Nagtipon ang Ikabeinte ka Siglo nga mga Nagahupot sing Integridad!

ANG patag-awayan ginhanda sing temprano pa sa maragtas sang tawo. Nag-utwas ang pagrebelde sa espirituhanon nga duog kag sa tawhanon man nga duog, kag ang pagkamatarong sang pagkasoberano sang Manunuga ginhangkat! Nagresulta ini sa hulusayon sa moral nga nagadalahig sang pamangkot, Sakdagon pa bala sang mga matutom kay Jehova nga Dios ang iya pagginahom paagi sa paghupot sang ila integridad sa iya?—Genesis 3:1-24; Exodo 9:16; Lucas 22:31.

Butigon nga ginsiling ni Satanas nga Yawa nga ang mga sumilimba ni Jehova nagaalagad lamang sa Iya bangod sang makagud nga kaayohan kag indi bangod sang gugma. (Job 1:1–2:10) Apang, nagpabilin sila nga matutom sa Dios walay sapayan sang mga panikasog ni Satanas kag sang iya nagapamatok nga kalibutan nga bungkagon ang ila integridad. (Hebreo 11:4-38; Bugna 12:10-17) Agod pabaskugon ang ika-20 ka siglo nga mga alagad ni Jehova nga magpadayon nga matutom, ginhimus sang Watch Tower Society ang mga serye sang “Mga Nagahupot sing Integridad” nga mga kombension sang mga Saksi ni Jehova nga ginhiwat sa madamong kapungsoran, sugod sang tig-ilinit sang 1985. Kada adlaw ginapatalupangod ang nagakaigo nga tema sa Biblia.

“Paglakat sa Integridad”

Ini nga tema sang nahauna nga adlaw sang kombension nagapukaw sang espirituwal nga gana. Ang pamulongpulong “‘Pamatii, O Katawhan Nakon,’ ang Pulong ni Jehova” nagapahanumdom sa tanan nga magpamati sing maayo. Nagapamatuod sa kaalam sina nga rekomendasyon amo ang pamulongpulong sang tsirman, “Tugoti ang Integridad nga Magaamlig sa Aton.” Paano ina himuon sang integridad? Ang integridad nagakinahanglan nga mangin bug-os kita sa aton debosyon sa Dios, nagahupot nga putli sang aton mga tagipusuon, mga motibo, kag mga luyag. “Kon amo sini ang aton determinasyon,” siling sang tsirman, “nian pagaamligan kita sang aton integridad.”—Salmo 25:5; 31:23.

Masunod kita nga “Ginapalig-on sang mga Halimbawa sang Natilawan nga mga Nagahupot sing Integridad.” Sa tapos mapatuhoyan ang makapalig-on nga mga halimbawa sang nagligad, gin-interbyu sang humalambal ang huaran nga mga nagahupot sing integridad sa aton tion. Yadtong naghupot sang integridad “Wala Ginakahuya ang Maayong Balita.” Ini nga pamulongpulong, pasad sa Marcos 8:38, nagapaathag nga ang wala sing kahuya nga pagpakilala naton sang aton kaugalingon sa aton ministeryo, sa aton sekular nga trabaho, kag bisan diin pa isa ka pangamlig. ‘Kag makalilipay gid kon magahambal si Jesus sa atubangan sang mga anghel kag sang iya Amay, kag magasiling nga kita iya mga disipulo nga nagalakat sa integridad!’

“Ang mga Butang nga Ginpahayag Natungod sa Aton kag sa Aton mga Anak” bahin sang programa nga nagapakita nga, subong mahigugmaon nga Amay, si Jehova nalipay sa pagpahayag sa iya katawhan sang “mga butang nga tinago.” (Deuteronomio 29:29; Amos 3:7) Ang maukod nga pagtuon sining ginpahayag nga mga butang magapabakud sa aton agod mahuptan naton ang aton integridad. Ang masunod nga topiko, “Pagkalipay sa Pulong ni Jehova,” nagapadaku sang punto nga ang mga Saksi ni Jehova dapat mangin mga estudyante sang Biblia. (Salmo 1:1, 2) Sa pagkamatuod, “ang pagtuon bahin sang pagkabuhi sang tagsa ka Cristiano nga nagalakat sa integridad.”

