Pagtukod Paagi sa Indi Masunog nga mga Materyalis
“Ang iban magagamit sing bulawan ukon pilak ukon mga bato nga malahalon sa pagtukod sang sadsaran; ang iban magagamit sing kahoy ukon hilamon ukon dagami.”—1 CORINTO 2:12, Today’s English Version.
1, 2. (a) Ano ang labi pa nga masakit sang sa pagkakita sang isa nga masunog sing bug-os ang isa ka balay? (b) Anong kaanggid nga kapaslawan ang naeksperiensiahan kon kaisa sang Cristianong ministro?
MAKALULUOY gid nga talan-awon kon ang isa ka matahom nga balay masunog sing bug-os. Daw ano pa gid kasubo kon ikaw ang nagtukod sini! Ang makita ang imo bug-os nga tion kag panikasog nga masunog masakit matuod. Apang diutay lamang ini nga kasakit kon ipaanggid sa ginabatyag sang Cristianong ginikanan kon bayaan sang ila anak nga lalaki ukon anak nga babayi ang kamatuoran tungod sa mga butang sa kalibutan. Mas masakit makita ang imo bata nga madugmok sa espirituwal.
2 Ang mga balatyagon sa mga tagipusuon sining mga ginikanan daw pareho sa kapaslawan nga naagihan mo subong isa ka Cristianong ministro. Ayhan nasugdan mo ang pagtuon sa Biblia sa isa ka tawo kag naghinguyang sing binulan ukon tinuig pa sa pagbulig sa iya nga makatuon sang kamatuoran. Nakita mo sia nga nagatambong sa mga miting kag nakigbahin pa sa pag-alagad sa latagon. Apang, sing hinali, nagluya sia sa espirituwal kag nangin diaktibo, ayhan nagbalik sa iya daan nga pagginawi. Daw ano ka makasulubo!
3. Gin-atubang sinang mga kahimtangan, anong mga pamangkot ang kinaugali nga nagautwas, kag sa ano nasandig ang mga sabat?
3 Sing masubo, nagakatabo ini pirme. Gani natural lamang nga mamangkot: Ngaa nagakatabo ini? May sarang bala kita mahimu tuhoy sa sini? Samtang ang kaugalingon nga kahimtangan sa tagipusuon sang isa ka tawo isa ka rason, sa bisan paano ang sabat sa sinang mga pamangkot nasandig sa sabat sa isa pa ka pamangkot: Kon imo ginatudloan ang iban, nagatukod ka bala sa husto nga sadsaran paagi sa indi masunog nga mga materyalis? Ang maathag nga paghangop naton kon ano ang kahulugan sini kag kon paano ini himuon amo ang yabi sa pagbulig sadtong aton ginatudloan—ang aton mga estudyante sa Biblia kag ang aton mga kabataan—agod magtindog nga malig-on sa kamatuoran.
Sin-o ang Nagatukod?
4. Sa 1 Corinto 3:10, 11, sa ano ginpaanggid ni Pablo ang Cristianong ministro, kag paano?
4 Bilang sabat, tan-awon naton ang 1 Corinto kapitulo 3, diin ginapaanggid ni Pablo ang Cristianong ministro sa isa ka manunukod. Aton mabasa: “Suno sa dibagay nga kaluoy sang Dios nga ginhatag sa akon, kaangay sa sampaton nga pangulo nga manunukod sang balay ako nagbutang sing sadsaran, kag lain nga tawo ang nagabalay sa ibabaw sini. Mag-andam ang tagsa ka tawo kon paano ang iya pagbalay sa ibabaw sini. Kay walay sadsaran nga mabutang sang bisan sin-o nga liwan sang nabutang na, nga amo si Jesucristo.”—Bersikulo 10, 11.
5. (a) Suno sa konteksto, ano na sahi sang hilikuton sa pagtukod ang ginahinun-anonan ni Pablo? (b) Sa anong kahulugan ang Cristianong ministro ‘nagatukod sing mga tawo”?
