Mabaton Mo Bala ang Disiplina?

‘ANG ginahampak lamang karon sang mga ginikanan amo ang tam tam (bombo para sa saot), indi ang ila kabataan.’ Ining komento nabatian gikan sa baba sang pila ka kabataan sa kolehiyo sa Aprika. Ano ang ila buot silingon? Nga ang disiplina kinaraan na. Indi luyag sang mga ginikanan nga ipadapat ini, kag malipayon ang kabataan sa indi pagbaton sini.

Maalamon bala ini nga mga panimuot? Suno sa isa ka diksionaryo, ang disiplina “paghanas nga nagatadlong, nagadihon, ukon nagahimpit sang hunahuna ukon moral nga kinaiya.” Mag-ayohan bala ang isa kon wala sina nga sahi sang disiplina? Ngaa amo sini ang ginhunahuna sadtong mga estudyante—kag sang ila mga ginikanan sa Aprika?

Ang matuod, ang negatibo nga panimuot sa disiplina indi lamang sa mga estudyante kag sa ila mga ginikanan sa Aprika. Daw subong bala nga ginatamod sang kalabanan nga tawo karon ang bisan anong laygay ukon disiplina subong isa ka sablag sa ila kahilwayan, isa ka pagdingot sang ila mga kinamatarong. Apang, ina nga panimuot indi tumalagsahon sa ika-20 nga siglo. Linibolibo ka tuig sang una, ang Dios gid nagsiling nga “ang huyog sang tagipusuon sang tawo malaut kutob sa iya pagkapamatan-on.” (Genesis 8:21) Nagatudlo sa resulta sadtong linibolibo ka tuig sinang malaut nga huyog, si apostol Pablo nagsulat: “Ang mga tawo magamahigugmaon sang kaugalingon, mahigugmaon sang kuwarta, bugalon, palabilabihon, mapasipalahon, malalison sa mga ginikanan, dimapinasalamaton, dimatutom, wala sing pasunaid, dimalugpayan, mapatopatuon, dimapinugungon, mabangis, madumot sa kaayohan, maluib, dasodaso, nagahabok sa pagpadayaw.” (2 Timoteo 3:2-4) Indi katingalahan nga ang disiplina wala ginabaton!

Malain Gid Bala ang Disiplina?

Kinahanglan gid bala sang isa ka Cristiano ang disiplina? Bueno, si Jesus nagsiling nga ang dalan padulong sa kabuhi “masipot.” (Mateo 7:13, 14) Mahapos nga maglisa sa sini. Gani indi bala maalamon nga batunon ang disiplina, ang paghanas suno sa pagtawag sa sini sang isa ka diksionaryo? Binagbinaga ang kaso sang isa ka biyahero nga nagtalang kag nagdangat sa isa ka makatalagam nga duog. Kon itudlo sang isa ka dumuluong kon paano sia makabalik sa iya alagyan, ano ang iya himuon? Maakig bala sia kag sikwayon ang bulig, nga nagapamilit nga may kinamatarong sia sa kon diin ang luyag niya? Isumbong bala niya ang mainabyanon nga dumuluong nga nagapanghilabot sa iya mga kinamatarong? Indi gid. Dapat pasalamatan niya ang bulig nga gintanyag.

Gani ang maalam nga Cristiano nagapasalamat kon ang bulig ginatanyag paagi sa maluluy-on nga disiplina. Ang mga pulong sang manalagna matuod walay sapayan kon ano ang aton edad ukon eksperiensia sa kabuhi: “O Jehova, nahibaloan ko nga ang dalanon sang tawo wala sa iya kaugalingon. Wala sa tawo nga nagalakat sa pagmando sang iya mga tikang.” (Jeremias 10:23) Busa, kita tanan nagakinahanglan sing disiplina.

Ginsikway Nila ang Disiplina

Ang isa nga nagsikway sang disiplina amo si Cain, nga nahisa sa iya utod nga si Abel. Sang makita nga si Cain nagalisa na gikan sa matarong nga banas, ginlaygayan sia ni Jehova, nga nagapamangkot: “Ngaa bala nga nagsingkal ka kag ngaa bala nga nahulog ang imo nawong? Kon maghimo ka sing maayo, indi ka bala pagbayawon? Apang kon indi ka maghimo sing maayo, ang sala nagapuot sa gawang, kag mangin sa imo ang iya handum; kag madaug mo bala ini?” (Genesis 4:6, 7) Wala mamati si Cain. Ginpatay niya ang iya utod nga si Abel kag sa amo ginpakilala niya ang pagpatay sa maragtas sang tawo.—Genesis 4:8-16.

