Tama Kadamol nga Panganod sang mga Saksi!

“Sanglit ginalibotan kita sing tama kadamol nga panganod sang mga saksi, . . . magdalagan kita nga may pagbatas sang dalaganon nga ginabutang sa aton atubang.”—HEBREO 12:1.

1, 2. (a) Anong malaragwayon nga kahimtangan ang ginahunahuna ni Pablo sang nagsulat sa Hebreohanong mga Cristiano? (b) Ngaa ang Hebreohanong mga masigkatumuluo nagakinahanglan sing malig-on nga pagtuo?

ILARAWAN ang imo kaugalingon subong manugdalagan sa isa ka istadyum. Nagapanikasog ka sa pag-abante, nagagamit sang tagsa ka kaunoran, ang imo mga mata natuon sa tulumuron. Apang kamusta ang mga tumalan-aw? Ti, sila tanan madinalag-on nga mga manugdalagan! Indi lamang sila mga tumalan-aw kundi aktibo nga mga saksi sa hambal kag buhat.

² Mahimo nga ginahunahuna ni apostol Pablo inang malaragwayon nga kahimtangan sang nagasulat sa Hebreohanong mga Cristiano (c. 61 C.E.). Nagakinahanglan sila sang malig-on nga pagtuo. (Hebreo 10:32-39) Paagi lamang sa pagtuo nga matuman nila ang paandam ni Jesus nga magpalagyo kon ang Jerusalem ginalibotan sang nagkampo nga mga hangaway (sang 66 C.E.) mga pila ka tuig sa wala pa ini malaglag sa kamut sang mga Romano (sang 70 C.E.). Ang pagtuo magasakdag man sa ila kon sila “hingabuton tungod sa pagkamatarong.”—Mateo 5:10; Lucas 21:20-24.

3. Sa Hebreo 12:1, ano ang “sala nga nagatapik gid,” kag ang mga Cristiano ginalaygayan sa pagdalagan sing anong dalaganon nga may pagbatas?

³ Sa tapos marepaso ang wala pa Cristiano nga mga buhat sang pagtuo (sa Hebreo, kapitulo 11), si Pablo naglaygay: “Sanglit ginalibotan kita sing tama kadamol nga panganod sang mga saksi, isikway ta man ang tagsa ka kabug-atan [nga mahimo magpabug-at sa aton sa espirituwal] kag ang sala [kakulang sing pagtuo] nga nagatapik gid, kag magdalagan kita nga may pagbatas sang dalaganon [para sa dayon nga kabuhi] nga ginabutang sa aton atubang.” (Hebreo 12:1) Ang pagrepaso ni Pablo sa pagtuo nga nagapanghikot nagapatalupangod sa lainlain nga bahin sini kag magabulig sa aton, hinaplas man kita nga mga Cristiano nga nagadalagan sa dalaganon sang pagkadimamalatyon sa langit ukon bahin kita sang “dakung kadam-an” nga may tulumuron nga kabuhi nga walay katapusan sa paraiso nga duta. (Bugna 7:4-10; Lucas 23:43; Roma 8:16, 17) Apang ano gid ang pagtuo? Ano ang pila ka bahin sining espiritual nga hiyas? Kag paano kita magahulat kon kita may pagtuo? Samtang ginapangita mo ang mga sabat sa sinang mga pamangkot, basaha palihug ang ginsitar nga mga bersikulo sang Hebreo kapitulo 11 kag 12 sa pribado kag sa pagtuon sang kongregasyon.

Kon Ano ang Pagtuo

4. Ano ang pagtuo?

⁴ Ginsaysay una ni Pablo ang pagtuo. (Basaha ang Hebreo 11:1-3.) Sing bahin, ang pagtuo amo ang “kasigurohan sang mga butang nga ginalauman.” Ang tawo nga may pagtuo may garantiya nga ang tanan nga ginasaad sang Dios daw subong nga ini natuman na. Ang pagtuo amo man “ang pagpamatuod sang mga butang nga indi makita.” Ang makahalaylo nga pamatuod sang dimakita nga mga katunayan tuman ka kusog amo kon ngaa ang pagtuo ginasiling nga katumbas sina nga pamatuod.

