Pagpasilak sing Kapawa sa Tunga sang Kadudulman sang Kalibutan

“Yari karon! ang kadudulman magatabon sa duta, kag ang pitipit nga kadudulman sang pungsodnon nga mga grupo; apang si Jehova magasilak sa imo, kag ang imo himaya makita sa imo.”—ISAIAS 60:2.

1. Anong positibo nga sabat ang mahatag sa mga pamangkot nga ginpautwas diri?

SA PAGKAMATUOD mahimayaon gid ini nga mga adlaw nga mabuhi! ‘Mahimayaon nga mga adlaw?’ basi ipamangkot sang iban. ‘Paano mo ina masiling, samtang ang bug-os nga kalibutan nagapangalapkap sa politikal, ekonomiko, kag relihioso nga pagkadinahiusa sa tunga sang kadudulman sang nuklear nga dag-on nga nagasalakay sa mga pungsod?’ Apang mahimayaon nga mga adlaw gid ini—bangod ang maayong balita nga ginabantala karon sa bug-os nga duta, nagapasanag sa gutom sa kamatuoran nga mga tawo nahanungod sa kahulugan sang aton tion kag sang malipayon nga palaabuton sa mas mahimayaon pa nga mga adlaw nga mahimu ila makita!

2. (a) Anong mga pinamulong sang pagpalig-on ang ginahatag ni Jehova sa Isaias kapitulo 45 kag 60? (b) Sin-o ang “babayi” sang Dios?

² Ang Tuboran sang aton makatilingala nga paglaum wala sing liwan kundi ang Soberanong Ginuo nga si Jehova, ang daku nga Manunuga sang langit kag duta. (Isaias 45:12, 18) Sia ang nagahatag sing mando nga narekord sa Isaias kapitulo 60, bersikulo 1: “Magtindog, O babayi, magsilak, kay ang imo kapawa nagaabot kag ang himaya ni Jehova nagasilak sa imo.” Sin-o ining “babayi”? Indi sia ang wala sing kabuhi nga Sta­tue of Li­ber­ty; indi sia ang undanon nga babayi nga nagakampanya para sa kahilwayan sang kababayin-an. Sa baylo, isa sia ka aktibo, nagaabante, langitnon nga organisasyon ni Jehova nga Dios, ang iya debotado nga kabulig nga ginahuman sang minilyonmilyon ka matutom nga mga manugtonda kag nagalakip na karon sa ginbanhaw nga “mga balaan”—yadtong nagpamatuod sang ila kaugalingon nga matutom bisan tubtob sa kamatayon subong hinaplas nga mga Cristiano diri sa duta.—Bugna 11:18; 2:10.

3. Paano ang babayi sang Dios (a) ‘nagtindog,’ kag (b) “nagasilak”?

³ “Magtindog, O babayi,” sugo ni Jehova. Sing matinumanon, ang langitnon nga organisasyon sang Dios nagtindog gikan sa siniglo na kalawig nga pagkadimabungahon, nahapay nga kahimtangan pakadto sa kahimtangan sang mabungahon nga pagpatubas. Sang 1914 nagbun-ag sia sang Mesianiko nga Ginharian. (Bugna 12:1-5) Kutob sang 1919 gindala niya ang nagkalabilin sang iya hinaplas nga mga anak sa duta pasulod sa “duta,” ukon kahimtangan, sang mahimayaon espirituwal nga kabuganaan. (Isaias 66:8) Dugang pa, ang langitnon nga organisasyon sang Dios “nagsilak” sing makatilingala nga mga tagna sa Ginharian. Ang iya madamu nga mga anak “gintudloan ni Jehova.”—isaias 54:1, 13.

Kapawa sa Tunga sang Pitipit nga Kadudulman

4. Ano nga kabaliskaran ang ginasiling ni Jehova tuhoy sa katawhan sang Dios kag sa mga pungsod sang duta?

⁴ “Magsilak,” siling ni Jehova. Sa pagkamatuod, “ang himaya ni Jehova nagasilak” sa iya langitnon nga organisasyon, kag ginpabanaag ini sa makatilingala nga paagi sang ginpasag-uli nga katawhan ni Jehova sa duta. Apang, masunod nga naghatag si Jehova sing kabaliskaran, nga nagasiling: “Yari karon! ang kadudulman magatabon sa duta, kag ang pitipit nga kadudulman sang pungsodnon nga mga grupo.” (Isaias 60:2) Wala bala ina nagalaragway sing maayo sang tugob-globo nga mga kahimtangan kutob sang 1914?

