Ang “Iban nga mga Karnero” kag ang Panihapon sang Ginuo

“[Si Jesus] amo ang katumbasan tungod sang aton mga sala, kay indi lamang bangod sang aton mga sala, kundi bangod man sa sala sang bug-os nga kalibutan.”—1 JUAN 2:2.

1. Ano ang positibo nga mga resulta sang ‘pagwali sang maayong balita sang ginharian’?

SI Jesus nagsiling: “Iwali ining maayong balita sang ginharian sa bug-os napuy-an nga duta nga panaksi sa tanan nga kapungsoran; kag ugaling magaabot ang katapusan.” (Mateo 24:14) Ang iban sang kaliwatan sang 1914 buhi gihapon agod pamatod-an nga ang mga Saksi ni Jehova matutom nga nagtuman sini nga sugo. Subong resulta, ginatos ka libo ka bunayag sing tagipusuon, nga nasuboan bangod sang kapaslawan sini nga kalibutan, ang nagsabat sing positibo sa maayong balita. Gindedikar nila ang ila kaugalingon kay Jehova nga Dios kag ginhatag ang ila katutom sa iya Ginharian, nagapahibalo sini nga dedikasyon paagi sa pagpabawtismo sa tubig. May yara 179,421 nga naghimu sina nga dalanon sang kaalam sadtong 1984. Busa, nagsiling sila sa katawhan sa ngalan sang Dios: “Magaupod kami sa inyo, kay nabatian namon nga ang Dios nagaupod sa inyo.”—Zacarias 8:23.

2. Ano nga rason ang nagapat-od sang panahon nga tipunon ni Jesus ang iya “iban nga mga karnero”?

² Ining nagadugang nga kadamuon sang “dakung kadam-an” sang mga sumilimba bahin sadtong ginlaragway ni Jesus subong iya “iban nga mga karnero.” (Bugna 7:9, 15; Juan 10:16) May yara sila matahom nga paglaum nga magkabuhi sing dayon sa dutan-on nga paraiso. (Salmo 37:29) Si Jesus nagtagna nga iya tingubon ining matutom nga mga sumulunod pagkatapos anay mahatag ang iya bug-os nga igtalupangod sa pagtipon sa “diutay nga panong” sang mga katulad-karnero nga sa ila ginpatung-an niya ang bag-o nga katipan. (Lucas 12:32; Hebreo 9:15) Nagahunahuna sini nga pagtipon sa duha ka katulad-karnero nga klase sang katawhan pasulod sa “isa ka panong,” mahangpan naton kon ngaa si apostol Juan makahambal nga si Jesus “amo ang katumbasan tungod sang aton mga sala, kag indi lamang tungod sa aton kundi man tungod sa mga sala sang bug-os nga kalibutan.”—1 Juan 2:1, 2.

Pagbalhin sa Punto-de-Vista

3, 4. (a) Anong nagbalhin nga punto-de-vista ang iya sang madamu nahanungod sa pagsaulog sang Panihapon sang Ginuo? (b) Ano ang buot silingon ni Pablo sa pagsiling, “Kay sa masunson sa nagakaon kamo . . . kag nagainum”?

³ Madamu sang bag-o nga mga gintipon sa “iban nga mga karnero” ang nagasaulog anay sang Misa ukon Komunyon, ang pagkasunson kag paagi sang pagsaulog ginagamhan anay sang pagpati sang partikular relihioso nga organisasyon nga ang ila ginakatapoan. Apang, karon, narealisar nila nga ang Panihapon sang Ginuo dapat saulugon sing makaisa lamang kada tuig. Ngaa? Ang Judiyong Paskua ginsaulog sing makaisa lamang kada tuig, kag ginsugdan ni Jesus ang Memoryal sa amo man nga gab-i sang Paskua, sang Nisan 14. Nian ginsilingan niya ang iya mga apostoles: “Padayon nga himoa ini sa handumanan nakon.” Si Pablo nagdugang: “Kay sa masunson nga nagakaon kamo sining tinapay kag nagainum sa tagayan, ginabantala ninyo ang kamatayon sang Ginuo, tubtob nga magkari sia.” (1 Corinto 11:24-26) Maathag nga buot silingon ni Jesus nga dapat saulugon sang iya mga disipulo ang iya kamatayon sa Adlaw sang Paskua, nga nagaabot sing makaisa kada tuig. Busa, ginsaulog ini sing “masunson” sa bug-os nga pagkabuhi sang Cristianong kongregasyon. Sa kamatuoran, ang Memoryal ginsaulog na sa 1,952 ka beses.

