Malipayon Yadtong Nagagamit sang Gahom sing Husto!
“Si Jehova makuli sa pagpangakig kag daku sa gahom, kag indi nga mas-a si Jehova magpaiway sa pagsilot.”—NAHUM 1:3.
1. Ngaa ang pagtigayon sang isa sing gahom indi rason nga magmatinaastaason?
MADAMO sing sahi sang gahom ang magamit sang intelihente nga mga tinuga sa husto nga paagi. Bangod sang kinaugali nga kinaiya kag bangod sang mga sirkunstansia, nagapanag-iya kita sing lainlain nga gahom. Apang rason bala ini sa pagpabugal? Indi gid. Ano ang mabasa naton sa Jeremias 9:23? “Dili magpabugal ang maalam sang iya kaalam ukon ang makusog nga tawo magpabugal sang iya kusog ukon ang manggaranon magpabugal sang iya manggad.” (New International Version) Ngaa indi? Si apostol Pablo nagahatag sing maayo nga sabat sa 1 Corinto 4:7: “Sin-o bala ang nagapalabi sa imo? Sa pagkamatuod, ano bala ang imo nga wala mo mabaton? Nian, kon imo nabaton ini, ngaa bala nga nagapabugal ka subong nga daw wala mo mabaton?”
2. Ngaa dapat kita magbantay kon tuhoy sa paggamit sa gahom?
2 Ngaa dapat kita magbantay nga indi pag-abusohan ang bisan ano man nga gahom naton? Bangod “ang tinutuyo sang tagipusuon sang tawo malaut kutob sa iya pagkapamatan-on.” (Genesis 8:21) Sanglit kita tanan may yara sining napanubli nga huyog sang kakagud, dapat kita pirme magbantay nga ginagamit naton sing husto ang bisan ano man nga gahom naton. Ginpabutyag anay sang isa ka manugbinalaybay ini nga panghunahuna: “Wala gid sing manggad nga wala sing nagasunod nga landong sang paghalong. Wala gid sing gahom nga wala sing tago nga malimbungon nga siod.” Huo, bangod sang napanubli nga pagkadihimpit, yara pirme ang huyog nga gamiton sing makagud ang gahom.
Si Jehova—Gamhanan, Apang Maalam Man kag Makatarunganon
3. Ano nga sahi sang mga gahom ang yara kay Jehova?
3 Wala na sing liwan pa sa Manunuga, si Jehova nga Dios, ang nagapahamtang sa aton sing maayo, huo, himpit, nga halimbawa sang paggamit sa gahom. Wala sia nagapadasudasu kundi makuli sa pagpangakig bisan pa nga dapat niya ipabutyag ang iya paghukom. (Nahum 1:3) Wala sing isa ang mas daku sing gahom sang sa Dios, kag sa sina nga rason ginapatuhoyan naton sia subong ang Isa nga labing gamhanan, ukon Isa nga makaako. Makatarunganon niya nga gin-aplikar ang titulo nga “Labing Gamhanan” sa iya kaugalingon. (Genesis 17:1) Indi lamang nga may yara sia bug-os nga gahom sa kahulugan nga may yara sia walay latid nga kusog, kundi may supremo man sia nga gahom nga sa amo may bug-os sia nga awtoridad bangod sang iya posisyon subong ang Soberanong Ginuo sang uniberso, nga gintuga niya. Amo kon ngaa wala sing isa ang makahaumhaum sa ‘pagpugong sang iya kamut ukon sa pagsiling sa iya, “Ano bala ang imo ginahimo?”’—Daniel 4:35.
