Maglakat sa Pagtuo!

“Kita . . . pirme nga maisog kag nakahibalo nga, samtang nagapuyo kita sa lawas, wala kita sa Ginuo, kay nagalakat kita sa pagtuo, indi sa panulok.”—2 CORINTO 5:6, 7.

1. Anong pila ka pagpakamaayo ang ginaagom naton bangod sang tawhanon nga mata?

ANG isa sa mga katingalahan sa lawas sang tawo amo ang mata. Paagi sa sining makatilingala potograpiko nga mekanismo, indi lamang nga malikawan naton ang sablag, kundi makuha man sa daku nga kadamuon ang mga impresyon, madamu sini ang nagaapekto sa aton kaangtanan sa iban. Maathag nga wala pagtuyoa sang Manugdesinyo sang mata nga magkaangkaang kita sa aton puluy-an nga planeta sa kadulom. Dugang pa, tuyo niya nga makita kag maagom naton ang iya makatilingala nga tinuga—ang mga tawo kag mga sapat, mga bukid kag mga suba, mga linaw kag mga dagat, mga kabulakan kag iban pa nga mga tanum, ang langit kag ang matahom nga duag sang pagtunod sang adlaw. Ang mainapresyahon nga mga tumalan-aw makapabutyag kaupod sa salmista: “Daw ano kadamu ang imo mga binuhatan, O Jehova! Sa kaalam ginhimu mo sila tanan. Ang duta puno sang imo mga manggad.” —Salmo 104:24.

2. Ngaa indi bastante ang paglakat sa panulok, kag ano ang ginasiling ni Pablo nahanungod sini?

² Apang, makatilingala man ang pisikal nga panulok, ang paglakat paagi sa sini lamang puno sing daku nga katalagman. Agod matigayon ang balaan nga kahamuot, dapat kita maglakat sa pagtuo sa Manugdesinyo sang tawhanon nga mata. Dapat naton pangitaon ang iya pagtuytoy agod buhaton kon ano ang maayo. Nagasulat sa mga masigka hinaplas nga mga Cristiano, si apostol Pablo nagakaigo nga nagsiling: “Kita . . . pirme nga maisog kag nakahibalo nga, samtang nagapuyo sa lawas, wala kita sa Ginuo, kay nagalakat kita sa pagtuo, indi sa panulok. Apang maisog kita kag nahamuot sa baylo nga mawala kita sa lawas kag magpuyo upod sa Ginuo [paagi sa kamatayon kag mabanhaw sa langitnon nga kabuhi]. Gani man ginahimu ta nga aton tuyo nga, bisan nagapuyo kita sa lawas ukon wala, nga mangin kalahamut-an kita sa iya. Kay kinahanglan kita tanan ipahayag sa atubangan sang lingkoran nga hukmanan ni Cristo, agod ang tagsatagsa magbaton sing maayo ukon malain, suno sa iya nahimu sa lawas.”—2 Corinto 5:6-10.

3. Dapat nga ano ang handum sang tanan dedikado nga mga alagad ni Jehova, kag anong mga pamangkot ang nagakabagay nga binagbinagon naton?

³ Ang tanan dedikado nga mga alagad ni Jehova—kon bala hinaplas man nga nagkalabilin ukon iya sang nagadugang nga “dakung kadam-an” nga may dutan-on nga paglaum—luyag sa paghimu kon ano ang maayo. (Bugna 7:9) Apang ngaa masiling nga may yara dakung katalagman sa ‘paglakat sa panulok’? Kag ano ang buot silingon sang ‘paglakat sa pagtuo’?

Mga Katalagman sang ‘Paglakat sa Panulok’

4. (a) Ngaa indi dapat tamdon ang tanan nga butang sa panampad nga dagway lamang? (b) Paano ginatamod sang Magbubuhat sang mata ang mga bagay?

