Madinalag-on sa “Ulihi nga mga Adlaw”

“May isa ka Dios sa mga langit nga Nagapahayag sa mga tinago, kag sia nagpakilala . . . sang mahanabo sa ulihi nga mga adlaw.”—DANIEL 2:28.

JEREMIAS, EZEQUIEL, DANIEL—ina nga mga ngalan nagapahanumdom sang makakulonyag nga mga tagna! Halos 2,600 ka tuig ang nagligad, yadtong tatlo ka maisog nga mga alagad sang Soberanong Ginuong Jehova nagkabuhi sa ulihi nga mga adlaw sang apostata nga Jerusalem, bisan pa nga nagaalagad sa lainlain nga mga lugar kag sa idalom sang magkatuhaytuhay nga mga kahimtangan. Apang ang tagsa gikan sa iya nahamtangan nagtagna nahanungod sa mga hitabo nga magatapos sa ulihi sa “ulihi nga mga adlaw.” Yadtong inspirado nga mga sinulatan gin-amligan para sa kalig-onan sang tanan nga nagahigugma sa Dios kag sa pagkamatarong, kag maluyag makalampuwas sa “dakung kapipit-an” nga nagahilapit sa aton tion.—Mateo 24:3-22; Roma 15:4.

² Si Jeremias nagtagna sa Jerusalem. Samtang nagahinampot ang kapahamakan, ang mga gumalahom kag katawhan nahulog sa pagkamalinapason kag kalautan. Gani, ginpabakud ni Jehova ang iya manalagna kaangay sang “kuta nga saway nga pinabakud” nga magtindog nga malig-on sa tunga sang ila kalautan.—Jeremias 15:11, 20; 23:13, 14.

Mga Manalagna sang Paghidait

³ Nahanungod sa delingkwente nga relihiosong mga lider sang Jerusalem, si Jehova nagsiling paagi kay Jeremias: “Dili kamo magpamati sa mga pulong sang mga manalagna nga nagatagna sa inyo. Sila nagatudlo sa inyo sang kadayawan. Nagapamulong sila sing palanan-awon sa ila kaugalingon nga tagipusuon—kag indi gikan sa baba ni Jehova. Nagasiling sila sing dalayon sa ila nga nagatamay sa akon, ‘Si Jehova nagsiling: “May paghidait kamo.”’” Yadtong butig nga mga manalagna nagsiling, “Paghidait! Paghidait!”bisan wala sing paghidait.—Jeremias 23:16, 17; 6:14.

⁴ Subong man, sa apostata nga Cristiandad karon may yara mga manalagna sang paghidait. Madamu sa ila ang nagapanguyapot sa ginlaragway ni Papa Paulo VI subong ang “katapusan nga paglaum sang paghiusa kag paghidait,” ang Nasyones Unidas. Sa dili madugay, ipahayag sina nga hubon ang 1986 subong ang Internasyonal nga Tuig sang Paghidait. Bilang pagpahibalo sang iya tinutuyo nga makigbahin sa Tuig, ang Santa Sede nagsiling nga “ginalauman niya nga ini nga Tuig magapatubas sing maayo nga mga resulta kag magatanda sang importante nga panag-on sa pagpaluntad sang mahidaiton nga mga relasyon sa tunga sang mga tawo kag mga pungsod.” Apang realistiko bala paabuton nga ang mga pungsod makapasad sing matuod nga paghidait?

⁵ Ang Dios mismo nagalaragway kon ano ang mahanabo: “Yari karon! Ang unos ni Jehova, ang kasingkal nagaguwa, ang unos nga nagaalimpulos. Magalupok ini sa ulo sang malauton. Ang kaakig ni Jehova indi magbalik tubtob nga mahikot kag mahimu niya ang mga tinutuyo sang iya tagipusuon. Sa ulihi nga mga adlaw binagbinagon ninyo ini nga may paghangop [ukon, “mahangpan ninyo ini sing himpit,” The New English Bible].” (Jeremias 23:19, 20; tan-awa man ang 30:23, 24.) Huo, ang mga lider sang butig nga relihion magahangop sang kon ano ang buot silingon sang “ulihi nga mga adlaw” para sa ila. Apang ang bisan ano nga pagbinagbinag sa sini tuman na ka ulihi!—Ipaanggid ang Bugna 18:10, 16; 19:11-16; Mateo 24:30.