4. Ngaa kurso sang kaalam ang pagkahadlok kay Jehova?
4 Bangod kay si Jehova nga Dios labing gamhanan, dalanon sang kaalam para sa aton ang magkahadlok nga indi sia pagpahamut-an. Huo, “ang kahadlok kay Jehova amo ang pamuno sang kaalam, kag ang ihibalo sang Isa nga Labing Balaan amo ang paghangop.” (Hulubaton 9:10) Si Pablo nagapaandam sa aton nga indi pagpaimunon si Jehova nga Dios paagi sa paghimo sang bisan ano nga dagway sang idolatriya bangod “makusog pa bala kita sa iya?” Indi gid! (1 Corinto 10:22) Apang, ang tanan nga nagalapas sing hungod sa matarong nga mga sugo sang Dios nagahulag nga daw makusog pa sila kay Jehova! Ang dugang nga pinamulong ni Pablo nagapakita sini nga punto: “Ang aton Dios amo ang kalayo nga nagapapas.”—Hebreo 12:29.
5. Ngaa dapat naton kahadlokan si Jehova bangod sang iya pagkalabing gamhanan?
5 Ini nga mga katunayan mahimo nga magapuno sa aton sing kahadlok kon wala ginatimbangan sing himpit ni Jehova ang iya labing gamhanan nga gahom sang tatlo pa niya ka panguna nga kinaiya: kaalam, katarungan, kag gugma. Ang paggamit niya sa gahom sa paghukom pirme gid nahisanto sa sining mga kinaiya. Halimbawa, ang Anaw sang adlaw ni Noe isa gid ka daku nga pamatuod sang gahom ni Jehova. Apang dimakatarunganon bala ukon dimahigugmaon ang paggamit sang Dios sa iya gahom? Indi gid! Tuman gid kalaut ang mga tawo sadto sa bagay nga nagkalisud ang Dios sa iya nakita. (Genesis 6:5-11) Sanglit yadtong mga malauton antes sang anaw nag-abuso sa mga pagpakamaayo sang Dios, nagakaigo gid nga papason niya sila sa duta, labi na kay wala nila ginsapak ang mga paandam sang “manugbantala sang pagkamatarong,” nga si Noe.—2 Pedro 2:5.
6. Ano ang ginapakita sang ginhimo ni Jehova sa Sodoma kag Gomora?
6 Sang ginpakita sang mga pumuluyo sang Sodoma kag Gomora ang ila sobra nga pagkamakasasala, paagi sa pag-abuso sa mga pagpakamaayo nga ginaagom nila, subong bahin sang katawhan, sa kamut ni Jehova, nagmando sia nga ang mga pumuluyo pagalaglagon. Tungod sa iya abyan nga si Abraham, ginsugid ni Jehova sa sinang tawo sang pagtuo ang Iya katuyoan nahanungod sa Sodoma kag Gomora. Naghunahuna si Abraham nga daku ini nga pag-abuso sa gahom, gani ginpamangkot niya si Jehova: “Indi bala maghimo sing matarong ang Hukom sang bug-os nga duta?” Apang, si Abraham sayop nga nagpugong. Sang ulihi, ginbaton niya nga ang sugo ni Jehova matarong sa pagpakamatuod, kay indi gani makita bisan ang napulo ka matarong nga kalag sa duha ka siudad. Nagapakita gid ini kon daw ano ka mahalungon nga ginagamit ni Jehova nga Dios ang iya gahom sing makatarunganon.—Genesis 18:17-33; Isaias 41:8.
7. Ngaa nagakabagay kay Paraon ang pagbaton sa malaglagon nga pagpabutyag ni Jehova sang iya gahom?
7 Sang ulihi, sang mag-abot na ang tion sa paghilway sa mga Israelinhon gikan sa ila dimakatarunganon nga pagkaulipon sa Egipto, ginhatagan ni Jehova si Paraon sing kahigayunan nga makigkooperar. Indi ini kuntani makahalit sa Paraon kag sa iya katawhan. Apang yadto nga gumalahom matinaastaason kag matig-a nga nagdumili sa pagpasugot sa pangabay ni Jehova. Gani ginpakita sang Dios kay Paraon ang isa ka pagpasundayag sang iya gahom sa Napulo ka Kalalat-an sa Egipto. (Exodo 9:16) Sang ginpalakat na ni Paraon ang mga Israelinhon, padayon niya nga ginhangkat si Jehova paagi sa paglagas sa mga Israelinhon. Busa, makatarunganon nga gingamit ni Jehova ang iya gamhanan nga gahom sa pagpapas kay Paraon kag sa iya kasoldadosan sa Dagat nga Pula. (Salmo 136:15) Sa tagsa ka halimbawa, talupangda, gingamit man ni Jehova ang iya daku nga gahom sa pag-amlig sa iya matutom nga mga alagad: si Noe kag ang iya panimalay, si Lot kag ang iya duha ka anak nga babayi, kag ang pungsod sang Israel.—Genesis 19:16.
