Makahanda Ka Bala Karon Para sa Paghingabot?
“Kon ginhingabot nila ako, hingabuton man nila kamo.”—JUAN 15:20.
HANDURAWA ang imo kaugalingon nga nagapahuway sa katre sang isa ka aga. Ginatuyo pa ikaw kag nagahunahuna kon bala mabangon ka sa gilayon ukon magpahuwayhuway pa. Apang una anay, ginpatokar mo ang radyo agod mamati sing balita. Sa hinali, namuragmuragan ikaw sa ginbalita. Ang manugbalita nagpahibalo: “Suno sa mando sang pangulohan, ang sekta nga nakilal-an subong mga Saksi ni Jehova ginadumilian na sa bug-os nga pungsod.” Indi ka na mapahamtang!
2 Ini, ukon ang butang nga kaangay sini, amo ang naeksperiensiahan sang mga Cristiano sa pila ka pungsod sa modernong tion. Sa masami, may yara una nga paandam. Apang kon kaisa ang pagdumili wala gid ginapaabot. Dapat bala kita makibot sa sini?
3 Indi. Natabo man ini sang unang siglo. Dumduma kon paano si Jesucristo, sa maaga nga bahin sang tigpamulak sang 33 C.E., nagsakay sa isa ka asno pasulod sa Jerusalem. Malipayon nga gin-abiabi sia sang katawhan, kag ginhumlad nila ang ila mga panapton sa dalan sa iya unahan. Apang ano ang natabo pagligad sang pila ka adlaw? Si Jesus may kasaba sa atubangan ni Poncio Pilato, kag ang isa ka guban sang mga tawo gikan sa amo gihapon nga siudad uhaw sa dugo nga nagsinggit: “Ilansang sia! . . . Ilansang sia!” (Mateo 21:6-9; 27:22, 23) Ang kahimtangan hinali nga nagbalhin.
4 Busa, indi kita dapat makibot kon sa pila ka kadutaan karon ang kahimtangan nagabalhin kag ang paghingabot nagaabot nga wala ginapaabot. Dumduma, kon kita matuod gid nga mga sumulunod ni Jesus, dapat naton paabuton ang paghingabot. (Juan 15:20) Ginapadaku sini ang pagkaimportante sang mga pulong ni Jesus, “Padayon kamo sa pagbantay.”—Mateo 24:42.
5 Paano naton mahimo ini? May yara bala paagi nga makahanda kita, kon matabo ang malain?
Ihanda ang Imo Hunahuna kag Tagipusuon
6 Mabudlay maghimo sing pisikal nga paghanda para sa paghingabot bangod wala ka makahibalo kon mangin ano gid ang kahimtangan. Tubtob aktuwal ini nga matabo, wala ka makahibalo kon bala ang pagdumili mangin estrikto ukon indi, ukon kon ano ang dumilian. Ayhan ang pagbantala lamang sa pamalay ang dumilian, ukon ayhan ang relihioso nga mga miting. Kon kaisa ang legal nga organisasyon sang mga Saksi ni Jehova ginapasira, ukon ang pila ka indibiduwal ginabilanggo sa gilayon. Mahimo naton maplano na ang lainlain nga duog nga matagoan naton sang mga literatura kon kinahanglanon ini. Apang labaw pa sa sina, diutay lamang ang aton mahimo sa pisikal nga paghanda.
7 Apang, sarang mo mahanda ang imo hunahuna kag tagipusuon, kag mas importante ini. Itanum sa imo hunahuna kon ngaa ginatugutan ang paghingabot kag kon ngaa mahimo nga dalhon ikaw sa atubangan sang mga manuggahom. “Subong panaksi,” siling ni Jesus. (Mateo 10:16-19) Kon ang imo tagipusuon bug-os nga nakahanda sa pagpabilin nga matutom bisan ano man ang matabo, sarang mapahayag ni Jehova ang maalamon nga paagi sa paghulag kon mag-utwas ang kinahanglanon. Busa, paano naton mahanda ang aton kaugalingon sa espirituwal para sa paghingabot?
Paano Ikaw Nagapakig-angot sa mga Tawo?