Ang “Pagpangatarungan Gikan sa Kasulatan” isa ka metodo nga gingamit sang mga nagahupot sing integridad sa pagpakig-angot sa lainlain nga sahi sang mga tawo nga ila ginabantalaan. Halimbawa, sa sinagoga sa Tesalonica, si apostol Pablo ‘nangatarungan gikan sa Kasulatan, nga nagasaysay kag nagapahayag nga kinahanglan ang Cristo mag-antos.’ Nagmadinalag-on bala si Pablo? Huo, kay ang iban sang iya tagpalamati nangin mga tumuluo. (Binuhatan 17:1-4) Apresyahon bala sang mga kombensionista ang bulig sa pagsabat sa mga pamangkot nga nasugata nila sa ila ministeryo? Makalilipay gid batunon sang ang humalambal nagpaguwa sang isa ka bag-ong libro nga gamiton sa pag-alagad sa latagon, Reasoning From the Scriptures!

“Paggamit sing Matadlong sang Pulong sang Kamatuoran”

Sadtong ikaduha nga adlaw, makalilipay makita ang tuman kadamo nga mga payunir—linibolibo sa iban nga mga kombension—nga nagtindog sa pangagda sang humalambal, nagapamatuod nga madamo ang nagapakigbahin sa bug-os tion nga pag-alagad. Sa sini nga bahin, “Panikasog Kamo sing Lakas sa Bug-os Tion nga Pag-alagad,” ginpadaku nga ang pagpayunir takus sa panikasog, bisan pa nga kinahanglan ang panikasog nga makig-ambit sa sini nga hilikuton.—Lucas 13:24.

Ang keynote address, “Pahalipaya ang Tagipusuon ni Jehova Paagi sa Paghupot sing Integridad,” ginpasad sa Hulubaton 27:11. Ini nga pamulongpulong nagbinagbinag sang natago nga bahandi sang Pulong sang Dios kag nagpatalupangod sini nga mga hiyas: “Ang matuod nga integridad nagakahulugan sing dimabugto nga debosyon sa isa ka Persona—kay Jehova nga Dios.” “Si Satanas amo ang lider sang nagabungkag sing integridad,” kag ang iya pagrebelde nagpautwas sang “hulusayon tuhoy sa pagkamatarong sang pagkasoberano sang Dios.” “Bisan pa nga ang pagkasoberano ni Jehova wala nasandig sa paghupot sing integridad sang iya mga tinuga, ginhimo sang rebelyuso nga buhat sang Yawa ang pagduhaduha sa integridad sang tawo nga isa ka importante nga bahin sang hulusayon tuhoy sa bug-os uniberso nga pagkasoberano.” Ang humalambal namangkot: “Paano kita posible nga magmadinalag-on subong mga nagahupot sing integridad?” “Mahimo naton ini bangod ginatuman naton ang Pulong sang Dios,” sabat niya.—Roma 14:8.

Ang pag-una sang espirituwal nga intereses sa kabuhi amo ang puwersa sang masunod nga pamulongpulong, “Ang Pagpakamaayo ni Jehova—Amo Ina ang Nagapamanggaranon.” Ginbuligan kita sa paghibalo sing labi pa nga samtang ang kuarta mabuligon, ang gugma sa kuarta makatalagam gid. (Manugwali 7:12; 1 Timoteo 6:10) Ang katutom amo ang nagadala sing pagpakamaayo ni Jehova, ang matuod nga manggad.—Hulubaton 10:22.

Ginpaanggid sang drama “Ang Imo Palaabuton—Isa ka Hangkat” ang nagahupot sing integridad nga dalanon sang mga Nazareo sa hangkat nga ginaatubang sang pamatan-on nga mga Saksi sa ila handum nga mangin mga payunir kag magpabilin sa bug-os tion nga pag-alagad sa baylo nga himud-osan ang materyalistiko nga mga tulumuron. Ginlaygayan sini ang mga pamatan-on nga batunon ang hangkat kag alagaron sing bug-os ang Dios. Gin-ilustrar man sang drama kon paano ang mga ginikanan kag ang iban pa makabulig.