8. Tungod sa anong maayo nga rason nga ginpakig-angotan ni Jehova si Senacherib subong sang ginhimo niya?
8 Mga siniglo sang ulihi, sang panahon ni Hari Ezequias, ginpakita ni Jehova nga Dios ang iya daku nga gahom sa labing talalupangdon kag matarong nga paagi sang ginapahog sang hari sang Asiria nga si Senacherib ang Jerusalem. Ang katawhan ni Jehova, upod sa mahinadlukon sa Dios kag matutom nga si Hari Ezequias subong ila ulo, nangayo sing bulig sa Iya. Ginaalagad nila sia sing matutom, gani ang Dios nagpanghikot tungod sa ila. Sa pihak nga bahin, ang tawo nga ginpadala ni Hari Senacherib nagpabugal: ‘Dili kamo magpamati kay Ezequias, dili kamo magpalimbong sa iya paagi sa pagpasalig nga si Jehova magaluwas sa inyo. Kay bisan sin-o bala sang mga dios sang mga pungsod nga nagluwas sang iya katawhan gikan sa kamut ni Senacherib? Sanglit wala sini nga mga dios ang nakahimo sina, ngaa ginahunahuna ninyo nga si Jehova makaluwas sa inyo?’ (Isaias 36:13-20) Bangod sina nga pagpabugal, ginpakita sang Dios ang iya daku nga gahom, nga ginbangdan sang pagkapatay sang 185,000 ka soldado sa isa ka gab-i, nagapamatuod nga, sa pagkamatuod, may kinatuhayan sa ulot sang mga dios sang mga pungsod kag kay Jehova.
9. Anong iban pa nga halimbawa ang mahatag nga nagapakita nga si Jehova nagahalong tuhoy sa kon paano niya ginagamit ang gahom?
9 Binagbinaga ang pila pa sa madamong mga halimbawa nga mahatag. Sang ginsilotan ni Jehova si Miriam sing aro, makatarunganon gid yadto kag maalam nga pagpakita sang iya gahom. Si Miriam nagakabagay silotan bangod sang paghambal sing matinaastaason batok sa iya utod nga si Moises, ang isa nga gintangdo sang Dios. (Numeros 12:1-15) Kaanggid ini sang si Hari Uzias walay pagtahod nga nagsulod sa sagrado nga santuaryo sang templo kag nagsunog sing incienso sa bulawan nga halaran, matinaastaason nga wala magpamati sa Levinhon nga mga saserdote. Ginpakita ni Jehova ang iya gahom sang makatarunganon nga ginsilotan niya ang hari sing aro. (2 Cronica 26:16-21) Bisan pa nga ang ila sala magkatuhay, ang silot ni Jehova sa ila magkatuhay man: ang aro ni Miriam temporaryo, apang si Uzias napatay nga aruon. Busa makita naton nga sa tanan nga tion si Jehova mahalungon nga nagagamit sang iya gahom sa isa ka maalamon kag makatarunganon nga paagi, kag nagaamlig sa matutom nga nagahigugma sa iya kag nagalaglag sa malauton.—Salmo 145:20.
Ang Halimbawa ni Jesucristo
10, 11. Ano nga mga hitabo ang nagapakita nga si Jesus nabalaka sa paggamit sa gahom sing husto?
