Integridad ni Job—Sin-o ang Makailog Sini?
“Timbangon niya ako sa sibu nga mga timbangan kag mahibaloan sang Dios ang akon integridad.”—JOB 31:6.
1. Ngaa maayo nga binagbinagon ang huwaran ni Job, kag anong mga pamangkot ang ginapautwas?
MAY pagsalig gid si Job tuhoy sa iya integridad, gani wala sia magpangalag-ag sa pagpausisa sa Dios. Ang iya halimbawa isa ka daku nga pagpalig-on para sa aton karon, labi na bangod si Satanas nagatinguha sa pagbungkag sang integridad sang tanan nga nagaalagad sa Dios. (1 Pedro 5:8) Nagakilala sini, si disipulo Santiago nagsiling nga ‘himuon nga huwaran ang pag-antos sing kalautan kag ang pagpailob sang mga manalagna,’ labi na si Job. (Santiago 5:10, 11) Apang sin-o ang makailog sang integridad ni Job? Kita bala? Sa anong mga paagi ginpahamtang subong halimbawa para sa aton ang iya paghupot sing integridad?
2. (a) Ano ang kahulugan sang ngalan ni Job? (b) Ano ang nahimo sang nagahupot-integridad nga dalanon ni Job?
2 Ang ngalan ni Job nagakahulugan “Hilingabuton,” nga amo gid ang natabo sa iya. Apang sang ginpasugtan ni Jehova ang pangabay ni Satanas kag ginkuha ang kudal sang pag-amlig kay Job, wala sing nahimo si Satanas sa pagbungkag sang integridad ni Job sa Dios. (Job 1:1–2:10) Paagi sa sini ginsabat ni Job ang yubit ni Satanas nga iya mapatalikod ang bisan sin-o gikan sa pag-alagad sa Dios (Hulubaton 27:11) Paagi sa paghupot sing integridad ni Job, daw subong bala nga sia nagdeklarar sa bug-os nga uniberso, ‘Satanas, butigon gid ikaw, bangod si Jehova ang akon Dios, kag huptan ko ang akon integridad sa iya bisan ano man ang matabo!’—Job 27:5.
Ang mga Kaangay ni Job
3. Sin-o ang gin-amligan sa langit, kag anong mga pamangkot ang ginpautwas tuhoy sa iya?
3 Ang hulusayon sa ulot ni Jehova kag ni Satanas bug-os uniberso, nga nagadalahig sang duog sang mga espiritu. Didto sa langit, gin-amligan ni Jehova ang ginsaad nga “binhi” nga paagi sa iya tumanon sang Dios ang Iya daku nga mga katuyoan. (Genesis 3:15) Apang, kon kuhaon ‘ang kudal sang pag-amlig,’ ilugon gid bala sining isa ang integridad ni Job? Ipakita bala niya nga ang isa ka himpit nga tawo, subong amo anay si Adan, makahupot sing himpit nga integridad sa Dios? (1 Corinto 15:45) Naghanda si Satanas sing mabudlay gid nga pagtilaw para sa sining “binhi” kon magkari Sia sa duta.
4. (a) Sin-o ang nangin una nga tulumuron sang paghingabot ni Satanas, kag paano naton nahibaloan nga ginkuha sang Dios ang iya pag-amlig sa iya? (b) Ano ang ginhatag ni Jesus para kay Jehova?
4 Si Jesucristo amo ang ginpadala nga “binhi” gikan sa langit. Sa amo sia nangin sentro sang igtalupangod ni Satanas, huo, ang una nga tulumuron sang paghingabot ni Satanas. Subong pamatuod nga ginkuha ni Jehova ang iya kudal sang pag-amlig, si Cristo nagsinggit samtang yara sa usok sang pag-antos: “Dios ko, Dios ko, ngaa ginpatumbayaan mo ako?” (Mateo 27:46; Salmo 22:1) Bisan pa nahibaloan niya nga ginkuha sang Dios ang iya pag-amlig sa iya, si Jesus, kaangay ni Job, “wala makasala ukon nagpabangod sa Dios sing binuang.” (Job 1:22) Gin-ilog niya si Job, naghupot sing himpit nga integridad sa Dios, kag paagi sa amo nagpamatuod nga ‘wala sing kaangay sa iya sa duta.’ (Job 1:8) Busa, may yara si Jehova kay Jesus bug-os kag wala sing katapusan nga sabat sa butig nga panumbungon ni Satanas nga ang Dios indi makabutang sa duta sing tawo nga magmatutom sa iya sa idalom sang labing daku nga pagtilaw.