⁶ Apang, sing malipayon, madamung mga indibiduwal nga mga ulipon anay sang butig nga relihion ang ‘nagabinagbinag sa sini.’ Ginasabat nila ang panawag: “Guwa kamo sa iya [butig nga relihion],” sanglit indi nila luyag nga makigbahin sa iya mga sala ukon makabaton sing bahin sa paghukom sang Dios batok sa iya. Kon isa ikaw sa ila, kabay nga magapadayon ka sa pagpamati kon ano ang ginasiling sang Pulong sang Dios nahanungod sa “ulihi nga mga adlaw” kag sa mahimayaon nga dag-on sang paghidait nga magasunod.—Bugna 18:2, 4, 5; 21:3, 4.

Pagsalakay ni Gog

⁷ Kamusta ang katawhan mismo sang Dios sa “ulihi nga mga adlaw”? Pasugira si manalagna Ezequiel. Subong isa ka pamatan-on, walay duhaduha nga kilala niya si Jeremias, apang sadto anay si Ezequiel gindala sa Babilonia. Didto, sa tupad sang suba sang Chebar, gintangdoan sia sang 613 B.C.E. agod magpanghikot subong manalagna kag manugbantay ni Jehova tungod sa mga Judiyo nga tinapok, ang pag-alagad nga gintuman niya sing matutom sa dimagkubos 22 ka tuig. Apang, ang iya mga tagna lampas pa sa iya kaugalingon nga tion. Sa mga kapitulo 38 kag 39, nagasugid sia nahanungod kay ‘Gog sang Magog.’

⁸ Sin-o ining si ‘Gog sang Magog’? Bueno, sin-o ang panguna nga kaaway ni Jehova nga sa iya dapat husayon ang daku nga hulusayon sa “ulihi nga mga adlaw,” ang nahanungod sa bug-os uniberso nga pagkasoberano? Sia amo si Satanas nga Yawa, nga gintagbong sang Manugbantay-Hari, nga si Jesucristo, gikan sa langit pagkatapos Sia mapalingkod sang 1914. Ang ginpakanubo kag akig nga si Gog yara karon sa limitado espirituhanon nga duog, “ang duta ni Magog,” nga malapit sa sini nga duta. Nagakahulugan ini sang “kailo sa duta” bangod nahibaloan ni Gog nga malip-ot na lang ang tion para tumanon niya ang iya makangilil-ad nga pagsulundan sang ‘paggahom kag paglaglag.’—Ezequiel 37:24-28; 38:1, 2; Bugna 11:18; 12:9-17.

⁹ Ginakutlo ni Ezequiel ang Soberanong Ginuong si Jehova nga nagasiling: “Yari karon batok ako sa imo, O Gog, prinsipe [gumalahom sang kalibutan] . . . kag palisuon ko ikaw kag butangan sing mga kaw-it ang imo mga sulang kag paguwaon ko ikaw kag ang bug-os mo nga hangaway, . . . ang madamu nga katawhan upod sa imo.” (Ezequiel 38:3-6; Juan 12:31) Huo, si Gog may madamu nga katawhan upod sa iya kay “ang bug-os nga kalibutan yara sa gahom sang malauton.” (1 Juan 5:19) Apang, mabutangan ni Jehova sing malaragwayon nga mga kaw-it ang mga sulang ni Gog agod maniobrahon sia. Apang ngaa, kag paano?