5. Ngaa ang butig nga relihion wala sing nakita nga solusyon sa mga problema sa nuklear nga dag-on?

⁵ Ang Cristiandad labi na nagsikway sa matagnaon nga ‘tanda sang presensia ni Jesus kag sang konklusion sang sistema sang mga butang.’ Busa, nasandad sia sa palibot sang pitipit espirituwal nga kadudulman. Ang mga relihion sang Cristiandad nagpakita sang ila kaugalingon nga bahin sang bug-os kalibutan nga emperyo sang butig nga relihion, ang Babilonia nga Daku—nga malayo gid gikan sa kapawa sang kamatuoran. (Mateo 24:3-14; Bugna 17:3-6) Ang kalibutanon nga mga relihion wala sing ginahatag nga solusyon sa mga problema sining nuklear nga dag-on, wala sini madula ang pitipit nga kadudulman, ang makaulugot nga pagkawala sing paglaum, nga nagalamon sa katawhan. Ang pagkanadalahig sang butig nga relihion sa hilikuton sang politikal nga mga pungsod magadul-ong sa ulihi sa iya kaugalingon nga kahapayan.—Bugna 17:16, 17.

6, 7. (a) Paano ang himaya ni Jehvoa “nagsilak” sang mga tuig 1919-31? (b) Ano nga putokputokan ang nalab-ot sini sang 1931?

⁶ Sa kabaliskaran, si Jehova padayon nga nagsiling tuhoy sa iya langitnon nga organisasyon: “Si Jehova magasilak sa imo, kag ang iya himaya makita sa imo.” (Isaias 60:2) Ini nga himaya makita sang hinaplas nga mga Cristiano diri sa duta, amo kon ngaa ila man ‘ginaiwag ang ila kapawa sa atubangan sang mga tawo.’ (Mateo 5:16) Ang mga tuig 1919 tubtob 1931 mahimayaon nga mga tinuig sa pagpasilak sang kapawa sang Ginharian, kag ginhukas sing bug-os sang katawhan sang Dios ang nabilin nga kadena ukon posas sang Babilonianhon nga doktrina, panghunahuna, kag batasan. Sadto nga mga tinuig, ang diutay nga nagkalabilin sang matuod nga mga Cristiano nagsugod sa paghatag sing positibo nga sabat sa pamangkot “SIN-O ANG MAGAPADUNGOG KAY JEHOVA?”—kag amo ini ang titulo sang artikulo nga tolon-an sang Enero 1, 1926, nga guwa sang The Watch Tower.

⁷ Nian, sang 1931, ang himaya ni Jehova bug-os nga nakita sa iya “alagad,” sang ginbaton nila ang ngalan nga ginhatag niya mismo sa ila—MGA SAKSI NI JEHOVA. (Isaias 43:10, 12) Sadtong 12 ka mabungahon, napuno sing aksion nga tinuig tubtob sang 1931, ang mga manugbantala sang Ginharian nagdugang kutob sa pila lamang tubtob sa napulo ka linibo sang makugi nga mga Saksi.

Dugang nga ‘Pagsilak’

8, 9. (a) Sang 1931, anong iban pa nga grupo ang gintalupangod sang The Watch Tower? (b) Suno sa Kasulatan, paano sila ‘gintandaan’?

⁸ Apang, “magasilak” lamang bala si Jehova tungod sa mga hinaplas sang ‘diutay nga panong sang mga manunubli sang Ginharian’? (Lucas 12:32) Indi, kay ang mga tuig 1931 tubtob 1938 napamatod-an nga isa ka daku nga panag-on sing dugang nga pagpasanag, sang ang The Watch Tower nagsugod sa pagtalupangod sing maathag sa isa pa ka grupo. Ang artikulo nga tolon-an sa iya guwa sang Septiembre 1, 1931, gintig-ulohan “ANG LALAKI NGA MAY TINTIROHAN SANG MANUNULAT,” subong nga napasad ini sa Ezequiel 9:1-11. Pagkatapos mapakilala ang ‘manunulat’ subong ang hinaplas nga nagkalabilin ang The Watch Tower nagkomento sing subong sini:

⁹ “Ang sugo ginhatag nga butangan sing ‘tanda ang mga agtang sang mga lalaki nga nagahayhay, kag nagabakho, bangod sang mga kalautan nga ginahimu sa tunga’ sang Cristiandad. . . . Ang Ginuo nagasugid tuhoy sa isa ka klase sang mga tawo nga iya ‘luwason sa panahon sang kagamo kag huptan nga buhi kag pakamaayuhon sa duta.’ (Sal. 41:1, 2) Amo ini ang klase sang mga tawo nga masami ginalaragway subong ang ‘minilyon nga nagakabuhi karon nga indi na mapatay’.” Karon, makalilipay nga makita sing aktuwal ang minilyon sining gintandaan nga pagaamligan samtang ginasuklob nila ang Cristianong mga personalidad, sa isa ka dedikado nga kaangtanan kay Jehova paagi kay Cristo Jesus.—Genesis 22:15-18; Sofonias 2:1-3; Efeso 4:24.

10, 11. (a) Paano ginalandongan ni Jehu si Jesus? (b) Ipakilala ang modernong-adlaw nga “Jehonadab.”

¹⁰ Labi na ka talalupangdon amo ang mga artikulo nga tolon-an sa mga guwa sang Watchtower sang Hulyo 1 tubtob Agosto 1, 1932. Nagapatuhoy sa Ikaduhang Hari kapitulo 9 kag 10, ginpakita sini kon paano ginlaragway ni Hari Jehu ang Manugpatay ni Jehova, si Hari Jesucristo, nga ginarepresentar sa duta sang hinaplas nga nagkalabilin, nga nagapaandam sa iban tuhoy sa nagapakari nga pagpatuman ni Jehova sang paghukom. Apang sin-o ang ginalaragway sang kaupod ni Jehu, si Jehonadab? Ang The Watchtower nagasabat:

¹¹ “Si Jehonadab nagarepresentar ukon nagalandong sa klase sang mga tawo diri sa duta sa panahon nga ang hilikuton ni Jehu nagapadayon nga . . . wala nahisuno sa organisasyon ni Satanas, nga nagkuha sang ila tindog dampig sa pagkamatarong, kag amo ang pagaamligan sang Ginuo sa panahon sang Armagedon, pagaluwason sila sa sina nga kagamo kag pagahatagan sila sing kabuhi nga walay katapusan sa duta.” Masunod nga ginpakita sang The Watchtower nga amo ini sila ang ‘pakamaayuhon sang Amay’ sa parabola ni Jesus tuhoy sa ‘mga karnero kag mga kanding.’ (Mateo 25:31-46) Nagsiling ini: “Nagahuman sila sa ‘mga karnero’ nga klase nga nahamuot sa hinaplas nga katawhan sang Dios bangod nahibaloan nila nga ang hinaplas sang Ginuo nagabuhat sang hilikuton sang Ginuo.”

12. Anong makalilipay nga pagbuyagyag sang balaan nga kamatuoran ang ginhimu sang 1935?

¹² Ining mga pagsilak sang matagnaon nga kapawa naghanda sang sadsaran para sa maragtason nga diskurso tuhoy sa “The ­Great Mul­ti­tude,” nga ginhatag sang Mayo 31, 1935, sang presidente sang Watch Tower So­cie­ty, si J. F. Ruth­erford, sa Wash­ing­ton, D.C., nga kombension sang mga Saksi ni Jehova. Isa gid yadto ka pagbuyagyag sang balaan nga kamatuoran! Ginpresentar sadto nga tion ang dimabais nga pamatuod nga nagapakilala sa “dakung kadam-an” sang Bugna 7:9 upod sa “iban nga mga karnero” sang Juan 10:16, upod sa Jonadab nga klase, upod sadtong gintandaan sa agtang agod makalampuwas upod sa minilyon nga nagakabuhi karon nga indi na mapatay, kag upod sa “mga karnero” nga ginpain gikan sa “mga kanding” kag magapanubli sang kabuhi nga walay katapusan sa dutan-on nga sakop sang Ginharian sang Dios. Ini tanan gintuptupan sang The Watchtower, sang Agosto 1 kag 15, 1935.