5. (a) Ano ang padayon nga ginahimo ni Satanas? (b) Ano ang ginhimo ni Satanas sang gintabog sia sa langit?
5 Apang sa paghandum sing dugang pa nga sabat, padayon nga ginasumbong ni Satanas ang espirituwal nga kauturan ni Jesus, nga upod kay Jesus nagahuman sang “binhi” sang tulad-babayi nga organisasyon sang Dios. Sang ginalaragway ang pagtukod sang Ginharian sa langit, ang Biblia nagasiling tuhoy kay Satanas: “Ginhulog ang manunumbong sang aton kauturan, nga nagasumbong sa ila sa atubangan sang aton Dios sa adlaw kag gab-i!” Apang, indi lamang pagsumbong ang ginahimo ni Satanas, sia mapintas nga nagasalakay! Ginapaathag sang Biblia nga sa tapos sia gintagbong gikan sa langit, “ang dragon [si Satanas] naakig sa babayi, kag nagkadto sa pagpakig-away sa nabilin sang iya kaliwat, nga nagabantay sang mga sugo sang Dios kag nagapanaksi kay Jesus.”—Bugna 12:7-12, 17.
6. (a) Sin-o sa karon ang nagapanguna sa pagbantala nga hilikuton, kag sin-o ang nagbuylog sa ila? (b) Ano ang ginatinguhaan ni Satanas nga himuon sa ila tanan?
6 “Ang nabilin sang binhi [sang babayi]” amo ang hinaplas nga mga saksi ni Jehova nga nabilin sa duta. Sila ang nagapanguna sa “pagpanaksi kay Jesus,” sa publiko nga ginabantala sa bug-os kalibutan nga sia karon nagahari kag sa dili madugay laglagon niya ining dimatarong nga sistema sang mga butang. (Mateo 24:14; Daniel 2:44) Apang indi sila isahanon! Sa karon isa ka daku nga kadam-an sang kapin sa tatlo ka milyon ka tawo ang nagbuylog sa ila sa paghuman sing isa ka nahiusa, bug-os kalibutan nga organisasyon sang mga nagahupot sing integridad. Ining tanan nga nagahupot sing integridad nangin tulumuron man sang wala untat nga paghingabot ni Satanas, kag ang ila langitnon nga Amay nga si Jehova nagakalipay sa ila integridad.—2 Timoteo 3:12; Hulubaton 27:11.
7. Ngaa makasalig kita walay sapayan sang mga pagsalakay ni Satanas?
7 Sa pagkamatuod, masubo hunahunaon nga subong nga ang mapintas nga igtalupangod ni Satanas ginsentro anay kay Job, amo man karon sa aton nga nagatinguha sa paghupot sing integridad sa Dios. Apang, indi kita dapat mabalaka. Ngaa? Bangod “si Jehova maluluy-on kag mainawaon,” kag ‘indi magpabaya sa imo ukon magbiya sa imo.” (Santiago 5:11; Deuteronomio 31:6) Huo, sakdagon kita ni Jehova. “Sia taming sa mga nagalakat nga may integridad,” siling sang Biblia. (Hulubaton 2:7) Apang, wala ini nagakahulugan nga indi magtugot si Jehova nga tilawan kita. Magatugot sia, subong sang iya ginhimo kay Job. “Apang ang Dios matutom,” siling ni apostol Pablo, “kag indi magtugot nga sulayon kamo labaw sa inyo masarangan, kundi kaupod sa pagsulay magahatag man sia sing lulutsan agod nga makasarang kamo sa pagbatas.”—1 Corinto 10:13.