“Magsab-ug sing Bugana, Mag-ani sing Bugana” nagapaathag nga ang prinsipio nga ‘Ginaani naton ang aton ginasab-ug’ maalamon, makatarunganon, kag mahigugmaon. Sa pag-ilog sa Dios, kay Cristo, kag sa ‘matutom nga ulipon,’ nagasab-ug kita sing bugana sa pagtambong sa miting, pangamuyo, pagpanaksi, kag sa tanan nga mga kaangtanan naton sa panimalay. (Mateo 24:45-47) Ina nga pagsab-ug nagapasalig sa aton sang pag-ani sang pagpakamaayo ni Jehova.—Hebreo 6:10.

Sa pamulongpulong “Kon Paano Mo Sabton ang Kada Isa,” ginhatagan sing bug-os nga igtalupangod sang tumalambong ang mga panugda kag mga demonstrasyon kon paano gamiton ang bag-o nga libro Reasoning From the Scriptures. Ginpadaku ang kinahanglanon nga landason ang kahanuklog paagi sa paggamit sing nagakaigo nga mga introduksion, nga maghatag sing matahom nga sabat kon may yara hanuot apang negatibo nga reaksion, kag ipakita nga ang Biblia amo ang ginhalinan sang aton mga sabat.—Colosas 4:6.

Pagkatapos sang katapusan nga pamulongpulong sang ikaduha nga adlaw, “Pagpahayag sang Makatilingala nga Binuhatan ni Jehova,” nagmasaku kita sa paghimo sina paagi sa pagpakigbahin sa pag-alagad sa latagon. Sadto mismo nga hapon ang isa ka Saksi nga nagpamalaybalay sa Vancouver, Canada, nakasugata sing pamatok: “Kon ang Dios isa ka Dios sang gugma, ngaa ginapahanugotan niya ang kalautan?” Nagagamit sa sabat nga gin-aman sang bag-ong Reasoning nga libro nagpaayaw sa nagpamangkot, kag ginsugdan dayon ang isa ka pagtuon sa Biblia.

“Walay Kasawayan sa Tunga sang Kaliwatan nga Tiko”

Amo ini ang nagapahunahuna nga tema sang ikatlo nga adlaw. Sadto nga aga, ang pamulongpulong “Pagpadungog kay Jehova Paagi sa Aton Hamili nga mga Butang” nagpadaku nga ang aton dedikado nga kabuhi, ang aton suod nga kaangtanan kay Jehova, kag nga ang aton pisikal, mental, espirituwal, kag materyal nga mga pagkabutang hamili tanan nga mga butang nga dapat naton ipadungog sa aton langitnon nga Amay.—Hulubaton 3:9, 10.

Ang pamulongpulong “Pagpasag-uli sang Kusog, Wala Ginalapyo” naghatag sing suno sa panahon nga instruksion agod buligan kita nga batuan ang panikasog ni Satanas nga bungkagon ang aton integridad paagi sa mga duhaduha, mga pagkawasi sing pagtuo, materyalismo, mga sulay, kag nanuhaytuhay nga dagway sang pagpaluya sing buot. Ang pagtuon, pamalandong, pangamuyo, pagtambong sa miting, kag regular nga pagpakigbahin sa pagbantala sang Ginharian amo ang pat-od nga mga paagi sa pagpili sang wala ginalapyo nga Tuboran sang enerhiya, si Jehova.—Isaias 40:28-31.

Ang panguna nga punto sa pamulongpulong “Pagkabuhi sa Kabubut-on sang Dios Karon kag sing Dayon” amo nga kon may panghunahuna kita nga iya ni Cristo, magakabuhi kita “indi na sa mga kailigbon sang mga tawo, kundi sa kabubut-on sang Dios.” (1 Pedro 4:1, 2) Wala gid pagtugoti ni Jesus ang bisan anong tawhanon nga kailigbon nga magpalikaw sa iya gikan sa sina nga dalanon. Ang mga kandidato sa bawtismo namati sing maayo sa masunod nga pamulongpulong “Pagbuylog sa mga Nagahupot sing Integridad kay Jehova.” Ginsilingan sila nga ang bawtismo ginsugoran lamang sang ila palumba agod huptan ang integridad. Agod makadalagan sing maayo, dapat nila himuslan ang mga aman subong sang pangamuyo, Pulong sang Dios, Cristianong mga publikasyon, kag aktibo nga pagpakig-upod sa kongregasyon. Ang mga kandidato nagtindog agod sabton ang duha ka pamangkot nga nagapakita kon bala nahangpan nila ang importante nga tikang nga ginahimo nila. Nagsunod ang pagbawtismo sa ila sa tubig, kon kaisa nga makita sing bug-os sang iban pa nga mga delegado sa kombension.