10 Ang Anak sang Dios isa gid ka maayo nga manug-ilog sang iya Amay sa paggamit sa gahom. Ang isa sa pinakauna nga halimbawa amo ang tion nga nakigbais si Satanas sa iya tungod sa bangkay ni Moises. Masabdong kuntani dayon sang Logos si Satanas. Sa baylo, nag-isol sia, kon hambalon pa, agod ang pagsabdong magahalin kay Jehova nga Dios mismo.—Judas 8, 9.
11 Ang nahauna nga pagsulay nga ginhatag ni Satanas kay Jesus sa kamingawan amo ang may kahilabtanan sa sining bagay sang pag-abuso sa gahom. Ginsulay ni Satanas si Jesus sa paggamit sang iya labaw sa kinaugali nga gahom para sa makagud nga katuyoan, sa paghimo nga pagkaon sang mga bato. Makasululay gid ini bangod 40 ka adlaw, nga wala pa makakaon si Jesus kag “gutom sia.” Ginpresentar ni Satanas ini nga pagsulay agod sulayon si Jesus sa paghimo sing makagud nga kurso, kay nagsugod sia sa, “KON ikaw anak sang Dios, sugoa ining mga bato nga mangin tinapay.” Ayhan naglaum sia nga si Jesus magasabat, ‘Aba anak sang Dios matuod ako, kag agod pamatod-an ini himuon ko ining mga bato nga tinapay.’ Sa baylo nga masulay sa paghulag sing dimakagud ukon sing binuang, si Jesus nagsabat: “Nasulat na, ‘Indi lamang sa tinapay mabuhi ang tawo, kundi sa tagsa ka pulong nga nagaguwa sa baba ni Jehova.’” (Mateo 4:1-4) Wala niya pagsapaka ang pagduhaduha kon bala anak sia sang Dios, kag wala niya pag-abusohi ang gahom nga ginhatag sang Dios sa iya.
12. Paano ginpakita sing dugang ni Jesus nga indi sia makagud sa gahom?
12 Sang ulihi, sang mapakaon ni Jesucristo ang 5,000 ka lalaki luwas sa madamong babayi kag kabataan, luyag sang mga Judiyo nga himuon sia nga hari. Kon ginbaton niya ang tanyag nila, pag-abuso kuntani ina sa iya gahom sa pag-impluensia sa mga tawo paagi sa iya mga milagro. Nahibal-an niya nga dapat sia magpabilin nga neutral tuhoy sa politika sang kalibutan kag maghulat kay Jehova nga Dios sa paghatag sa iya sang pagkahari. (Juan 6:1-15) Kag sang ulihi pa gid, sang luyag sia bilangguon sang kadam-an, mapangabay niya kuntani ang 12 ka lehiyon sang mga anghel kag sa sina indi sia mabilanggo. Apang, pag-abuso kuntani ina sa gahom, kay kabubut-on sang iya Amay nga magpasakop sia.—Mateo 26:39, 53.
Ang Iban Pa nga Wala Mag-abuso sa Gahom
13, 14. (a) Anong maayo nga halimbawa ang ginpahamtang ni Gideon, nagapakita nga indi sia makagud sa gahom? (b) Paano si Saul nagpahamtang sing maayo nga halimbawa sang primero nga nangin hari sia?
13 Sa tunga sang dihimpit nga mga tawo nga wala magpasulay sa pag-abuso sa gahom, si Hukom Gideon sarang masambit. Sa tapos niya mahilway ang Israel gikan sa kamut sang Midian, luyag sang mga tawo nga himuon sia nga hari. Nangindi si Gideon, sa pagsiling sing makatarunganon: “Indi gid ako magpangulo sa inyo, kag indi man ang akon anak nga lalaki magpangulo sa inyo. Si Jehova amo ang magapangulo sa inyo.” Huo, yara gihapon ang pagkamapinaubuson nga ginpakita niya sang pamuno pa lamang sang iya karera subong hukom. Kag ang sabat ni Gideon nagpabanaag sa kon ano ang balatyagon ni Jehova nahanungod sa pagtigayon sang Israel sing hari. Mahibaloan naton ina sa sabat sang Dios sa luyag sang Israel sing isa ka hari sang panahon ni manalagna Samuel.—Mga Hukom 8:23; 6:12-16; 1 Samuel 8:7.
