“Magpakaisog kag Magpakabakud”

“Dili kamo magkahadlok sa ila, kay si Jehova nga inyo Dios amo ang nagapakig-away tungod sa inyo.”—DEUTERONOMIO 3:22.

1. (a) Ano ang kahimtangan sang Israel sang matapos ang pagpanlugayaw sa kahanayakan? (b) Ano nga laygay ang ginhatag anay didto ni Moises?

NAG-ABOT na ang pinakaimportante nga hitabo sa maragtas sang Israel. Ang balaan nga pungsod sang Dios dapat na karon maghanda sa pagsulod sa Ginsaad nga Duta! Sa sulod sang 40 ka tuig, ginpangunahan ni Moises ang mga Israelinhon sa daku kag makahaladlok nga kahanayakan. Apang karon, sa rehiyon sang Suba sang Jordan, sa duta sang Moab, namulongpulong sia sa katawhan sang Dios sa katapusan nga tion. Sa edad nga 120 ka tuig, “ang iya mata wala magdulom, kag ang iya kinaugali nga kusog wala magbuhin,” ukon ang iya tingog nagluya. Si Josue, nga magatal-us sa iya, kag ang bug-os nga Israel mahimo nga nalipay sa pagpamati sa makusog nga pagpahayag ni Moises sa kasugoan ni Jehova kag sa iya mabaskog nga laygay nga magpakaisog kon maglakat sila agod panag-iyahan ang duta.—Deuteronomio 1:1-5, 19, 21, 29, 30; 3:22; 31:6, 7, 23; 34:7.

2. Paano naton nahibaloan nga ang rekord tuhoy sining mga butang para sa pagtudlo sa aton karon?

² Ina bala nga mga hitabo sang nagligad nga tuig maragtason lamang? Indi gid! Si apostol Pablo nagasiling sa aton: “Ang bisan ano nga nasulat sadto anay ginsulat sa pagtudlo sa aton, agod nga paagi sa pagkalig-on kag pagpabakud sang mga Kasulatan may paglaum kita.” (Roma 15:4) Ina nga rekord may modernong-adlaw nga kaanggid. Nagapabakud ini sa aton karon para sa espirituwal nga inaway. Isa man ini ka “paandam sa aton nga naabutan sang katapusan sang sistema sang mga butang,” nagabulig sa aton agod malikawan ang mga siod ni Satanas.—1 Corinto 10:11; 1 Pedro 4:7.

Ang Kusog ni Josue—Diin Maghalin?

3, 4. (a) Ngaa dapat naton palambuon ang pagkawalay kahadlok? (b) Paano naton ini himuon?

³ Sa dili madugay karon, ang katawhan sang Dios magamartsa pasulod sa bag-ong sistema sang mga butang sang Dios. Bangod sang mga hitabo sa kalibutan, dapat naton palambuon ang pagkawalay kahadlok. Paano naton ini himuon? Samtang nagahanda si Josue sa pagsulod sa Ginsaad nga Duta, ginsilingan sia sang Dios: “Lamang magpakaisog kag magpakabakud gid sa pagbantay sa paghimo suno sa bug-os nga kasugoan nga ginsugo sa imo sang akon alagad nga si Moises. Dili ka maglipas gikan sini sa tuo ukon sa wala, agod nga may maayo ka nga kauswagan sa bisan diin ka makadto. Ining tolon-an sang kasugoan indi magbulag sa imo baba, kundi magpamalandong ka sa iya sa adlaw kag gab-i, agod nga makabantay ka sa paghimo suno sa tanan nga nasulat sa sini; kay nian mapabugana mo ang imo dalanon, kag nian may maayo ka nga kauswagan.”—Josue 1:7, 8.

