskwela ka bala? Ngaa indi paghimuslan ang imo “espesyal nga teritoryo”?