14 Walay sapayan sina, sang ginpili ang isa ka hari, si Saul sang primero nagpahamtang sing maayo nga halimbawa sang pagpugong sa paggamit sa gahom. Ang pila ka mga tawo nga huroshuros nagsiling: “‘Paano bala nga pagluwas sini nga tawo sa aton?’ Kag gintamay nila sia . . . Apang sia naghipos.” Naghulag sia kuntani sing padasudasu, bangod sang iya pagkahari, apang wala niya ina paghimoa. Sing kaanggid, sang madaug ni Saul ang mga Amonhon, ang pila sa iya katawhan naghunahuna nga amo na ini ang maayo nga tion sa pagbalus sa mga nagtamay kay Saul. Gani ginsilingan nila sia: “Sin-o bala ang nagsiling, ‘Si Saul—magagahom bala sia sa aton?’ Dalha ninyo ang mga tawo, agod nga mapatay naton sila.” Apang, wala gid ina paghunahunaa ni Saul. Nagsiling sia: “Wala sing tawo nga patyon sini nga adlaw, kay karon nga adlaw si Jehova naghimo sing pagluwas sa Israel.” Makita naton nga si Saul maayo sa ginsugoran kag mapainubuson. (1 Samuel 9:21; 10:20-23, 27; 11:12, 13) Makasulubo gid nga nagsugod sia pag-abuso sa iya harianon nga gahom kag sa amo nakatigayon sing malain nga katapusan!—1 Samuel 28:6; 31:3-6.
15, 16. (a) Ano nga panaksi ang ginhatag ni Hukom Samuel tuhoy sa paggamit niya sang iya pagkahukom? (b) Anong kaanggid nga halimbawa ang ginhatag ni Hari David?
15 Si Samuel, isa ka manalagna nga naghukom man sa Israel, nagpahamtang sing maayo nga halimbawa. Gingamit sia sang Dios kutob sa iya pagkapamatan-on. Makatarunganon nga ginhukman ni Samuel ang iya katawhan kag ginpahanabo ang paghilway sa ila. Ginhingalitan bala niya ang iya posisyon para sa makagud nga ganansia? Wala gid! Sa iya nagapaalam nga pamulongpulong ginsilingan niya ang katawhan: “Yari karon, ako nagpamati sa inyo tingog sa tanan nga inyo ginsiling sa akon, kag nagbutang sing hari sa ibabaw ninyo . . . Yari ako. Saksi kamo batok sa akon sa atubangan ni Jehova kag sa atubangan sang iya hinaplas: Kay sin-o bala baka ang nakuha ko ukon kay sin-o bala asno ang nakuha ko ukon sin-o bala ang akon ginlimolimo ukon sin-o bala ang akon ginpigus ukon sa kay sin-o bala kamut nakabaton ako sing hamham sa pagbulag sang akon mga mata tungod sini?” Dapat batunon sang iya katawhan nga ang dalanon ni Samuel walay dagta sa sining tanan nga butang. Wala sia mag-abuso sa gahom sang iya pagkahukom.—1 Samuel 12:1-5.
16 Indi man naton pagpasapayanan ang maayo nga halimbawa nga ginpahamtang ni David. Makaduha ka beses nga mahimo niya mapatay si Hari Saul. Nangatarungan kuntani si David: ‘Luyag ako patyon ni Saul, gani sia ukon ako.’ Ukon ayhan makagud sia nga nangatarungan: ‘Sanglit gintangdoan ako ni Samuel nga mangin ang masunod nga hari sang Israel, amo gid sini ang matabo sa ulihi. Ngaa indi pa abi karon na?’ Wala, si David naghulat sing mapailubon tubtob panahon na ni Jehova nga ihatag sa iya ang ginharian. (1 Samuel 24:1-22; 26:1-25) Apang, sing makasulubo, sang naghari na si David, sa duha ka okasyon gin-abusohan niya ang iya gahom: sa pagpahanabo sang kamatayon ni Urias kag sa pag-isip sa kasoldadosan sang Israel.—2 Samuel 11:15; 24:2-4, 12-14.