Sadto nga hapon, ginpadaku sang pamulongpulong “Yara bala sa Aton ang Kahadlok kay Jehova?” ang pagtahod sa Soberano sang Bug-os nga Uniberso. (Hulubaton 8:13) Sa ulot sang mahadlukon sa Dios nga si Hari Josafat sang Juda kag sa napalingkod na karon sa trono nga Mas Dakung Josafat, si Jesucristo, may mga pagkaanggid subong sini: paghupot sang pagsimba nga matinlo (1 Hari 22:16; Malaquias 3:1-18); pagpangapin sa kahilwayan sang pagsimba (2 Cronica 17:1, 2, 12-19; Filipos 1:6, 7); pag-organisar nga tudloan ang matuod nga mga sumilimba (2 Cronica 17:7-9; Mateo 28:19, 20); kag pagtukod sing teokratikong hukmanan sa kasugoan para ipatuman ang katarungan.—2 Cronica 19:6, 7; 1 Corinto 6:5, 6.

Ginpakita sang bahin nga “Ang mga Kasulatan Mapuslanon sa Pagsabdong” kon paano kita ginabuligan sang Biblia nga magkabuhi sing mahusay kag magpakita sing pagtahod sa organisasyon, gintangdo nga mga manugtatap, kag mga gulang. Sa masunod nga bahin, “Determinado sa Pag-alagad kay Jehova sa Bug-os nga Tagipusuon,” ginpatudok sa aton ang kinahanglanon nga tigayunon ang mapagros malaragwayon nga tagipusuon, ang isa nga nahiusa—bug-os—sa pag-alagad kay Jehova.—1 Cronica 28:9.

Apang kamusta ang mata? Ginsabat sang masunod nga humalambal ang pamangkot, “Subong Katapo sang Panimalay, ‘Simple’ Bala ang Imo Mata?” Sanglit ginagamit ni Satanas ang madamo nga mga butang sa pagtublag sa aton espirituwal nga mata, nagakaigo nga huptan sang Cristianong mga amay, mga iloy, kag mga kabataan ang timbang nga pagtamod kag unahon ang intereses sang Ginharian. (Mateo 6:33) Ang pagkinahanglan nga kilalahon ang Daku nga Organisador paagi sa pagpakita sing pagtahod sa gintangdo nga mga gulang kag sa kongregasyon ginpadaku sa masunod nga pamulongpulong, “Pamatii sing Maayo ang Mando sang Hari.”—Hulubaton 8:32-36.

Ang pinakaputokputokan sadto nga adlaw amo ang diskurso “Integridad sa Kamatuoran sa Wala sing Dios nga Kalibutan.” Lakip sa iban nga butang, dapat huptan sang mga Cristiano ang integridad sa kamatuoran paagi sa pagpangapin sa panudlo sang Biblia tuhoy sa pagpanuga kag paagi sa pagpamatuod nga butig sang walay dios nga mga teoriya. Nalipay ang mga tumalambong sang ginpaguwa ang 256-pahina nga libro nga nagasabat sing tul-id sang pamangkot nga ginpautwas sa iya titulo, Life—How Did It Get Here? By Evolution or By Creation? Daw ano ka epektibo ini nga publikasyon? Ginbasa sang isa anay ka ebolusyonista, nga karon isa na ka Saksi sa Sweden, ang bilog nga libro sadto nga gab-i kag nagkomento: “Kon isa pa ako ka ebolusyonista kahapon, pat-od nga ginbag-o ko ang akon hunahuna sa isa ka gab-i.”

“Hupti ang Maayo nga Paggawi sa Tunga sang mga Pungsod”

Amo ini ang tema sang katapusan nga adlaw sang kombension. Ang isa sang mga pamulongpulong nga ginhatag sadto nga aga nagasabat sang pamangkot “Ang Bisan Ano Lang Magapahamulag bala sa Imo sa Gugma sang Dios?” Kita lamang ang makahamulag sang aton kaugalingon sa gugma sang Dios kag ni Cristo. Apang tubtob ginahuptan naton ang aton pagtuo, wala sing pag-ipit, wala sing hitabo, wala sing nagapamatok ang makadula sang gugma sang Dios sa aton.—Roma 8:35-39.