5 Anong sahi sang hilikuton sa pagtukod ang ginahambalan ni Pablo? Bueno, talupangda ang konteksto: “Kamo . . . tinukod sang Dios.” “Kamo templo sang Dios.” (1 Corinto 3:9, 16) Busa isa ini ka malaragwayon nga hilikuton sa pagtukod, ang isa nga nagahilabot sa ‘mga tawo.’ Buot silingon, ang Cristianong ministro ‘nagatukod sing mga tawo’ sa kahulugan nga ginapanikasogan niya nga tukoron sa interesado nga mga tawo ang Cristianong personalidad, nagahimu sing mga disipulo gikan sa ila.—Mateo 28:19, 20.
6, 7. (a) Sa anong responsabilidad nasentro ang pinamulong ni Pabo sa 1 Corinto 3:9-15? (b) Apang, paano nadalahig ang nagabuligay nga hilikuton sa pagtukod? (c) Ano ang ginabulig sa aton nga makita sang dugang nga pagbinagbinag sa pinamulong ni Pablo?
6 Nagapanugda bala ina nga ang Cristianong manunudlo amo lamang ang may salabton sa kon paano nagatubo ang estudyante? Indi gid. Una, kita “mga masigkamanugpangabudlay sang Dios.” Samtang ang pinamulong ni Pablo sa 1 Corinto 3:9-15 nasentro sa salabton sang isa nga nagatukod, ukon nagatudlo, sa pagkamatuod isa gid ini ka nagabuligay nga hilikuton sa pagtukod diin nadalahig man ang estudyante. Mahimu naton ini mapaanggid sa paghanda sa isa ka soldado sa inaway. Ayhan hanason kag sangkapan sia sa iban, apang kon yadto na sia sa patag-awayan ang soldado dapat makig-away, nagagamit sang iya naton-an. Ang iya mismo kabuhi nasandig sa sini! Sing kaanggid, ginapanikasogan sang isa nga nagatudlo nga magtukod sing isa ka matuod nga Cristiano, ang isa nga makasarang sa pagbato sa mga kahuol kag mga pagsulay sining sistema. Apang, sa amo man nga tion, ang estudyante may responsabilidad; dapat niya iaplikar sa iya kabuhi ang iya naton-an.—Mateo 7:24-27; Filipos 2:12, 13.
7 Walay sapayan, yara gihapon ang kamatuoran nga ang isa nga nagatudlo may mabug-at nga salabton. Sa pagbinagbinag naton sing dugang sang pinamulong ni Pablo, makita naton ang importansia sang epektibo nga pagtudlo sa Pulong sang Dios agod makatukod sa iban sang apresasyon sa aton langitnon nga Amay.
Ibutang ang Husto nga Sadsaran
8. Sa sining malaragwayon nga hilikuton sa pagtukod, ano ang sadsaran?
8 Antes ka magtukod, dapat nimo anay ibutang ang sadsaran. Busa sa hilikuton nga pagtukod sang paghimu sing mga disipulo, ano ang sadsaran? Si Pablo nagasabat: “Walay sadsaran nga mabutang sang bisan sin-o nga liwan sang nabutang na, nga amo si Jesucristo.—Ipaanggid ang Efeso 2:20-22 kag 1 Pedro 2:4-6.
9. (a) Kon nagatudlo sa iban, ano ang nadalahig sa pagbutang kay Cristo nga sadsaran? (b) Ngaa importante para sa aton mga estudyante sa Biblia nga mahangpan ang bug-os nga kamatuoran nahanungod kay Jesus?
9 Paano naton mabutang si Cristo nga sadsaran kon nagatudlo sa iban? Primero, dapat naton itudlo ang kamatuoran nahanungod kay Jesus kag buligan ang iban nga tukoron ang ila kabuhi palibot sina nga kamatuoran. Nagalakip ina sang pagbulig sa ila nga magtuo kay Jesus subong ang aton Mananabang kag ang Isa nga paagi sa iya si Jehova nagaaman sing gawad. (Mateo 20:28; 1 Juan 2:1, 2) Apang indi lamang amo sina. Si Jesucristo amo ang gintangdoan nga ulo sang Cristianong kongregasyon. (Colosas 1:18) Sia man ang makatarunganon nga Hari sang duta, kag sa sina nga kapasidad sa dili maguday iya “kompletohon ang iya pagpangdaug” sa Har-Magedon. (Bugna 6:1, 2) Sing maathag, kon amo, ang pagbutang kay Cristo nga sadsaran nagahilabot sang pagtudlo sa bug-os nga kamatuoran nahanungod sa iya, pagbulig sa iban nga mahangpan ang papel ni Jesus sa pagpanghikot sang katuyoan sang Dios. Ngaa importante gid ini? Kon ang aton mga estudyante magatuo kay Jesus subong ang nagagahom nga Hari sang Dios, indi sila gilayon masuboan bangod sa mga kahimtangan sang kalibutan kag sang mga problema sang matag-adlaw nga pagkabuhi.—Isaias 28:16; 1 Pedro 2:6-8.