8 Si apostol Pablo nagsiling: “Nagakalipay ako sa mga kaluyahon, sa mga pasipala, sa mga kaiwat, sa mga paghingabot kag sa mga kasakitan, tungod kay Cristo.” (2 Corinto 12:10) Luyag bala ni Pablo nga pasipalahan sia? Sa pagkamatuod indi. Apang ang paghingabot masami nga nagalakip sing pasipala, kag kon kinahanglanon ini sa pagdala sing kadayawan sa ngalan sang Dios, nian nalipay si Pablo sa pagbatas sini.
9 Mapat-od man naton nga kita kon kaisa dapat magbatas sing “mga pasipala . . . tungod kay Cristo.” Ayhan abusuhan kita sa pulong ukon sa lawas. Magabatas bala kita? Bueno, paano naton ginatamod ang aton kaugalingon karon? Serioso gid bala kita sa aton kaugalingon kag nagapangakig dayon sa matuod ukon indi matuod nga mga insulto? Kon amo, ngaa indi panikasogan ang pagpalambo sing “pagbatas, . . . pagkalulo, pagpugong sang kaugalingon”? (Galacia 5:22, 23) Maayo gid ini nga paghanas para sa Cristiano nga nagakabuhi karon, kag makaluwas ini sang imo kabuhi sa tion sang paghingabot.
Paano Mo Ginatamod ang Pag-alagad sa Latagon?
10 Sa masami, ang una nga ginadumilian amo ang pagbantala sa publiko sing “maayong balita.” Apang ang pagbantala kag paghimo sing disipulo importante sa sining katapusan nga mga adlaw. Paano pa makatuon ang mga tawo nahanungod sa Ginharian sang Dios? Busa, ang nagakaigo nga reaksion sa sina nga pagdumili amo ang ginpabutyag sang mga apostoles, sang gindumilian sang Judiyong mga lider sang relihion ang ila pagbantala. (Binuhatan 5:28, 29) Sa idalom sang pagdumili, ang pila ka paagi sang pagbantala mahimo sirhan. Apang, dapat himuon ang hilikuton. May kusog ka ayhan sa pagpadayon sang pagbantala sa idalom sang pag-ipit sang paghingabot?
11 Bueno, paano mo ginatamod ang pagbantala nga hilikuton karon? Ginatugutan mo bala ang diutay nga mga balagbag nga mag-upang kag maghimo sa imo nga ditayuyon sa pag-alagad sa latagon? Kon amo, ano ang himuon mo sa idalom sang pagdumili? Nahadlok ka bala sa mga tawo karon? Handa ka bala sa pagbantala sa balay kag balay sa inyo kalye? Nahadlok ka bala nga magbantala sing isahanon? Sa pila ka kadutaan, ang duha ka tawo nga nagabantala masami nga makatawag sing igtalupangod. Gani, kon wala sing peligro, ngaa indi magbantala sing isahanon karon kon kaisa? Mangin maayo ini nga paghanas?
12 Nagapakigbahin ka bala sa pagpahamtang sing mga magasin sa kalye? May kaisog ka bala kag inisyatibo sa pagpangita sing mga kahigayunan para sa dipormal nga pagpanaksi? Nagabantala ka bala sa mga kumbuyahan nga teritoryo? Nahadlok ka bala magpalapit sa mga manggaranon ukon bantog nga mga tawo? Kon nagapakigbahin ikaw sa pila lamang ka sahi sang pagbantala, ano ang himuon mo kon, sa idalom sang pagdumili, ina nga sahi sang pagbantala indi na posible?
13 Ginabaton mo bala nga may kaluyahon ikaw sa pila ka bahin? Karon na ang tion sa paglandas sini. Magtuon sa pagsandig kay Jehova kag mangin kapin ka sangkol subong isa ka ministro. Nian masangkapan ikaw sing maayo pa sa pagbantala karon kag nakahanda sing mas maayo sa pagbatas sa tion sang paghingabot.
Masaligan Ka Bala?
14 Sa bug-os nga Cristianong Griegong Kasulatan, ginasambit ang mga tawo nga nangin mga torre sang kusog sa kongregasyon. Halimbawa, maisugon nga ginbuligan ni Onesiforo si Pablo sang nabilanggo sia sa Roma. (2 Timoteo 1:16) Si Febe gindayaw bangod sang iya lakas nga pagpangabudlay sa kongregasyon sa Cencreas. (Roma 16:1, 2) Ina nga mga lalaki kag mga babayi mahimo gid nangin makapalig-on nga impluwensia sang mag-abot ang paghingabot. Sila ‘nagpabilin nga nagamata, nagtindog sing malig-on sa pagtuo, nagpakalalaki, nagpakabakod.’—1 Corinto 16:13.