⁴ Kon tamdon naton ang tanan sa panampad kag magsalig lamang sa nagguwa nga panagway, yara ang katalagman nga malimbungan sa aton kaugalingon nga kahalitan. Halimbawa, ang isa mahimu nga nagadayandayan sa malawig nga hunasan sang sing hinali nadiparahan niya nga ginlamon na sia sang hatay-hatay. Ukon ang isa mahimu nga indi makapangaman sa mainabyanon nga panagway sang isa nga isa gali ka ‘lobo sa panapton sang karnero.’ (Mateo 7:15) Gani dapat kita magbantay. Ang Magbubuhat sang mata wala ginatuytoyan sang naguwa lamang nga panagway. Ginsilingan niya si manalagna Samuel: “Ang Dios nagatan-aw indi subong sang pagtan-aw sang tawo, ang tawo nagatulok sa guwa nga dagway; apang si Jehova nagatulok sa tagipusuon.” (1 Samuel 16:7) Sa pagkamatuod, ang Isa nga naghimu sang mata nakahantup sa nasulod nga panghunahuna kag tinutuyo, kag ang iya pagtantiya kay bisan sin-o ukon sa bisan ano pirme nga sibu. (Ipaanggid ang Hebreo 4:12.) Bangod sang iya himpit nga panulok kag paghangop, Isa gid sia sa pagkamatuod nga pirme makakita.

5. Ngaa importante nga paandaman kita nga daan nahanungod sa mga katalagman sang ‘paglakat sa panulok’?

⁵ Apang, subong mga tawo, indi kita makahantop sa kon ano ang yara sa tagipusuon sang isa ka tawo. Bisan pa nga paagi sa aton hatag-Dios nga mga ikasarang, kita dihimpit kag masami nga nalimbongan. Sa katunayan, ang aton mismo tagipusuon mahimu nga magapatalang sa aton, kay ini “labi ka malimbungon sang sa bisan ano kag lakas gid kadunot.” (Jeremias 17:9) Gani importante gid nga paandaman kita sing una nahanungod sa mga katalagman sang ‘paglakat sa panulok.’ Naghatag bala si Jehova sining hilingagawon nga kinahanglanon? Sa pagkamatuod gid! Para sa aton instruksion, ginparekord niya ang pila ka talalupangdon nga mga hitabo nga nagapakita sang mga katalagman sang paglakat sa panulok lamang.—Roma 15:4.

6. Ano ang mga epekto sang ‘paglakat sa panulok’ sang mga Israelinhon?

⁶ Ang mga eksperiensia sang dumaan nga katawhan sang Dios, ang mga Israelinhon, nagakaigo gid. Bisan pa nga ang wala nagasayop nga pagtuytoy ni Jehova matigayon sadtong nahamut-an katama nga katawhan, ang iya walay pagtuo nga kadam-an matig-a nga naglakat sa “ila kaugalingon nga mga laygay.” (Salmo 81:12) ‘Nagalakat sa panulok,’ nagliso sila sa pagsimba sa mga idolo ukon sa mga diosdios nga makita sang kinaugali nga mata. Subong nga natuytoyan sang panampad nga dagway, nagkurog sila sa kahadlok sa dakung kadamuon sang ila mga kaaway. Dugang pa, bangod sang ‘paglakat sa panulok, indi sa pagtuo,’ ang mga Israelinhon naghangkat man sa hatag-Dios nga pagpangulo ni Moises kag nagyamo tuhoy sa ila nadangatan sa kabuhi. (Ipaanggid ang Judas 16.) Huo, kag ang madamu sa ila hayag nga nahisa sa daw kahilwayan kag kabuganaan sang palibot nga mga pungsod, wala magsapak sang kamatuoran nga ining mga tawo puno sing kalautan kag napaidalom sa impluensia sang demonyo.—Levitico 18:1-3, 30.

7. Ano ang natabo sa mga Israelinhon nga nagsikway sang balaan nga panuytoy?

⁷ Ano ang natabo sa mga Israelinhon nga nag-insister sa paglakat sa ila kaugalingon nga paagi, nagsikway sa balaan nga panuytoy? Ti, wala nahamuot sa ila si Jehova, kag ginkuha niya ang iya maamligon nga pangamlig amo kon ngaa nalupig sila sang ila mga kaaway! Bisan sa Ginsaad nga Duta, ang mga Israelinhon masami nga napaulipon sa ila walay kaluoy nga mga kaaway. (Mga Hukom 2:17-23) Indi kaangay ni Moises, nga nagdumili sa pag-agom sang kalibutanon nga mga kasulhayan sa nagagahom nga klase sang Egipto, ang katawhan sang Israel naghingamo sang “umalagi nga kalipay sang sala” kag wala magpadayon sa paglakat “subong nga nakakita sang Isa nga dimakita.” Wala sila sing pagtuo. Kag dumduma, “kon wala sing pagtuo imposible nga pahamut-an ang [Dios].”—Hebreo 3:16-19; 11:6, 24-27.