¹⁰ Sa idalom sang sugyot ni Gog, ang mga su­perpow­er karon nagapangatarungan nga ang bug-os kalibutan nga paghidait nagadepende sa ila pagtipon sing dugang pa sang makahaladlok nuklear nga mga hinganiban. Kag ang iban nga mga pungsod nagasakdag sa ila. Apang, ang katawhan sang Dios nga “natipon sing tingob gikan sa mga pungsod” nagsikway sa mga hinganiban sang kasingki. Ang mga Saksi ni Jehova amo lamang ang “pungsod” sa duta nga makasiling sing matinuoron, “Nagasalig kami sa Dios.” (Isaias 2:4; 31:1; Hulubaton 3:5) Ining mahidaiton nga mga saksi ni Jehova “nagapuyo sing malig-on, tanan sila nga nagapuyo nga wala sing mga kuta, kag wala sing mga pintal ukon mga gawang.” Sila “nagapuyo sa tungatunga sang duta,” kay sa tanan nga mga pungsod, sila ang yara sa tunga subong ang isa ka katawhan nga wala mabihag ni Gog. (Ezequiel 38:11, 12) Busa, ang akig nga si Gog sang Magog magadala sang iya bug-os yawan-on nga organisasyon sa patag-awayan. Kaangay sang leon nga nagangurob, ang ginpakanubo nga si Satanas nagahanda para sa bug-os nga pagsalakay. Para sa kaluwasan, dapat kita tanan ‘magtindog batok sa iya, nga malig-on sa pagtuo.’—1 Pedro 5:8, 9.

¹¹ Ginsilingan ni Jehova si Ezequiel: “Busa, O anak sang tawo, itagna, kag isiling kay Gog, ‘Amo ini ang ginasiling sang Soberanong Ginuong si Jehova: “Indi bala nga sa sadto nga adlaw kon ang akon katawhan [espirituwal] nga Israel magapuyo sing malig-on ikaw makahibalo sini?”’” Si Gog kag ang iya kabon nahisa sa kalig-onan kag kabuganaan nga nakita nila sa tunga sang mga Saksi ni Jehova karon. Naakig sila nga ginhimu nila anay ang ila kaugalingon nga “indi bahin sang kalibutan [ni Satanas].” Sa amo si Jehova magayaguta kay Job, nagapukaw sa iya nga salakayon ang wala sing inugpangapin nga mga Saksi. Silingan ni Jehova si Gog: “Magataklad ka batok sa akon katawhan nga Israel, subong sang gal-um sa tabon sang duta. Sa ulihi nga mga adlaw dalhon ko ikaw batok sa akon duta, agod ang mga pungsod magkilala sa akon kon pakabalaanon ako sa imo, O Gog, sa atubangan sang ila mga mata.”—Ezequiel 38:14, 16; Juan 17:14, 16.

¹² Ang akig nga si Gog nagahulag agod sakupon ang mabuganaon nga “duta” sang katawhan ni Jehova. Apang, si Gog lamang bala ang isa nga akig? Kamusta ang kaakig sang Soberanong Ginuong si Jehova batok kay Gog kag sa iya mga kabon? Sa Ezequiel 38:18-23 ginalaragway ni Jehova kon paano niya ‘pakabalaanon ang iya kaugalingon sa mga mata sang pungsod’ paagi sa paglaglag kay Gog kag sa pagluwas sa iya matutom nga mga alagad. Nagahinakop sang report sang iya kadalag-an batok kay Gog kag sa iya mga kabon, ang Soberanong Ginuo mismo nagsiling: “Makilala nila nga ako amo si Jehova.” Ang iya mahimayaon nga ngalan ginbindikar!

‘Ginpahayag ang mga Tinago’

¹³ Samtang si Ezequiel nagapanagna sa tunga sang tinapok nga mga Judiyo malapit sa Babilonia, ang pamatan-on nga si Daniel, nga may prinsipenhon nga Judiyong kaliwat, gin-edukar sa harianon nga luwang ni Nabokodonosor. Didto, subong manughupot-integridad nagpahamtang sia sing maayo nga halimbawa para sa tanan matutom nga mga alagad ni Jehova karon.—Daniel 1:8, 9.

