Andam Kamo sa Inyo Kaaway, ang Yawa!

“Magbut-anan kamo, magpulaw. Ang inyo kaaway nga Yawa, subong sang nagangurob nga leon nga nagaluyong, nga nagapangita sang iya tulukbon.”—1 PEDRO 5:8.

1. Ano ang kaaway sang mga Saksi ni Jehova, apang mapaslawan bala sia?

DEDIKADO ka bala sing bug-os nga saksi ni Jehova nga Dios? Kon amo, may yara ikaw malimbungon nga kaaway, isa ka malaut nga kaaway. Apang, walay sapayan sang tanan nga masarangan niya himuon, inang malimbungon nga kaaway mapaslawan. Sarang ikaw mapamatod-an nga matutom sa Labing Mataas nga Dios, si Jehova. Sing walay duhaduha, sarang ikaw makigbahin sa pagbindikar sa dimatupongan nga ngalan sang imo langitnon nga Amay. Huo, sarang mo mapahalipay ang tagipusuon ni Jehova kag mahatagan sia sing sabat sa Daku nga Napagapakahuya. Huo, kag sarang mo matigayon ang padya nga dayon nga kabuhi sa malipayon nga paraiso.—Hulubaton 27:11; Lucas 23:43; Bugna 2:7.

2. Ano ang ginasiling ni apostol Pedro nahanungod sa aton pangunang kaaway?

² Agod magpabilin nga matutom sa Dios, dapat andaman mo ang imo pangunang kaaway. Nahanungod sa iya, si apostol Pedro nagsulat: “Magbut-anan kamo, magpulaw. Ang inyo kaaway nga Yawa, subong sang nagangurob nga leon nagaluyong, nga nagapangita sang iya tulukbon.” Apang, posible ang mangapin batok sini nga kaaway, kay ang apostol nagpadayon: “Apang sumponga sia, nga nagpangalig-on sa inyo pagtuo . . . Sa tapos nga nakaantos kamo sa diutay nga tion, ang Dios sang bug-os nga dibagay nga kaluoy, magapabakod sa inyo.” (1 Pedro 5:8-10) Ining mga pulong labi na nga nagapaumpaw sa hinaplas nga mga sumulunod ni Jesucristo. Apang, may matuod man nga kahulugan ini sa mga alagad ni Jehova nga nagahulat magkabuhi sing dayon sa dutan-on nga paraiso.

3. (a) Sin-o ang pirme handa sa pagbulig sa aton? (b) Ano nga kaaway ang ginagamit ni Satanas agod matigayon ang iya malaut nga katuyoan?

³ Agod makaandam kita batok sa aton Kaaway, kinahanglan naton ang bulig, subong man ang ihibalo tuhoy sa iya mga taktika. Sanday Jehova nga Dios, Jesucristo, ang balaan nga mga manugtonda kag ang Cristianong kongregasyon handa kag kinabubut-on nga magabulig sa aton tanan agod huptan ang integridad. Sa pihak nga bahin, kinhanglan nga batoan naton ang aton kaugalingon dihimpit nga unod, ining malaut nga sistema sang mga butang kag si Satanas nga Yawa mismo. Ginapahulag sia sang kalautan kag handa nga gamiton ang bulig sang aton duha pa ka kaaway agod matuman ang iya malaut nga tinutuyo.—Juan 15:19; 1 Corinto 9:27.

4. (a) Paagi sa anong apat ka paglaragway nakilal-an si Satanas? (b) Ngaa nagakabagay kay Satanas ang mga titulo “Yawa,” “man-ug” kag “dragon”?