8. Ngaa ang modernong-adlaw nga mga alagad ni Jehova nagakuha sing paandam gikan sa mga eksperiensia sang dumaan nga mga Israelinhon?

⁸ Ang modernong-adlaw nga mga alagad ni Jehova makakuha man sing paandam gikan sa sadtong mga hitabo sang nagligad. Kita, man, yara sa katalagman nga mangin maluya sa pagtuo ukon mawasi pa gani ang aton pagtuo. Indi bala isa ka kamatuoran nga dinagakaigo kita nga maimpluensiahan sang naguwa nga panagway sang mga butang kag sa amo sa liwat magasugod sa ‘paglakat sa panulok’? Huo, kag amo ina kon ngaa maluluy-on nga gin-aman ni Jehova ang panuytoy para sa sadtong magaalagad sa iya nga may pagtuo. Gingamit niya ang mga Israelinhon kag ang iya pagpakig-angot sa ila subong leksion para sa naulihi nga mga kaliwatan, lakip sa aton. (1 Corinto 10:11) Busa ginapalig-on kita sang sibu nga ihibalo, sang makusog nga paglaum, kag sang pagbatas.

9. Agod ‘maglakat kita sa panulok,’ ano ang mahimu nga batyagon naton nahanungod sa pila ka mga buhat kag nahanungod sa teokratikong mga butang?

⁹ Kon wala ining pat-od nga panuytoy gikan sa aton mahigugmaon nga Manunuga, yara kita sa katalagman nga hangkaton ang Mas Daku nga Moises, si Jesucristo, nalipat nga ang Dios kag si Cristo amo ang nagatuytoy sa matuod nga mga Cristiano karon. (Ipaanggid ang 1 Corinto 11:3; Efeso 5:24.) Mahimu naton tamdon ang organisasyon sang mga Saksi ni Jehova subong naghalin lamang sa tawo kag sa amo magabatyag nga hilway sa paghimu sang kon daw ano ang matarong sa aton kaugalingon nga mga mata. (Ipaanggid ang Mga Hukom 21:25.) Dugang pa, mahimu kita mahulog sa sala sang iban nga daw nagahunahuna nga tubtob ang pila ka buhat wala nagatublag sang ila konsiensia, okey lang ini. Ang iban mahimu magasugod sa paghunahuna nga ang teokratikong organisasyon para sa ila kasulhayan kag kahaposan kag ang tanan nga ginapangayo sini dapat nga pahapuson, nga wala na nagakinahanglan sing pagsakripisyo sang kaugalingon para sa ila. Ang isa pa ka katalagman mahimu nga amo ang paglingaw sa ideya nga ang mga kahimusan sa organisasyon dapat magpahisuno sa aton kabubut-on sa baylo sang sa kabubut-on sang Dios. Apang, ang aton Huaran, si Jesucristo, pirme nagahimu sang kabubut-on sang iya langitnon nga Amay sing malipayon.—Salmo 40:8; Hebreo 10:5-10.

10. Paano maapektohan ang aton mga panimuot sa pag-alagad sa latagon kag sa iban pa teokratikong mga hilikuton kon pasapayanan naton ang balaan nga panuytoy ukon kabigon ini sing mamag-an?