¹⁴ Duha ka tuig sa tapos mapukan ang Jerusalem, si Nabokodonosor gintublag sang isa ka damgo. Sang makabugtaw na sia, indi na niya madumduman ang damgo. Apang ginpahibalo sang mahadlukon sa Dios nga si Daniel sa hari ang damgo kag ang kahulugan sini. Bangod sini, ginhatag niya sa Dios ang tanan nga kredito, nagasiling sa hari: “May isa ka Dios sa mga langit nga Nagapahayag sang mga damgo, kag sia nagpakilala kay Hari Nabokodonosor sang mahanabo sa ulihi nga mga adlaw.” (Daniel 2:28) Ano ang maton-an naton gikan sa damgo kag sa aplikasyon sini sa “ulihi nga mga adlaw”?

¹⁵ Makita naton diri ang isa ka higante, daku nga larawan nga ginahuman ang kalabanan nga bahin sang lainlain nga mga metal sing sunodsunod. Ginpaathag ni Daniel kon ano ang ginarepresentar sang mga serye sang mga ginharian kag ginsilingan si Nabokodonosor, “Ikaw amo ang ulo nga bulawan,” nga nagapatuhoy sing maathag sa dinastiya sang Babilonia. Nagasunod ang iban pa nga mga kagamhanan sa kalibutan, ang dughan kag mga butkon nga pilak nagalarawan sa Medo-Persia, ang tiyan kag mga paa nga saway sa Gresya, kag ang mga batiis nga salsalon sa Roma kag, sa ulihi, sa bug-os kalibutan nga kagamhanan sang Britanya kag Amerika. (Daniel 2:31-40) Tubtob sa “gintalana nga panag-on sang mga pungsod,” kutob sang 607 B.C.E. tubtob 1914 C.E., ining mga kagamhanan nagasakdag sa ginharian sang ‘dios sining kalibutan.’—Lucas 21:24; 4:5, 6; 2 Corinto 4:4.

¹⁶ Apang, nag-abante sa “ulihi nga mga adlaw” ang “kaliwat sang mga tawo,” ang kinaandan nga tawo. Sa madamu nga kadutaan ang mga hari, mga emperador, kag mga pangulo gintal-usan sang rebolusyonaryo kag demokratiko nga mga gumalahom. Ang sayop nga paggahom sang tawo sa duta nangin isa ka magarot kag mapintas nga pagkadiktador kag labi ka mapasibusibuon nga demokratiko nga mga dagway sang pangulohan. Kaangay sang salsalon kag daga, wala ini nagasamo. Bisan sa Nasyones Unidas wala sila nagahiusa kundi nagapakigbahin, sa baylo, sa maakigon nga mga debate kag mga pamahog. Sa pagkamatuod, ‘ang ginharian napamatod-an nga nabahinbahin.’—Daniel 2:41-43.

¹⁷ Sa amo, sa “ulihi nga mga adlaw,” ang hulusayon tuhoy sa bug-os kalibutan nga pagginahom yara na sa iya putokputokan. Kag ano ang solusyon? Yari karon! Nagapanghikot na kutob sang 1914 ang Mesianikong Ginharian sang Dios. Amo ini ang “bato” nga natiphag sa “bukid” sang bug-os uniberso nga pagkasoberano ni Jehova. Wala sing tawhanon nga politiko ang nagapakigbahin sa sina! Nag-abot ini, sing husto sa tion, sing eksakto gid. Sa pat-od nga tion sang Dios, dugmokon sini ang tiil sang larawan kag pulboson ang bug-os nga higante. Kaangay sang upa nga ginapalid sang hangin, ang hinimu tawo nga pagginahom pagapaliron, nga wala na sing agi nga mabilin. Apang, ang “bato”—ang Ginharian sang dakung Dios kag sang iya Cristo—mangin isa ka daku nga bukid nga magapuno sa bug-os nga duta. Ina nga ginharian ‘indi na pagalaglagon kag indi na pagailiton sa iban nga katawhan.’ Magatindog ini sing dayon. Mapasalamaton gid kita kay Jehova bangod sang iya abanse nga ‘pagpahayag’ sina nga mga tinago!—Daniel 2:29, 44, 45.

