Maghanda Kamo!

“Maghanda kamo, kay sa takna nga wala ninyo ginahunahuna magakari ang Anak sang tawo.”—LUCAS 12:40.

1. Ano ang ginsiling ni Cristo nahanungod sa kinahanglanon nga pirme magbantay?

GINPALIG-ON ni Jesucristo ang iya mga sumulunod nga magmabinantayon. Halimbawa, nagsiling sia: “Apang, andam kamo; nasugid ko na sa inyo ang tanan nga butang. . . . Kag nian makita nila ang Anak sang tawo nga nagakari sa mga panganud nga may dakung gahom kag himaya. . . . Nahanungod sadtong adlaw ukon sadtong takna walay isa nga makahibalo, bisan pa ang mga manugtonda sa langit, ukon ang Anak, kundi ang Amay lamang. Padayon sa paghulat, padayon sa pagmata, kay wala ninyo mahibaloi kon san-o ang gintangdo nga tion. Kaangay sa tawo nga nagapanlakatan sa malayong duta kag sang ginbiyaan niya ang iya balay kag ginhatag sa iya mga ulipon ang pagbulut-an, sa tagsatagsa sang iya buluhaton, magsugo man sa manugbantay sang gawang sa pagbantay. Busa padayon kamo sa pagbantay, kay wala kamo makahibalo kon san-o maabot ang agalon sang balay, kon sa kahaponon ukon sa tungang-gab-i, ukon sa tigpamalo sang manok ukon sa kaagahon; basi kon mag-abot sia sa hinali masapwan niya kamo nga nagakatulog. Kag ang ginsiling ko sa inyo ginasiling ko sa tanan, Padayon sa pagbantay.”—Marcos 13:23-37.

2. Ngaa ang modelo nga pangamuyo nagapanugda sing pagkamabinantayon, apang paano gindula sang mga iglesia sang Cristiandad ang pagpaabot sa Ginharian?

² Ang nauna nga mga artikulo naghatag sing bugana nga pamatuod gikan sa wala ginadampigan nga mga ginhalinan nga ang mga iglesia sang Cristiandad wala ‘nagpadayon sa pagbantay.’ Suno sa The Catholic Encyclopedia, gindula nila ang pagpaabot sa Ginharian paagi sa pagsiling nga ang “ginharian sang Dios nagakahulugan . . . sang paggahom sang Dios sa tagipusuon,” gani nagakuha sang tanan nga kahulugan sa modelo nga Pangamuyo sang Ginuo nagahunahuna sing una nga ang ngalan kag kabubut-on sang Dios pasipalahan, nga ang iya Ginharian wala pa magkari.” Huo, ang modelo nga pangamuyo nagahunahuna sing una sang pagkamabinantayon. Sing espesipiko, para sa anong mga butang ang mga Cristiano magapabilin nga magbantay?

“Magbantay”—Para sa Ano?

3. Ngaa indi mapasapayanan sang mga Cristiano ang tuhoy sa tion?

³ Ang maid-id nga pag-usisa sa mga tagna sang Biblia tuhoy sa “Katapusan nga Butang” nagapakita sang eksakto nga mga butang diin ang mga Cristiano “magbantay.” Una, indi nila dapat kalimtan ang tuhoy sa tion, kay si Jesucristo naghambal tuhoy sa “gintangdo nga tion” nga nahibal-an lamang sang iya Amay. (Marcos 13:32, 33) Sing dugang, ginsilingan ni Jesus ang iya mga disipulo nga ang Jerusalem “pagatapakon sang mga pungsod, tubtob ang gintangdo nga tion sang mga pungsod [mga Gentil] matuman.” (Lucas 21:24) Sing hayag, ginhatag ni Jesus sa iya mga sumulunod ining impormasyon agod buligan sila nga makilal-an ang panag-on sang katapusan, kay bahin ini sang iya sabat sa pamangkot: “Manunudlo, san-o bala magakahanabo ini, kag ano bala ang tanda kon ini malapit na matabo?”—Lucas 21:7.