5. Paagi sa pagtuo ano ang mahangop naton?

⁵ Paagi sa pagtuo “ang mga tawo sadtong una nga panahon may pamatuod” nga ginpahamut-an nila ang Dios. Subong man, “paagi sa pagtuo nahangop ta nga ang sistema sang mga butang”—ang duta, ang adlaw, ang bulan, kag ang mga bituon—“nahimo paagi sa Pulong sang Dios, sa bagay nga ang makita nahimo gikan sa mga butang nga dimakita.” Kombinsido kita nga si Jehova amo ang Manunuga sinang mga butang, bisan pa nga indi naton sia makita bangod dimakita sia nga Espiritu.—Genesis 1:1; Juan 4:24; Roma 1:20.

Ang Pagtuo kag ang “Daan nga Kalibutan”

6. Ngaa si Abel may “kasigurohan” nga ang matagnaon nga mga pulong ni Jehova nahanungod sa ‘binhi sang babayi’ magamatuod?

⁶ Ang isa sa madamong bahin sang pagtuo amo ang apresasyon sa pagkakinahanglanon sang halad tungod sa mga sala. (Basaha ang Hebreo 11:4.) Sa “daan nga kalibutan,” ang pagtuo sa halad nga dugo ginpakita ni Abel, ang ikaduha nga anak sang nahaunang tawhanon nga mag-asawa, sanday Adan kag Eva. (2 Pedro 2:5) Walay duhaduha nga si Abel nakahantup sa iya kaugalingon sang makamamatay nga mga epekto sang napanubli nga sala. (Genesis 2:16, 17; 3:6, 7; Roma 5:12) Sing maathag natalupangdan man niya ang katumanan sang dekrito sang Dios nga nagdul-ong sa mabug-at nga pagpangabudlay ni Adan kag kasakit sa pagmabdos ni Eva. (Genesis 3:16-19) Gani si Abel may “kasigurohan” nga ang iban pa nga butang nga ginpamulong ni Jehova magamatuod. Naglakip ini sa matagnaon nga pulong nga ginpatuhoy sa pangunang kaaway nga si Satanas sang ang Dios nagsiling sa man-ug: “Butangan ko sing kaawayon sa tunga mo kag sang babayi kag sa tunga sang imo binhi kag sang iya binhi. Sia magdugmok sang imo ulo kag dugmokon mo ang iya tikod.”—Genesis 3:15.

7. (a) Paano ginpakita ni Abel ang apresasyon sa pagkinahanglan sing halad tungod sa mga sala? (b) Sa anong paagi ang Dios ‘nagpanaksi sa mga dulot ni Abel’?

⁷ Si Abel nagpakita sing pagtuo sa ginsaad nga Binhi paagi sa pagpresentar sa Dios sing sapat nga halad nga mahimo makatal-us sing malaragwayon sa kaugalingon nga dugo ni Abel. Apang ang iya walay pagtuo nga magulang nga si Cain naghalad sing walay dugo nga mga utan. Subong manugpatay sang tawo, sang ulihi ginpatulo ni Cain ang dugo ni Abel. (Genesis 4:1-8) Apang napatay si Abel nga nakahibalo nga ginkabig sia ni Jehova nga matarong, “gintamod sang Dios si Abel kag ang iya halad.” Paano? Paagi sa pagbaton sa halad ni Abel nga ginhalad sa pagtuo. Bangod sang iya pagtuo kag balaan nga kahamuot, nga tuhoy sini ang Inspirado nga Rekord padayon nga nagasaksi, ‘bisan napatay si Abel, apang sia nagahambal.’ Nakita niya ang pagkinahanglan sing halad tungod sa sala. May pagtuo ka bala sa mas importante pa nga halad gawad ni Jesucristo?—1 Juan 2:1, 2; 3:23.