10. (a) Suno sa Efeso 3:17-19, ano pa ang nadalahig sa pagbutang kay Cristo nga sadsaran? (b) Paano naton ‘mapapuyo sa aton tagipusuon’ si Cristo?
10 Apang, labi pa ang nadalahig sa pagbutang kay Cristo nga sadsaran. Dapat nga may pareho kita nga tulumuron kay apostol Pablo. Ang iya pangamuyo tungod sa mga taga-Efeso amo nga “si Cristo magpuyo sa inyo mga tagipusuon paagi sa pagtuo; sa katuyoan nga kamo nga nakagamut kag napasad sa gugma mangin may gahom sa paghangop kaupod sang tanan nga balaan kon ano ang kasangkaron kag kalabaon kag kataason kag kadalumon, kag sa pagkilala sang gugma ni Cristo nga nagalabaw sa ihibalo, agod nga mapun-an kamo sa tanan nga kabug-osan sang Dios.” (Efeso 3:17-19) Talupangda nga ang pagka ‘nanggamut kag napasad’ nagadalahig sa ‘pagpapuyo sa aton mga tagipusuon’ kay Cristo. Ano ang kahulugan sini? Bueno, si Cristo ‘nagapuyo sa aton mga tagipusuon’ kon tugotan naton ang iya halimbawa kag mga panudlo nga magaapektar sang aton mga balatyagon kag mga buhat.
11, 12. (a) Paano naton mabuligan ang iban nga ‘papuy-on sa ila tagipusuon’ si Cristo? (b) Dugang sa paghibalo nahanungod kay Jesus, ano pa ang nadalahig?
11 Paano naton mabuligan yadtong aton ginatudloan nga ‘papuy-on sa ila mga tagipusuon’ si Cristo? Ang pagpaambit sa ihibalo imporante, kay dapat sila ‘maghangop’ sang “kasangkaron kag kalabaon kag kataason kag kadalumon” sang kamatuoran sang Pulong sang Dios, labi na ang may kahilabtanan sa kabuhi kag mga panudlo ni Jesucristo. Luyag naton nga tigayunon sang aton mga estudyante ang “painoino ni Cristo,” nga kilalahon sia sing labi pa subong buhi, mapatugsilingon nga persona. (1 Corinto 2:16) Magatandog ini sang ila mga tagipusuon.
12 Apang talupangda nga si Pablo nagsiling man: “Kag sa pagkilala [Griego, gnonaiʹ, sa pagkilala “sing praktikal, paagi sa eksperiensia”] sang gugma ni Cristo nga nagalabaw sa ihibalo.” Makilala naton ang “gugma” ni Cristo paagi sa pagtuon kon ano ang ginasiling sa aton sang Biblia nahanungod sa iya dalanon sang kabuhi kag paagi sang pagpakig-angot sa iban. Apang, paagi sa pag-ilog sa kon ano nga sahi sang persona si Jesus nga maapresyar naton sing matuodtuod ang iya balatyagon. Sa sining paagi, paagi sa eksperiensia, makilala naton “ang gugma ni Cristo nga nagalabaw sa ihibalo.”
13, 14. (a) Paano naton mabuligan ang aton mga estudyante nga ilugon ang mga kinaiya ni Jesus? (b) Ngaa ang paginguha nga ilugon si Jesus magabulig sa aton mga estudyante naga palambuon ang maayong kaangtanan kay Jehova? (c) Dugang sa husto nga sadsaran, ano pa ang dapat naton hatagan sing igtalupangod?