⁴ A, amo sina ang sekreto! Basaha ang Biblia adlaw-adlaw. Nagaunod ini sang kasugoan sang Dios para sa aton. Pamalandongi ini. Pamatii ang iya mga pahanumdom. Indi pagtuguti ang imo kaugalingon nga magliso sa materyalistiko, imoral nga kalibutan sa palibot mo. Bisan ano man ang imo kahimtangan, maghulag nga may kaalam. Iaplikar sing mapuslanon ang sibu nga ihibalo kag espirituwal nga kaalam nga natigayon mo paagi sa imo pagtuon sang Pulong sang Dios. Ihambal ini sa iban. Paagi sa paghimo sina kag paagi sa pagsalig kay Jehova, sa pagkamatuod ikaw ‘magpakaisog kag magpakabakud, kag magmadinalag-on ang imo dalanon.’—Ipaanggid ang Salmo 1:1-3; 93:5; 119:165-168.

5. (a) Kaangay kay Josue, paano karon makatigayon sing kusog ang pamatan-on nga mga ministro? (b) Anong maayo nga tulumuron ang matigayon karon sang pamatan-on nga mga Saksi?

⁵ Si Josue “manug-alagad ni Moises kutob sang iya pagkapamatan-on” padayon. (Numeros 11:28) Walay duhaduha nga ining malapit nga pagpakig-upod nagbulig sa iya nga matigayon ang espirituwal nga kusog. Sing kaanggid, ang pamatan-on nga mga ministro karon makatigayon sing kusog paagi sa pagpangabudlay upod sa debotado nga mga ginikanan, mga payunir, madugay na nga mga Saksi, kag iban pa matutom nga mga alagad ni Jehova. Ang pagpamalaybalay upod sinang mga mapisan mangin kalipay kag magabulig sa pagpalig-on sa aton mga pamatan-on sing kahamtong kag sing handum nga mag-uswag sa ministeryo. (Binuhatan 20:20, 21; Isaias 40:28-31) Daw ano pa kaayo nga tulumuron ang iya sang pamatan-on nga mga Saksi sang sa bug-os tion nga pag-alagad tungod sa Ginharian ni Jehova!—Salmo 35:18; 145:10-12.

6. Paano si Josue isa ka halimbawa para sa aton may kahilabtanan sa kampanya batok kay Amalek?

⁶ Sang ginpadala ni Moises si Josue agod makig-away sa mga Amalekinhon, “ginhimo ni Josue ang ginsiling sa iya ni Moises.” Matinumanon sia; gani, natigayon niya ang kadalag-an. Kita man makig-ambit sa pagbindikar kay Jehova kon pamatian naton sing maayo ang mga instruksion sa inaway nga ginabaton naton paagi sa iya organisasyon. Ginsilingan ni Jehova si Moises nga dumdumon ang Iya kadalag-an batok kay Amalek paagi sa pagsulat sini sa isa ka tolon-an kag sa pagbinagbinag sini sa igdulungog ni Josue. Walay duhaduha nga ginpadaku sing dugang ni Josue ang kadalag-an ni Jehova paagi sa pagsugid sini sa iban. Sa amo man nga paagi, mapahibalo man naton karon ang gamhanan nga mga buhat sang Soberanong Ginuong si Jehova, kag mapahayag naton ang iya nagahilapit nga “adlaw sang pagtimalus” sa malaut.—Exodo 17:10, 13, 14; Isaias 61:1, 2; Salmo 145:1-4.

7, 8. (a) Ano nga pagsalig ang ginpabutyag ni Josue kag ni Caleb sang magpauli halin sa Canaan? (b) Ano nga paandam kag pagpalig-on ang masapwan naton sa ginhimo ni Jehova sadto nga tion?

⁷ Sang nagpadala si Moises sing 12 ka pangulo agod maglampitaw sa Ginsaad nga Duta, ginlakip niya si Josue sa ila. Sang magpauli, napulo sa mga lampitaw ang nagpabutyag sing dakung kahadlok sa Canaanhon nga pumuluyo sang duta kag naghaylo sa mga tawo nga magkampanya agod magbalik sa Egipto. Apang si Josue kag si Caleb maisog nga nagsiling: “Kon si Jehova nahamuot sa aton, pasudlon niya kita sa sining duta kag ihatag ini sa aton, duta nga nagailig sing gatas kag dugus. Lamang dili kamo magribuk kay Jehova; kag dili kamo magkahadlok sa katawhan sang duta, kay kalan-on sila nga sa aton. Ang ila panagang ginkuha gikan sa ila, kag si Jehova upod sa aton. Dili kamo magkahadlok sa ila.”—Numeros 13:1–14:38.