4. Sa anong “tanda” ang mga Cristiano padayon nga magbantay?

⁴ Dugang sa paghatag nila sing igtalupangod sa tion, dapat bantayan sang mga Cristiano ang ginpangabay nga “tanda,” nga ginsambit man sa Mateo 24:3 kag Marcos 13:4. Ining madamu sing bahin nga tanda—lakip ang internasyonal nga mga inaway, mga gutom, mga linog, mga kamatay kag paghingabot sa matuod nga mga Cristiano—magahisanto sa katumanan sang mga tagna sa tion agod makilal-an ang “kaliwatan” nga “indi magtaliwan” tubtob ang tanan nga butang magakahanabo sa panag-on sang katapusan.—Lucas 21:10-12, 32.

5. Paano mangin kaupod si Cristo sang iya matuod nga mga sumulunod sa bug-os nga siglo, apang amo bala sini ang buot silingon niya sang ginhatag niya ang tanda sang iya “presensia”?

⁵ Anong importante nga mga hitabo may kaangtanan sa “konklusion sang sistema sang mga butang” ang ibalita sining tanda? Ginpamangkot si Jesus sang iya mga disipulo: “Ano ang tanda sang imo presensia [Griego, pa·rou·siʹa]?” (Mateo 24:3) Ano ang buot silingon sang “presensia” ni Cristo? Labi pa sang sa pagkakaupod niya sa iya matuod nga mga sumulunod kon magkit-anay sila liwat ukon magtuman sang ila buluhaton nga maghimu sing disipulo. Pagasakdagon niya ang iya mga sumulunod sa sining paagi sing siniglo. (Mateo 18:20; 28:18-20) Bisan ang mga teologo sang Cristiandad nagaako nga ang tinaga “presensia” may pinasahi nga kahulugan. Ang The New International Dictionary of New Testament Theology nagasiling: “Ang ideya sang Parousia nahigut sa pagpaabot sang iglesia sa pagluntad ni Cristo sa katapusan sang dag-on.” Kutob sa isa ka ukbong tubtob sa pihak, ginalaygayan sang Cristianong Griegong Kasulatan ang mga Cristiano nga magkabuhi nga nagapaabot sang presensia ni Cristo.—Mateo 24:3, 27, 37, 39; Santiago 5:7, 8; 2 Pedro 3:3, 4; 1 Juan 2:28; Bugna 1:7; 22:7.

6. (a) Ano ang buot silingon sang presensia ni Cristo para sa sining malauton nga sistema sang mga butang? (b) Paano maapektohan sang presensia ni Cristo ang hinaplas nga mga Cristiano nga napatay sing matutom kag buhi gihapon sa duta?

⁶ Ang presensia ni Cristo magakahulugan sang “konklusion sang sistema sang mga butang.” (Mateo 24:3; Marcos 13:4) Magakahulugan ini nga ang karon malaut nga sistema sang mga butang nagsulod na sa iya “panag-on sang katapusan,” ukon “katapusan nga mga adlaw.” (Daniel 12:4, 9; 2 Timoteo 3:1-5) Magakahulugan ini nga nabaton ni Cristo sa iya Amay ang mando nga himuon ang pagginahom sang Ginharian sa ibabaw sang duta ‘sa tunga sang iya mga kaaway.’ (Salmo 110:2; 2:6-9; Bugna 11:15-18) Antes hukman ang kalibutan sa kabilogan, inspeksionon ni Cristo ang iya kaugalingon nga kongregasyon kag banhawon ang hinaplas nga mga Cristiano nga napatay sing matutom. (1 Corinto 15:21, 23; 1 Tesalonica 2:19; 3:13; 4:13-17; 2 Tesalonica 2:1) Ang hinaplas nga mga Cristiano nga buhi pa sa duta kag matutom nga nagapanghikot subong “ulipon” ni Cristo paagi sa pagpablilin nga nagabugtaw sa espirituwal kag nagaaman sang espirituwal nga “pagkaon sa nagakaigo nga tion” pagatangdoan ni Cristo “sang tanan niya nga pagkabutang,” ukon mga intereses sang ginharian sa duta. (Mateo 24:45-47; Lucas 12:42-44) Ining “matutom kag mainandamon nga ulipon” magapakigbahin kag magadumala sang bug-os kalibutan nga hilikuton sang pagbantala ‘sining maayong balita sang ginharian’ kag ‘ugaling magaabot ang katapusan.’—Mateo 24:14.

