Ang Biblia—Praktikal Bala Para sa Aton Adlaw?

INING kalibutan nagbalhin sing daku sa sulod sang nagligad nga siglo. Ang pagbalhin gikan sa mga adlaw sang kalesa padulong sa modernong dag-on sang kahawaan madasig nga nag-uswag sa bagay nga ang mga libro tuhoy sa teknolohiya masami nga daan na sa tapos maimprinta. Ang latagon sang siensya kag teknolohiya nagauswag. Bisan pa ang digital concepts una nga gingamit mga 150 ka tuig na ang nagligad, sining karon lamang nga tinuig nga ang mga kompyuter gingamit sa bug-os nga uniberso, nagakontrol sang tanan nga butang halin sa paglansar sing mga satelayt kag mga salakyan sa kahawaan tubtob sa pagbalanse sang badyet sang panimalay. Makatilingala gid ini! Ang isa daw indi makahingabot sa sining tanan!

Madamo nga mga pagbalhin ang nangin mapuslanon. Lakip sa sini amo ang mga pag-uswag sa latagon sang komunikasyon, transportasyon, makapakinot sing trabaho nga mga kasangkapan, kag sa medisina. Halimbawa, ang nautod nga kamut ukon tudlo, nga sang una wala sing paglaum nga masugpon, mapasag-uli na karon paagi sa microsurgery. Makalupad kita sa pihak nga bahin sang aton globo kubos sa isa ka adlaw, nagakinot sing binulan nga paglakbay. Ipaanggid sa isa ka gatos ka tuig nga nagligad—sang wala sing mga awto, mga radyo, mga TV, mga pelikula, mga repridyeretor, mga makina sa laba, mga bitamina, mga antibiotiko, mga bakuna, kag ginatos pa sang iban nga butang nga ginabaton na karon—matuod gid nga kita nagakabuhi sa isa ka bag-ong dag-on.

Apang indi tanan nangin para sa aton kaayohan. Ang paggamit sing nuklear nga enerhiya, halimbawa, nagapresentar sing daku nga katalagman sa katawhan paagi sa inaway ukon radyasion. Ang lapnag nga pagdagta sang kemikal, ang ikaduha nga produkto sang aton industriyal nga teknolohiya, nagadugang sa sina nga katalagman. Ang ginadumilian nga mga droga kag ang modernong kultura sang droga naghalit sa madamo nga kabuhi.

Ang labing talalupangdon amo ang pagbalhin sa kabuhi sang mga tawo. Ang industriyalisasyon kag ang pagbalhin gikan sa kinaraan padulong sa modernong pagkabuhi nagbahinbahin sa pamilya. Labaw sa bisan anong tion—kag labi na sa tunga sang mga babayi kag mga kabataan—ang mga tawo nakabatyag sing kahilwayan kag nangin independiente. Ang kahilwayan gikan sa mga pagdumili sang ginakilala anay nga mga talaksan nagresulta sa bag-o nga mga estilo sang pagkabuhi kag nagbalhin sang sosyal nga mga prinsipio, amo kon ngaa tuhay gid ini karon gikan sa kalibutan nga nakilal-an sa sulod sang linibolibo ka tuig.

Ang Biblia Wala Magbalhin

Sa diin, kon amo, ang isa magaliso para sa tuytoy? Ano nga laygay ang maaplikar sa karon? Masunson nga ginabag-o sang modernong mga edukador ang ila mga metodo kag mga libro agod makigdungan sa aton nagabalhin nga kalibutan. Ang mga klerigo kag iban pa nga mga propesyonal nagaliwat sang ila laygay nahisuno sa ginabaton sang kalabanan.

Ang Biblia, sa pihak nga bahin, nagpabilin nga wala magbalhin sa sulod sang linibolibo ka tuig. Sa pagkamatuod, nagaunod ini sing malig-on nga mga paandam nga indi pagdugangan ukon pagbuhinan ang mga pulong nga nasulat sa sini. (Hulubaton 30:5, 6; Bugna 22:18, 19) Mabaton bala ang Biblia subong praktikal nga tuytoy para sa aton modernong adlaw?

Ang iban nagasiling nga indi. “Wala sing bisan sin-o nga magasakdag sa paggamit sing 1924 nga edisyon sang libro tuhoy sa chemistry para sa moderno nga klase sang chemistry—daku na ang naton-an tuhoy sa chemistry kutob sadto,” sulat ni Dr. Eli S. Chesen sa iya libro nga Religion May Be Hazardous to Your Health. Sia nagpadayon pa: “Sa amo man nga paagi, daku na ang naton-an tuhoy sa sosyolohiya, pilosopiya, kag sikolohiya sa nagligad nga pila ka libo ka tuig; apang, ang Biblia (nga madamo sing masiling tuhoy sa sining mga tema) ginagamit subong awtoridad kag talagsa lang ginarebisar.”

Sia nagdugang: “Nagakatingala ako pirme kon makabati ako sa isa nga nagahambal sang ‘milagro’ nga ang Biblia wala sing katapusan kag mapuslanon gihapon karon subong sang ginsulat ini. Daw kaanggid ini sa pagkatingala sang isa sa ‘pagkasibu’ sang astrolohiya. Ang Biblia may mabaskog nga awtoridad amo kon ngaa pila lamang ang nagabinagbinag sa pagpamoderno sini ukon sa pagsikway sini.”

Apang, matuod bala nga daan na ang Biblia sa aton modernong kalibutan? Ukon ang laygay bala nga ginahatag sini praktikal pa kag mapuslanon para sa aton tion?