Ang Kabuhi kag Ministeryo ni Jesus

Pagtudlo Paagi sa mga Ilustrasyon

MAATHAG nga si Jesus yara sa Capernaum sang ginsabdong niya ang mga Fariseo. Sang ulihi sina nga adlaw nagbiya sia sa balay kag naglakat pakadto sa malapit nga Dagat sang Galilea, diin nagtipon ang kadam-an sang tawo. Didto nagsakay sia sa isa ka sakayan, nagpalayo diutay, kag nagsugod sa pagtudlo sa mga tawo sa duta sa ubay sang dagat nahanungod sa Ginharian sang mga langit. Ginhimo niya ini paagi sa mga serye sang mga parabola, ukon mga ilustrasyon, ang tagsa may kahimtang nga pamilyar sa mga tawo.

Una, si Jesus nagasugid tuhoy sa isa ka manugsab-ug nga nagsab-ug sing binhi. Ang iban nga binhi nagtupa sa higad sang dalan kag gintuka sang mga pispis. Ang iban nga binhi nagtupa sa batuhon nga duog. Bangod ang ugat kulang sing kadalumon, ang bag-ong mga tanum nalayong sang nagsubang ang adlaw. Ang iban pa gid nga binhi nagtupa sa mga talongon, nga naglumus sa tanum sang mag-ulhot sila. Sa katapusan, ang iban nga binhi nagtupa sa maayong duta kag nagpamunga sing isa ka gatus ka pilo, ang iban kan-uman, kag ang iban katloan.

Sa isa pa gid ka ilustrasyon, si Jesus nagasiling nga ang Ginharian sang Dios kaangay sang pagsab-ug sing binhi sang isa ka tawo. Sa pagligad sang inadlaw, kon magtulog kag magbugtaw sia, ang binhi nagtubo. Wala mahibaloi sang lalaki kon paano. Nagtubo ini sing kinaugalingon kag nagpatubas sing uhay. Sang ang uhay alanyon na, gin-ani ini sang tawo.

Si Jesus nagasugid sang ikatlo nga ilustrasyon nahanungod sa tawo nga nagsab-ug sang husto nga sahi sang binhi, apang sang nagakatulog sia, nag-abot ang kaaway kag nagsab-ug sing gamhon sa tunga sang trigo. Ang mga suluguon sang tawo namangkot kon bala gabuton nila ang mga gamhon. Apang nagsabat sia: ‘Indi, basi magabot ninyo ang iban nga trigo. Pabayai nga magtubo anay sila sing tingob tubtob sa ani. Ugaling magasiling ako sa mga mangangani nga gabuton ang mga gamhon kag sunugon kag tipunon ang trigo sa tambobo.’

Dugang sa iya pamulongpulong sa kadam-an sa duta sa ubay sang dagat, si Jesus naghatag sing duha pa ka ilustrasyon. Ginapaathag niya nga “ang ginharian sang mga langit” kaangay sang binhi sang mustasa nga ginatanum sang isa ka tawo. Bisan pa nga amo ini ang pinakamagamay sa tanan nga binhi, siling niya, nagatubo ini nga mangin ang pinakadaku sa tanan nga utanon. Nangin kahoy ini nga ginakadtoan sang mga pispis, nga nagahulon sa iya mga sanga.

Ang iban karon nagapamatok nga may mas magagmay nga binhi sang sa binhi sang mustasa. Apang si Jesus wala nagahatag sing leksion sa botaniya. Tuhoy sa mga binhi nga pamilyar ang mga taga-Galilea sang adlaw niya, ang binhi sang mustasa amo gid ang pinakamagamay. Gani ginaapresyar nila ang talalupangdon nga pagtubo nga ginailustrar ni Jesus.

Sa katapusan, ginapaanggid ni Jesus “ang ginharian sang mga langit” sa tapay nga ginkuha kag gintago sang isa ka babayi sa tatlo ka sukub sang harina. Sang ulihi, siling niya, bug-os ini nga nalatum.

Sa tapos mahatag ining lima ka ilustrasyon, ginpalakat ni Jesus ang kadam-an kag nagbalik sa balay nga ginadayunan niya. Sang ulihi ang iya 12 ka apostoles kag ang iban pa nagkadto sa iya didto. Mateo 13:1-9, 24-36; Marcos 4:1-9, 26-32; Lucas 8:1-8.

◆ San-o kag diin nagpamulong si Jesus paagi sa mga ilustrasyon sa mga kadam-an?

◆ Ano ang lima ka ilustrasyon nga ginsugid ni Jesus sa kadam-an?

◆ Ngaa nagsiling si Jesus nga ang binhi sang mustasa amo ang pinakamagamay sa tanan nga binhi?