Kon Ginatilawan
8. Paano ang huwaran ni Job makabulig sa aton karon?
8 Ang huwaran sang integridad ni Job labi na nga makabulig sa aton kon nagaatubang kita sing mabudlay nga mga pagtilaw. Si Job nag-antos sing daku amo kon ngaa naghandum sia nga mapatay kag taguon sa Sheol, ang kinaandan nga lulubngan sang katawhan. (Job 14:13) Amo man sina ang ginabatyag sang iban nga mga tawo karon kag nagasiling nga kaangay sila ni Job sang sia nag-antos sing tama. Mahimo nga amo man sina ang imo ginbatyag kon kaisa. Sa pagkamatuod, ang pagbasa nahanungod sa iya mga pag-antos daw subong sang pagbaton sing pagpalig-on gikan sa isa ka abyan nga nakabatas sing mas mabudlay nga pagtilaw. Ang paghibalo nga ang isa nakabatas, kag nakahangop sa pagkamatuod nagabulig sa aton sa pagbatas.
9. Paano kita makabenepisyo sa paghupot sing integridad sang iban?
9 Ginakilala ang aton mga kinahanglanon, ginparekord ni Jehova ang tolon-an ni Job agod buligan kita sa paghupot sing integridad subong sang ginhimo ni Job. (Roma 15:4; Santiago 5:10, 11) Nahibaloan sang Dios nga subong nga ang isa ka bahin sang lawas nasandig sa isa, ang iya matutom nga mga alagad nagakinahanglan man sa isa kag isa. (1 Corinto 12:20, 26) Dumduma ang kasan-o lang nga “Mga Nagahupot sing Integridad” nga mga Kombension nga gintambongan sang minilyon ka bumalasa sining magasin. Madumduman sang mga nakatambong didto kon daw ano kaayo nga makaupod ang madamo nga tawo nga ang ila una nga tulumuron sa kabuhi amo ang paghupot sing integridad sa Dios. Daw ano nga pagpalig-on sa paghupot sing integridad para sa mga nagtambong ang mahibal-an nga linibolibo sa palibot nila—samtang yara sa ila mga ginatrabahoan ukon sa eskwelahan sa ila komunidad—ang nagahupot sing integridad sa idalom sang mabudlay nga mga pagtilaw!—1 Pedro 5:9.
10. (a) Paano mapaslawan ang isa ka tawo sa paghupot sing husto nga pagtamod? (b) Ano ang ginduhaduhaan ni Job?
10 Apang kon kaisa mahimo nga mapaslawan kita sa paghupot sing husto nga pagtamod, subong sang natabo kay Job. Ang isa ka tawo nga nagaantos sing daku, kag napung-awan, mahimo nga magasiling, ‘Ngaa ginahimo ini sang Dios sa akon? Ngaa ginatugutan niya ini nga matabo?’ Mahimo nga magapamangkot pa gani sia, ‘Ano pa ang pulos sang akon pag-alagad sa Dios?’ Wala nakahangop sang kabangdanan sang iya pag-antos, ginduhaduhaan ni Job ang kaayohan sang pagkamatarong, bangod ang pag-antos sang maayo daw pareho lang kon indi man labaw sa pag-antos sang malaut. (Job 9:22) Suno kay Elihu, si Job nagsiling: “Ano bala ang ikaayo sini sa akon? Ano bala ang mapulos ko sini labi pa sang nakasala ako?” (Job 35:3, An American Translation) Apang indi lamang ang aton pag-antos ang hunahunaon naton tubtob sa punto nga madula naton ang husto nga pagtamod kag duhaduhaan ang kapuslanan sang pag-alagad sa Dios.