⁸ Apang, ang katilingban sang Israel nagpadayon sa pagkumud, amo kon ngaa nagpasilabot si Jehova kag nagpakamalaut sa mahinadlukon nga mga Israelinhon sa pagpanlugayaw sa 40 ka tuig sa kahanayakan. Luwas kay Caleb kag kay Josue, ang tanan nila nga mga lalaki sa inaway napatay nga wala makakita sa Ginsaad nga Duta. Isa gid ini ka paandam para sa aton karon! Indi gid kita magkumud batok sa mga kahimusan ni Jehova. Bisan pa nabudlayan kita sa mga teritoryo nga ginapanaksihan, magpakaisog kag magpakabakud kita sa pagkadto sa puluy-an sang mga tawo upod ang nagaluwas sang kabuhi nga mensahe sang Ginharian. Kabay nga indi gid kita mangin kaangay sang modernong-adlaw nga mga apostata nga, sa baylo nga maghatag sing dayag nga panaksi, nagpasipala sa ila mga kauturan kag nagbalik sa mga dalanon sang kalibutan—ang antitipiko nga Egipto.—Numeros 14:1-4, 26-30; Lucas 12:45, 46; ipaanggid ang Binuhatan 5:27-29, 41, 42.

Ang Ngalan ni Jehova sa Unahan!

9. Paano si Josue nagpabilin sa iya bag-ong ngalan?

⁹ Ang listahan sang Biblia tuhoy sa 12 ka lampitaw nagalista kay Josue subong Hosea, nga nagakahulugan “Kaluwasan.” Apang sa sining punto ang rekord nagasiling: “Kag si Hosea nga anak ni Nun ginhingadlan ni Moises nga Jehoshua [nagakahulugan, ‘Si Jehova Amo ang Kaluwasan’].” Ngaa ginpadaku ni Moises ang ngalan ni Jehova? Bangod si Josue nag-alagad para gid sa pagbindikar sa sina nga ngalan. Si Josue nangin buhi nga halimbawa sang pagkamatinumanon sa sugo nga ginpadaku sang ulihi ni Moises sa Israel: “Higugmaon mo si Jehova nga imo Dios sa bug-os mong tagipusuon kag sa bug-os mong kalag kag sa bug-os mong kusog.” Sa sina, may pribilehiyo sia sa pagpakita nga ‘si Jehova amo ang kaluwasan.’—Numeros 13:8, 16; Deuteronomio 6:5.

10. (a) Ano ang kahulugan sang ngalan ni Jehova sa imo? (b) Ano nga kusog ang makuha naton gikan sa dugang nga pinamulong ni Jehova kay Josue?

¹⁰ Indi bala nga ginakabig man naton ang ngalan ni Jehova subong labing hamili kag nagakabagay sang tanan nga kadayawan? Ang iya daku nga ngalan nagakahulugan “Ginapahanabo Niya” kon tuhoy sa pagtuman sa iya mga saad. Daw ano gid ka makalilipay ang mga saad sang Ginharian! Upod ang kakugi kaangay sang iya ni Josue, luyag naton nga pakadakuon ang ngalan kag mga katuyoan ni Jehova sa atubangan sang tanan nga mahimo magabaton sang paglaum sang iya matinlo kag matarong nga bag-ong sistema sang mga butang. Sa sining mabudlay nga tion, makakuha kita sing kusog gikan sa dugang nga pinamulong ni Jehova kay Josue: “Wala bala ako magsugo sa imo? Magpakaisog kag magpakabakud. Dili ka mahadlok ukon mahangawa, kay si Jehova nga imo Dios nagaupod sa imo bisan diin ka makadto.”—Josue 1:9.a

11. (a) Paano ang kahulugan sang ngalan ni Jesus ginpadaku sang magsakay sia pasulod sa Jerusalem? (b) Paano gintamod ni Jesus ang ngalan ni Jehova, kag ano ang ginapakita sini?