7. Bisan sa presensia ni Cristo, sa anong iban pa nga tanda anong iban pa nga tanda ang mga Cristiano padayon nga magbantayk kag ngaa padayon nila nga ipangamuyo na “magkari” ang Ginharian sang Dios?

⁷ Ang matuod nga mga Cristiano “padayon nga magabantay” para sa sining tanan nga butang nga magapamatuod nga nagakabuhi sila sa tion sang presensia ni Cristo kag sa “konklusion sang sistema sang mga butang.” Apang bisan sa “panag-on sang katapusan,” padayon sila nga magabantay para sa “tanda sang Anak sang tawo,” sa iya “pag-abot” agod hukman ang malaut nga sistema sang mga butang ni Satanas. (Mateo 24:30, 44; Marcos 13:26, 35; Lucas 12:40; 21:27; 2 Tesalonica 1:7-10) Sa amo, bisan pa nga ‘presente’ sia kag ang iya Ginharian natukod na, sia kag ang iya Ginharian dapat gihapon “magkari” kag “magadugmok kag magatapos” sa mga pungsod kag mga ginharian sang kalibutan ni Satanas. (Daniel 2:44) Nagapaathag ini kon ngaa, pagkatapos mahatag ang mga kaundan sang “tanda” sang iya presensia, si Cristo nagdugang: “Kon Makita ninyo nga nagakahanabo ining mga butang, makilala ninyo nga malapit na ang ginharian sang Dios.” (Lucas 21:31) Huo, bisan sa presensia ni Cristo, ang mga Cristiano dapat gihapon mangamuyo nga magkari ang Ginharian sang Dios, kag kinahanglan gihapon nila ang “padayon nga maghulat” kag “padayon nga magbugtaw” para sa gintangdo nga panag-on sang “katapusan” kag sang ila “pagtubos.”—Marcos 13:7, 29, 32-37; Lucas 21:9, 28.

Sin-o ang Napamatod-an nga ‘Mabinantayon’?

8. Isaysay sing malip-ot ang mga butang nga padayon nga bantayan sang mga Cristiano.

⁸ Bag-o lang naton nakita nga ang mga Cristiano dapat magkabuhi nga nagapaabot sa katapusan sang “gintangdo nga panag-on sang mga pungsod.” Dapat nila bantayan ang ‘tanda sang presensia ni Cristo kag sang konklusion sang sistema sang mga butang.’ Dapat nila paabuton ang pagkabanhaw sang hinaplas nga mga Cristiano nga napatay sing matutom kag ang maathag nga identipikasyon sang “matutom kag mainandamon nga ulipon” nga klase nga pagatangdoan sang dutan-on nga intereses sang Ginharian ni Cristo. Sa katapusan, ining “ulipon” padayon nga magaaman sing espirituwal nga pagkaon, samtang nagapanguna sa pagbantala ‘sining maayong balita sang ginharian . . . sa tanan napuy-an nga duta’ antes “ang katapusan.” “Ang tanda sang Anak sang tawo” magaluntad paagi sa iya “pag-abot” agod laglagon ang malauton nga sistema sang mga butang ni Satanas.

9. Sin-o ang napamatod-an nga nagabantay sa katapusan sang “gintangdo nga panag-on sang mga pungsod,” kag paano nabuligan sang Zions’ Watch Tower ang mga Cristiano nga padayon nga mangin alisto sa espirituwal?