⁴ Ang paglaragway mismo nga ginahatag sang Kasulatan sa aton Kaaway magabulig sa aton nga mahangpan sing mas maayo ang iya mga metodo, ang iya mga desinyo. Ginapatuhoyan sia nga Satanas, Yawa, man-ug kag dragon. (Buna 12:4, 9, 10) Ang iya ngalan Satanas nagakahulugan “Manugpamatok,” ukon “Kaaway.” (Job 1:6; 2:1) Ang “Yawa” nagakahulugan “Manugpasipala,” “Manugsumbong,” ukon “Malaut.” Ginatawag man si Satanas nga “man-ug” bangod gingamit niya ang man-ug agod limbongan si Eva sa katamnan sang Eden. (Genesis 3:1-7) Kag ginatawag sia “dragon” bangod sang iya kinaugali nga manukob.

Mga Motibo kag mga Katuyoan ni Satanas

5. Ano nga tindog ang ginhimu ni Satanas tuhoy kay Jehova?

⁵ Si Satans nga Yawa, nga isa anay sa langitnon nga kaanakan sang Dios, handa nga pamatokan kag pasipalahan si Jehova. Tuyo ni Satanas nga patalikdon ang katawhan gikan sa Dios, agod mahimu ang makagud nga katuyoan ni Satanas. Maathag nga ginapakita sang ginahulag sang Yawa nga ginaduhaduhaan niya ang pagkamaminatud-on sang Dios, subong man ang pagkinahanglan sang tawo nga magsalig kay Jehova kag nagasalig sa iya para sa padayon nga kabuhi kag kalipay. Ginapakita sang dalanon ni Satanas ang iya pagpangduhaduha sa kinamatarong sang Dios sa paggahom kag sa iya paagi sang paggahom. Si Jehova magagahom sa pagkamatarong kag ang iya mga tinuga magaalagad sa iya sing handa bangod sang gugma sa iya kag sa pagkamatarong. Sa pihak nga bahin, ginatamod ni Satanas nga ang makagud nga daug amo ang labing halandumon nga motibo. Sa iban nga hambal, ginapangatarungan niya nga ang tanan intelihente nga tinuga dapat mangin kag subong kakagud sa iya.—Job, kapitulo 1 kag 2.

6. Ano ang ginapakita sang dalanon ni Satanas tuhoy sa iya mga motibo?

⁶ Para kay Satanas nga sugdan ina nga dalanon nagapakita nga ginpahanugotan niya ang sobra nga ambisyon nga mangin makahalapay nga balatyagon kag motibo. Makit-an man ini gikan sa paandam ni apostol Pablo batok sa pagtangdo sa bag-o lang makombertir nga lalaki nga manugtatap, “basi kon magpabugal sia kag mahulog sa katagudilian sang Yawa.” (1 Timoteo 3:6) Huo, nagpakita sing sobra nga pagkabugalon si Satanas sang makig-indis sia batok sa Labing Gamhanan, Labing Mataas, Soberano sang Uniberso, Hari sang walay katubtoban, nga si Jehova nga Dios. (Genesis 17:1; 2 Samuel 7:28; Salmo 83:18; 1 Timoteo 1:17) Ginpakita sang Yawa nga ang pagpakataas sa kaugalingon amo ang iya nagapangibabaw nga handum, nga ginakahisaan niya ang pagsimba nga ginahatag sang intelihente nga mga tinuga kay Jehova nga Dios sang gintanyag niya kay Jesucristo “ang tanan nga ginharian sa kalibutan” lamang nga si Jesus maghimu sang isa ka buhat sang pagsimba sa iya.—Mateo 4:8, 9.

7. Ngaa wala dayon pagpatya sang Dios ang mga rebelde nga sanday Satanas, Adan kag Eva?

⁷ Sa pagkamatuod, ginpatay kuntani dayon ni Jehova nga Dios si Satanas kag ang nahaunang mag-asawa pagkalapas gid nila. Apang bangod sang ginpautwas nga mga hulusayon ni Satanas, kag bangod sang kaluoy sa wala pa mabun-ag nga kaanakan ni Adan, ginapahanugotan sang Dios ang Yawa nga magkabuhi kag pamatod-an ang iya matinaastaason nga mga hangkat. Sa amo man nga tion, ginahatagan ni Jehova sing kahigayunan ang katawhan nga tinguhaan gamhan ang ila kaugalingon nga nahamulag sa Dios kag sa iya matarong mga mga prinsipio.