¹¹ Ang Griegong katumbas sang ngalan Josue, ukon Jehoshua, amo ang Jesus, nga nagakahulugan man “Si Jehova Amo ang Kaluwasan.” Paagi kay Jesucristo nga si Jehova nagaaman sing kaluwasan sa katawhan. Sang 33 C.E. sang si Jesus magsakay sa polyino pasulod sa Jerusalem, ang kadam-an nagsinggit: “Luwasa kami, ginapangamuyo namon! Bulahan sia nga nagkari sa ngalan ni Jehova!” (Marcos 11:9; Zacarias 9:9) Si Josue matuod nga tipo ni Jesus, nga ‘nagbilin sa aton sing sulondan agod pagsundon naton ang iya mga tikang.’ (1 Pedro 2:21) Kaangay ni Josue, ginkabig ni Jesus ang ngalan ni Jehova nga bilidhon, kag ginpakataas niya ina nga ngalan. Makaduha sa iya katapusan nga pangamuyo upod sa iya mga disipulo, ginpadaku niya ang ngalan sang Dios, nga nagasiling: “Ginpahayag ko ang imo ngalan sa mga tawo nga ginhatag mo sa akon gikan sa kalibutan. . . . Ginpakilala ko sa ila ang imo ngalan kag ipakilala ko ini, agod nga ang gugma nga imo ginhigugma sa akon mangin yara sa ila, kag ako sa ila.” (Juan 17:6, 26) Daw ano nga pribilehiyo nga mapakilala naton ina nga ngalan sa iban!

12. Anong gamhanan nga mga buhat ang ginahulat naton karon, kag ngaa?

¹² Samtang ginabasa naton ang rekord sang Biblia tuhoy sa matutom nga pagpangulo ni Josue, madumduman naton nga ang Mas Daku nga Josue, si Jesucristo, nagapangulo sa katawhan sang Dios karon. Ang “adlaw ni Jehova” sa pagbindikar malapit na karon. Daw ano kalangkag nga ginahulat naton ang katumanan sang iya saad nahanungod sa matarong nga bag-ong sistema nga magasunod sa sina nga adlaw! (2 Pedro 3:10-13, 17, 18) Sing masaligan, nian, mahulat naton ang dugang nga gamhanan nga mga buhat ni Jehova, nga mas gamhanan pa sang sa ginhimo niya anay paagi kay Josue.

Ang Milagro ni Jehova sa Jordan

13. (a) Anong daw imposible nga kahimtangan ang gin-atubang sang Israel sa nasidlangan nga bahin sang Jordan? (b) Paano ginpadyaan ang pagkamatinumanon sang Israel?

¹³ Panahon ini anay sang tig-alani sang tuig 1473 B.C.E., kag ang Suba sang Jordan nagbaha. Paano ang minilyon ka kalag, tigulang kag pamatan-on, lalaki, babayi, kag kabataan, makatabok sa sinang masulog nga baha? Apang ginsugo ni Jehova si Josue: “Busa karon tindog, tabok ka sini nga Jordan, ikaw kag ining bug-os nga katawhan.” Kag, ginsilingan sang mga tawo si Josue: “Ang tanan nga ginsugo mo sa amon, himuon namon.” Ang Israel naglakat. Mga saserdote ang nagmartsa una, nga nagadala sang kaban sang katipan, nga ginatabonan sing maayo kag nagarepresentar sa presensia ni Jehova sa ila. Kag si Jehova nagsugod sa ‘paghimo sing makatilingala nga mga butang sa tunga nila,’ kay “sang nag-abot sa Jordan ang nagadala sang Kaban kag ang mga tiil sang mga saserdote nga nagadala sang kaban nakatusmog sa bibi sang tubig . . . ang mga tubig nga nag-ilig gikan sa ilaya nagdulog.” Ang tubig sa ilawod “nagponong,” kag nag-ilig pa ilawod nayon sa Patay nga Dagat, “kag ang katawhan nagtabok.” (Josue 1:2, 16; 3:5-16) Isa gid ka makahalawhaw nga milagro!