8. (a) Ano ang maton-an naton nahanungod sa pagtuo gikan sa maisog nga pagpanaksi ni Enoc? (b) Paano si Enoc “ginliton agod indi mapatay”?

⁸ Ang pagtuo magapahulag sa aton sa paghambal sang mensahe sang Dios nga may kasidla. (Basaha ang Hebreo 11:5, 6.) Ang dumaan nga saksi ni Jehova nga si Enoc maisog nga nagtagna sang balaan nga paghukom sa mga didiosnon. (Judas 14, 15) Walay duhaduha nga ang mga kaaway ni Enoc nagtinguha sa pagpatay sa iya, apang “ginkuha sia” sang Dios agod indi niya maantos ang kasakit sang kamatayon. (Genesis 5:24) Apang, una, “may saksi sia nga ginpahamut-an gid niya ang Dios.” Paano? “Paagi sa pagtuo si Enoc ginliton agod nga indi sia mapatay.” Sing kaanggid, si Pablo ginliton, ukon “ginsabnit pakadto sa paraiso,” sing maathag nakabaton sing palanan-awon tuhoy sa palaabuton nga espirituwal nga paraiso sang Cristianong kongregasyon. (2 Corinto 12:1-4) Gani si Enoc maathag nga nakakita sing palanan-awon nahanungod sa nagapakari nga dutan-on nga Paraiso sang ginpatulog sia ni Jehova sa kamatayon, nga wala sing peligro gikan sa mga kamut sang kaaway. Agod mangin kalahamut-an sa Dios kita, kaangay ni Enoc, dapat maghambal sang mensahe sang Dios upod ang kasidla. (Binuhatan 4:29-31) Dapat man kita magtuo nga ang Dios nagaluntad kag “mangin ang manugpadya sadtong hanuot nga nagapangita sa iya.”

9. Paano ang dalanon ni Noe nagapakita nga ang pagsunod sing maayo sa mga panudlo sang Dios isa pa ka bahin sang pagtuo?

⁹ Ang pagsunod sing maayo sa mga panudlo sang Dios isa pa ka bahin sang pagtuo. (Basaha ang Hebreo 11:7.) Nagapanghikot sa pagtuo, ginhimo ni Noe ‘ang ginsugo sang Dios.’ (Genesis 6:22; 7:16) Si Noe nakabaton sing “balaan nga paandam nahanungod sa mga butang nga wala pa makita” kag nagtuo sa ginsiling ni Jehova nga mahanabo ang isa ka bug-os kalibutan nga anaw. Bangod sa pagtuo kag talahuron nga kahadlok sa Dios, si Noe “nagtukod sing arka sa pagluwas sang iya panimalay.” Paagi sa pagkamatinumanon kag matarong nga mga buhat, ginpakamalaut niya ang dimatinuohon nga kalibutan bangod sang iya malaut nga mga binuhatan kag nagpakita nga nagakabagay ini laglagon.—Genesis 6:13-22.

10. Bisan pa si Noe nagatukod sing arka, naghinguyang sia sing tion para sa anong iban pa nga hilikuton?

¹⁰ Si Noe isa man sang mga saksi ni Jehova sa bagay nga sia “isa ka manugbantala sang pagkamatarong.” (2 Pedro 2:5) Bisan pa masako sia sa pagtukod sang arka, naghinguyang sia sing tion sa pagbantala, subong sang ginahimo sang mga Saksi ni Jehova karon. Sa pagkamatuod, si Noe naghambal sing masidla subong pahibalo nahanungod sa paandam sang Dios sa mga tawo antes sang anaw, apang “wala sila mamati tubtob nag-abot ang anaw kag nag-anod sa ila tanan.”—Mateo 24:36-39.

Pagtuo sa Tunga sang Pagkatapos sang Anaw nga mga Patriarka

11. (a) Paano ginpakita ni Abraham nga ang pagtuo nagalakip sang bug-os nga pagsalig sa mga saad ni Jehova? (b) Sa pagtuo, ano nga “siudad” ang ginahulat ni Abraham?

