Paano Nimo Ginatamod ang Ngalan ni Jehova?

INING makahalangkat nga pamangkot ginpautwas para sa mga delegado sang “Pag-uswag sa Ginharian” nga Distrito nga mga Kombension sang mga Saksi ni Jehova. Gin-updan ini sang pagpaguwa sa bag-o nga broch­ure nga, The Di­vine ­Name That Will En­dure For­ev­er. Ngaa importante nga ginpamangkot ina?

Gikan mismo sa dutan-on nga maragtas sang pagpanuga, ang ngalan ni Jehova gingamit sa pagpatuhoy sa lamang matuod nga Dios. (Genesis 2:4; 4:1) Ang “abyan ni Jehova” nga si Abraham naggamit sini sing hilway. (Santiago 2:23; Genesis 18:30-33) Naton-an ni Moises nga si Jehova amo ang ngalan sang Manunuga “tubtob sa tion nga dinapat-od.” (Exodo 3:15) Ginpadayag ni Jesus ang ngalan sang Dios sa iya mga sumulunod. (Juan 17:6) Kag ang iya mga disipulo naglakbay sing malayo agod buligan ang mga tawo nga ‘magtawag sa ngalan ni Jehova kag maluwas.’—Binuhatan 2:21.

Apang, wala pagpadunggi sang iban ang ngalan. Ang mga Israelinhon nga napaslawan sa pagtuman sa kasugoan ni Jehova nagpasipala sa iya ngalan. (Levitico 18:21; 19:12) Ang mga Israelinhon sa tiilan sang Bukid sang Sinai nga naggamit sang ngalan sang Dios may kahilabtanan sa ila pagsimba sa bulawan nga baka nagdala sing pasipala sa iya ngalan. (Exodo 32:4, 6) Sing kaanggid, ang mga Judiyo nga sang ulihi superstisyuso nga nagdumili sa pagsambit sa ngalan sang Dios wala magpadungog sini, subong man ang Judiyong mga mistiko nga nagtamod sini subong simbulo sang mahiko.

Ang wala sing kaalam nga nagaangkon nga mga Cristiano, subong man, nagtabon sa ngalan sang, kaangay sang mga Judiyo, wala nila ini paggamita ukon ginkuha ini gikan sa Griegong pagbadbad sang Hebreong Kasulatan. Kag ini, man, nagdul-ong sa moderno nga pag-abuso. Ang mga tawo karon wala nagasapak sa ngalan sang Dios, nagatamod sini subong indi importante ukon indi kinahanglanon para sa pagsimba.

Padayon nga Padunggi ang Ngalan

Sa katunayan, ang mga Saksi ni Jehova lamang ang nagasunod sa halimbawa sang dumaan nga mga disipulo ni Jesus nga nagabulig sa mga tawo sa bug-os nga duta nga ‘magtawag sa ngalan ni Jehova kag maluwas.’ Sila lamang ang tunay nga matawag nga “katawhan sa iya ngalan.” (Binuhatan 15:14) Apang, posible bala nga kita, man, magapahigad sa ngalan ni Jehova?

Bueno, kon lapason naton ang mga kasugoan ni Jehova kag buhaton ang dimatarong, kita sa katunayan wala nagapadungog sa iya ngalan. (2 Timoteo 2:19) Kag kon gamiton naton ang ngalan ni Jehova sa aton pagsimba, apang ang aton mga buhat nagapakita nga ang aton tunay nga paglaum para sa palaabuton napasad sa materyal nga mga butang ukon sa pila ka bagay nga kaanggid sini, indi kita tuhay gikan sadtong dumaan nga mga Israelinhon nga naggamit sang ngalan ni Jehova apang sing aktuwal nagsimba sa bulawan nga baka. Dugang pa, ang ngalan ni Jehova indi isa ka anting-anting. Kon idis­play naton ang Tetragrammaton ukon ang moderno nga pagtigbatobato sa aton balay ukon sa aton salakyan sa paglaum nga magaamlig ini sa aton ukon magadala sing “swerte,” paano kita mangin tuhay gikan sadtong superstisyuso nga mga Judiyo nga nagtamod sini subong simbulo sang mahiko?—Exodo 20:7.

Busa, importante kon paano naton ginatamod ang ngalan sang Dios. Ang ngalan nga Jehova amo ang dalayon nga handumanan sang Dios. (Exodo 3:15) Nagarepresentar ini sa iya wala nagabag-o nga mga kinaiya kag mga katuyoan. (Deuteronomio 32:3-43) Bugana nga ginapakamaayo ni Jehova yadtong nagakahadlok kag nagapadungog sa iya ngalan. (Malaquias 3:16) Ang bag-o nga broch­ure nga, The Di­vine ­Name That Will En­dure For­ev­er, kag ang iya maid-id nga paghinun-anon sa balaan nga ngalan, sa iya kahulugan kag husto nga paggamit, pat-od nga magabulig sa linibolibo pa nga padunggan ang ngalan sang ila Manunuga, si Jehova.—Bugna 4:11.