14. Ano nga kaanggid ang nagaluntad sa sining adlaw, kag ano ang resulta sang panaksi nga ginhatag?

¹⁴ Ang nagabalingaso nga Jordan nagaanggid sa katawhan nga madasig nga nagapadulong karon sa kalaglagan sang Armagedon. (Ipaanggid ang Isaias 57:20; Bugna 17:15.) Karon, samtang ang katawhan yara sa bibi sinang katapusan nga kalaglagan, ginapabakud ni Jehova ang iya katawhan, nga nagadamo na karon sa kapin sa 3,000,000—ang kadamuon nga mapaanggid sa iya sang katawhan sang Dios nga nagmartsa kaupod ni Josue.—Ipaanggid ang Habacuc 2:3.

15. (a) Ano ang nagaanggid sa modernong tion sa maisugon nga buhat sang mga saserdote sadto anay? (b) Paano ginarepresentar ang “dakung kadam-an” sa sining laragway?

¹⁵ Samtang ang minilyon sang Israel nagaagi sa pangpang sang suba, “ang mga saserdote nga nagdala sang kaban sang katipan ni Jehova nagtindog sing malig-on sa tunga sang Jordan,” agod ilarawan ang pagpasilabot ni Jehova nga Dios. (Josue 3:17) Sadto anay sang 1919 nga ang diutay nga hubon sang hinaplas nga mga Saksi maisugon nga nagtusmog sa “tubig” sang katawhan. Sang 1922 maisugon nga ginsabat nila ang panawag nga ‘ibantala, ibantala, ibantala ang Hari kag ang iya Ginharian,’ nga daw nagasiling: “Yari ako! Ipadala ako.” Ginpasalig sila ni Jehova: “Kon mag-agi ka sa mga tubig ako magaupod sa imo; kag sa mga suba, indi sila maglapaw sa imo.” Sang 1931, ginpadunggan niya sila paagi sa paghatag sa ila sang ngalan mga Saksi ni Jehova. (Isaias 6:8; 43:2, 12) Sa tunga sang mga nagtabok sa Jordan amo ang indi Levinhon nga mga Israelinhon kag mga kaliwat sang indi Israelinhon nga “nagsalakut nga kadam-an” nga nagbiya sa Egipto kaupod ni Moises. Sing kaanggid, ang “dakung kadam-an” karon nagapakigbahin sa pagtabok pakadto sa bag-ong sistema sang Dios, samtang ang nagkalabilin sang espirituwal saserdotenhon nga klase nagatindog nga “malig-on, dimationg,” nga huaran sa ila pagtuo.—Exodo 12:38; Bugna 7:9; 1 Corinto 15:58.

Pagdumdom sa Milagro

16. (a) Paano gindumdom ang milagro sa Jordan? (b) Ano ang ginapanugda sini nahanungod sa gamhanan nga mga buhat karon ni Jehova?

¹⁶ Gindumdom ni Jehova ining milagro sa Jordan, nagsugo nga 12 ka lalaki, nga nagarepresentar sa tribo sang Israel, ang magkuha sing 12 ka bato gikan sa pangpang sang suba kag magbutang sini sa nakatundan nga hunasan sang Gilgal. Ina nga mga bato magapabilin didto subong dayon nga handumanan sang ngalan ni Jehova kag sang iya gamhanan nga mga buhat. Ang ulihi nga mga anak sang Israel pagasugiran nga ining handumanan amo nga “agod nga ang tanan nga mga katawhan sang duta makakilala sang kamut ni Jehova nga gamhanan; agod nga magkahadlok kamo kay Jehova nga inyo Dios sa gihapon.” (Josue 4:1-8, 20-24) Sa moderno nga tion, ang makatilingala nga mga buhat ni Jehova sa pagtipig sa iya katawhan, walay sapayan sang malaut nga mga pagsalakay sang mga lider sa politika kag relihion, nagatindog subong handumanan nga nagaupod sia sa iya katawhan. Walay duhaduha nga ang iya dalagkung modernong-adlaw nga mga buhat sa pagbindikar sang iya ngalan pagadumdumon sing permanente sa iya bag-ong sistema sang mga butang.—Bugna 12:15, 16; Salmo 135:6, 13.