13 Gani kon nagabutang sang sadsaran, hatagi sing igtalupangod ang mga kinaiya ni Jesus—ang iya gugma (Juan 15:13, 14), pagkamaabiabihon kag pagkamapatugsilingon (Mateo 11:28-30), pagkamapainubuson (Juan 13:1-15) kag kaluoy (Marcos 6:30-34), sa pagsambit sa pila lamang. Palig-ona ang imo estudyane nga ilugon ining mga kinaiya sa iya dalanon sang kabuhi. Magahatag ini sang maayong sadsaran diin tukoron ang iban pa importante nga mga kinaiya. Kon kaisa, kon ginahambalan ang mga kasaysayan sa Biblia nahanungod kay Jesus, ayhan makadulog ikaw kag makapamangkot: ‘Ano nga kinaiya ang nakita mo nga ginpakita ni Jesus? Paano mo mapakita sing bug-os ining kinaiya sa imo kabuhi?’ Ipaathag nga ang pag-ilog sa personalidad ni Jesus magabulig sa estudyante sang Biblia nga mapalambo ang mabakud, suod nga kaangtanan kay Jehova. Ngaa? Bangod himpit nga napabanaag ni Jesus ang personalidad sang iya amay kag kon tinguhaan naton nga ilugon si Jesus aktuwal nga aton ginailog si Jehova mismo!—Juan 14:9.
14 Importante ang may husto nga sadsaran, apang bastante na bala ini? Si Pablo nagasabat: “Mag-andam ang tagsa ka tawo kon paano ang iya pagbalay sa ibabaw sini.” Huo, kamusta ang mga materyalis nga ginagamit naton sa pagpatindog sang tinukod nga magatindog sa ibabaw sang sadsaran?
Ang Indi Masunog nga mga Materyalis
15, 16. (a) Sa 1 Corinto 3:12, anong pagpaanggid ang ginapakita ni Pablo? (b) Nagaaplikar sang ilustrasyon ni Pablo, anong pamangkot ang ginpakiana?
15 Nagadul-on ini sa aton sa bersikulo 12 sang 1 Corinto Kapitulo 3, diin ginahambalan ni Pablo ang nanuhaytuhay nga mga materyalis sa pagtukod: “Karon kon ang bisan sin-o magbalay sa ibabaw sang sadsaran sing bulawan, pilak, mga bato nga malahalon, kahoy, kugon, ginalaban.” Lainlain gid ina nga mga materyalis! Ginapanugda bala ni Pablo nga magtukod kita sang tagdiutay sining tagsa ka materyalis sa aton mga estudyante? Indi. Talupangda kon paano ini ginabadbad sang iban nga mga badbad: “Ang iban magagamit sing bulawan ukon pilak ukon mga bato nga malahalon sa pagtukod sang sadsaran; ang iban magagamit sing kahoy ukon hilamon ukon dagami.” (TEV) “Sa sining sadsaran sarang ka makatukod sa bulawan, pilak kag mga hiyas, ukon sa kahoy, hilamon kag dagami.” (The Jerusalem Bible) Maathag nga ginapaanggid ni Pablo ang duha ka sahi sang mga tinukod. Sa isa ka bahin yara, kon hambalon pa, ang isa ka matahom nga palasyo nga napunihan sang bulawan, pilak kag malahalon nga mga bato. Sa kabaliskaran yara ang kugon sing atop nga payag nga may kahoy nga haligi ukon poste nga nagasuportar sa mga dingding sang ginpamala nga hilamon nga ginmikslahan sing lutak.
16 Nagaaplikar sang ilustrasyon ni Pablo, nian, ang pamangkot amo: Kon nagatudlo sa iban, ikaw bala nagatukod sing “mga palasyo” ukon “mga payag”? Ang kabangdanan kon ngaa ang iban nga mga pamatan-on kag mga bag-ohan nagpahilayo amo nga indi tanan gintukod sa pareho nga materyalis. Ano ang kinatuhayan? Ang kahimtangan sa dumaan nga kongregasyon sang Corinto nagailustrar sang kinatuhayan sa ulot sang pagtukod paagi sa indi masunog nga mga materyalis kag sa masunog.
17, 18. (a) Anong serioso nga problema ang nagluntad sa kongregasyon sang dumaan nga Corinto, kag paano gintadlong ni Pablo ini? (b) Busa anong yabi nga rason ang magapat-od kon bala nagatukod kita paagi sa “bulawan” ukon “kugon?