¹⁰ Bangod sang pagpasapayan sa balaan nga panuytoy ukon sa pagpakadiutay sini, ang iban mahimu magahunahuna nga ang aton mga miting dapat palip-uton, ang mga duog nga ginahiwatan sang asambleya dapat nga malapit lamang, kag ang tolon-an nga materyal dapat nga pirme simple, nga wala nagalakip sang “matig-a nga pagkaon.” (Hebreo 5:12) Sa mga pungsod diin ang mga Cristiano nagaagom sing paghidait kag kalinong, mahimu pasapayanan sang iban ang pagpakamaayo sang Ginharian, nagabatyag nga indi na kinahanglan ang manikasog sa balaan nga pag-alagad. Kon ginapalambo naton ina nga mga panimuot, mahimu nga kita mangin “mahigugmaon sang kalipayan sa baylo sang sa Dios,” ayhan nagatigana sang halos tagsa ka talipusposan sang semana para sa kalingawan sa baylo nga gamiton ina nga tion sa pag-alagad sa latagon kag sa iban pa teokratikong mga hilikuton nga nagapakita sing bug-os tagipusuon nga debosyon kay Jehova. (2 Timoteo 3:1, 4) Kon matabo ina, makasiling bala kita sing bunayag nga kita gid ‘nagalakat sa pagtuo, indi sa panulok’?

11. Ano ang epekto sang pagpagusa sang aton kaugalingon, apang ano ang dapat naton nga himuon?

¹¹ Yara man ang katalagman nga magpagusa sang aton kaugalingon. Mahapos hunahunaon sa aton kaugalingon nga ang diutay nga sakit sang ulo ukon ang iban pa nga kaanggid nga mga problema mas malain sa kon ano gid ini. Ang aton dihimpit nga unod mahimu nga magatiklod sa aton nga gamiton ini subong balibad nga indi paghimuon ang isa ka responsabilidad, subong sang paghatag sing isa ka pamulongpulong sa Theo­cra­tic Mi­nis­try ­School. Apang posible bala nga indi gid kita maghunahuna nga pahanugotan ang amo man kalain nga pamatyag nga magpugong sa aton gikan sa pagpakigbahin sa pila ka sahi sang kalingawan? Siempre pa, dapat naton gamiton ang maayong panghunahuna kag indi pagkabigon sing mamag-an ang serioso nga mga simtoma. Apang, kinahanglan nga manikasog kita sing makusog. (Lucas 13:24) Kag sa pagkamatuod ang aton pagtuo nasandig sing daku sa aton pamat-od agod nga indi kita ‘maglakat sa panulok’ lamang, nahisuno sa aton kaugalingon wala sing bulig nga laygay.—Roma 12:1-3.

12. Ano nga sahi ang pagpakig-away naton, nagakinahanglan sing anong panimuot sa bahin naton?

¹² Indi pagkalimti nga kita nagapakig-away batok sa malauton espirituhanon nga mga kabon. (Efeso 6:11-18) Ang aton panguna nga kaaway, si Satanas nga Yawa, nagahatag sing daku nga impluensia sa aton paagi sa paggamit sang iya mga hinganiban nga gindesinyo sa paglaglag sang aton pagtuo kay Jehova. Si Satanas magaganyat sang tagsa ka makagud nga huyog sang mga tawo kag indi magapasapayan sang sahi sang pagganyat nga mahimu magapapalayo sa aton sa aton panghunahuna. Kon nagapakig-upod kita sa “nagkalabilin” sang “binhi” sang “babayi” sang Dios, ukon sang langitnon nga organisasyon, nagapakig-away kita. Isa ini nga wala gid sing pahuway tubtob si Jehova nga, nagapabakud sa aton nga malandas ang mga satanikong pagsalakay, magatapos sang bug-os nga organisasyon sang Yawa. (Bugna 12:16, 17; 1 Pedro 5:6-11) Gani, indi bala kita dapat magmaisugon kag magbatyag sing pagkahilingagawon? Dapat gid!—Salmo 31:24.