¹¹ Ang pagtuo nagalakip sang bug-os nga pagsalig sa mga saad ni Jehova. (Basaha ang Hebreo 11:8-12.) Bangod sa pagtuo gintuman ni Abraham (Abram) ang sugo sang Dios kag nagbiya sa Ur sang mga Caldeo, isa ka siudad nga madamo sing mahatag sa materyal nga paagi. Nagtuo sia sa saad ni Jehova nga “ang tanan nga panimalay sa duta” magapakamaayo sang ila kaugalingon paagi sa iya kag nga ang iya binhi pagahatagan sing isa ka duta. (Genesis 12:1-9; 15:18-21) Ang anak ni Abraham nga si Isaac kag ang apo nga si Jacob “mga manunubli kaupod niya sang amo man nga saad.” Bangod sa pagtuo si Abraham “nangin manlulugayaw sa duta sang saad subong sa duta nga indi iya.” Ginhulat niya ang “siudad nga may matuod nga sadsaran, nga ang manunukod kag manugbuhat sini nga siudad amo ang Dios.” Huo, si Abraham naghulat sa langitnon nga Ginharian sang Dios nga sa idalom sini sia pagabanhawon pa kabuhi sa duta. Ang Ginharian bala may subong sina ka importante nga lugar sa imo kabuhi?—Mateo 6:33.

12. Ano ang natabo bangod nagtuo si Sara sa mga saad ni Jehova?

¹² Ang mga asawa sang mahinadlukon sa Dios nga mga patriarka nagtuo man sa mga saad ni Jehova. Halimbawa, bangod sa pagtuo ang asawa ni Abraham nga si Sara, bisan nga baog tubtob mag-edad sing mga 90 anyos kag “nagtaliwan na sia sa panuigon,” ginhatagan sing gahom sa “pagpanamkon, . . . sanglit gin-isip niya [Dios] nga matutom ang nagsaad.” Sang ulihi, ginpanganak ni Sara si Isaac. Sa amo gikan sa 100 anyos ang edad nga si Abraham, “nga daw patay” kon tuhoy sa pagmuad, sang ulihi “natawo ang mga kaliwatan nga subong kadamo sang mga bituon sang langit.”—Genesis 17:15-17; 18:11; 21:1-7.

13, 14. (a) Bisan pa nga sanday Abraham, Isaac, kag Jacob “wala makatigayon sang katumanan sang mga saad,” ano ang reaksion nila? (b) Paano kita makabenepisyo gikan sa pagbinagbinag sa katutom sang mga patriarka kay Jehova bisan pa nga indi naton makita ang gilayon nga katumanan sang iya mga saad?

¹³ Ang pagtuo magahupot sa aton nga matutom kay Jehova bisan pa nga indi naton makita ang gilayon nga katumanan sang iya mga saad. (Basaha ang Hebreo 11:13-16.) Ang matutom nga mga patriarka napatay tanan nga wala makita ang bug-os nga katumanan sang mga saad sang Dios sa ila. Apang “nakakita [sang ginsaad nga mga butang] sini kag nakaabiabi sini gikan sa malayo kag nakatu-ad nga mga dumuluong kag mga umalagi sila sa duta.” Huo, nagkabuhi sila sa pagtuo, kay nagligad ang mga kaliwatan antes ang Ginsaad nga Duta nangin pagkabutang sang kaanakan ni Abraham.