15 Ang tanan nga Cristiano, labi na ang mga gulang, dapat magtinguha sa pag-uswag kag mangin kaangay sang malig-on nga mga Cristiano sang una. (1 Timoteo 4:15) Magtuon sa pagtago sang kompidensial nga mga butang kag maghimo sing mga desisyon pasad sa Makasulatanhon nga mga prinsipio. Hanasa ang imo kaugalingon sa paghantop sing Cristianong mga kinaiya sa iban agod mahibaloan mo kon sin-o ang masaligan sa idalom sang pag-ipit. Magpanikasog, upod sa kusog ni Jehova, nga mangin haligi sa inyo kongregasyon, isa ka tawo nga nagabulig sa iban sa baylo nga amo pirme ang bululigan.—Galacia 6:5.
Paano Ikaw Nagapakigbagay sa mga Tawo
16 Ginpalig-on kita ni apostol Pablo: ‘Sul-ob kamo sing tagipusuon sang pagkaawa, pagkalulo, pagkakubos, pagkamapinailubon, kag pagkamabinatason. Magpinaumuray kamo kag magpinatawaray.’ (Colosas 3:12, 13) Mahapos bala ini para sa imo? Ukon naugot-ugot ka bala sing indi nagakaigo sa mga dikahimpitan sang iban nga tawo? Madali ka bala masaklaw ukon mangluya? Kon amo, ini pa ang dapat handaan.
17 Sa kadutaan nga sa diin ginadumilian ang mga miting, ang mga Cristiano tayuyon nga nagatipon sa diutay nga mga grupo. Sa amo nga mga kahimtangan, ang ila mga kakulangan kapin nga kitaon. Gani ngaa indi hanason na karon ang imo kaugalingon sa pagbatas sang mga kaluyahon sang iban, nga ayhan amo man ang ila ginahimo sa imo? Indi mangin mamulayon sa iban kag sa amo mapaluya mo sila. Subong man, hanasa ang imo kaugalingon kag ang imo mga anak nga tahuron ang propiedad sang iban nga tawo samtang nagatambong sa Pagtinuon sa Libro sang Kongregasyon. Sa idalom sang paghingabot, ina nga pagtahod makaamot sa mahidaiton nga relasyon.
Palausisa Ka Bala?
18 Sing kinaugali, ang iban sa aton tuman ka palausisa. Indi kita makabatas nga indi “makahibalo.” Amo ka bala sina? Kon amo, binagbinaga ini: Kon kaisa, kon ang hilikuton sang mga Saksi ni Jehova ginadumilian, ginatinguhaan sang awtoridad nga tukibon ang ila mga kahimusan sa organisasyon kag ang mga ngalan sang may salabton nga mga manugtatap. Kon nahibaloan mo ining mga butang, mahimo nga sakiton ikaw sa tuyo nga piliton ikaw sa pagsugid. Kag kon manugid ka sa ila, ang hilikuton sang imo kauturan maapektohan sing daku. Busa, kon kaisa maayo pa nga ang mahibaloan mo amo lamang ang dapat mahibaloan mo.
19 Makahanas ka bala karon para sa sina? Huo. Halimbawa, Kon may yara kaso sa hudisyal nga komite sang kongregasyon, ang mga indibiduwal dapat mangin kontento na sa ginpamat-od sang mga gulang nga dapat isugid kag indi na mangusisa pa agod mahibaloan ang mga detalye. Ang mga asawa kag mga anak sang mga gulang indi dapat magtinguha sa pagpilit sa ila nga isugid ang kompidensial nga mga butang. Sa tanan nga paagi, dapat kita magtuon nga indi ‘manghilabot sa butang nga indi para sa aton.’—2 Tesalonica 3:11.
Ikaw Bala Estudyante sang Biblia?
20 Ang Biblia amo ang sadsaran sang espirituwal nga kusog sang Cristiano. Nagahatag ini sa iya sing mga sabat sa iya labing importante nga mga pamangkot kag nagapahayag sa iya sang kaalam sang Dios. (2 Timoteo 3:14-16) Ginakilala ini sang tanan nga Cristiano sa prinsipio, apang ano gid ang bahin sang Biblia sa imo kabuhi? Ginaton-an mo bala ini sing tayuyon kag ginatugutan ini sa pagtuytoy sa imo sa tanan nga imo ginahimo?—Salmo 119:105.