Kon Ano ang Buot Silingon sang ‘Paglakat sa Pagtuo’

13. Ano ang buot silingon sang ‘paglakat sa pagtuo’?

¹³ Ang ‘paglakat sa pagtuo’ nagakahulugan sing pagpadayon nga may pagtuo sa Dios sa mabudlay nga mga kahimtangan, sa iya ikasarang sa pagtuytoy sa aton mga tikang, kag sa iya kahanda nga luwason kita. (Salmo 22:3-5; Hebreo 11:6) Nagakahulugan ini sang pagpangindi nga matuytuyan sang panampad lamang nga dagway sang mga butang ukon sang wala sing bulig nga pangatarungan sang tawo. Ang pagtuo magapahulag sa aton nga magalakat sa panuytoy nga ginatudlo ni Jehova, bisan pa kon daw ano kabudlay ini nga banas. Kon ‘nagalakat kita sa pagtuo,’ mangin kaangay kita kay David, nga nagsiling tuhoy sa Dios: “Ipakita mo sa akon ang banas sang kabuhi. Sa imo atubangan yara ang kabug-osan sang kalipayan; sa imo tuo yara ang mga kalipayan sa gihapon.” (Salmo 16:11) Dugang pa, kon pahanugotan naton si Jehova nga magatuytoy sang aton mga tikang, hatagan niya kita sing kalinong sa panghunahuna kag buligan kita nga matigayon ang kadalag-an, bisan pa kon daw ano ka daku ang kabudlayan batok sa aton. (Juan 16:33; Filipos 4:6, 7) Lakip sa sini, ang ‘paglakat sa pagtuo’ tayuyon nga magadala sa aton nga nagapakig-upod sa aton espirituwal nga kautoran nga mga lalaki kag kautoran nga mga babayi para sa nahiusa nga pagtuon sang Biblia kag pangamuyo.—Hebreo 10:24, 25.

14, 15. (a) Ano ang panimuot ni Jesus tuhoy sa mga manggad, kabantogan, kag pagkanadalahig sa politika? (b) Subong ginapakita sang mga Kasulatan, paano gintamod ni Jesus ang panuytuy sang Dios?

¹⁴ Sa katunayan, ang ‘paglakat sa pagtuo’ nagahimu man sa aton nga mga kaupdanan sang matutom nga mga alagad sang Dios sang nagligad. Ang panguna sini sa ila amo si Jesucristo, “ang Pangulong Ahente kag Manughimpit sang aton pagtuo.” Samtang nagapanikasog kita nga “sundon ang iya mga tikang sing suod,” ano ang masapwan naton?—Hebreo 12:1-3; 1 Pedro 2:21.

¹⁵ Si Jesus wala makigbahin sa kalibutanon nga mga politika kag wala gid magpaninguha sa mga manggad kag kabantogan nga ginahimud-osan sang madamu. Sa baylo, ginpakita niya nga ang iya Ginharian “indi bahin sining kalibutan,” kag indi materyalistiko, wala gani sia sing ‘ulonlan sang iya ulo.’ (Juan 6:14, 15; 18:36; Lucas 9:57, 58) Bisan pa si Jesus may himpit nga panghunahuna, wala sia magpanghikot sing hilway kundi naghulat sa iya langitnon nga Amay sing tuytoy.—Juan 8:28, 29.

16. Sa kapawa sang halimbawa ni Jesus, ano ang masiling nahanungod sa panimuot sang mga Saksi ni Jehova?

¹⁶ Bangod sang halimbawa ni Jesus, ano ang masiling nahanungod sa mga Saksi ni Jehova karon? Bueno, subong mga tagasakdag sang langitnon nga Ginharian sang Dios, ginatahod naton ang “superyor nga mga awtoridad” sang pangulohan apang nagapabilin nga neutral sa politika. (Roma 13:1-7; Mateo 6:9, 10; Juan 17:16) Sa baylo nga tinguhaon ang mga manggad kag kabantogan sini nga kalibutan, aton ‘ginapangita anay ang Ginharian,’ nagasalig nga si Jehova magaaman sang aton mga kinahanglanon sa kabuhi. (Mateo 6:24-34; Salmo 37:25) Kag kaangay ni Jesus, ‘wala kita nagasandig sa aton kaugalingon nga paghangop’ kundi mapasalamaton nga nagabaton sing panuytoy sa aton mahigugmaon nga Amay. (Hulubaton 3:5, 6) Sa pagkamatuod, ini tanan nagabulig sa aton nga ‘maglakat sa pagtuo.’