¹⁴ Ang kamatuoran nga wala nila matigayon ang katumanan sang balaan nga mga saad sa ila pagkabuhi wala magpaakig kay Abraham, Isaac, kag Jacob ukon nagtiklod sa ila nga mangin mga apostata. Wala nila pagbiyai si Jehova kag nagbalik sa Ur, nga nangin masaku sa kalibutanon nga mga buhat. (Ipaanggid ang Juan 17:16; 2 Timoteo 4:10; Santiago 1:27; 1 Juan 2:15-17.) Wala, yadtong mga patriarka ‘naghandum’ sang isa ka duog nga maayo pa sa Ur, “nga amo, ang langitnon.” Gani si Jehova ‘wala mahuya tawgon nga ila Dios.’ Ginhuptan nila ang pagtuo sa Labing Mataas tubtob sa kamatayon kag sa ulihi pagabanhawon pa kabuhi sa duta, nga bahin sang sakop sang “siudad,” ang Mesianikong Ginharian nga ginhanda sang Dios para sa ila. Apang kamusta ka? Bisan pa nga ikaw ‘naglakat sa kamatuoran’ sa sulod sang mga tinuig, nagtigulang sa pag-alagad kay Jehova, dapat mo huptan ang imo pagsalig sa iya ginsaad nga bag-ong sistema. (3 Juan 4; 2 Pedro 3:11-13) Daw ano nga padya ang mabaton mo kag sang matutom nga mga patriarka tungod sina nga padya!

15. (a) Ano ang nagtiklod kay Abraham nga ihalad sang ulihi si Isaac subong halad? (b) Paano dapat maapektohan ang aton pagtuo bangod sang hitabo may kahilabtanan kay Abraham kag kay Isaac? (c) Ano ang matagnaon nga ginalaragway sina nga hitabo?

¹⁵ Ang bug-os nga pagkamatinumanon sa Dios importante nga bahin sang pagtuo. (Basaha ang Hebreo 11:17-19.) Bangod gintuman sing bug-os ni Abraham si Jehova, iya ‘ginhalad si Isaac,’ ang iya “bugtong nga anak”—ang lamang nga bata niya kay Sara. Paano ini nahimo ni Abraham? Bangod “sia nagkabig nga ang Dios makasarang sa pagbanhaw [kay Isaac] bisan gikan sa mga patay,” kon kinahanglanon, agod matuman ang saad tuhoy sa kaanakan paagi sa iya. Sang tion nga buot na kuntani kutlon sang kutsilyo nga ginauyatan ni Abraham ang kabuhi ni Isaac, ang tingog sang isa ka anghel ang nagpugong sini. Gani, ginbaton ni Abraham si Isaac gikan sa kamatayon “sa malaragwayon nga paagi.” Dapat man kita mapahulag sa pagtuman sa Dios sa pagtuo bisan pa nga ang aton kabuhi ukon ang iya sang aton kabataan nabutang sa katalagman. (1 Juan 5:3) Talalupangdon man nga si Abraham kag Isaac matagnaon anay nga naglarawan kon paano ihatag ni Jehova nga Dios ang iya bugtong nga Anak, si Jesucristo, subong gawad agod ang mga nagatuo sa iya mahimo makatigayon sing kabuhi nga walay katapusan.—Genesis 22:1-19; Juan 3:16.

16. Kon tuhoy sa aton kabataan kag pagtuo sa mga saad sang Dios, ano nga halimbawa ang ginahatag sang mga patriarka?

¹⁶ Kon kita may pagtuo, buligan naton ang aton mga anak sa pagpahamtang sang ila paglaum sa kon ano ang ginasaad sang Dios para sa palaabuton. (Basaha ang Hebreo 11:20-22.) Tuman gid kakusog ang pagtuo sang mga patriarka sa bagay nga bisan pa ang mga saad ni Jehova sa ila wala matuman sing bug-os sa ila kabuhi, ginliton nila ini sa ila mga anak subong ginapakamahal nga panublion. Sa amo, “ginpakamaayo ni Isaac si Jacob kag si Esau nahanungod sa mga kabulahanan nga palaabuton,” kag ang nagatagumatayon nga si Jacob nagbungat sing pakamaayo sa mga anak ni Jose nga si Efraim kag Manases. Bangod si Jose mismo may makusog nga pagtuo nga ang mga Israelinhon magabiya sang Egipto tungod sa duta nga ginsaad, ginpasumpa niya ang iya mga utod nga dal-on nila ang iya mga tul-an kon maglakat sila. (Genesis 27:27-29, 38-40; 48:8-22; 50:24-26) Ginabuligan mo bala ang imo pamilya sa pagpalambo sing kaanggid nga pagtuo sa kon ano ang ginsaad ni Jehova?