Sang mga adlaw ni Samuel, ang mga anak ni Eli wala man magbaton sing disiplina. Ang ila amay amo ang mataas nga saserdote sa santuaryo ni Jehova, apang gingamit sang iya mga anak ang ila katungdanan sa pagpangawat gikan sa mga halad kag ginhaylo nila ang mga babayi sa paghimo sing imoralidad upod sa ila. Ginsaway sila sang ila amay—sing medyo maluya—apang wala sila mamati. Ang resulta? Ang ila pagsikway sa disiplina nagdul-ong sa ila pagkapatay sa inaway, kag ini nga balita ginbangdan sang kamatayon ni Eli mismo.—1 Samuel 2:12-17, 22-25; 3:11-18; 4:1-4, 10-18.

Namati ang Iban

Apang, ang iban nagbaton sing disiplina. Si David, isa ka hari kag isa ka tawo sang inaway, nakahimo sing mabug-at nga krimen sang ginpapatay niya si Urias, ang tawo nga tag-iya sang asawa nga ginpanginlahian ni David. Apang ginbaton ni David ang sabdong nga ginpadala sang Dios paagi kay manalagna Natan, kag sa amo wala sia pagsikwaya ni Jehova sing bug-os. (2 Samuel 12:1-14) Huo, ang disiplina makabulig sa aton agod makapasag-uli bisan gikan sa mabug-at gid nga mga sala.

Si Job ginlaygayan sang pamatan-on nga si Elihu kag mahimo niya kuntani nga sikwayon sing maakigon ang laygay. Bisan pa nag-antos sing daku si Job sa mga kamut ni Satanas, nagdumili sia nga ‘sumpaon ang Dios kag manginmatay.’ Bangod sina nga rekord, mahimo hunahunaon niya nga wala sing rason nga pamatian pa niya ang laygay sining pamatan-on. Apang, namati si Job kag nakatuon nga, walay sapayan sang iya integridad, ang iya panimuot kinahanglan nga pasibuon. Nian ginhatagan sia sing laygay ni Jehova mismo kag sang ulihi ginpadyaan sia sing madamo nga pagpakamaayo. (Job 2:9, 10; 32:6; 42:12-16) Sa amo, ang disiplina makabulig bisan sa mga tawo nga may talalupangdon nga rekord sang pagbatas kag pagkatutom.

Si apostol Pedro man nakabaton sing disiplina. Dumduma, si Pedro isa anay ka apostol ni Jesucristo, isa ka saksi sa pagbaylo sing dagway ni Jesus, kag isa nga ginsaligan ni Cristo sing “mga yabi sang ginharian.” (Mateo 16:18, 19) Apang, sang isa ka okasyon, si apostol Pablo, nga bag-ohan pa lang nga sumulunod ni Jesus, dayag nga nagdisiplina kay Pedro bangod sang iya gingawi sa kongregasyon sa Antioquia. Maathag nga ginbaton ni Pedro ang disiplina, kay sang ulihi sia naghambal tuhoy sa “aton hinigugma nga utod nga si Pablo.” (2 Pedro 3:15; Galacia 2:11-14) Busa, ang isa ka Cristiano nga may madamong pribilehiyo, mahimo man makapaabot nga disiplinahon sia.

Modernong mga Cristiano kag ang Disiplina

Sa kongregasyon, indi kita dapat makibot sa pagbaton sing laygay gikan sa hamtong nga tawo. Apang ang labi na nga may salabton sa pagbantay sang aton kaayohan amo ang gintangdo nga mga gulang. Ining espirituwal nga mga manugbantay ginsilingan sang Biblia: “Magmaukod ka sa paghibalo sang kahimtangan sang imo mga panong. Tan-awa sing maayo ang imo kabakahan.”—Hulubaton 27:23.