Paglimbong Tuhoy sa Iya Pagluntad

8. Paano nadaya ni Satanas ang katawhan tuhoy sa iya pagluntad mismo?

⁸ Ginahimu ni Satanas ang madamu kag nanuhaytuhay nga mga padugi agod ipaabante ang iya katuyoan subong Kaaway ni Jehova nga Dios kag kon posible, agod patalikdon ang tanan nga katawhan gikan sa matarong nga pagsimba sa ila Manunuga. Isa sining mga padugi amo ang pagpapati niya sa mga tawo nga wala sia nagaluntad! Nagahimu ini para sa ila nga mangin iya mahapos nga mga biktima. Gani, sa karon, sa madamung relihion bantog ang pagpati nga wala sing persona subong ni Satanas nga Yawa. Halimbawa, ginreport sang isa ka surbey nga ginhimu sang Center for Policy Research sa Siudad sang Nueva York nga sang 1974 kapin sa katunga sang mga Amerikano ang wala gid nagapati sa pagluntad sang personal nga Yawa. Bisan ang madamung mga klerigo wala nagapati sa pagluntad sang Yawa subong isa ka persona.

9, 10. Paano ginapakita sang Kasulatan ang katunayan nga ang Yawa isa ka persona?

⁹ Apang ginaathag gid sa aton sang Kasulatan nga may personal nga Yawa. Ginapakita sini nga isa ka persona ang naghambal, naglimbong kag nagsulay sa nahaunang babayi, si Eva, paagi sa man-ug. Dugang nga ginapamatod-an sang tolon-an ni Job ang pagluntad ni Satanas subong persona, kay nagasugid ini tuhoy sa iya pagpakigsugilanon kay Jehova nga Dios, kag ginduhaduhaan ang integridad sang alagad sang Dios nga si Job. Dugang pa, ginrekord sang mga manunulat sang Ebanghelyo nga sanday Mateo, Marcos kag Lucas nga si Jesucristo ginsulay sang Yawa. Nga inang mga pagsulay natabo kay Jesus gikan sa naguwa nga ginhalinan maathag indi lamang gikan sa nahibal-an naton tuhoy sa pagkahimpit kag personalidad ni Jesus kundi gikan man sa kinaugali sang ikatlo na pagsulay ni Satanas. Paano si Jesus maghapa kag maghimu sing buhat sang pagsimba sa atubangan sang malaut nga prinsipio ukon ideya? Importante man, amo ang sulitsulit nga pagpatuhoy ni Jesus kay Satanas subong isa ka persona kag subong “ang gumalahom sining kalibutan.”—Juan 12:31; 14:30; 16:11; 8:44; Mateo 4:1-10; 12:26; Lucas 10:18.

¹⁰ Ginpakilala man sang mga apostoles ni Jesus ang Yawa subong isa ka persona. Ginpakita ni Pablo nga ang matuod nga mga Cristiano indi ignorante sa “mga padugi” ni Satanas kag ginpaandaman sila sang apostol batok sa “mga daya sang Yawa.” (2 Corinto 2:11; Efeso 6:11) Subong sang natalupangdan na, ginalaygayan ni Pablo ang mga masigkatumuluo nga mag-andam sa ila Kaaway, nga Yawa. Kag nagpanaksi si apostol Juan nga “ang bug-os nga kalibutan yara sa gahom sang malauton” kag nga “ang Yawa dali na lang magsulod sang iban sa inyo [mga Cristiano] sa bilanggoan.”—1 Juan 5:19; Bugna 2:10; 1 Pedro 5:8.