Ang Pagtuo Nagahimo sa Aton nga Unahon ang Dios

17. Paano ang mga ginikanan ni Moises naghulat sa pagtuo?

¹⁷ Ang pagtuo nagapahulag sa aton nga unahon si Jehova kag ang iya katawhan sa bisan ano nga mahatag sining kalibutan. (Basaha ang Hebreo 11:23-26.) Ang mga Israelinhon mga ulipon nga kinahanglan hilwayon gikan sa pagkaulipon sa Egipto sang ang mga ginikanan ni Moises naghulag sa pagtuo. ‘Wala sila mahadlok sa sugo sang hari’ nga patyon ang Hebreohanon nga mga lalaki nga matawo. Sa baylo, gintago nila si Moises sa sulod sang tatlo ka bulan, kag ginbutang sia sang ulihi sa isa ka takupis nga papiro sa tunga sang mga tambo sa pangpang sang Suba sang Nilo. Sang makita sang anak nga babayi ni Paraon, ‘ginpadaku [sia] subong iya kaugalingon nga anak.’ Apang, si Moises ginbatiti anay kag ginhanas sa espirituwal sa puluy-an sang iya amay kag iloy, sanday Amram kag Jocabed. Nian, subong katapo sang panimalay ni Paraon, “gintudloan [sia] sang tanan nga kaalam sang mga Egiptohanon” kag nangin “gamhanan sa iya mga hambal kag mga buhat,” gamhanan sa ikasarang sa hunahuna kag lawas.—Binuhatan 7:20-22; Exodo 2:1-10; 6:20.

18. Bangod sang iya pagtuo, ano nga posisyon ang ginhimo ni Moises kon tuhoy sa pagsimba kay Jehova?

¹⁸ Apang, ang Egiptohanon nga edukasyon kag materyal nga kahamungaya sang harianon nga balay wala magtiklod kay Moises nga biyaan ang pagsimba kay Jehova kag mangin apostata. Sa baylo, “bangod sa pagtuo si Moises, sang daku na sia, nagdumili nga pagtawgon nga anak sang babaying anak ni Paraon,” isa ka buhat nga ginpakita sang ginpangapinan niya ang isa ka Hebreohanon nga utod. (Exodo 2:11, 12) Ginpasulabi ni Jose ang “pag-ambit sang pagpintas kaupod sa katawhan sang Dios [Israelinhon nga mga masigkasumilimba ni Jehova] sang sa pag-agom sang umalagi nga mga pagpangalipay sang sala.” Kon isa ikaw ka bawtismado nga alagad ni Jehova nga may malig-on kag nagakaigo nga espirituwal nga paghanas, sundon mo bala ang halimbawa ni Moises kag magtindog nga malig-on para sa matuod nga pagsimba?

19. (a) Paano mapamatod-an nga gin-una ni Moises si Jehova kag ang Iya katawhan sa kabuhi? (b) Ano nga balus ang gintan-aw ni Moises nga ihatag?

¹⁹ Ginpasulabi ni Moises ang natabo sa iya upod sa katawhan ni Jehova “bangod ginkabig niya ang pagtamay nga gin-antos tungod sa Cristo nga daku pa nga manggad sang sa mga bahandi sa Egipto.” Mahimo nga si Moises ‘nagkabig sang pagtamay nga gin-antos nga mangin ang dumaan nga tipo ni Cristo, ukon Isa nga Hinaplas sang Dios, nga daku pa nga manggad sang sa mga bahandi sa Egipto.’ Subong katapo sang harianon nga panimalay, naagom niya kuntani ang manggad kag kabantogan sang Egipto. Apang nagtuo sia kag “nagtan-aw sia sa balus”—ang kabuhi nga dayon paagi sa pagkabanhaw sa duta sa ginsaad nga bag-ong sistema sang Dios.

20. Ano ang nagapakita sa eksperiensia ni Moises nga ang pagtuo nagahimo sa aton nga indi magkahadlok subong mga alagad ni Jehova?