⁴ May isa pa ka importante nga pagbalhin sa punto-de-vista nga gin-apresyar sang “iban nga mga karnero” nga klase. Sa baylo nga makig-ambit sa tinapay kag alak subong sang ginhimu anay sang madamu sa ila sa iban nga iglesia, ila karon “ginpasibu” ang ila kahimtangan subong mga tumalan-aw lamang. Ngaa amo sini, kag may yara bala kita Makasulatanhon nga pamatuod sa isa ka paagi nga may bahin para sa mga tumalan-aw kag sa mga umalambit?—2 Corinto 13:11; 2 Timoteo 3:16, 17.

5. (a) Hingadli ang pundamental nga mga tikang nga dapat himuon sang isa agod makabenepisyo sa halad ni Jesus. (b) Ngaa ang Dios nagpanghikot labi na tungod sa 144,000 ka sumulunod ni Cristo Jesus?

⁵ Para kay bisan sin-o nga makabenepisyo gikan sa “katumbasan nga halad” ni Cristo Jesus, may yara pila ka tikang nga dapat himuon, walay sapayan kon ang isa nagalaum sang kabuhi sa langit ukon nagalaum sia sang kabuhi sa dutan-on nga paraiso. Ining pundamental nga mga tikang amo ang masunod: (1) pagkuha sing sibu nga ihibalo sa Pulong sang Dios (Roma 10:13-15); (2) pagtuo (Hebreo 11:6); (3) paghinulsul (Mateo 4:17); (4) pagkombertir (Binuhatan 3:19); (5) pagdedikar (Lucas 9:23); kag (6) pagpabawtismo (Mateo 28:19). Pagkatapos lamang nga mahimu ining mga tikang nga ang Dios nagapanghikot sa pinasahi nga paagi sa isa nga ginpili niya nga mangin isa sang 144,000 ukon “diutay nga panong.” Para sa anong katuyoan? Agod ang isa mangin espirituwal nga anak sang Dios nga may paglaum nga mangin saserdote kag hari kaupod ni Cristo Jesus. (Bugna 20:4, 6) May yara lamang nagkalabilin sadtong espirituwal nga mga anak nga buhi karon, kag sila amo ang nagapakig-ambit sa nagakaigo nga mga emblema. Amo ini kon ngaa ang kalabanan nga mga Saksi ni Jehova mga tumalan-aw lamang kag indi mga umalambit.

Ang Paskua kag ang Memoryal

6. Ngaa ang iban nagasiling nga ang “iban nga mga karnero” dapat makig-ambit sa mga emblema, kag ano nga pamangkot ang ginapautwas sini?

⁶ Ginasiling sang iban nga ang nagadugang nga dakung kadamuon sang “iban nga mga karnero” dapat makig-ambit sa mga emblema. Ang ila pangatarungan amo: Sanglit ang “Kasugoan may landong lamang sang maayong mga butang nga palaabuton,” kag sanglit ang isa sang mga kinahanglanon sang Kasugoan amo ang pagsaulog sa Paskua sang mga Israelinhon kag sang sirkunsidado nga dumuluong nga mga pumuluyo, nagapakita ini nga ang duha ka klase sang mga katulad-karnero sa “isa ka panong” sa idalom sang “isa ka manugbantay” dapat nga makig-ambit sa mga emblema sang Memoryal. (Hebreo 10:1; Juan 10:16; Numeros 9:14) Nagapautwas ini sang isa ka importante nga pamangkot: Ang Paskua isa bala ka tipo sang Memoryal?