Ang Paagi ni Satanas nga Butig nga Relihion

11. Ano ang ginhimu ni Satanas sa pagkaduna sang tawo nga magsimba?

¹¹ Ang padugi ni Satanas agod bulagon ang mga tawo nagadalahig sang paggamit niya sang butig nga relihion. (2 Corinto 4:4) Ang tawo gintuga sang Dios upod ang kinahanglanon nga makig-angot sa iya Manunuga paagi sa pagsimba. Ginpalikaw ni Satanas ini nga pagkaduna paagi sa pagpukaw sa kakagud kag pagpauswag sang pagkawalay hinalung-ong sa putli nga pagsimba. Agod mahimu ang iya katuyoan “nagapakamanugtonda [sia] sang kapawa.” (2 Corinto 11:14) Subong resulta sina nga paglimbong, ang mga tawo naduyog sa linibo ka lainlain nga sahi sang butig nga relihion.

12. Paano naton dapat tamdon ang butig nga relihion kag ang pagsamo sang pagtuluohan?

¹² Ang tanan butig nga relihion aktuwal nga produkto ni Satanas, kay si Pablo nagsiling: “Ang ginahalad sang mga pungsod ginahalad nila sa mga yawa, kag ang wala nagapanipon upod sa akon nagapaaplag.” Dugang pa, wala ginapahanugotan ni Cristo ang pagsamo sing pagtuluohan, kundi nagsiling: “Walay nagaabot sa Amay kundi paagi sa akon.”—1 Corinto 10:20; Mateo 12:30; Juan 14:6.

13. Sa anong paagi ginhimuslan ni Satanas ang kalangkag sang tawo nahanungod sa okulto?

¹³ Ginahimuslan ni Satanas ang kalangkag sang tawo nahanungod sa okulto kag sa kahimtangan sang minatay. Paagi sa indi gid makasulatanon nga mga paagi subong sang pagpakigsugilanon sa patay, ukon espiritismo, pagpakot sa palaabuton, astrolohiya kag black magic, nasiod niya ang dimaisip nga kadamuon. Sa katunayan, nagadugang ang interes sa sinang mga butang karon. Naglab-ot ini tubtob sa punto nga ang iban aktuwal nga nagasimba sa Yawa mismo.—Exodo 22:18; Levitico 19:26; 20:6; Deuteronomio 18:10-12.

Ang Pagpukaw ni Satanas sa Bugal

14, 15. (a) Ano nga paagi ang gingamit ni Satanas agod mapahimu kanday Eva kag Cain ang iya katuyoan? (b) Anong dugang nga halimbawa ang ginahatag sang Biblia nahisuno sa sini?

¹⁴ Si Satanas nagpadala sa pagsulay sang bugal. Gani, ginpukaw niya kay Eva ang bugalon, makagud nga handum nga mangin kaangay sang Dios nga Labing Mataas, kag sa amo nagmadinalag-on sia sa pagpatalikod sa aton nahaunang ginikanan pahilayo sa pagsimba kay Jehova nga Dios. Walay duhaduha nga gingamit man ni Satanas ang kaanggid nga paagi kay Cain. Sang matalupangdan niya kon paano nagkasubo si Cain bangod si Abel nga iya utod ang nakabaton sang balaan nga kahamuot, gindabokan sang Yawa ina nga kasubo nga mangin makamamatay nga kahisa.—Genesis 4:3-8; 1 Juan 3:11, 12

¹⁵ Sa bug-os nga maragtas sang tawo, nagamit ni Satanas subong mga galamiton yadtong mga bugalon—mga tawo nga kasubong nanday Nimrod, ang Paraon sang Egipto sang kaadlawan ni Moises kag ang Asiriahanon nga si Hari Senacherib. (Genesis 10:8-12; Exodo 5:2; Isaias 36:7-10, 16-20) Naimpluensiahan karon ni Satanas ang kadam-an bangod sang bugal: bugal sang rasa, bugal sang nasyonalidad, bugal sang edukasyon, bugal sang tindog sa katilingban, kag iban pa. Ini tanan nagapangalagad sa katuyoan sang Yawa paagi sa pagtiklod sa mga tawo nga magpabungol sa mensahe sang Dios.