²⁰ Ang pagtuo nagahimo sa aton nga walay kahadlok bangod nagasalig kita kay Jehova subong manluluwas. (Basaha ang Hebreo 11:27-29.) Sang mabatian nga si Moises nakapatay sing Egiptohanon, gintinguhaan sia nga patyon ni Paraon. “Apang si Moises nagpalagyo gikan kay Paraon kag nagpuyo sa duta sang Midian.” (Exodo 2:11-15) Gani ginpatuhoyan sing indi direkta ni Pablo ang Pagpalagyo sang ulihi sang mga Hebreohanon gikan sa Egipto sang magsiling sia: “Bangod sa pagtuo ginbiyaan niya [ni Moises] ang Egipto, nga wala nagakahadlok sa kaakig sang hari [nga nagpahog sa iya nga patyon bangod sang pagrepresentar sa Dios tungod sa Israel], kay nagbatas sia subong nga nagatan-aw sa iya nga dimakita.” (Exodo 10:28, 29) Bisan pa wala makita sing aktuwal ni Moises ang Dios, ang pagpakig-angot ni Jehova sa iya tuman gid ka tunay sa bagay nga naghulag sia subong nga daw nakita niya ang ‘Isa nga dimakita.’ (Exodo 33:20) Amo bala sina ka kusog ang imo kaangtanan kay Jehova?—Salmo 37:5; Hulubaton 16:3.

21. Kon tuhoy sa pagbiya sang Israel gikan sa Egipto, ano ang natabo “bangod sa pagtuo”?

²¹ Sa wala pa ang Israel magbiya gikan sa Egipto, “bangod sa pagtuo ginhiwat niya [ni Moises] ang paskua kag ginwisik ang dugo, agod nga ang manuglaglag indi magtandog sang mga panganay nila [mga Israelinhon].” Huo, kinahanglan ang pagtuo sa paghiwat sing Paskua upod ang pagpati nga ang panganay nga mga anak nga lalaki sang Israel pagaluwason samtang ang iya sang mga Egiptohanon mapatay, kag ini nga pagtuo ginpadyaan. (Exodo 12:1-39) Subong man “paagi sa pagtuo sila [ang katawhan sang Israel] nagtabok sa Dagat nga Mapula subong sang sa mamala nga duta, apang ang mga Egiptohanon sang nagpangahas sila sa paghimo sing amo nagkalumus.” Daw ano ka makatilingala nga manluluwas ang Dios! Kag bangod sini nga pagluwas, ang mga Israelinhon “nagsugod sa pagkahadlok kay Jehova kag sa pagtuo kay Jehova kag kay Moises nga iya alagad.”—Exodo 14:21-31.

22. Nahanungod sa pagtuo, anong mga pamangkot ang nagapabilin nga pagabinagbinagon?

²² Ang pagtuo ni Moises kag sang mga patriarka isa gid ka modelo para sa mga Saksi ni Jehova karon. Apang ano ang natabo sang ang Dios nagpakig-angot sing dugang pa upod sa mga kaliwat ni Abraham subong naorganisar sing teokratiko nga pungsod? Ano ang maton-an naton gikan sa dugang nga mga buhat sang pagtuo sang dumaan nga panahon?

Paano Mo Sabton?

◻ Ano ang pagtuo?

◻ Ano ang ginatudlo sa aton sang halimbawa ni Enoc tuhoy sa pagtuo?

◻ Paano ginapakita sang mahinadlukon sa Dios nga mga patriarka nga ang pagtuo nagalakip sang bug-os nga pagsalig sa mga saad ni Jehova?

◻ Ano nga buhat ni Abraham ang nagapakita nga ang bug-os nga pagkamatinumanon sa Dios importante nga bahin sang pagtuo?

◻ Ano nga mga buhat ni Moises ang nagapakita nga ang pagtuo nagakahulugan sing pag-una kay Jehova kag sa Iya katawhan sa bisan ano nga mahatag sang kalibutan?