Ang Pulong sang Dios Buhi

Gin-apresyar ni Rut ang Katawhan sang Dios

ANG magayon lamharon nga babayi diri amo si Rut, nga nagpuyo sa Moab, nasidlangan sang Patay nga Dagat. Bisan nga ginpadaku sia sa tunga sang mga Moabita nga nagasimba sa butig nga mga dios, luyag niya alagaron ang matuod nga Dios, si Jehova, upod sa iya katawhan sang Israel. (Numeros 25:1-5) Sang matigayon niya ini nga kahigayunan, ginhugakom niya ini nga may kahanuot amo kon ngaa napamahal sia sa iban pa nga mga sumulimba ni Jehova nga nagakilala sa iya subong “ekselente nga babayi.”—Rut 3:11.

Ang tiggulutom sa Israel ang naghatag kay Rut sining kahigayunan nga alagadon si Jehova. Subong resulta sang tiggulutom, ang apat sa pamilya gikan sa Betlehem nagsaylo sa duta sang Moab. Amo ini sila ang pamilya nga makita diri—si Elimelec, ang iya asawa nga si Noemi kag ang ila mga anak nga sanday Mahalon kag Quelion. Apang dili madugay sang ulihi napatay si Elimelec. Sang ulihi ginpangasawa ni Mahalon si Rut, kag ginpangasawa naman ni Quelion ang isa pa ka Moabita nga si Orpa. Gani bangod sang bana kag ugangan nga nagasimba kay Jehova, nakilala ni Rut ang matuod nga Dios.

Apang, wala magdugay sanday Mahalon kag Quelion lunsay napatay, nga nagbilin sa tatlo ka babayi nga wala sing mga bana ukon kabataan. Handurawa lamang ang ila kasubo. Ano ang ila himuon? Nahibaloan ni Noemi nga tapos na ang tiggulutom sa Israel. Gani namat-od sia nga magbalik sa iya katawhan sa Betlehem. Mahal nanday Rut kag Orpa ang ila ugangan kag nag-upod sila sa iya. Apang sang nagalakat na sila, subong sang imo makita, ginsilingan ni Noemi ang mga babayi: ‘Lakat kamo kag magbalik sa inyo mga iloy.’

Ginhalokan ni Noemi ang duha sa pagpaalam, kag naghibi sila. “Indi, maupod kami pabalik sa imo katawhan,” siling nila. Si Noemi nagsabat: ‘Balik kamo, mga anak ko.’ Gani si Orpa naglakat pauli. Apang, wala maglakat si Rut.

Ginbalikid ni Noemi si Rut kag nagsiling: “Balik ka sunod sa imo bilas nga babayi.” Apang si Rut nagsabat sing makahalaylo nga kahanuot: “Dili ako pagpilita sa pagbiya sa imo, sa pagbalik gikan sa pagsunod sa imo; kay bisan diin ka makadto magakadto ako; kag bisan diin ka magpabilin magapabilin ako. Ang imo katawhan mangin akon katawhan, kag ang imo Dios akon Dios.” (Rut 1:1-17) Gani nagpauli si Rut kaupod ni Noemi kag nangin bahin sang katawhan sang Dios nga Israel.

Ikaw bala, kaangay ni Rut, nakakilala sa matuod nga Dios, si Jehova, kag sa katawhan nga nagasimba sa iya? Kon amo, kabay nga may determinasyon man kamo nga sakdagon sing matutom ang mga alagad ni Jehova subong sang ginhimu anay ni Rut!