7. Sa ano nga bahin ang Paskua “landong sang maayong mga butang nga magaabot”?

⁷ Matuod nga ang pila ka bahin sang pagsaulog sang Paskua sa Egipto walay duhaduha nga natuman kay Jesus. Ginpaanggid ni Pablo si Jesus sa kordero sa Paskua, nga nagasiling, “Si Cristo nga aton paskua ginhalad.” (1 Corinto 5:7) Ang pagwisik sa dugo sang kordero sa Paskua sa ulohan sang ganhaan kag mga talambuan nagpasalig sing kahilwayan para sa panganay sa sulod sang kada Israelinhon nga puluy-an. Sing kaanggid, paagi sa pagwisik sang dugo ni Cristo nga ang “kongregasyon sang mga panganay nga nalista sa mga langit” nakabaton sang ila kahilwayan, ukon “ginhilway paagi sa gawad.” (Hebreo 12:23, 24; Efeso 1:3, 7) Dugang pa, wala sing isa ka tul-an sang kordero sang Paskua ang nabali, kag natuman man ini kay Cristo Jesus. (Exodo 12:46; Salmo 34:20; Juan 19:36) Busa, nagakaigo isiling nga ang Paskua, sa pila ka bahin, isa sang madamu nga mga bahin sang Kasugoan nga nag-aman sing “landong lamang sang maayong mga butang nga palaabuton.” Ining tanan nga mga bahin nagtudlo kay Jesus, “ang Kordero sang Dios.”—Juan 1:29.

8-10. (a) Sa anong importante nga bahin nahanungod sa dugo tuhay ang Paskua gikan sa Memoryal? (b) Paano ang mga katipan nga ginbuylog sa Memoryal nagapadaku sang isa pa ka kinatuhayan? (c) Sa ano nga konklusion kita ginadul-ong sini?

⁸ Apang, ang Paskua indi lamang tipo sang Panihapon sang Ginuo. Ngaa indi? Sang ginsugdan ang Paskua sa Egipto, ang unod sang gin-ihaw nga karnero ginkaon, apang wala pagkaona ang dugo sang kordero sa Paskua. Apang, sa kabaliskaran, sang ginsugdan ni Jesus ang Memoryal sang iya kamatayon espesipiko nga ginmandoan niya yadtong nagtambong anay nga kaunon ang iya unod kag imnon ang iya dugo nga ginasimbulohan sang tinapay kag sang alak. (Exodo 12:7, 8; Mateo 26:27, 28) Sa sining tuman ka importante nga bahin—ang dugo—ang Paskua indi isa ka tipo sang Panihapon sang Ginuo.

⁹ May isa pa ka butang nga indi dapat pasapayanan. Ginhambalan ni Jesus ang duha ka may kahilabtanan nga mga katipan upod sa iya mga disipulo, “ang bag-o nga katipan” kag ‘ang katipan para sa isa ka ginharian.’ (Lucas 22:20, 28-30) Ang duha ka katipan may kahilabtanan sa pagpakigbahin sang mga umalambit subong mga saserdote kag mga hari kaupod ni Cristo Jesus. Apang sa Israel wala sing sirkunsidado dumuluong nga mga pumuluyo ang mahimu nga mangin isa ka saserdote ukon isa ka hari. Sa sini man nga bahin, makita naton ang kinatuhayan sa ulot sang piesta sang Paskua sang Israel kag sang Panihapon sang Ginuo.

¹⁰ Busa sa ano nga konklusion kita ginadul-ong? Ang katunayan nga ang sirkunsidado dumuluong nga pumuluyo nagkaon sang walay lebadura nga tinapay, mapait nga mga hilamon kag kordero sang Paskua wala nagapakita nga yadtong “iban nga mga karnero” sang Ginuo karon nga nagatambong sa Memoryal makig-ambit sa tinapay kag alak.