Ang diskurso “Indi Kamo sa Hinali Magpatublag sa Inyo Hunahuna” nagpadaku sang kinahanglanon nga amligan ang aton duog sa espirituwal nga paraiso. Paano? Sing bahin, paagi sa paglikaw sa espiritu sang pagreklamo kag paagi sa pagbato sa apostasya, sa amo nagapamati sa laygay ni Pablo nga ‘indi sa hinali magpatublag sa aton hunahuna’ bangod sang bisan anong binaba ukon nasulat nga mensahe nga gintuyo sa pagtuga sing mga duhaduha kag sa paglaglag sang aton pagtuo.—2 Tesalonica 2:1, 2.

“Kahadloki ang Dios, Likawi ang Malaut” amo ang ikaduha makatalandog nga drama. Nahanungod ini sa nagahupot sing integridad nga si Job kag ginpakita nga ang paghingabot kag pag-antos bangod sang pag-alagad sa Dios indi bag-o. Walay sapayan sang mga panikasog nga ginhimo sa pagpahilayo sa aton, kaangay ni Job, dapat kita mangin determinado nga magpabilin sa aton integridad, nagakahadlok kay Jehova kag nagalikaw sa malaut.

Ang pamulongpulong publiko, “Ang Tion kag Panag-on sang Dios—Sa Ano Ini Nagadul-ong?” nagapahanumdom sa aton nga si Jehova “nagkuha sang mga hari kag nagbutang sang mga hari” nahisuno sa iya dimabag-o nga katuyoan. Busa, kon magaabot ang iya tion, tapuson niya sa walay duhaduha ang kalautan kag ipasag-uli ang pagkamatarong.—Daniel 2:21, 44.

Ang duha ka nagahinakop nga pamulongpulong nagakaigo gid. Ang “Kalipay para sa mga Tawo sang Integridad” nagpahalipay sa aton bangod sang pasalig nga paagi sa iya Pulong, paagi sa iya espiritu, kag bilang sabat sa aton mga pangamuyo, walay duhaduha nga sakdagon kita ni Jehova sa pagtilaw. Kag subong ginapakita sang katapusan nga diskurso, ang mga Saksi ni Jehova wala nagaisol bangod nagakabuhi sila sa sining nagapamatok nga kalibutan. Sa baylo, sila “Isa ka Nagahupot sing Integridad nga Organisasyon nga Nagaabante!” Ini nga organisasyon pinasahi sa iya pagsakdag sa pagkasoberano ni Jehova kag sa iya kapat-oran nga magmadinalag-on kag makalampwuas.

Abante Kamo nga mga Nagahupot sing Integridad!

Dugang sa kalipay nila sa pagbaton sang iban pa bugana espirituwal nga pagkaon, lakip ang duha ka matahom nga bag-ong mga libro, ang mga kombensionista nalipay sang ginpaguwa ang de-kolor sing laragway nga 32-pahina nga brosyur The Government That Will Bring Paradise. Kag makalilipay gid batunon ang Kingdom Melodies No. 6, isa ka cassette tape sang matahom nga lanton para sa ikalipay naton!

Narepreskohan kag napakamaayo, ang nagpalauli nga mga delegado mapasalamaton gid bangod sining makalilipay espirituwal nga sinalusalo. Ginpabakud ang aton pagsalig nga ang Isa nga sa sulod sang 6,000 ka tuig nagsuportar sa mga sumalakdag sang iya soberano madinalag-on nga magatan-aw nga ang iya mga saksi makalampuwas sa sining putokputokan sang “katapusan nga mga adlaw” kag walay peligro nga makasulod sa Bag-ong Kahimusan, ang tanan sa iya dayon nga bindikasyon.—2 Timoteo 3:1; Bugna 7:9-12; 21:1-5.

Paagi sa sining pagsalig kag pagtuo sa aton Dios, si Jehova, ano ang aton tuyo? Ti, determinado kita nga magpadayon sa pag-abante sing maisugon subong organisasyon sang ika-20 ka siglo nga mga nagahupot sing integridad kay Jehova!