⁹ Sin-o ang napamatud-an nga “nagabantay” sa sining tanan nga butang? Sang temprano sang 1876, si Charles T. Russel sang Pittsburgh, Pennsylvania, maukod nga nagabantay sa katapusan sang “gintangdo nga panag-on sang mga pungsod,” ukon “panag-on sang mga Gentil.” (King James Version) Sadto nga tuig ginbalhag niya ang artikulo nga natig-ulohan “Panag-on sang Gentil: San-o Ini Matapos?” Sa sini ginsiling niya nga “ang pito ka panag-on matapos sang A.D. 1914.” Kutob sang 1880 padayon, ina man nga impormasyon ginbalhag sa mga kolumna sang Zion’s Watch Tower. Ang Marso 1880 nga guwa nagsiling: “‘Ang Panag-on sang mga Gentil’ naglab-ot tubtob sang 1914, kag ang langitnon nga ginharian indi magapanghikot sing bug-os tubtob sadto.” Matuod, ang mga estudyante sang Biblia nga nagsulat sadtong mga artikulo wala anay sing sibu Biblikanhon kag maragtason nga paghangop kon ano gid ang buot silingon sadtong “gintangdo nga panag-on sang mga pungsod,” subong sang paghangop naton karon sa sini.a Apang ang importante nga punto amo nga sila ‘nagbantay’ kag nagbulig sa ila mga masigka Cristiano nga mangin alisto sa espirituwal.

10. Paano gin-athag ang matuod nga kahulugan sang “presensia” ni Cristo?

¹⁰ Yadtong amo man nga grupo sang mga estudyante sang Biblia nga nakig-upod kay Charles Russell kag sa magasin nga Zions’s Watch Tower nagbulig man sa sinsero nga mga Cristiano nga mahangpan nga ang “presensia” ni Cristo dapat hangpon nga dimakita, kag nga indi sia magabalik sa duta agod maggahom subong undanon nga hari. Pirme nila ginpatalupangod sa “panimalay” sang Agalon ang mga hitabo sang kalibutan may kahilabtanan sa “tanda” sang presensia ni Cristo kag “sang panag-on sang katapusan.”

11. (a) Ano ang wala mahangpi sing bug-os sadto nga tion tuhoy sa dutan-on nga mga ginharian kag tuhoy sa hinaplas nga mga Cristiano nga “sagmiton”? (b) Anong mas maayo nga paghangop naton karon sa Daniel 2:44 kag 1 Tesalonica 4:15-17?

¹¹ Sa pagkamatuod, ginhunahuna anay nga ang pagkatukod sang Ginharian sa mga langit magakahulugan sang gilayon nga pagkalaglag sang dutan-on nga mga ginharian kag nga ang hinaplas nga mga Cristiano “pagasagmiton” agod makigbuylog sa napatay na nga mga hinaplas nga mga Cristiano nga pagabanhawon sa panahon sang presensia ni Cristo. (2 Tesalonica 2:1) Apang sin-o ang makabasol sa ila bangod sang indi bug-os nga paghangop sadto nga tion nga ang dakung hilikuton sa pagtipon mahanabo pa sa ulot sang ginsugoran kag sang katapusan sang katumanan sang Daniel 2:44, ukon nga ang ‘pagkanasagmit’ nga ginsambit sa 1 Tesalonica 4:15-17 nagapatuhoy sa gilayon nga pagbanhaw sa hinaplas nga napatay pagkatapos sang ginsugoran sang nahaunang pagkabanhaw?—1 Corinto 15:36, 42-44; Roma 6:3.

12. (a) Ano ang ginapaabot ni Cristo nga masapwan sa iya matutom nga “ulipon” nga ginahimu kon mag-abot sia agod inspeksionon ang iya panimalay, kag sin-o ang nasapwan niya nga nagahimu sina? (b) Ano ang padayon nga ginhimu sang matutom nga “ulipon” kutob sadto?