21 Sa masami, ang pagtuon sang aton mga literatura sa Biblia ginadumilian kon ang aton hilikuton ginadumilian. Kon kaisa, bisan ang mga Biblia mabudlay makita. Sa idalom sinang mga kahimtangan, pahanumdumon ikaw sang balaan nga espiritu sang mga butang nga imo naton-an sang una. Apang indi sini ipahanumdom sa imo ang butang nga wala mo maton-an! Busa, sa kapin nga pagtuon mo, kapin pa ang matipon sa imo hunahuna kag tagipusuon nga ipahanumdom sa imo sang balaan nga espiritu sa tion sang pagkinahanglan.—Marcos 13:11.
Nagapangamuyo Ka Bala?
22 Importante ini nga pamangkot kon ginahunahuna naton ang paghingabot. Ang Biblia nagalaygay: “Magpadayon sa pangamuyo.” (Roma 12:12) Ang pangamuyo amo ang direkta nga pagpakig-angot kay Jehova nga Dios. Paagi sa sini makapangayo kita sing kusog sa pagbatas sang mga kabudlayan kag sa paghimo sing husto nga mga desisyon, subong man sa pagtukod sing personal nga relasyon kay Jehova nga Dios. Bisan kon kuhaon sa aton sang mga manugpamatok ang aton mga literatura, ang aton mga Biblia, kag ang aton pagpakig-upod sa iban nga Cristiano, indi gid nila makuha sa aton ang pribilehiyo sa pagpangamuyo. Sa pinakamabakod nga bilanggoan, ang isa ka Cristiano makapakighambal sa Dios. Busa, ang bug-os nga paghimulos sang pribilehiyo sa pagpangamuyo isa ka maayong paagi sa paghanda para sa bisan ano nga mahimo ginatigana sang palaabuton.
Nagasalig Ka Bala sa Awtoridad?
23 Importante man ang pagpalig-on sini nga pagsalig. Ang mga gulang sa kongregasyon bahin sang aman sang Dios sa pag-amlig sa aton. Ang mga gulang dapat maghulag sa isa ka paagi nga takus sa pagsalig, kag ang nabilin nga bahin sang kongregasyon dapat magtuon sa pagsalig sa ila. (Isaias 32:1, 2; Hebreo 13:7, 17) Labi pa ka importante, dapat kita magtuon sa pagsalig sa “matutom kag mainandamon nga ulipon.”—Mateo 24:45-47.
24 Ang mga kaaway mahimo nga magpalapta sing kabutigan nahanungod sa organisasyon sang Dios. (1 Timoteo 4:1, 2) Sa isa ka pungsod, ang iban nga mga Cristiano ginpatalang sa pagpati nga gintalikdan na sang Nagagahom nga Hubon sang mga Saksi ni Jehova ang Cristianismo, samtang sila nagapabilin gihapon nga matutom sa sini. Ang isa ka maayong paagi sa paghanda sa pagpamatok sa mga pag-atake nga subong sini amo ang pagtukod sing malig-on nga gugma para sa kauturan kag magtuon sa pagsalig sa mga kahimusan ni Jehova.—1 Juan 3:11.
Mahimo Ikaw Magdaug
25 Ang tigulang na nga si apostol Juan, sa tapos magbatas sing paghingabot, nagsugid sa aton: “Ang bisan ano nga natawo sa Dios nagadaug sang kalibutan. Kag ini amo ang pagdaug nga nagadaug sang kalibutan, ang aton pagtuo.” (1 Juan 5:4) Indi ikaw magdaug paagi lamang sa imo kusog. Si Satanas kag ang iya kalibutan mas makusog sa imo. Apang indi sila mas makusog kay Jehova nga Dios. Busa, kon tumanon naton ang mga sugo sang Dios, nagapangamuyo nga sakdagon kita sang iya espiritu kag nagasandig sa iya sing bug-os para sa kusog nga makabatas, nian magadaug kita.—Habacuc 3:13, 18; Bugna 15:2; 1 Corinto 15:57.