Ang Ganyat sang Materyalistiko nga Kakagud

16. Ano ang kadalag-an ni Satanas sa paggamit sang materyalistiko nga kakagud?

¹⁶ Ang isa pa ka paagi nga ginagamit ni Satanas agod masulay ang mga tawo amo ang materyalismo, kakagud, gugma sa kuarta, pagpabugal sa pagkabutang. Gani ginsulay niya ang klerigo sang kaadlawan ni Jesus nga makagud nga mga mahigugmaon sa kuarta. (Lucas 16:14) Naggamit sang ganyat sang materyalistiko nga kakagud, “gintugob ni Satanas (si Ananias) sa pagbutig sa balaan nga espiritu.” (Binuhatan 5:1-11) Kag walay duhaduha nga gingamit sang Yawa ang gugma sa materyal nga mga butang kag kalibutanon nga mga kalipay agod mapahilayo si Demas kag ang iban pa nga Cristiano gikan sa pag-alagad kay Jehova.—2 Timoteo 4:10.

17. Anong kilala nga halimbawa ang aton tuhoy sa isa ka tawo nga nagpadala sa paggamit ni Satanas sa kakagud subong sulay?

¹⁷ Ang isa ka kilala nga halimbawa sang paggamit ni Satanas sang kakagud agod magsulay amo ang iya ni Judas Iscariote. Indi lamang nga nangin makagud sia nga makawat kundi ang kakagud nangin rason nga ginluiban ni Judas ang iya Agalon. Ginpakita niya ang pagkanaduyog sang iya painoino sa sina nga direksion sang ginprotestahan niya ang paghaplas ni Maria sa tiil ni Jesus sing malahalon nga lana. (Juan 12:4-6; Mateo 26:14-16) Dapat gid kita maghalong nga indi kita maabtan ni Satanas paagi sa pagpukaw sang materyalistiko nga kakagud!

Ginhimuslan ni Satanas ang Kaluyahon sang Tawo

18. (a) Ano nga mga aman ang ginhimu sang Dios para sa tawo agod magkalipay sa pagkabuhi? (b) Paano ini ginhimuslan ni Satanas sa kahalitan sang tawo?

¹⁸ Ang isa sa nanuhaytuhay nga mga kaluyahon nga ginapukaw ni Satanas amo ang pagkaibog sa ginadumilian nga kalipayan sa sekso. Tuyo ni Jehova nga Dios nga magkalipay kita sa madamung kalipayan, kag kon agumon ini sa sulod sang mga latid sang iya kabubut-on para sa aton, magaresulta ini sa tuman nga ikaayo kag kalipay. Apang ginasulay ni Satanas ang mga tawo nga unahon ining mga butang sa ila kabuhi kag magpaduyog sa sini sa imoral nga mga paagi nga nagalapas sa kasugoan sang Dios. Gani natiklod ni Satanas ang 24,000 ka Israelinhon nga magpadala sa pagganyat ni Baal sang Peor. (Numeros 25:1-9) Karon ang kalibutan nagbinuang sa pagpangita niya sang kalipayan sa sekso. Ang mga magasin, mga pamantalaan, mga sine kag mga programa sa telebisyon labi pa nga maathag nga nagaganyat sa malaw-ay nga intereses. Apang, subong mga Cristiano nga ginatuytuyan sang espiritu sang Dios, dapat naton likawan ina nga mga pagsulay.—1 Corinto 14:20.

19. (a) Sa anong pagsulay ni Satanas labi na nga madali madala ang pamatan-on nga mga Cristiano? (b) Tuhoy sa ano mangin alisto ang pamatan-on nga mga Cristiano?