Importansia sang Pagtambong sa Memoryal

11. Tungod sa anong importante nga mga rason dapat magtambong ang “iban nga mga karnero” sa Memoryal?

¹¹ Apang, nagapakita bala ini nga indi importante para sadtong “iban nga mga karnero” nga klase nga magtambong sa pagsaulog sang Memoryal? Wala gid! Amo ini ang okasyon para sa tanan sang mga katulad-karnero nga sumulunod ni Jesus nga dumdumon si Jesus sa tuman ka pinasahi nga kahulugan. Ang “iban nga mga karnero” sa sina nga okasyon nagadumdom nga sila nakabenepisyo na bangod sang ila pagtuo sa ginpatulo nga dugo ni Cristo tubtob sa kasangkaron nga sila karon gintamod ni Jehova subong “nagbunak sang ila panapton kag nagpaputi sini sa dugo sang Kordero.” Amo ini kon ngaa nakahimu sila sing “balaan nga pag-alagad adlaw kag gab-i sa templo [sang Dios].” (Bugna 7:14, 15) Nadumduman man nila nga dapat nila pirme nga ‘pangitaon si Jehova, ang pagpakamatarong, kag pagkamapainubuson’ nga nagalaum nga makalampuwas sa “adlaw sang kaakig ni Jehova,” kag busa magakalipay sa pagtigayon sang tawhanon nga kahimpitan. Sa ulihi mapahayag sila ni Jehova nga matarong, nga mahanabo pagkatapos matugyan ni Jesus ang Ginharian sa iya Amay.—Sofonias 2:2, 3; 1 Corinto 15:24; Bugna 20:5.

12. Ano nga mga benepisyo ang magaresulta gikan sa pagpamati sa pamulongpulong sa Memoryal?

¹² Ang isa pa ka importante nga rason nga magtambong amo ang katunayan nga ang mga kamatuoran nga ginahambalan sa pamulongpulong sa Memoryal amo ang “madalom nga mga butang sang Dios,” ‘ang matig-a nga pagkaon sang mga hamtong,’ indi lamang ang gatas sang “nahauna nga doktrina.” (1 Corinto 2:10; Hebreo 5:13–6:1) Ang Makasulatanhon nga pamulongpulong magapatudok sang apresasyon sa gugma nga ginpakita ni Jehova sa pagpahamtang sinang matahom nga kahimusan sang Ginharian para pakamaayuhon ang tawhanon nga panimalay. Isa man ini ka kahigayunan nga ‘magtulok sing hanuot sa Pangulo nga Ahente kag Manughimpit sang aton pagtuo, si Jesus.’ Indi gid dapat pasapayanan ang gugma nga ginpakita ni Jesus tungod sa aton, ukon ang mga pag-antos nga iya gin-agom. (Hebreo 12:2, 3) Dugang pa, kita tanan magaugyon nga madamu sang hamili nga mga panghunahuna nga ginhambalan ni Jesus upod sa iya mga apostoles sang ginsugdan ang Memoryal—mga panghunahuna nahanungod sa paghiusa, gugma kag paghimaya sa ngalan ni Jehova—ang sarang mapakigbahinan sang “iban nga mga karnero” kag sang “diutay nga panong” man.

Pagpakita sing Mahigugmaon nga Pag-ulikid Para sa Tanan

13. Ngaa importante nga ipasa ang mga emblema sa tanan nga nagtambong?

¹³ Importante nga ang tanan nga magatambong sa Panihapon sang Ginuo pahanumdumon sang paagi nga ginsugdan ni Jesus. Ang pagpasa sa tinapay kag sa alak gikan sa isa pakadto sa isa nagabulig sa pagpahanuot sang apresasyon sa sagrado nga mga butang nga bag-o lang ginhambalan sina nga gab-i. Nagaparepaso man ini sa isa kon ano ang iya paglaum sa kabuhi—langitnon ukon dutan-on.a Ang pagsunod sa nagakaigo nga paagi nagapahisuno sa kongregasyon sa kon ano ang ginahimu sa bug-os nga duta sa sina nga gab-i.—1 Corinto 14:40.