17 Nahimu ni Pablo ang iya bahin nga pagbutang sang nagakaigo nga sadsaran, apang ang iban sa Corinto hayag nga nagbalay sa sini sing ‘kahoy, kugon kag ginalaban—mapigaw nga mga materyalis nga nagarepresentar sang mga kinaiya nga indi mabakod. (1 Corinto 3:12) Sa amo, dapat nga sulatan ni Pablo ang mga kautoran didto: “May pagpinuyasay sa tunga ninyo. Ang buot ko isiling amo ini, nga ang tagsatagsa sa inyo nagasiling: ‘Ako kay Pablo,’ ‘Ako kay Apolos,’ ‘Ako kay Cefas,’ ‘Ako kay Cristo.’ Si Cristo nabahinbahin.” (1 Corinto 1:11-13) Busa ang mga katapo sang kongregasyon nabahinbahin. Kag ngaa? Bangod ginhatagan nila sing daku nga importansia ang pila ka tawo. Gintadlong sila ni Pablo, nagapaathag: “Nian, ano bala si Apolos? Ano bala si Pablo? Mga manug-alagad nga paagi sa ila nagtuo kamo . . . Ako nagtanum, si Apolos nagbunyag, apang ang Dios nagpatubo.”—1 Corinto 3:5-7.
18 Sing malip-ot, ang problema amo ini: Bangod ginhatagan nila sing daku nga importansia ang pagsunod sa tawo, ang iban nga katapo sang kongregasyon sa Corinto wala sing suod nga kaangtanan kay Jehova. Amo ini ang yabi nga rason sa pagpat-od kon bala nagatukod kita paagi sa “bulawan” ukon “kugon,” nagatukod sing “mga palasyo” ukon “mga payag,” kon hambalon pa.
19. (a) Paano mapinatumbayaon nga mahatagan sing daku nga igtalupangod sang isa nga nagatudlo ang iya kaugalingon ukon ang isa ka tawo? (b) Kon luyag naton magtukod paagi sa ‘bulawan, pilak kag malahalon nga mga bato,’ ano ang dapat naton panikasogan nga himuon?
19 May hamili nga mapanutoan gikan sa sina. Basi ang iban magasiling. ‘Apang wala ko ginatudloi ang iban nga sundon ang bisan sin-o nga tawo.’ Apang, madali ini matabo bisan nga wala naton ginatuyoa ini. Halimbawa, kon ang estudyante magapautwas sang mga pamangkot kag pirme kita nagasiling, ‘Siling ni Brother (ukon Sister) Kuwan, . . .’ indi bala mapinatumbayaon nga ginapatalupangod naton sing daku ang isa ka dihimpit nga lalaki ukon babayi? Ukon, kon magautwas ang pamangkot kag magasiling kita, ‘Bueno, indi ako sigurado, apang amo sini ang masiling ko,’ indi bala dihungod nga ginahatagan naton sing daku nga igtalupangod ang aton kaugalingon? Dumduma, mahapos para sa isa ka estudyante nga palambuon ang mataas nga opinyon sa iya manunudlo. (Ipaanggid ang Binuhatan 10:25, 26 kag Bugna 19:10.) Kon luyag naton magtukod sing “mga palasyo,” dapat kita mag-andam batok sa pagtukod sing mga sumulunod sang tawo. Sa baylo, dapat naton buligan ang aton mga estudyante nga palambuon ang malapit nga kaangtanan kay Jehova. Bangod sina dapat kita magtukod paagi sa ‘bulawan, pilak kag malahalon nga mga bato.’ Ano ang ginarepresentar sini?
20. Ano ang ginarepresentar sang ‘bulawan, pilak kag malahalon nga mga bato’? (Hulubaton 3:13-15)
20 Ang pagpaanggid sa mga kasulatan subong sang Salmo 19:7-11, Hulubaton 2:1-6 kag 1 Pedro 1:6, 7 nagapakita nga ang bulawan, pilak kag malahalon nga mga bato ginagamit kon kaisa sing malaragwayon sa pagrepresentar sa mga kinaiya, subong sang mabakod nga pagtuo, diosnon nga kaalam, espirituwal nga paghantup, katutom, mahigugmaon nga apresasyon kay Jehova kag sa iya mga kasugoan. Inang mga kinaiya kinahanglan sa pagtigayon sang isa sing mabakod, suod nga kaangtanan kay Jehova nga Dios. Ining mga kinaiya nagahuman sa personalidad nga dapat naton panikasogan nga tukoron sa mga ginatudloan naton. Nagatukod ka bala sa sining paagi?