26 Sa tanan nga kadutaan, may yara mga Cristiano nga ginahingabot, ayhan sang ila mga tiayon nga nagapamatok ukon sa iban nga paagi. Sa iban nga kadutaan, ang tanan nga alagad sang Dios nagabatas bangod sang opisyal nga mga buhat sang lokal nga pangulohan. Apang bisan pa kon, sa karon gid, wala ikaw nagabatas sing pagpamatok ukon tumalagsahon nga kabudlayan, dumduma nga mahimo ini matabo sa bisan anong tion. Si Jesus nagsiling nga ang paghingabot sa mga Cristiano mangin bahin sang tanda sang tion sang katapusan; busa, dapat naton pirme paabuton ini. (Mateo 24:9) Gani ngaa indi maghanda para sa sini karon? Mangin determinado nga, bisan ano ang yara sa unhan, ang imo paggawi pirme nga magadala sing kadayawan sa imo langitnon nga Amay, si Jehova nga Dios.—Hulubaton 27:11.
Ano ang Imo mga Sabat?
◻ Ano nga sahi sang mga paghanda para sa paghingabot ang sarang mo mahimo karon?
◻ Ano ang imo mahimo karon sa pagpalambo sing kusog nga kinahanglanon sa pagpadayon sang pagbantala kon ginahingabot?
◻ Paano ang pag-aplikar karon sang Colosas 3:12, 13 makabulig kon matabo ang paghingabot?
◻ Ngaa palig-unon mo ang imo pagsalig sa gintangdo nga mga gulang kag “matutom kag mainandamon nga ulipon”?
◻ Paano ikaw magdaug kon ginahingabot?
[Mga Pamangkot sa Pagtinuon]
1, 2. Anong wala ginapaabot nga mga aksion ang ginhimo sang pila ka pangulohan batok sa mga Saksi ni Jehova?
3. Anong magkatuhay nga eksperiensia ang naagihan ni Jesucristo sang 33 C.E.?
4. Subong mga sumulunod ni Jesus, ano nga pagtrato ang dapat naton paabuton?
5. Anong mga pamangkot ang takus nga binagbinagon naton karon?
6, 7. (a) Ngaa mabudlay maghimo sing pisikal nga mga paghanda para sa paghingabot? (b) Anong labi pa ka importante nga paghanda para sa paghingabot ang mahimo?
8. Ngaa nakasiling si Pablo nga sia ‘nagkalipay sa mga pasipala’?
9. Paano kita karon makahanda sa pagbatas sing “mga pasipala . . . tungod kay Cristo”?
10. Ano ang nagakaigo nga Makasulatanhon nga reaksion kon ang aton pagbantala nga hilikuton dumilian?
11, 12. Paano mo mahibaloan kon bala may yara ikaw kusog nga kinahanglanon sa pagpadayon sang pagbantala kon ginahingabot?
13. Ano ang mahimo mo karon nahanungod sa imo ministeryo agod masangkapan sing maayo pa sa pagbantala sa tion sang paghingabot?
14, 15. (a) Ano nga sahi sang mga Cristiano sang unang siglo ang nangin makapalig-on nga impluwensia sang mag-abot ang paghingabot? (b) Paano ang alagad ni Jehova karon mangin kaangay sang malig-on nga mga Cristiano sang una?
16, 17. Paano ang pag-aplikar sang Colosas 3:12, 13 karon makabulig sa imo sa paghanda para sa paghingabot?
18. Ngaa maayo pa kon kaisa nga mahibaloan lamang ang dapat mo mahibaloan?
19. Ano karon ang makabulig sa imo sa paglikaw nga ipahayag ang kompidensial nga mga butang kon hingabuton?
20, 21. Paano ang maukod nga pagtuon sing Biblia karon makabulig sa imo kon dumilian ang hilikuton?
22. Paano ang ‘pagpadayon sa pangamuyo’ makabulig sa paghanda para sa paghingabot?
23. Ngaa palig-unon ang pagsalig sa gintangdo nga mga gulang kag sa “matutom kag mainandamon nga ulipon”?
24. Ano ang mahimo sa paghanda sa pagpamatok sa binutig nga mga pag-atake sang mga kaaway sang katawhan ni Jehova?
25. Ano ang makabulig sa aton agod magdaug kon hingabuton?
26. Bisan pa kon wala ikaw nagabatas sing paghingabot karon, ano ang dapat mo himuon?