Mga Pagtilaw kag mga Pagpakamaayo

17. Ano ang dapat batason sang katawhan ni Jehova samtang ‘nagalakat sila sa pagtuo’? Iilustrar palihug ini.

¹⁷ Sa madamung kadutaan ang aton masigka Saksi ni Jehova nagabatas sing dikinaandan nga kabudlayan kag mga kapipit-an, kag bisan pa sa mapintas nga paghingabot, samtang ‘nagalakat sila sa pagtuo.’ Sa pagkamatuod, ang mga pagtilaw sa pagtuo lainlain sing dagway. Halimbawa, binagbinaga ang mga kabudlayan kag ang matutom nga pag-alagad sang isa ka tigulang nga utod nga lalaki sa Ecuador. Nakatuon sia sang kamatuoran sa edad nga 80, kag nakatuon sa pagbasa kag sa pagsulat. Ginbawtismohan sia duha ka tuig sang ulihi. Sanglit nagaistar sia sa kagulangan, nagalakat sia sing tatlo ka oras agod makakadto sa Kingdom Hall. Ginatago sang iya nagapamatok nga asawa ang iya panapton kag kuarta agod indi sia makatambong sa Cristianong mga miting. Apang ining mga problema wala magpaluya sa sining matutom nga utod. Nag-alagad sia subong temporaryo, ukon auxiliary payunir kada bulan sa sulod sang napulo ka tuig kag nagbantala sa madamung mga minuro, sing masami ginamaltrato sang mga taga-minuro. Apang, sang ang mga payunir kag mga misyonero nagpanaksi sang ulihi sa sadtong mga duog, madamung mga tawo ang nagpalapit sa ila kag nangabay sing pagtuon sa Biblia. Gani, nagresulta ang maayong mga butang bangod sang lakas nga pagpangabudlay sining makugi nga utod. Napatay sia sa balatian nga kanser sa edad nga 92 apang nakahinguyang sia sing 40 ka oras sa pag-alagad sadtong bulan mismo nga napatay sia.

18. (a) Ano ang dapat naton himuon agod maagom ang balaan nga kahamuot? (b) Ano nga padya ang matigayon naton kon padayon kita nga ‘magalakat sa pagtuo, indi sa panulok’?

¹⁸ Kita, man, dapat magpadayon walay sapayan sang mga problema kag mga kabudlayan. (Mateo 24:13) Agod maagom naton ang balaan nga kahamuot, importante nga iaplikar naton ang laygay sang Dios, saligan sia, kag magpabilin nga nahamulag sa kalibutan, sa iya mga panimuot, kag sa iya mga dalanon. (Salmo 37:5; 1 Corinto 2:12; Santiago 1:27) Gani manikasog kita nga ilugon ang aton Huaran, si Jescuristo. Mangin masinakripisyuhon kita sa kaugalingon kag handa nga manikasog sa mahimayaon nga pag-alagad kay Jehova. Samtang ginahimu naton ini, masinaligon nga mahulat naton ang katumanan sang matahom nga mga saad sang aton langitnon nga Amay sa iya matutom nga mga sumilimba. Kag magadul-ong ini sa makatilingala nga mga pagpakamaayo sa iya ginsaad nga Bag-o nga Kahimusan! Labaw sa tanan, ‘ang paglakat sa pagtuo, indi sa panulok,’ nagahatag sa aton sang padya nga makigbahin sa pagbindikar sa bug-os uniberso nga pagkasoberano ni Jehova.

Madumdoman Mo Bala?

◻ Ano ang mga katalagman sang ‘paglakat sa panulok’?

◻ Ano nga paandam ang ginahatag sang mga eksperiensia sang mga Israelinhon para sa katawhan ni Jehova karon?

◻ Sa baylo nga pagusaan ang aton kaugalingon, ano ang dapat naton nga himuon?

◻ Ang ‘paglakat sa pagtuo’ nagakahulugan sing paghimu sang ano?

[Laragway sa pahina 12]

Samtang ang masigka Saksi ni Jehova nagapakigbahin sa teokratikong mga hilikuton, ikaw bala kag ang imo pamilya masunson nga nagapakadto sa pila ka kalingawan?

[Laragway sa pahina 14]

Si Jesucristo nagpahamtang sing maayo nga halimbawa. Kaangay sa iya, ikaw bala ‘nagalakat sa pagtuo’?