13. Anong dugang nga panugda ang ginhimu sang 1938?

¹³ Sang masunod nga tinuig, ang organisasyon sang Dios naghatag sing dugang pa nga igtalupangod sa “dakung kadam-an” kag sa ila matahom nga paglaum nga makalampuwas pasulod sa ginpasag-uli nga Paraiso sa duta. Sadtong Septiembre 9-11, 1938, ang mga Saksi ni Jehova nagtipon sa isa ka kombension sa London, Inglaterra, kag ang duha ka pangunang pamulongpulong gin-angot paagi sa direkta nga tie-in sang telepono sa iban pa nga mga kombension sa palibot sang kalibutan. Pasad sa nauna na nga mga mando nga ginhatag sa mga tawo, ang isa sining mga diskurso gintig-ulohan “Pun-a ang Duta,” nagapanugda nga ang “mga Jonadab” nga makalampuwas sa dakung kapipit-an mahimu nga, sa dili magkubos sa makadali, magaminyo kag magapamata sa Bag-o nga Kahimusan pagkatapos sang Armagedon.—Genesis 1:28; 9:1, 7; tan-awa ang The Watchtower, sang Oktubre 15 kag Nobiembre 1, 1938.

14. Paano ginpabugana ni Jehova ang iya katawhan sadtong mga tinuig?

¹⁴ Sadto nga mga tinuig, ang Agalon nga si Jesucristo padayon nga nagtipon kag nagpadala sing dugang nga manugpangabudlay. Busa ang mga manugbantala sa latagon nagdamu sing mga 50,000 sang 1938.—Mateo 9:37, 38.

Ang “mga Hari” kag “mga Pungsod”

15, 16. Paano ang “mga hari” nakig-ambit sa katumanan sang Isaias 60:3-10 (a) sa dumaan nga panahon, kag (b) sa moderno nga panahon? (c) Paano ang “mga dumuluong” nagaalagad karon upod sa “mga hari”?

¹⁵ Ining hilikuton sa pagtipon matahom nga ginlaragway sa Isaias kapitulo 60, mga bersikulo 3 tubtob 10. Didto si Jehova nagahambal tuhoy sa “mga hari” nga magaguwa may kahilabtanan sa “pagsilak” sang Sion kag magaalagad sa sinang katulad-asawa nga organisasyon. Sang ang katawhan sang Dios sang dumaan nga panahon nagpauli gikan sa pagkabihag sa Babilonia, si Hari Dario sang Medo kag si Hari Ciro sang Persia nanguna sa paghatag sing aman para ipasag-uli ang pagsimba kay Jehova sa Jerusalem. (Daniel 5:30, 31; 9:1; Esdras 1:1-3) Sa sini, nagakaigo nga ginlaragway nila ang Labing Gamhanan nga Hari, si Jehova, kag ang iya kaupod nga Hari, si Jesus, nga nagdirekta sa pagpasag-uli sang matuod nga pagsimba sa tunga sang katawhan ni Jehova sa modernong panahon. (Bugna 11:15, 17) Dugang pa, ang hinaplas nga nagkalabilin sang matuod nga sumilimba—ang palaabuton nga “mga hari,” “mga masigka manunubli ni Cristo”—nanguna sa moderno nga adlaw nga hilikuton sa pagpanaksi. Nagaalagad upod sa ila amo ang “mga dumuluong”—nga indi iya sang espirituwal nga Israel kundi mangin dutan-on nga mga sakop sang Ginharian kag makigbahin bisan karon sa pagtukod sang teokratiko nga hilikuton sa bug-os nga duta.—Roma 8:17; ipaanggid ang Isaias 61:5, 6.

¹⁶ Si Jehova mismo ang nagaagda sa aton: “Bayawa ang imo mata sa palibot kag tan-awa!” Ang natipon na nga mga manunubli sang Ginharian ginabuylogan karon sinang “dakung kadam-an . . . gikan sa tanan nga mga pungsod”! (Bugna 7:9; Zacarias 8:23; Isaias 2:2, 3) ‘Ginapahibalo nila ang kadayawan ni Jehova,’ sa makugi nga pag-alagad. Ginahinguyang man nila ang ila kaugalingon sa mga proyekto subong sang pagtukod sang mga Kingdom Hall para sa pagsimba—ang iban sini gintukod sa sulod lamang sang duha ka adlaw lamang. “Nagaalagad” sila, sa bug-os tagipusuon nga pagsakdag sa tugob-globo nga pagpasangkad sang intereses sang Ginharian.—Isaias 60:4-7.