[Kahon sa pahina 29]

Kon Ano ang Ginsiling sang Iban

Isa ka superintendente sang polisiya, Leeds, Inglaterra: “Luyag ko kamo pasalamatan, ang inyo katapo, kag ang inyo tanan katawhan nga nagtambong . . . bangod sang tuman kaayo nga pagplano kag paghiwat sini. Kadayawan ini sa inyo tanan. Ginduaw ko ang Estadyum sang Sabado sang hapon kag Domingo sang aga kag nakita ko ang palibot kag ang mga hitabo nga tuman gid ka makalilipay. Amo man sini ang komento sang kalabanan sang akon mga kaupdanan.”

Pangulo nga manunulat sang editoryal sang isa ka pamantalaan sa Montreal, Canada, sa idalom sang tig-ulo “Yuhuman naton ang katawhan ni Jehova”: “Sang nagligad nga adlaw, sing wala pa duha ka oras, nanuktok sila sa 800,000 ka ganhaan diri. Isa ka dagway sang tingob espirituwal nga pagkombertir, nga daw makatulublag diutay apang indi gid man makaulugot. . . . Kon may magaduaw sa inyo balay, wala mo ginasapak ang diutay nga dikasulhayan agod atubangon sila. . . . Gani, ano abi kon wala naton ginapaambitan ang mga pagtuo sang mga Saksi ni Jehova; magapakig-ambit kita, sa pila ka adlaw, sang pila lamang sang ila paghidait, kag mas maayo ang pagabatyagon naton sa sini. Ginpili sining mahidaiton nga mga tawo nga magtipon sa Montreal, abiabihon naton sila, linaksalaksa sa ila.”

Isa ka polis sa Dortmund, Republika Pederal sang Alemanya: ‘Kon may mga hampang diri sa dimagkubos 200 ka mga polis ang ginabutang; sa inyo mga miting duha lamang ang kinahanglan namon, kag duha pa nga magadirekta sang trapiko.’

Isa ka manedyer sang estadyum sa football sa Norwich, Inglaterra: “Ang mahidaiton nga palibot sa sulod sang apat ka adlaw . . . makagalanyat. Maeksperiensiahan mo ang personal nga kakalma nga kabaliskaran gid sa bisan anong apat ka adlaw sa mapiot nga kalibutan sang negosyo kag matag-adlaw nga pagkabuhi sa palibot naton. Ang mga Saksi tunay nga may pila ka butang nga tuhay nahanungod sa ila kag mabudlay ipaathag.

[Kahon sa pahina 30]

Ang Kombension sa Montreal—Pinasahi Gid!

Sa kaundan sang programa, ang “Mga Nagahupot sing Integridad” nga Distrito nga Kombension nga ginhiwat sa bantog nga Olympic Stadium sa Montreal, Quebec, Canada, kaangay sa tanan nga iban pa sini nga serye. Apang sa pila ka paagi pinasahi ini. Lakip sa iban nga mga butang, amo ini ang nahauna sang isa ka grupo sang mga kombension nga mangin pinasahi sa kadakuon ukon sa iban pa nga mga bagay.

Kadakuon: Isa ka kabug-osan sang 78,804 ang nagtipon gikan sa nasidlangan nga Canada kag naaminhan-nasidlangan nga Estados Unidos. Makapabakud sing pagtuo nga mangin bahin sinang daku nga kadamuon sang mga nagahupot sing integridad nga nagapamati, nagaamba, kag nagapangamuyo sing tingob. Pinasahi ina!

Bawtismo: Pinasahi nga kalipay nga makita ang 1,004 ka bag-ong dedikado nga nagtindog para sa bawtismo. Yari ang makita nga pamatuod sang pag-uswag nga nagakatabo sa tunga naton.

Mga hambal: May mga programa sa 11 ka hambal—Arabiko, Inintsik, Ingles, Pranses, Griego, Hungaryano, Italyano, Koreano, Portugues, Kinatsila, kag Ukrainiano. Sa sulod sang estadyum, ang pinasahi nga sistema sa tunog gin-areglo sing maayo amo kon ngaa yadtong yara sa seksion sang mga Pranses namati sa ila hambal samtang ang mga delegado nga nagahambal sing Ingles nagapamati man sang ila.