¹⁹ Ang isa pa ka padugi ni Satanas amo ang pagpukaw niya sa kaluyag para sa makalilipay nga kalangkag. Ang mga pamatan-on labi na nga madali madala sa sining pagsulay. Sing masami, ginahimu nila ang tanan para sa lainlain nga sahi sang hampang, tumalan-aw man ukon humalampang. Apang magahimu ini sa ila nga mangin “mga mahigugmaon sa kalipayan sa baylo sang sa Dios.” (2 Timoteo 3:4) Ginaliso sang iban nga pamatan-on ang kaluyag sa kalipay sa dagway sang musika kag ambahanon nga nagapadaku sang imoralidad kag kasingki. Sa pagkamatuod, kinahanglan gid ang paghalong, kay ina nga mga butang sarang magpukaw sa lamharon nga mga Cristiano pahilayo sa banas sang pagkamatarong kag pagkahalangdon.—Salmo 16:11; 2 Pedro 2:20-22.

20. Paano ginagamit ni Satanas ang kahadlok?

²⁰ Ginagamit man ni Satanas ang pagsulay nga kahadlokan ang tawo. Kinaugali ang mag-isol kon yagutaon kag ang magtinguha nga likawan ang pag-antos. Ina nga kahadlok nagtiklod sa madamu nga magkompromiso sa panahon sang kabudlayan. (Hulubaton 29:25; Hebreo 2:14, 15) Paagi sa bulig sang Dios indi gid naton pahanugotan nga mahanabo ina sa aton.

21. Ngaa indi kita dapat malandas sang pagkalas-ay?

²¹ Ang isa sa mga padugi ni Satanas amo ang pagtinguha niya nga palas-ayon ang mga alagad sang Dios agod mag-untat sila. Pat-od nga gintilawan sang Yawa ini nga himuon kay Job, nagtiklod sa iya nga handumon nga mapatay ukon nga wala matawo. Gintilawan man ini ni Satanas kay Moises. (Job 3:1-13; 14:13; Numeros 11:10-15) Wala magpadala ining matutom nga mga lalaki nga magluya. Sa baylo, ginsunod nila ang balaan nga kabubut-on. Kaangay nila, indi kita dapat magpadala sa bisan anong kahimtangan, kay sakdagon kita ni Jehova kag indi niya pahanugotan ang matarong nga mationg.—Salmo 55:22.

Magtindog nga Malig-on!

22, 23. Agod makatindog nga malig-on batok sa “mga daya” ni Satanas kag indi mahimu ang iya mga padugi, ano ang dapat naton nga himuon?

²² Bangod sang kadalag-an ni Satanas nga mapahilayo ang daku nga kadam-an sang katawhan gikan kay Jehova nga Dios, ano ang dapat naton nga himuon? Subong maisog nga mga saksi ni Jehova, dapat kita “magtindog nga malig-on batok sa mga daya ang yawa,” batok sa iya mga padugi, sa iya mga panglimbong kag sa iya mga taktika. (Efeso 6:11) Busa mapamatod-an naton sia nga malaut, matinaastaason nga butigon nga amo gid man sia.

²³ Apang, indi kita makatindog nga malig-on batok kay Satanas sa aton kaugalingon nga kusog, kay may mas daku sia nga gahom, mas masangkad nga ihibalo kag mas daku nga eskperiensia sang sa aton. Agod makatindog nga malig-on batok sa iya, kon amo, dapat nga himuslan naton ang tanan nga mga butang nga ginaaman ni Jehova nga Dios para sa iya katawhan. Nian mapaslaw naton inang malimbungon nga kaaway!

Madumduman Mo Bala?

◻ Ano nga mga kaaway ang ginagamit ni Satanas agod matigayon ang iya malaut nga katuyoan?

◻ Ano nga tindog ang ginhimu ni Satanas tuhoy kay Jehova?

◻ Paano ginapamatod-an snag Biblia nga si Satanas isa ka persona?

◻ Ano ang pila ka paagi nga ginagamit sang Yawa agod sulayon kita, kag paano naton malikawan nga malandas sini?

[Piktyur sa pahina 11]

Ang mga Saksi ni Jehova wala nagapadala sa kahadlok sa tawo