¹² Nahangpan naton ining mga butang karon, bangod sang nagadugang nga kapawa nga ginapaiwag sa Pulong sang Dios paagi sa “matutom kag mainandamon nga ulipon” nga klase. (Hulubaton 4:18) Nahanungod sina nga “ulipon,” si Jesus nagsiling: “Sin-o bala nian ang ulipon nga matutom kag mainandamon, nga ginpadumala sang iya agalon sa iya panimalay, sa paghatag sa ila sing pagkaon sa nagakaigo nga tion? Malipayon yadtong ulipon nga kon mag-abot ang iya agalon masapwan sia nga nagahimu sing subong. Sa pagkamatuod, nagasiling ako sa inyo, nga padumalahon Sia niya sa tanan niya nga pagkabutang.” (Mateo 24:45-47) Sang gin-inspeksion sang naghari na nga si Ginuong Jesus ang iya panimalay sang 1919, nasapwan niya ang grupo sang mga Cristiano nga nakig-upod sa magasin nga Lalantawan nga nagapanikasog sing matutom nga “padayon nga magbantay” paagi sa bulig sang espirituwal nga “pagkaon sa nagakaigo nga tion.” Tubtob karon, inang “ulipon” nga kalase matutom nga padayon nga nagaaman sing espirituwal nga pagkaon agod magahimu sa “panimalay” sang Agalon kag sa ila mga kaupdanan nga “padayon nga magbantay, padayon nga magmata.”—Marcos 13:33.

Pagkaalisto ukon Pagkauyaya?

13. Anong mga pamangkot ang dapat ipamangkot sadtong nagamulay sa mga Saksi ni Jehova sa ila kaugalingon?

¹³ Mahapos para sa establisado nga mga iglesia sang Cristiandad kag sang iban nga mga tawo nga mulayon ang mga Saksi ni Jehova bangod ang ila mga publikasyon, kon kaisa, nagsiling nga ang pila ka butang mahanabo sa isa ka pat-od nga petsa. Apang indi bala ina nga buhat nahisuno sa laygay ni Cristo nga “padayon nga magbantay”? (Marcos 13:37) Sa pihak nga bahin, ginpalig-on bala sang mga iglesia sang Cristiandad ang Cristianong pagkamabinantayon paagi sa pagtudlo nga ang Ginharian amo “ang pagginahom sang Dios sa aton tagipusuon’”? Sa baylo, wala bala nila ginpalig-on ang espirituwal nga pagkauyaya paagi sa pagkabig sa pagpaabot sa “katapusan” nga “walay pulos” ukon “indi importante nga mito”? Ginpadaku bala sang mga apostata nga nagasiling nga ang “katapusan nga mga adlaw” nagsugod sang Pentecostes kag nagtuptop sang bug-os nga Cristianong Dag-on ang Cristianong pagkaalisto? Sa baylo, wala bala nila ginpalig-on ang espirituwala nga pagtulog?

14. Sin-o ang halimbawa sang matutom nga mga alagad ni Jehova sang nagligad ang nalangkag katama nga makita nga matuman ang mga katuyoan sang Dios?

¹⁴ Matuod, ang iban nga mga pagpaabot nga daw ginsakdag sang kronolohiya sang Biblia wala magmateryalisar sa ginpaabot nga petsa. Apang indi bala nga mas maayo pa ang magsayop bangod sang sobra nga kalangkag nga makita ang katuyoan sang Dios nga natuman sang sa magtulog sa espirituwal tuhoy sa katumanan sang tagna sang Biblia? Indi bala nga si Moises nakahimu sing 40 ka tuig nga sayop nga kalkulasyon sa pagtinguha nga magpanghikot sing una sa tion agod dulaon ang kapipit-an sang Israel? (Genesis 15:13; Binuhatan 7:6, 17, 23, 25, 30, 34) Indi bala ang mga apostoles ni Cristo nalangkag kaayo nga makita nga natukod na ang Ginharian, indi na paghambalon ang ila bug-os nga paghangop sing sayop tuhoy sa kon ano gid ang Ginharian? (Binuhatan 1:6; ipaanggid ang Lucas 19:11; 24:21) Indi bala ang hinaplas nga mga Cristiano sa Tesalonica dimapailubon nga makita “ang presensia sang aton Ginuong Jesucristo” kag “ang adlaw ni Jehova”?—2 Tesalonica 2:1, 2.