Masarangan Bala Nila ang Kalayo
21. (a) Ngaa importante katama nga tukoron naton ang mabakod nga mga kinaiya sa mga ginatudloan naton? (b) Ano ang ginarepresentar sang “kalayo”?
21 Ngaa impotante katama nga buligan naton tukoron inang mabakod nga mga kinaiya sa mga ginatudloan naton? Si apostol Pablo padayon sa pagpaathag: “Ang buhat sang tagsa ka tawo ipadayag, kay ipakita ini sang adlaw, bangod nga ipahayag ini sa kalayo; kag ang kalayo magatilaw kon ano ang buhat sang tagsa ka tawo.” (1 Corinto 3:13) Busa ang “kalayo” “magatilaw” kon sa anong paagi kita magatukod. Ano ang ginarepresentar sang “kalayo” diri? Mapintas pisikal nga paghingabot? Indi gid. Kay talupangda nga “ang buhat sang tagsa” mapaidalom sa “kalayo.” Indi tanan nga mga Cristiano makabaton sang mapintas nga paghingabot. Busa ang “kalayo” nagarepresentar sa bisan anong mga pag-ipit ukon mga pagsulay nga sarang makaguba sa espirituwalidad sang isa.
22. Ano ang iban sang kalayuhon nga mga pagtilaw ang mahimu maeksperiensiahan sang iban?
22 Para sa iban ang “kalayo” mahimu magaabot sa dagway sang hulusayon sa neutralidad. Halimbawa, basi ang iban ipiton nga makigbahin sa politikal nga mga aktibidad ukon magaatubang sing pagkabilanggo. (Juan 15:19) Kon kaisa ang “kalayo” labi nga malalangon. Ayhan makasululay ang magtan-aw sing sine ukon programa sa TV nga nagapakita sing sekso kag kasingki. Para sa Cristianong mga pamatan-on ang “kalayo” mahimu magaabot sa dagway sang pagkanadayag sa seksuwal nga paghaylo, mga imbitasyon nga magdroga ukon pag-ipit nga makigbahin sa manubo nga kalingawan sang kalibutan. Ang kinaugali nga handum nga batunon sang iban magaipit sing tuman sa Cristianong mga pamatan-on nga magpadala.—1 Juan 2:16.
23. (a) Nahanungod sa pag-atubang sa sinang mga pagtilaw, anong mga pamangkot ang ginpautwas, kag sa ano nasandig ang sabat? (b) Ano ang pagahinun-anon sa masunod sa artikulo?
23 Kalabanan sang matuod nga mga Cristiano madinalag-on nga nakabato sa sinang kalayuhon nga mga pagtilaw. Sing masubo, walay sapayan, ang iban wala makabato. Busa, dapat nga pamangkuton naton ang aton kaugalingon: Kon ang mga ginatudloan naton magaatubang sang “kalayo,” kamusta sila? Mangin kaangay bala sila sang matahom nga palasyo nga napunihan sang indi masunog nga bulawan, pilak kag malahalon nga mga bato, kag magatindog nga malig-on? Ukon mangin kaangay bala sila sang payag nga nahuman sang kahoy, kugon kag dagami, kag masunog? Siempre, nasandig ini sing daku sa estudyante mismo. Apang, sa amo man nga tion, daku man ang nasandig sa aton subong mga manunudlo—kon paano kita nagtukod. Gani nagapabilin ining pamangkot: Paano mo ginatukod inang mabakod nga mga kinaiya sa imo ginatudloan? Pagahinun-anonan ini sa masunod nga artikulo.
Mapaathag mo bala:
◻ Paano ang nagabuligay nga hilikuton sa pagtukod nadalahig sa pagtudlo sa iban?
◻ Paano mo mabutang si Cristo nga “sadsaran”?
◻ Ano ang maton-an gikan sa natabo sa kongregasyon sang dumaan nga Corinto?
◻ Ano ang “kalayo,” kag paano sini ginapadaku ang importansia sang pagtukod sang mabakod nga mga kinaiya sa iban?
[Mga piktyur sa pahina 11]
Kon nagatudlo sa iban, nagatukod ka bala sing indi masunog ukon masunog nga mga materyalis?