11. Anong nagakaigo nga pagtadlong ang ginhatag ni Elihu kay Job?
11 Ginhatag ni Elihu kay Job ang kinahanglanon nga pagtadlong, kag ginpatalupangod sing nagakaigo ang mga butang sa pagpakita nga si Jehova ginbayaw sing labi kataas kay Job. (Job 35:4, 5) Ginpakita ni Elihu nga, bisan ano man ang matabo, indi gid kita maghinakop nga ang Dios wala nagaulikid kag magsunggod sa Iya bangod sang aton ginakabig nga indi matarong sa Iya bahin. “Kon nakasala ka,” pamangkot ni Elihu kay Job, “ano bala ang ginapatubas mo batok sa iya? Kag kon ang imo mga paglalis magdamo, ano bala ang ginahimo mo sa iya?” (Job 35:6) Huo, kon magsunggod kita sa Dios paagi sa pagbiya sa iya mga dalanon ukon sa pag-alagad sa iya, ginahalitan mo lamang ang imo kaugalingon, indi ang Dios.
12. Paano ang aton paghupot sing integridad nagaapektar sa Dios?
12 Sa pihak nga bahin, ginpakita ni Elihu nga si Jehova indi ang personal nga makabenepisyo kon maghimo kita sing matarong. Sa pagkamatuod, ang Dios nalipay kon maghupot kita sing integridad, apang, sa amo man nga tion, wala gid sia nagasandig sa aton pagsimba, subong sang ginpakita sang ginpamangkot ni Elihu kay Job: “Kon matarong ka, ano bala ang ginahatag mo sa iya, ukon ano bala ang ginabaton niya gikan sa imo kamut?” (Job 35:7) Ang Dios naghatag sing kabuhi sa aton, kag bangod sa iya nagaginhawa kita kag nagahulag kag nagakabuhi. Sia ang tag-iya sang tanan! (Binuhatan 17:25; 1 Cronica 29:14) Sa amo ang aton kalautan ukon ang aton pagkamatarong indi makaapektar sa iya sing personal.—Job 35:8.
Kon Ginatadlong
13. (a) Ano ang reaksion ni Job sa pagtadlong sa iya? (b) Ano ang problema naton tanan?
13 Ano ang ginhimo ni Job sang gintadlong sia, una ni Elihu kag dayon ni Jehova mismo? Ginbaton niya ini, kag naghinulsol “sa yab-ok kag abo.” (Job 42:6) Huo, nagpaubos si Job, kag ginbaton ang iya sayop. Kag wala bala naton ginadayaw ina nga pagkamapainubuson? Apang kamusta kita? Bisan kita mahimo matutom nga mga nagahupot sing integridad kaangay ni Job, kita tanan may huyog sa paghimo sing sala kag madulaan sing pagkatimbang. (Santiago 3:2; Galacia 2:11-14) Ano ang aton himuon kon ang aton sala ukon dikahimpitan ipatalupangod sa aton, bisan sang isa ka pamatan-on subong ni Elihu?—Job 32:4.
14. (a) Ano ang kinaandan nga huyog kon ang isa ka tawo ginatadlong? (b) Ano ang makaamot sa mga sala ukon dinagakaigo nga mga paghukom, kag ano nga halimbawa ang ginpakita ni Job sang gintadlong sia?
14 Indi pirme mahapos batunon ang pagtadlong. (Hebreo 12:11; Hulubaton 3:11, 12) Ang huyog amo nga pakamatarungon ang aton kaugalingon. Kaangay ni Job, mahimo nga wala naton ginhungod ang paghambal ukon paghimo sing butang nga sayop. Ang aton motibo mahimo nga maayo. Apang mahimo nga naghambal kita nga wala sing bug-os nga ihibalo, nga may kakulang sing paghangop ukon pagkasensitibo. Ayhan ang aton mga komento nagpakita sing pagkataas bangod sang aton rasa ukon pungsod, ukon nangin estrikto kita sa isa ka butang nga wala ginasakdag sang Kasulatan. Mahimo ipatalupangod sa aton nga ang aton ginhambal personal lamang naton nga pagtamod kag nasaklaw sini ang iban tubtob sa punto nga mahalitan ang ila espirituwalidad. Kon tadlungon, kita bala, kaangay ni Job, magabaton nga kita ‘naghambal nga wala sing paghangop’ kag ‘magkangil-ad sa aton kaugalingon’?—Job 42:3, 6.