15. Anong halimbawa ang nagapakita nga indi dimakasulatanhon gamiton ang kronolohiya sa pagtinguha nga mahibal-an kon san-o ang mga katuyoan sang Dios matuman na, kag ano ang isinggit sang madamu sa matutom nga mga alagad ni Jehova, sang nagligad kag karon?

¹⁵ Indi gid man dimakasulatanhon ang paggamit sa kronolohiya sa panikasog nga mahibal-an ang “gintangdo nga panag-on” para sa katumanan sang katuyoan sang Dios. (Habacuc 2:3) Ginbantabanta ni Daniel kon san-o matapos ang kahapayan sang Jerusalem. (Daniel 9:1, 2) Ginapaabot sang nahaunang-siglo nga matutom nga Judiyong nagkalabilin ang pagkari sang Mesias bangod ginbantabanta nila ang katapusan sang isa ka panag-on, pasad sa tagna. (Daniel 9:25; Lucas 3:15) Sang talipusposan sang ika-19 ka siglo ang mga Cristiano nagkabuhi nga nagapaabot sa pagginahom sang Ginharian sang Dios antes sang 1914 bangod ginbantabanta nila kon san-o matapos “ang gintangdo nga panag-on sang mga pungsod.” (Lucas 21:24; Daniel 4:16, 17) Busa, halangpunon kon ngaa ginhimu ang mga panikasog nga gamiton ang iban nga mga tanda sa panahon sang Biblia agod tinguhaan nga mahibal-an kon san-o ang madugay nga ginahulat nga mga paglaum mahimu mangin katunayan. Ang matutom nga mga alagad ni Jehova sang nagligad nagsinggit: “Tubtob san-o pa, O Jehova?”—Isaias 6:11; Salmo 74:10; 94:3.

Ngaa “Maghanda Kamo”

16. (a) Dapat bala hangpon ang Marcos 13:32 nga nagakahulugan nga indi kita dapat magpakita sing interes sa kon san-o magaabot ang katapusan? (b) Ano nga “tanda” ang makita, apang anong iban pa nga “tanda” ang ginahulat naton?

¹⁶ Sanglit maathag nga ginsiling ni Jesus nga wala sing tawo ang makahibalo sang “adlaw” ukon “takna” nga mandoan sang Amay ang iya anak nga ‘magkari’ batok sa malaut nga sistema sang mga butang ni Satanas, basi ang iban mamangkot: ‘Ngaa hilingagawon gid ang magkabuhi nga nagapaabot sa katapusan?’ Hilingagawon ini bangod nahisuno man sa sini, si Jesus nagdugang: “Padayon nga maghulat, padayon nga magmata . . . padayon nga magbantay.” (Marcos 13:32-35) Ang “tanda” sang parousia ni Jesus nakit-an na kutob sang 1914. Ginahulat naton karon “ang tanda sang Anak sang tawo,” kon ‘mag-abot’ sia subong Manugtuman sang Pamatbat ni Jehova.

17, 18. (a) Ngaa ginmandoan ni Jesus ang nahaunang-siglo nga mga Cristiano nga magpalagyo gikan sa Jerusalem kon makita nila ang tanda sang nagahilapit nga kalaglagan sini? (b) Ngaa makatalagam nga palantangon ang tuhoy sa pagkahilingagawon sang aton tion?