17. Paano ginpakita ni Pablo nga indi gid sia makagud kag wala sia mag-abuso sa iya gahom?
17 Sa tunga sang mga sumulunod ni Jesucristo, si apostol Pablo nagpahamtang sing maayo nga halimbawa sa sini nga bahin. Ayhan nangabay sia kuntani sing suporta gikan sa mga kongregasyon nga gin-alagaran niya. Apang, wala niya ini paghingaliti. Ginsilingan niya ang mga gulang sang Efeso: “Wala ako magkaibog sang pilak ukon bulawan ukon panapton ni bisan sin-o. Kamo gid nakahibalo nga ining mga kamut nagpanghikot sa akon mga kinahanglan kag sa ila sang akon mga kaupod.” (Binuhatan 20:33, 34) Sang nagasulat sa kongregasyon sang Corinto, ang apostol nagpabutyag sang iya kaugalingon sing mas malig-on pa sa sini nga punto. (1 Corinto 9:1-18) May awtoridad sia nga indi magtrabaho, kay sin-o bala ang nagaalagad subong soldado sa kaugalingon niya nga gasto? Wala bala magsiling si Moises nga indi pagbusalan ang baka nga nagalinas sang uyas? “Apang,” paathag ni Pablo, “wala ako maggamit sang bisan ano sining mga aman.” Ano bala ang balus sa iya? “Nga sa akon pagwali mahimo ko nga walay bayad ang maayong balita, nga indi ko magamit sing bug-os ang akon mga kinamatarong sa maayong balita.”
18. (a) Ano ang balatyagon naton tuhoy sa maayo nga paggamit ni Jehova sang iya gahom? (b) Ngaa ang mga nagailog sa iya sa sining bahin masiling nga malipayon?
18 Sa pagkamatuod masiling nga, ‘Malipayon ang tanan nga wala nagaabuso sa ila gahom.’ Daw ano gid ka ekselente ang ngalan ni Jehova nga Dios bangod nagapahamtang sia sing maayo nga halimbawa, nga pirme ginatimbangan ang iya labing gamhanan nga gahom sang iban pa niya nga mga kinaiya sang kaalam, katarungan, kag gugma! Sa amo, makasiling kita kaupod kay salmista David: “Pakamaayuha si Jehova, O kalag ko, kag tanan nga yari sa sulod nakon, ang iya balaan nga ngalan.” (Salmo 103:1) Ang tanan nga nag-ilog sa halimbawa ni Jehova sa paggamit sing nagakaigo sa gahom malipayon gid. Ang mga halimbawa nga ginbinagbinag naton gikan sa Kasulatan nagapamatuod nga bisan pa kita dihimpit nga mga tawo, kita man makagamit sing husto sang aton gahom. Sa paghimo sini, indi lamang nga may yara kita matinlo nga konsiensia kundi may kahamuot man sang Dios kag pagtahod sang aton mga isigkatawo.
Madumduman Mo Bala?
◻ Ngaa nagakaigo ang laygay nahanungod sa pag-abuso sa gahom?
◻ Ano nga mga halimbawa ang nagapakita nga ginagamit ni Jehova nga Dios ang iya gahom sing husto?
◻ Ngaa masiling naton nga si Jesus naghalong gid nga indi pag-abusohan ang gahom?
◻ Sin-o sa Hebreong Kasulatan ang nagpakita nga wala nila pag-abusohi ang gahom?
◻ Paano ginpakita ni apostol Pablo ang iya kaugalingon nga huaran sa paggamit sa gahom?
[Laragway sa pahina 9]
Ang panguna nga mga kinaiya ni Jehova natimbang sing himpit
Gugma Gahom Katarungan Kaalam
[Mga Laragway sa pahina 10]
Makatarunganon nga ginpakita sang Dios ang iya gahom:
sa Anaw
sa Sodoma kag Gomora
sa Dagat nga Pula