Ang Kabuhi kag Ministeryo ni Jesus

Ang Pagkabun-ag ni Jesus—Diin kag San-o?

SAMTANG nagahilapit na ang tion para kay Maria nga magbun-ag, ngaa si Jose magalakbay pa sing malawig? Bueno, ang emperador sang Romanong Emperyo, si Cesar Agosto, naghimu sing kasugoan nga ang tanan dapat magpauli sa ila siudad nga natawhan agod magparehistro. Gani si Jose magapauli sa iya duog nga natawhan, ang siudad sang Betlehem.

Madamu nga mga tawo ang nagkadto sa Betlehem agod magparehistro, kag ang lamang nga duog nga nakita ni Jose kag ni Maria nga madayonan amo ang isa ka kuadra. Diri, diin ang mga asno kag iban pa nga sapat ginatago, si Jesus nabun-ag. Ginputos sia ni Maria sing mga panapton kag ginkulan sia sa isa ka pasungan, ang duog nga ginabutangan sang pagkaon para sa mga sapat.

Sa pagkamatuod bangod sa panuytoy sang Dios nga si Cesar Agosto naghimu sang iya kasugoan sa pagparehistro. Nagpaposible ini para kay Jesus nga mabun-ag sa Betlehem, ang siudad nga madugay na gintagna sang Kasulatan nga mangin ang dutang natawhan sang ginsaad nga gumalahom.

Daw ano ka importante nga gab-i yadto! Didto sa mga latagon nagsilak ang isa ka masanag nga kapawa sa palibot sang isa ka grupo sang mga manugbantay. Himaya ini ni Jehova! Kag ang manugtonda ni Jehova nagsiling sa ila: ‘Natawo sa inyo karon sa Betlehem ang Manluluwas, nga si Cristo nga Ginuo. Makita ninyo sia nga nakulan sa pasungan.’ Sing hinali madamung iban pa nga mga manugtonda ang nagguwa kag nag-amba: “Himaya sa Dios sa kahitaasan, kag paghidait sa duta sa tunga sang mga tawo nga iya nahamut-an.”

Sang maghalin na ang mga manugtonda, ang mga manugbantay nagsiling sa isa kag isa: ‘Makadto kita sa Betlehem kag tan-awon ta ining butang nga ginpahayag ni Jehova sa aton.’ Dalidali sila nga naglakat kag nakita nila si Jesus sa kon diin siling sang mga manugtonda nga makita nila sia. Sang ginsugilanon sang mga manugbantay kon ano ang ginsiling sa ila sang manugtonda, ang tanan nga nagpamati natingala. Gintipigan ni Maria ang tanan sining mga hambalanon kag ginpakabahandi ini sa iya tagipusuon.

Madamung mga tawo karon ang nagapati nga si Jesus nabun-ag sang Disiembre 25. Apang ang Disiembre isa ka maulanon, matugnaw nga panag-on sa Betlehem. Ang mga manugbantay indi mahimu nga yara sa guwa sang latagon sa bug-os nga gab-i upod ang ila mga panong sa sadtong panahon sang tuig. Subong man, ang Romano nga si Cesar Agosto indi gid magapangabay sa mga tawo nga nahuyog na nga daan nga magrebelde batok sa iya nga maglakbay sing subong sina sa tigtulognaw agod magparehistro. Sing maathag si Jesus natawo sing mga temprano sang tigragas sang tuig. Lucas 2:1-20; Miqueas 5:2.

◆ Ngaa naglakbay sanday Jose kag Maria pakadto sa Betlehem?

◆ Anong makatilingala nga butang ang natabo sang gab-i nga nabun-ag si Jesus?

◆ Paano naton nahibaloan nga si Jesus wala mabun-ag sang Disiembre 25?

[Bug-os pahina nga retrato sa pahina 9]