14. Paano makapakita sing mahigugmaon nga kabalaka ang mga gulang para sa isa ka hinaplas nga nagmasakit sang gab-i sang Memoryal?

¹⁴ Halimbawa ang isa sang hinaplas sa kong­re­gas­yon nagmasakit kag wala sia makatambong sa Memoryal. Ti ano? Dapat himuon ang tanan nga panikasog nga dal-on sang isa sang mga gulang ang emblema sa sinang nagamasakit nga Cristiano kag, kon kombeniente, ang gulang sarang makahimu sing pila ka nagakaigo nga mga komento antes itanyag ang mga emblema kag hinakpan ini sing nagakaigo nga pangamuyo. Daw ano nga kalig-onan ang batyagon sang nagamasakit! Ina nga buhat sang mahigugmaon nga pag-ulikid nagapauswag sang espiritu sang gugma sa sulod sang kongregasyon. (Tan-awa man ang pahina 31.)—Salmo 133:1.

15. Sambita ang pila ka paagi nga mapakita ang pagtahod sa Panihapon sang Ginuo.

¹⁵ Ang iban pa makawiwili nga mga pamangkot ginpautwas nahanungod sa paagi kag sa tipo sang mga emblema nga pagagamiton sa Memoryal. Ang mga sabat sa sining mga pamangkot makita sa pahina 19 sa idalom sang “Pagpakita sing Pagtahod sa Panihapon sang Ginuo.” Ang responsable nga mga gulang nagakaigo nga magasunod sing mahalungon sa kon ano ang ginbalay diri.

Ang Pagkinahanglan nga Usisaon ang Kaugalingon

16, 17. (a) Ano nga pamangkot ang ginpamangkot sang iban nahanungod sa pagpakig-ambit sa Memoryal, kag sin-o lamang ang makahatag sing sabat? (b) Paano ang Dios naghatag sing makapahaylo nga pamatuod para sa sadtong ginpanganak sang iya espiritu?

¹⁶ Ang iban nagapangduhaduha kon bala nagakabagay sila nga makig-ambit sa mga emblema. Kon kaisa ini nga mga pamangkot nagautwas sing mga senemana sa wala pa ang pagsaulog sa Panihapon sang Ginuo. Sing masami ina nga mga pamangkot ginahimu sadtong bag-o lang makig-upod sa mga Saksi ni Jehova. Isa bala ikaw sinang may amo sini nga pangduhaduha sa imo hunahuna? Paano mo mapat-od ang husto nga dalanon nga himuon?

¹⁷ Si Pablo nagrekomendar nahanungod sa Panihapon sang Ginuo: “Ang tawo mag-usisa sang iya kaugalingon, kag sa sina magkaon sia sang tinapay kag mag-inum sa tagayan.” (1 Corinto 11:28, 29) Natalupangdan mo bala nga si Pablo nagsiling nga ikaw amo ang isa nga ‘magausisa’? Sa pagkamatuod, indi sayop nga hambalan inang serioso nga bagay upod sa hamtong nga Cristiano, apang ikaw lamang ang magapat-od sang imo personal nga kahimtangan upod kay Jehova kag sa iya Anak. Wala ginabiyaan sang Dios ang isa sang iya 144,000 nga nagaduhaduha. Ginapasalig kita: “Ang espiritu mismo nagapanaksi upod sa aton espiritu nga kita mga anak sang Dios.” Ang espiritu sang Dios amo ang nagapukaw sa tagipusuon sang bisan sin-o nga katapo sang lawas ni Cristo nga magpati nga sia isa sang espirituwal nga mga anak sang Dios. Nahibaloan ini sang isa ka pinili kag indi na kinahanglan nga pamangkuton ang iban agod pat-uron.—Roma 8:15, 16.