Ang Modernong-Adlaw nga “Pagsumponganay”

¹⁸ Apang, may dugang nga inugsiling si Daniel nahanungod sa tawhanon nga pangulohan kag sa “ulihi nga mga adlaw.” Mga 70 ka tuig sa tapos mapatpat ang damgo ni Nabokodonosor, ang tigulang nga si Daniel yara gihapon sa Babilonia apang nagapangalagad sa idalom ni Ciro, ang hari sang Persia. Samtang yara sia sa pangpang sang suba sang Hiddekel, ang isa ka manugtonda nagpakita sa iya, nga nagsiling: “Nagaabot ako sa pagpahangop sa imo sang mahanabo sa imo katawhan sa ulihi nga mga adlaw, kay ang palanan-awon tungod sa madamu pa nga adlaw.” (Daniel 10:14) Padayon nga ginalaragway sang manugtonda sing detalyado katama ang mga gumalahom kag mga hitabo nga magaluntad sa maragtas sang Persianhon, Griego, Egiptohanon, Romano, Germaniko, Anglo-Amerikano, kag sosyalistiko nga mga dagway sang pagginahom. Daw ano ka talalupangdon nga ining tanan nga maragtas, nga nagatuptop sa kapin sa 2,500 ka tuig, ginsulat sing abanse! Nagahatag ini sa aton sing daku nga pagsalig sa inspirado nga matagnaon nga Pulong ni Jehova nga Dios!a

¹⁹ Ini nga tagna nagasiling nga, sa ulihi, ang duha ka su­perpow­er magaluntad, ang “hari sang bagatnan” kag ang “hari sang aminhan.” Sa katapusan, ang manugtonda nagsiling, ang naaminhan nga hari “magapadaku sang iya kaugalingon labaw sa tagsa ka dios; kag magapamulong sing makatilingala nga mga butang batok sa Dios sang mga dios”—sing indi kalahamut-an nga mga butang, kay ‘sa dios sang mga kuta sia nagahatag sing himaya.’ Batok sa sining matinaastaason nga “hari,” makig-away ang “hari sang bagatnan,” nga isa man ka gamhanan sa kusog militar. Subong sang gintagna, ining duha ka hari ‘magasumponganay.’ Ang modernong-adlaw nga mabugnaw nga inaway sa ulot sang mga su­perpow­er nagailustar sing maayo sini. Kon kaisa ‘nagasumponganay’ sila sing masingki samtang nagabaisay sila para sa magkapareho nga nuklear nga mga hinganiban, samtang ginadugangan ang ila paghanda sa inaway tubtob sa latid.—Daniel 11:36-45.

²⁰ Bisan pa nga ang tagna nagatagna nga ang “hari sang aminhan” magaabot kaangay sang buhawi nga magabaha sa madamu nga mga duta, indi ini magapat-od sa resulta. Ang nagapat-od nga bagay amo ang ginsiling sa Daniel 12:1: “Kag sa sadto nga tion magatindog si Miguel, ang daku nga prinsipe nga nagatindog batok sa mga anak sang imo katawhan.” Ining si Miguel amo si Jesucristo, nga ‘nagtindog’ sa iya Ginharian sang 1914, kag gilayon nga nagtagbong kay Satanas gikan sa mga langit. Kag ining “Hari sang mga hari” amo ang magapanghikot sa Armagedon agod laglagon ang tanan nga “mga hari sang duta,” lakip yadtong sa “aminhan” kag sa “bagatnan.”—Bugna 12:7-10; 19:11-19.

²¹ Didto, sa putokputokan sang “ulihi nga mga adlaw,” ang resulta mangin dayag, upod ang kadalag-an sang Ginharian sang Dios. Ginalaragway ini sang manugtonda sa sining dugang nga mga pulong: “Kag may tion sang kagamo subong sang wala pa mahanabo kutob sang may pungsod tubtob sa amo nga tion.”—Daniel 12:1; ipaanggid ang Jeremias 25:31-33; Marcos 13:19.