Siudad sang Trailer: Amo ini ang isa pa ka pinasahi nga bahin. Agod may dalayonan ang mga delegado nga nagakinahanglan sing espasyo para sa mga trailer, mga salakyan sa paglingawlingaw, kag mga tolda, ginpanikasogan kutob sang Disiembre 1984 nga magamit ang malapit nga Maisonneuve Park, nga tabok dalan lamang gikan sa estadyum. Sang ginpalapitan primero ang mga opisyal nahanungod sa pag-arkila sa parke, mahinangpunon nga nagkadlaw sila. Matuod, wala pa gid anay matabo nga gin-arkilahan ang bilog nga parke sang siudad. Apang, sang ulihi, ginhatag ang permiso. Ang maayo nga reputasyon sang mga Saksi ni Jehova nakabulig.

Sang ulihi, 4,300 ka yunit ang gintukod, kag halos 20,000 ka mga kombensionista ang nagdayon sa madabong nga kahilamunan sa tunga sang madamo mahandong nga mga kahoy. Kag kamusta ang hitsura sang parke sa tapos ini magamit sang tuman kadamo nga tawo sing mga isa ka semana? Ang natingala nga mga opisyal wala sing nakita nga grabe nga halit bisan diin. Bangod sina, ang bug-os nga kantidad nga gindeposito para sa halit gin-uli!

Nagtambong ang mga Katapo sang Nagadumala nga Hubon: Ini nga bahin naghimo man sang kombension sa Montreal nga pinasahi. Samtang ginalikawan sang katawhan ni Jehova ang tanan nga pagsimba sa tinuga, walay duhaduha madamo ang nakig-ambit sa balatyagon sang isa ka utod nga mainapresyahon nga nagsiling: “Ang pagtambong sang napulo ka katapo sang hinigugma nga Nagadumala nga Hubon, ang iban sa ila wala ko pa gid makita ukon nabatian nga naghatag sing pamulongpulong anay, makapalig-on gid.” Ina nga pagpakig-upod nagresulta sa espirituwal nga “pagbaylohanay sing pagpalig-on.”—Roma 1:11, 12.

Maayo nga Pagbaton: Ginpakig-angotan sang mga opisyal kag sang publiko ang mga Saksi ni Jehova sing dalayawon kag maayo nga paagi. Pinasahi ini kon dumdumon nga sang nagligad nga mga tinuig hayag nga gindeklarar sang Premier anay sang Quebec nga si Maurice Duplessis ang “inaway nga wala sing kaluoy sa mga Saksi ni Jehova” tubtob madula sila. Bangod sang maayo nga rason, nian, ang reporter sang isa ka pamantalaan nagsiling: “Hunahunaa lamang, kahapon [Biernes] may yara eksakto nga 72,846 ka mga Saksi sa sulod sang estadyum! Si Maurice Duplessis, nga nagdumili sa hublag, mahimo nga nagaligidligid sa iya lulubngan.”

Indi amo ini ang nahauna nga tion nga ginpakamaayo ni Jehova sing bugana ang iya mga nagahupot sing integridad. Apang, sa madamo nga paagi, ang kombension sa Montreal pinasahi gid.

[Tsart sa pahina 28]

Ang Iban sang “Mga Nagahupot sing Integridad” nga mga Kombension

Pungsod Mga Kombension Mga Tumalambong Nabawtismohan

Austria 3 23,123 237

Brazil 25 389,387 4,825

British Isles 10 142,859 925

Canada 14 146,897 1,585

Ecuador 4 22,918 394

Pransya 11 119,940 2,002

Alemanya, Ped. Rep. 17 148,853 904

Gresya 3 37,367 368

Italya 25 184,078 4,153

Japan 25 202,221 3,512

Netherlands 1 40,694 151

Portugal 10 52,581 990

Espanya 13 90,808 1,628

Sweden 8 27,194 315

Switzerland 3 20,601 213

Estados Unidos

sang Amerika 112 1,189,173 9,851

Venezuela 4 69,843 1,063

[Laragway sa pahina 31]

Sa Montreal, si W. L. Barry sang Nagadumala nga Hubon nagpaguwa sang makatalandog nga bag-ong libro “Life—How Did It Get Here? By Evolution or By Creation?”

Ang nagahupot sing integridad nga dalanon ni Job ginpatalupangod sa sini nga drama sa Biblia, nga ginpresentar sa kombension sa Atenas, Gresya