18. Anong maragtason nga katunayan nahanungod sa “iban nga mga karnero” ang makawiwili sa aton?

¹⁸ Ang modernong maragtas sang mga Saksi ni Jehova nagapakita nga kutob sang 1931 dugang nga igtalupangod ang ginsugdan nga ihatag sa “iban nga mga karnero” paagi sa mensahe sang Ginharian. Nian sang Mayo 31, 1935, paagi sa pamulongpulong nga “The ­Great Mul­ti­tude,”b ang “dakung kadam-an” nga nakit-an ni apostol Juan sa palanan-awon maathag nga ginkilala upod sa “iban nga mga karnero.” Ano ang ginapakita sining bag-o nga pagpadaku? Sing pat-od nga ang pagtipon sa “diutay nga panong” malapit na matapos kag ang tion nag-abot na para kay Jesus, paagi sa administrasyon sang “matutom kag mainandamon nga ulipon,” nga iliso ang iya igtalupangod sa pagtipon sa “iban nga mga karnero.”—Mateo 24:45-47.

19. Anong personal nga pag-usisa ang nagakaigo para sa mga bag-o nga nagaangkon nga hinaplas?

¹⁹ Nagahunahuna sang nasambit na, ginsilingan namon yadtong bag-o lang makig-upod sa mga katawhan ni Jehova kag mahimu nga ang iban sa ila nagaangkon nga isa sang hinaplas nga klase: Usisaa sing maayo ang imo kaangtanan kay Jehova. Pamangkota ang imo kaugalingon, Ang langitnon nga paglaum nga ginaangkon ko resulta lamang bala sang ginpatihan ko anay nga panudlo nga ang tanan nga katapo sang iglesia magakadto sa langit? Ang akon paglaum sa bisan paano may kahilabtanan bala sa pila ka makagud nga handum ukon emosyonal nga balatyagon? Si Pablo nagsiling: “Imposible sa Dios ang magbutig.” (Hebreo 6:18) Ang balaan nga espiritu sang pag-adoptar wala nagabutig. Busa, ang bisan sin-o sang matuodtuod nga ginpanganak sang espiritu sang Dios wala pirme ginatublag sang mga pangduhaduha kundi makapanaksi nga may maayo nga konsiensia nga isa sia sa mga anak sang Dios.

Pagsaulog sa 1986

20. Ano ang importansia sang Memoryal sa mga Saksi ni Jehova?

²⁰ Ang Panihapon sang Ginuo amo, sa walay duhaduha, ang pinakadaku nga selebrasyon para sa tanan nga Cristiano. Wala na sing iban pa nga okasyon ang kaangay kon tuhoy sa importansia, katuyoan ukon paagi. Busa, samtang ang duta nagalibot sa iya ehe, nagahimu sa adlaw nga magsalop sa ukbong sang palibot sang duta, ang tagsa ka kongregasyon sang mga Saksi ni Jehova, dalagku kag magagmay, kag ang tagsa ka diutay nga grupo magatipon sing tingob bilang pagtuman sa sugo sang Agalon.

21. Ano nga panimuot kag pagpaabot ang dapat ipautwas sang Memoryal sa 1986 sa mga tagipusuon sang katawhan sang Dios?

²¹ Busa ang tanan sang katulad-karnero nga mga disipulo malipay sing daku sa palaabuton nga makigbahin sing tingob sa isa pa ka pagsaulog sang Memoryal. Kabay nga ang okasyon sa sini nga tuig mapamatod-an nga isa ka tion sang makapalig-on nga pagpalig-onay sa tanan nga mga alagad ni Jehova. Kabay nga ipatudok sini sa ila ang amo man nga espiritu sang pagsalig sa ila Huaran, nga si Jesucristo, nga nagsiling: “Magpakaisog! Nadaug ko ang kalibutan.”—Juan 16:33.