²² Dapat bala naton kahadlokan inang tion sang kapipit-an kag kagamo? Indi kon dampig kita kay Jehova, kay ang manalagna padayon sa pagsiling: “Sa sadto nga tion luwason ang imo katawhan, ang tagsatagsa nga makita nga nasulat sa tolon-an.” (Daniel 12:1) Busa, ton-an naton sing makugi ang Biblia kag hinguyangon ang aton kaugalingon sa pagsimba kay Jehova. Sa amo, sa “ulihi nga mga adlaw,” kabay nga makita naton ang aton mga ngalan nga nasulat sa “tolon-an nga handumanan” sang Dios nga “ginsulat sa atubangan niya tungod sa mga nagkahadlok kay Jehova kag nagpainoino sa iya ngalan.” (Malaquias 3:16) Sa paghimu sini, may pribilehiyo kita nga makigbahin sa iya kadalag-an sa “ulihi nga mga adlaw.”

[Footnotes]

Tuhoy sa “ulihi nga mga adlaw”—

◻ Ano nga resulta ang gintagna ni Jeremias tuhoy sa bug-os kalibutan nga paghidait?

◻ Ang pagsalakay ni Gog nagaresulta sa paghusay sang anong hulusayon, kag paano?

◻ Sa anong daku nga putokputokan nagatudlo ang damgo ni Nabokodonosor?

◻ Paano matapos ang pag-inaway sang kagamhanan sa ulot sang duha ka “hari”?

[Mga Pamangkot sa Pagtinuon]

1. (a) Paano ang mga tagna ni Jeremias, Ezequiel, kag Daniel makawiwili sa aton? (b) Ngaa yadtong inspirado nga mga sinulatan gin-amligan?

2. Ngaa kinahanglan ni Jeremias ang kabakud gikan kay Jehova?

3. Anong butig nga mga pulong ang ginapamulong sang mga manalagna?

4. Sa ano nga paglaum nagapanguyapot ang madamu sa Cristiandad?

5. Ano ang ginatagna ni Jehova, kag paano ini matuman sa “ulihi nga mga adlaw”?

6. Anong malipayon nga resulta ang mahanabo para sa madamu?

7. Sa idalom sang anong mga kahimtangan nagtagna si Ezequiel?

8, 9. (a) Anong dakung hulusayon ang dapat husayon, kag san-o? (b) Sin-o si Gog, sin-o ang nagasunod sa iya, kag ano nga pagsulundan ang iya ginahimu? (c) Ano ang himuon ni Jehova kay Gog?

10. (a) Kabaliskaran sa mga pungsod, diin ginabutang sang mga Saksi ni Jehova ang ila pagsalig? (b) Ngaa naakig si Gog kag ang iya kabon? (c) Ano ang dapat naton himuon agod makalampuwas?

11. Paano ‘dal-on [ni Jehova] si Gog batok sa iya duta,’ kag para sa anong katuyoan?

12. Nahisuno sa Ezequiel 38:18-23, ano ang resulta sang pagsalakay ni Gog?

13. Paano nagpahamtang si Daniel sing maayo nga halimbawa para sa pamatan-on nga mga Saksi?

14. Sa ano nga bagay ginhatag sang pamatan-on nga si Daniel ang tanan nga kredito sa Dios?

15, 16. Ano ang pagkapatpat sa damgo ni Nabokodonosor?

17. Paano natuman ang tagna sa “ulihi nga mga adlaw”?

18. (a) Anong ulihi nga palanan-awon ang ginhatag kay Daniel? (b) Ano ang talalupangdon tuhoy sining palanan-awon?

19. Anong modernong mga hitabo ang ginatagna sang tagna?

20. Ano ang nagapat-od sang resulta, kag paano nadalahig si “Miguel”?

21. Ano, nian, ang resulta sang “ulihi nga mga adlaw”?

22. Subong katawhan sang Dios, ano ang dapat nga reaksion naton sa sining mga tagna kag upod ang anong paglaum?