¹⁷ Sang ginhatagan ni Jesus sing tanda ang nahaunang-siglo nga mga Cristiano sa Judea diin mahibal-an nila nga nag-abot na ang tion nga magpalagyo gikan sa Jerusalem, gin-insister niya ang kinahanglanon nga maghulag dayon. (Lucas 21:20-23) Ngaa magdalidali gid, samtang halos apat ka tuig ang nagligad kutob sa pagguwa sang tanda sang 66 C.E., kag aktuwal nga pagkalaglag sang Jerusalem sang 70 C.E.? Bangod nahibaloan ni Jesus nga kon magpalantag sila, ipaisol nila ang ila pagpalagyo kag sa ulihi maabtan sang Romanong mga hangaway.

¹⁸ Sing kaanggid sa karon, mas makatalagam para sa mga Cristiano nga palantangon ang pagkahilingagawon sang aton tion kag adoptahon ang “relaks” nga panimuot nga nagapakita sing pangduhaduha tuhoy sa pagkalapit sang katapusan.

19. Anong paandam ang ginhatag nanday Pedro kag Jesus?

¹⁹ Ang parousia, ukon presensia, ni Cristo naglawig na karon sa 70 ka tuig, kag ang iya “pagkari” sa “adlaw ni Jehova” agod hukman ang kalibutan ni Satanas madasig nga nagahinampot. Si apostol Pedro nagsiling nga ining adlaw “magakari subong sang makawat,” kag nagdugang sia nga dapat naton ‘hulaton kag pirme hunahunaon ang presensia sang adlaw ni Jehova.’ (2 Pedro 3:10-12) Si Jesus nagpaandam man sa aton karon: “Andam kamo sa inyo mga kaugalingon basi ang inyo mga tagipusuon mabug-atan sang patuyang kag kahulugbon kag mga paghimud-os sining kabuhi, kag yadtong adlaw magaabot sa inyo sing hinali subong sang siod. . . . Padayon nga magmata.”—Lucas 21:34-36.

20. Sa ano dapat kita magpasalamat, kag paano kita maamligan sang nagakaigo Cristianong pagpaabot?

²⁰ Daw ano ka malipayon kag daw ano ka mapasalamaton ang mga Saksi ni Jehova nga padayon sila nga ginpabugtaw sa espirituwal sang matutom kag mapisan nga “ulipon” nga klase! Ang nagakaigo Cristianong pagpaabot magaamlig sa aton sa sining makatalagam nga “katapusan nga mga adlaw” kag magapahulag sa aton nga makigbahin sing makugi sa pagbantala ‘sining maayong balita sang ginharian.’ Busa mabuligan naton ang iban nga padayon nga magbantay kag makalampuwas pasulod sa bag-ong sistema sang mga butang diin “magapuyo ang pagkamatarong.”—2 Timoteo 3:1-5; Mateo 24:14; 2 Pedro 3:13.

[Footnote]

Madumduman Mo Bala?

◻ Ngaa indi dapat pasapayanan sang mga Cristiano ang tion sa kronolohiya sang Biblia?

◻ Ano ang natigayon nga pinasahi nga kahulugan sang tinaga “presensia”?

◻ Ngaa nagakaigo gihapon nga ipangamuyo nga magkari ang Ginharian sang Dios?

◻ Paano mo sabton yadtong nagamulay sa mga Saksi ni Jehova tuhoy sa kronolohiya?

◻ Ngaa makatalagam nga palantangon ang pagkahilingagawon sang aton tion?

[Kahon sa pahina 18]

Mga Butang nga Dapat Padayon nga Bantayan sang mga Cristiano

Ang katapusan sang “gintangdo nga panag-on sang mga pungsod.”—Lucas 21:24.

“Ang tanda” sang presensia ni Cristo “kag ang konklusion sang sistema sang mga butang.”—Mateo 24:3—25:46.

Ang maathag nga pagkakilala sa “matutom kag mainandamon nga ulipon” nga klase.—Mateo 24:45-47.

Ang “tanda sang Anak sang tawo,” kon ‘magkari’ sia agod himuon ang paghukom ni Jehova.—Mateo 24:30.