Mahimo mabuligan kita sa pagbaton sing disiplina kon hunahunaon naton nga kinahanglan ang matuod nga gugma kag kaisog agod makahatag ang mga gulang sing laygay. Ang mga gulang masami nga ginapangindian kon magtinguha sila sa pagbulig. Halimbawa, ang isa ka gulang nagpakighambal sa isa ka madugay na nga Cristiano, nga nagapaandam sa iya tuhoy sa isa ka dicristiano nga buhat. Mabudlay ihatag yadto nga laygay, kag labi ini nga nagbudlay sang masaklaw sia. Sang ulihi, ang laygay ginsikway, kag ang gintanyagan naglikaw sa gulang nga nagtinguha sa pagbulig sa iya. Daw ano ka maalamon kuntani kon gindumdom niya nga ‘matutom ang mga pilas gikan sa abyan’!—Hulubaton 27:6.

Ang disiplina makabulig sa aton sa pag-aplikar sang isa pa ka hulubaton sang Biblia: “Maalamon ang tawo nga nakakita sang malaut kag nagapanago sia, apang ang wala sing eksperiensia nga tawo nagapadayon kag nagaantos tungod sini.” (Hulubaton 22:3) Ina nga mga pulong nakabulig sa isa ka Cristianong lalaki sa amo gihapon nga pungsod. Nangin batasan niya nga magkadto sa publiko nga mga restawran nga wala ang iya asawa kag anak. Natublag sa sini ang iban bangod sa sadto nga duog ang mga serbedora sa madamo nga restawran mga pampam nga nagapangita sing mga kustomer. Gani makapila nga ginhambal sang mga gulang ini nga tawo nahanungod sini. Apang ginsikway niya ang laygay, sa masami may katig-a. Sang ulihi, nahulog sia sa siod sang imoralidad. Daw ano ka maalamon kuntani kon ginpamatian ang maayo sing tuyo nga laygay!

Kon kalimtan naton ang aton pagtamod sa makadali kag tamdon ang mga butang suno sa pagtamod ni Jehova, indi kita mabudlayan sa pagbaton sing disiplina. Matuod, ang disiplina mahimo nga isa ka indi maayo nga pahanumdom sang aton mga dikahimpitan. Mahimo nga mahuy-an kita diutay sa sini. Apang hunahunaa kon daw ano ka mahamuot si Jehova kon ang iya mga alagad maalamon nga nagahikot kag nagalikaw nga mahulog sa sala. “Anak ko, magmaalam ka,” siling sang iya Pulong, “kag pasadyaha ang akon tagipusuon, agod nga masabat ko sia nga nagapakahuya sa akon.” (Hulubaton 27:11) Kon matulon naton ang aton bugal kag batunon ang disiplina nga ginatanyag, malakip kita sa mga tawo nga nagahatag kay Jehova sing sabat sa mga hangkat ni Satanas.

Ang Disiplina may Maayong Bunga

Subong nakita na naton, ang disiplina para sa aton tanan. Kinahanglan ini sang mga lalaki kag mga babayi, bata kag tigulang, sang mga madugay na sa kamatuoran kag sang mga bag-ohan pa lang. Busa, dapat naton paabuton ang disiplina, kag kalangkagan pa gani. Ton-i ang Pulong sang Dios kag talupangda kon ano ang ginasiling sini nga mangin laygay para sa imo. (2 Timoteo 3:16, 17) Magtambong sa mga miting kag mamati sing maayo agod mahibaloan mo kon ano ang naaplikar sa imo. (Hebreo 10:24, 25) Kon ang mahigugmaon nga disiplina pasad sa Kasulatan ginatanyag sa imo sing personal, batona ini sa espiritu nga gintanyag ini sa imo. Himusli ang bisan anong nagatadlong nga paghanas nga nagagikan kay Jehova.

Si Pablo nagsiling sa mga Hebreo: “Matuod, wala sing disiplina nga daw makalilipay sa karon, kundi masakit; apang sa tapos sini para sa mga nahanas sini nagabunga ini sing mahidaiton nga bunga, nga amo, ang pagkamatarong.” (Hebreo 12:11) Sa amo, bisan pa masakit kon kaisa ang disiplina, maayo ang resulta sini. Ang pagbaton sing disiplina makabulig sa aton nga malakip sa hubon sang mga tawo nga nagapahamuot kay Jehova. Ang disiplina magabulig sa aton sa ‘paggawi sing matarong, nagahikot sing pagkamatarong, kag nagapamulong sing kamatuoran sa aton tagipusuon.’ (Salmo 15:1, 2) Busa, kabay nga batunon naton tanan ang disiplina.