17. (a) Anong dugang nga handumanan ang gintukod ni Josue? (b) Anong kaanggid nga panaksi karon ang indi malikawan sang katawhan?

¹⁷ Ang dugang nga handumanan sunodsunod: “Si Josue nagpatindog sing napulog duha ka bato sa tunga sang Jordan sa duog nga didto nagtindog ang mga tiil sang mga saserdote nga nagdala sang kaban sang katipan kag didto sila tubtob sining adlaw.” Sang ang mga saserdote nagtakas sa tubig kag ginbuy-an ni Jehova ang nagponong nga mga tubig, naglibotlibot ini sa 12 ka bato sang panaksi. (Josue 4:9) Gani, ina nga baha indi makapalagyo sa presensia sining mga bato. Amo man karon, ang katawhan madasig nga nagapadulong sa “Patay nga Dagat” sang Armagedon. Apang indi ini makapalagyo sa panaksi nga gintumpok sang mga Saksi ni Jehova sa bug-os nga kalibutan samtang nagatindog sila nga “malig-on sa isa ka espiritu, sa isa ka kalag nga nagapanikasog sing tingob tungod sa pagtuo sang maayong balita.” (Filipos 1:27, 28) Ang rekord nagapakita nga, sa sulod sang 67 ka tuig tubtob karon nga tuig 1986, ang mga Saksi nakapahamtang sa puluy-an sang mga tawo sa bug-os kalibutan, sa kapin sa 200 ka hambal, sing sobra sa 570,000,000 ka libro kag kapin sa 6,400,000,000 ka kopya sang Lalantawan kag Magmata! nga magasin, subong man sang minilyon ka suskripsion sa magasin—isa gid ka daku nga panaksi!

18. (a) Ano nga mga kinaiya ang ginpakita karon sang saserdotenhon nga klase? (b) Paano ginpukaw ang tanan nga katawhan sang Dios?

¹⁸ Malipayon kita nga ang panaksi nagpadayon tubtob karon nga tuig sang 1986. Ang paghimo sang kabubut-on sang Dios isa ka lakas nga pagpangabudlay, subong sang ang 12 ka lalaki nag-abaga ang tagsa sang iya handumanan nga bato kag nagdala sini pakadto sa Gilgal. Apang ang dakung espiritu sa pagpayunir nagpahiusa sa modernong-adlaw nga katawhan sang Dios, nagapukaw sa ila sing dayon nga “magpakaisog kag magpakabakud.”—Salmo 27:14; 31:24; Sofonias 3:9.

19. Sa pagrepaso sa dugang nga mga hitabo sa adlaw ni Josue, ano ang pagsalig naton?

¹⁹ Ang iban pa nga hitabo sang adlaw ni Josue dapat magpalig-on sa aton nga mag-abante, nagasalig nga si Jehova magahimo sing dugang nga mga milagro tungod sa iya katawhan. Ang amon masunod nga artikulo magarepaso sang iban sini sa ila.

[Footnote]

Nagadumdom sa mga Hitabo sang Adlaw ni Josue—

◻ Ngaa dapat ini tamdon subong labi pa sa maragtas lamang?

◻ Paano naton mapalambo ang kaisog kag espirituwal nga kabakud?

◻ Anong maayo nga talaksan ang ginbilin ni Josue para sa aton?

◻ Sa anong mga paagi ginlandongan ni Josue si Jesus?

◻ Ano nga mga hitabo karon ang kaanggid sadtong sa Jordan?