Pagsalig sa Dios, Indi sa Kamanggaran
15. Paano naton nahibaloan nga ang pagsalig ni Job wala sa iya kamanggaran?
15 Ginduhaduhaan ni Bildad kon sa diin ang pagsalig ni Job, nagapahangop nga ginkalipatan niya ang Dios kag lain nga butang ang iya ginasaligan. (Job 8:13, 14) Apang bisan ginpakamaayo si Job sing madamo nga materyal, ang iya pagsalig wala sa sini. Ang iya integridad wala mationg sang madula ang tanan niya nga pagkabutang. (Job 1:21) Sa iya nagahingapos nga pagpangapin, si Job nagsiling: “Kon nahimo ko ang bulawan nga akon paglaum, ukon kon nakasiling ako sa bulawan, ‘Ikaw ang akon salaligan!’ Kon nagkalipay ako bangod daku ang akon manggad, ukon bangod nga ang akon kamut nakaagom sing madamo . . . ini man kalautan nga silotan sang mga hukom, kay ginpanghiwala ko kuntani ang matuod nga Dios nga yara sa ibabaw.”—Job 31:24-28.
16. (a) Ano nga pag-usisa ang dapat naton himuon sa aton kaugalingon? (b) Ano ang saad sang Dios sa mga nagasalig sa iya?
16 Kamusta kita? Sa diin naton ginabutang ang aton pagsalig—kay Jehova ukon sa materyal nga mga pagkabutang? Kon timbangon kita sa sibu nga timbangan, subong amo ang ginhandum ni Job, mahibaloan bala sang Dios ang aton integridad sa sini nga butang? Ang aton bala una nga ginakabalak-an sa kabuhi amo gid bala ang paghatag kay Jehova sing nagahupot sing integridad nga dalanon nga iya isabat sa mga pagpakahuya ni Satanas? Ukon kita bala labi na nga nabalaka sa pagpaayaw sang aton ginahandum nga kalipay kag mga pagkabutang? Daw ano kaayo kon mailog naton si Job kag pahalipayon ang tagipusuon ni Jehova paagi sa pagsalig sa Iya, kag indi magbutang sing dinagakaigo nga importansia sa aton kaugalingon ukon sa materyal nga mga butang nga matigayon! Kon nagasalig kita kay Jehova, ginauna ang iya mga intereses, sia nagasaad sa aton nga indi gid kita pagpabay-an ukon patumbayaan.—Mateo 6:31-33; Hebreo 13:5, 6.
Seksuwal nga Moralidad
17. Ano ang mga ginpahangop sang “mga manuglipay” ni Job, apang ano ang ginsiling ni Job nahanungod sa iya moral nga paggawi?
17 Ang dimatuod nga mga manuglipay ni Job wala sing direkta magsumbong sa iya sing dinagakaigo nga paggawi sa sekso, apang sa liwat kag liwat ginpahangop nila nga sia may tinago nga sala amo kon ngaa ginasilotan sia sang Dios. Subong isa ka tawo nga manggaranon, sa pagkamatuod “ang tawo nga amo ang labi gid kadaku sa tanan nga katawhan sang Sidlangan,” may mga kahigayunan gid si Job para sa seksuwal nga paghiusa upod sa iban nga babayi. (Job 1:3; 24:15) Ang iban nga mga alagad sang Dios, sa wala pa kag sa tapos sang panahon ni Job, nahulog sa mga pagsulay sang sekso. (Genesis 38:15-23; 2 Samuel 11:1-5) Apang, ginpangapinan ni Job ang iya kaugalingon batok sa pagpahangop nga sia nakasala sina, nga nagasiling: “Nagpakigkatipan ako sa akon mga mata. Gani paano bala nian ang pagtulok ko sa ulay? Kon ang akon tagipusuon nahaylo sa isa ka babayi, kag nakapuot ako sa ganhaan sang akon isigkatawo . . . ina makangilil-ad nga sala, kag kalautan ini nga silotan sang mga hukom.”—Job 31:1, 9-11.