17, 18. (a) Sing malipayon, anong makalilipay nga ‘paglupad’ ang nagakatabo karon? (b) Paano ining panag-on nga hitabo sa Palestina nagakaigo nga nagailustrar sini nga ‘paglupad’?

¹⁷ Masunod nga ginpamangkot ni Jehova ining may kahilabtanan nga pamangkot: “Sin-o bala ini sila nga nagalupad subong sang panganud, kag subong sang mga pating sa ila mga talambuan?” Una nga nagkari sa organisasyon sang Dios amo ang iya “mga anak gikan sa malayo,” nga bug-os nga nahamulag gikan sa tanan Babilonianhon nga relihion. Ining mga hinaplas nagdala sing hamili nga mga butang, gindedikar ang tanan nga sa ila “sa ngalan ni Jehova,” ang ila Dios. Subong ang “Balaan sang Israel,” ginhatag niya ang iya ngalan sa ila kag ginpatahom sila paagi sa pribilehiyo nga alagaron sia subong iya mga saksi. Nanguna sila sa pagbayaw sa ngalan sang ila Soberanong Ginuo, nga si Jehova, subong ang pinakadaku, pinakabantog, pinakamahimayaon nga ngalan sa bug-os nga uniberso.—Isaias 60:8, 9.

¹⁸ Sing malipayon, wala nagaisahanon ang hinaplas nga nagkalabilin sa sini. Mabudlay ini kuntani kon hambalon pa! Ining nagatigulang nga grupo nagadiutay, kag amat-amat nga natapos nila ang ila dutan-on nga pagkabuhi sing matutom. Mga 9,000 na lamang karon ang nabilin. Apang ang iban, nga nagadamu sing minilyon, nagadugok kaangay sang mga pating sa ila “mga talambuan,” ukon “mga balay sang pating,” nga nagadangop sa organisasyon sang Dios. (NW; The New English Bible) Kaangay sila sang mga panong sang pating nga makita sa Palestina sa pila ka panag-on—nagalupad subong sang panganud, nga tuman gid kadamu amo kon ngaa ginapadulom nila ang kalangitan.

‘Bukas Kaayo nga mga Gawang’

19. Ngaa ang “mga gawang” sang organisasyon ni Jehova nagapabilin nga bukas, kag ano ang sabat sang “mga hari” kag sang “mga dumuluong”?

¹⁹ Sing maluluy-on, ginbuksan sing daku ang mga gawang sang iya organisasyon, nga ginpatuhoyan niya karon sa sining mga pinamulong: “Ang imo mga gawang man buksan sing dalayon; indi sila pagtakpan sa adlaw ukon sa gab-i, agod nga ang mga tawo magadala sa imo sang manggad sang mga pungsod.” Amo gid sina sa karon samtang ang mahigugmaon sa paghidait nga “dakung kadam-an” nagadugang sing dalayon sa kadamuon. Sing malipayon, ining “mga dumuluong” nag-amot sang ila manggad nga tion, enerhiya kag pagkabutang sa “balaan nga pag-alagad sa adlaw kag gab-i.” Ginhinguyang nila ang ila kaugalingon sa “ganhaan nga daku nga nagadul-ong sa pagpangabudlay” kag nagpakig-ambit upod sa palaabuton nga mga hari sa pagdala sing matahom nga kadayawan sa ngalan ni Jehova.—Isaias 60:10, 11; Bugna 7:4, 9, 15; 1 Corinto 16:9.

20. (a) Sin-o ang “laglagon”? (b) Anong makalilipay nga kabaliskaran ang matalupangdan naton diri?

