Nagalakat Ka Bala sa mga Tikang sang Manluluwas?

ANG isa sang pinakamaayo nga komplimento nga mahatag mo sa isa ka tawo amo ang pag-ilog sa iya. Ang kabataan masami nga nagailog sa ila mga ginikanan. Ang mga tin-edyer nagailog sa popular nga mga manuglingaw, ang mga adulto sa kilala nga mga lider sa latagon sang negosyo kag politika. Apang pila ang nagatinguha sa pag-ilog sa labing daku nga lider sa maragtas sang tawo—si Jesucristo?

Ang isa ka surbe kasan-o lang nga gindumalahan sang organisasyon nga Gal­lup nagpahayag: “Walo sa 10 ka Amerikano ang nagsiling nga sa dimagkubos nagapanikasog sila sa pagsunod sa huwaran ni Jesus.” “Dose porsiento [lamang] ang nagsiling nga ginahimo nila ang ila labi nga masarangan.”

Apang, ano ang nagahimo kay Jesus nga takus sundon sang sa kay bisan sin-o nga tawo nga may impluwensia? Una, suno sa The World Book Encyclopedia, si Jesucristo “makaimpluwensia sa katawhan sing labaw kay bisan sin-o nga nabuhi.” Apang indi subong sang iban nga tawo nga may impluwensia, si Cristo wala manguna sa mga hangaway sa latagon agod pilit nga magkombertir. Wala sia magsandig sa magasto nga propaganda subong sang ginahimo sang kilala nga mga ebanghelisador karon. Wala man sia magsakdag sa bisan anong politikal nga partido. Ang iya impluwensia naggikan lamang sa gahom sang iya mensahe kag sa iya paagi sa paghambal sini—Mateo 7:28, 29; Juan 7:46.

Napahulag ni Jesus ang mga tawo sa paghimo sing daku nga mga pagbalhin sa ila kabuhi, sa espirituwal kag sa moral. Sin-o pa nga tawo nga may impluwensia ang nakaapektar sa madamo sing mapuslanon? Sin-o pa nga tawhanon nga lider ang malaragway subong “matutom, walay kasawayan, walay dagta, napain sa mga makasasala”? (Hebreo 7:26) Busa, himpit ang huwaran ni Jesus—indi subong sang bisan sin-o nga tawo nga naglakat sa duta!

‘Apang, paano masunod sang isa ka maluya kag dihimpit nga tawo ina nga huwaran?’ pangatarungan sang iban. Ang istoryador nga si H. G. Wells nagsiling sa iya libro nga The Outline of History nga sugod sa ginsuguran ang mga tawo nagduhaduha sa pagsunod kay Cristo. “Kay ang pagsunod [kay Cristo],” siling ni Wells, “nagkahulugan sing pagsulod sa isa ka makatilingala kag makahaladlok nga kabuhi, pagbiya sa mga bisyo, pagkontrol sang mga duna kag mga sugyot, pagtinguha sa indi mapatihan nga kalipay.” Si ­Wells naghinakop: “Kalatingalahan bala nga tubtob karon ining Galileanhon [Cristo] indi masarangan sang aton diutay nga tagipusuon.”

Apang matuod gid bala ina? Ibutang ta nga ang pagsunod kay Cristo sing himpit imposible. Walay sapayan si apostol Pedro nagsiling nga si Cristo ‘nagbilin sa aton sing sulundan agod nga sundon naton ang iya mga tikang sing maayo.’ (1 Pedro 2:21) Talupangda, wala sia magsiling “sing himpit” kundi “sing maayo.” Ano, nian, nga sulundan ang ginbilin sa aton ni Jesus? Paano naton mailog ini?