18. Ngaa mabudlay tipigan ang seksuwal nga moralidad, apang ngaa mangin malipayon kita kon tipigan naton ini?
18 Mahimo nga wala na sing iban nga paagi nga madinalag-on gid si Satanas sa pagpaluya sa integridad sang mga alagad sang Dios subong sang paghaylo niya sa ila nga magpakighilawas. (Numeros, kapitulo 25) Mailog mo bala ang integridad ni Job paagi sa pagpamatok sa tanan nga paghaylo sa dinagakaigo nga sekso? Sa pagkamatuod isa ini ka hangkat, labi na sa sining buang-sa-sekso nga kalibutan nga sa diin lapnag gid ang imoralidad. Apang hunahunaa kon daw ano kaayo, kon sa tion sang pagsulay, masinaligon nga makasiling kita subong ni Job: “Mahibaloan sang Dios ang akon integridad”!—Job 31:6.
Kon Ano ang Makabulig sa Aton
19. Ano ang importante agod mabuligan kita sa paghupot sing integridad?
19 Indi mahapos ilugon ang integridad ni Job, bangod nagatinguha gid karon si Satanas sa pagbungkag sang aton integridad subong ginhimo niya anay kay Job. Busa, importante nga isuklob naton ang bug-os nga hinganib gikan sa Dios. (Efeso 6:10-18) Nadalahig sa sini ang pagkilala sa Dios, subong ni Job, pirme nagakabalaka sa pagpahamuot sa Iya sa bisan ano nga butang nga himuon naton ukon sang aton pamilya. (Job 1:5) Sa amo, importante ang aton pagtuon sing Biblia, regular nga pagpakig-upod sa aton mga masigka tumuluo, kag pagpabutyag sa publiko sang aton pagtuo.—2 Timoteo 2:15; Hebreo 10:25; Roma 10:10.
20. (a) Ano nga paglaum ang makasakdag sa aton sa tion sang mga pagtilaw? (b) Ano nga padya para sa paghupot sing integridad ang ginsambit sang salmista nga mabaton naton?
20 Apang ang labi nga makasakdag sa aton sa tion sang pagtilaw amo ang nagsakdag kay Job—ang iya pagsalig nga may kapin pa sa kabuhi karon. “Kon ang tawo mapatay, mabuhi pa bala sia?” pamangkot ni Job. Nian sia nagsabat: “Magapanawag ka, kag ako magasabat sa imo.” (Job 14:13-15) Ang paghupot sing bug-os nga pagsalig nga banhawon ni Jehova ang iya matutom nga mga alagad makabulig man sa aton sa pag-atubang sang bisan anong pagtilaw nga ipadangat sa aton ni Satanas. (Hebreo 6:10) Ang salmista sang Biblia nagsulat sang una: “Kon tuhoy sa akon, bangod sang akon integridad ginpatindog mo ako, kag ipahamtang mo ako sa atubangan sang imo nawong tubtob sa walay katubtuban.” (Salmo 41:12) Kabay nga mangin amo sina ang malipayon nga palaabuton sang tagsatagsa sa aton—ang sakdagon kita ni Jehova kag luwason tubtob sa walay katubtuban bangod kita nagahupot sing integridad nga mga alagad niya!
Masabat Mo Bala?
◻ Sin-o ang mga nakapamatuod nga kaangay ni Job, kag ano nga mga pagpaanggid ang mahimo naton sa ulot nila kag ni Job?
◻ Ano ang maton-an naton gikan sa reaksion ni Job sa mga pagtilaw sa iya?
◻ Ano ang reaksion ni Job sang gintadlong sia, kag ano ang aton maton-an gikan sa sini?
◻ Anong maayo nga huwaran ang ginhatag ni Job tuhoy sa materyal nga mga butang kag seksuwal nga moralidad?
◻ Ano ang makabulig sa aton sa paghupot sing integridad subong sang ginhimo ni Job?
[Laragway sa pahina 17]
Kaangay ni Job, ginduhaduhaan mo bala ang kaayohan karon sang paghupot sing integridad?