²⁰ Masunod, ginpatuhoyan ni Jehova ang iya organisasyon, nga nagasiling: “Ang pungsod kag ginharian nga indi mag-alagad mawala; kag yadto nga mga pungsod laglagon sing bug-os.” Ang tanan bugalon kalibutanon nga mga pungsod kag iban nga nagapamatok paubson sa Armagedon. Sa kabaliskaran, patahumon ni Jehova ang iya kaugalingon nga santuaryo sang pagsimba. Iya ‘ginahimaya ang duog sang iya tiil,’ ang dutan-on nga mga luwang sang iya daku espirituwal nga templo sa pagsimba, samtang iya ginatipon didto ang dalayon nga nagadugang nga kadamuon sang dakung kadam-an. Paagi sa isa pa ka manalagna, si Jehova nagsiling: “Uyugon ko ang tanan nga pungsod, agod nga ang bilidhon nga mga butang sang tanan nga pungsod magaabot; kag pun-on ko ining balay sing himaya.” (Hageo 2:7) Apang ang mga nagahingabot, mga apostata, kag iban dimatinahuron nga mga manugpamatok mapilitan nga ‘magyaub’—magakilala sing makapalaslaw nga ang mga Saksi ni Jehova nagarepresentar sa pagkamatuod sa organisasyon sang Dios —“ang siudad ni Jehova, ang Sion sang Balaan sang Israel.”—Isaias 60:12-14.

21, 22. (a) Ano nga pasalig ang ginahatag diri ni Jehova? (b) Paano, sing malaragwayon, ang iya katawhan “magasuso sang gatas sang mga pungsod”? (c) Anong dugang makalilipay nga pagtuon ang nagahulat sa aton?

²¹ Indi gid pagpatumbayaan ni Jehova ang iya katulad-asawa nga kabulig walay sapayan sang pagpasipala sang mga nagapamatok sa iya ‘mga anak nga lalaki kag mga anak nga babayi’ diri sa duta. Sa baylo, ginasilingan niya ang iya matutom nga organisasyon: “Himuon ko ikaw nga maglabaw sing walay katubtuban nga ikasadya sa mga kaliwatan. Ikaw man magasuso sang gatas sang mga pungsod.” Sa malaragwayon nga paagi, ang dutan-on nga mga tiglawas sang organisasyon sang Dios magagamit sang tanan nga matigayon nga manggad sa pagpauswag sa matuod nga pagsimba. Praktikal nga ila ginagamit ang moderno nga mga pasilidad sa komunikasyon, pagpadala, kag pag-imprinta agod ibantala ang maayong balita. Ang pangamlig kag pagtuytuy ni Jehova yara sa mga Saksi ni Jehova sa sini nga hilikuton. Sila, man, nagaalagad tungod sa langitnon nga organisasyon ni Jehova, nagakalipay sa katumanan sang iya saad: “Ikaw makahibalo nga ako, si Jehova, imo Manluluwas, kag ang Makagagahom ni Jacob imo Manunubos.”—Isaias 60:15, 16.

²² Ano ang dugang nga pagpalig-on ang ginahatag sa aton sang Isaias 60:17-22? Amo ina ang makalilipay nga tipiko nga aton ton-an sa masunod.

Mga Pamangkot nga Repasuhon

◻ Anong kinatuhayan sa ulot sang kapawa kag kadudulman ang hayag karon?

◻ Anong amat-amat nga ‘pagsilak’ ang natabo sang 1919-38?

◻ Paano natuman ang Isaias 60:8 sa modernong panahon?

◻ Paano ang “mga hari” kag “mga dumuluong” nagsulod sa ‘bukas kaayo nga mga gawang’?

[Kahon sa pahina 13]

“Ang mga hinganiban nga malaglagon sing makahaladlok ginatumpok sing madasig gid. . . . Ang palumbaanay sa hinganiban karon nagalab-ot sa mga oseano sang kalibutan kag sa naguwa nga kahawaan. Sa kamatuoran makahalam-ot nga ang pagtipon sang mga hinganiban amo ang isa sang nagasangkad nga industriya sa panag-on sang kapigaduhon sa ekonomiya kag kadudulman.”—Sekretaryo-Heneral sang NU, G. Javier Perez de Cuellar.

“Sa idalom sang ganhaan sang balay sang nagligad nga adlaw, yara ang isa pa ka pamilyar nga mensahe sa dagway sang isa ka relihioso nga polyeto. ‘Malapit na bala kita sa Armagedon?’ siling sang mga tinaga nga nasulat sa ibabaw sang panganud kag kirab sang kilat nga may kahilabtanan sa aton. May panahon anay nga ina nga sahi sang mensahe daw makahalam-ot. Sing hinali, indi na ini makahalam-ot.”—­Haynes John­son, The Wash­ing­ton Post.