[Mga footnote]

Madumduman Mo Bala—

◻ Ngaa ang Paskua indi isa ka tipo sang Memoryal?

◻ Ano ang anum ka tikang nga himuon antes makabenepisyo gikan sa halad ni Jesus?

◻ Ngaa tuman ka importante ang imo pagtambong sa Memoryal?

◻ Ano nga pag-usisa sa kaugalingon ang mapuslanon antes ang Memoryal?

[Kahon sa pahina 19]

Pagpakita sing Pagtahod sa Panihapon sang Ginuo

Mga Emblema nga Pagagamiton

Tinapay nga walay lebadura: Tinapay, subong sang wala sing matimplahi nga mat­zoth sang Judiyo, gamiton lamang ang nahuman sang harina kag tubig. Indi paggamita ang mat­zoth nga may dugang nga ingrediente subong sang asin, kalamay, malt, itlog ukon sibuyas. Sarang mo mahimu ang imo kaugalingon nga tinapay nga walay lebadura nga nagagamit sang masunod nga resipe: Isamo ang isa kag tunga ka tasa sang harina nga trigo (kon indi matigayon, gamita ang bugas, mais, ukon iban pa nga harina sang uyas) sa isa ka tasa sang tubig, nga nagahimu sing masa. Nian himoa ang masa nga may kadamulon sang waf­er. Ibutang ini sa bak­ing pan kag tusloktusloka sang tinidor. Ihurno ini tubtob nga magmala kag maghagpok.

Alak: Gamita ang wala sing simpon, mapula nga alak sang ubas subong sang Chian­ti, Bur­gun­dy, ukon clar­et. Likawi ang mga alak nga panulse nga ginsimponan ukon ginbutangan sing brandy, subong sang sher­ry, port ukon mus­ca­tel. Indi paggamita ang mga alak nga may pangpakahang ukon tanumtanum nga gindugang sa sini, subong sang Du­bon­net kag iban pa pangpagana nga mga alak. Ang ginhimu sa balay mapula nga alak mahimu man gamiton kon wala ini gintam-isan, gintimplahan ukon ginsimponan.

Paghanda sa Kingdom Hall

Latok para sa mga emblema: Hapini ang latok sing matinlo nga hapin kag ihanda ang bastante nga plato kag kopa para sa nagakaigo nga pagserbe. Ang tinapay mahimu tipiktipikon kag ang alak mahimu ibutang na antes ang miting. Si Jesus wala naghatag sing ritwalistiko nga paagi nahanungod sini nga bagay. Kon ginakinahanglan, taboni ang mga emblema sing maputi nga panapton agod indi masudlan sing mga sapatsapat.

Mga manugserbe: Ipahibalo sing una ang nahanungod sa paagi nga sundon agod malikawan ang bisan ano nga pagpalantang ukon pagkagumon sa pagserbe sa mga emblema sa tanan nga mga tumalambong, lakip sa humalambal kag sa mga manugserbe.

Mga at­ten­dant: Ang bastante nga mga at­ten­dant dapat nga yara na antes magsugod ang miting agod ang tanan sarang maabiabi kag mapalingkod.

Dekorasyon nga bulak: Mahimu ini iaman, apang dapat ini nga mangin simple kag matahom.

Paagi sa Miting

Oras sang Selebrasyon: Bisan nga ang pamulongpulong mahimu magsugod sing mas temprano, ang emblema indi dapat ipasa tubtob indi magtunod ang adlaw. Dapat hibaluon sing lokal kon san-o mahanabo ang pagtunod sang adlaw sa Abril 4 sa inyo duog.

Pamulongpulong sa Memoryal: Dapat nga nakahanda sing maayo ang humalambal agod mapresentar niya ang iya materyal sa sulod sang gintalana nga tion. Dapat ini ipresentar sing maathag kag sing makapalig-on sa tanan nga tumalambong.

[Laragway sa pahina 17]

Ang Memoryal nagapatudok sang gugma para kay Jehova kag sa iya Anak