Malipayon nga Katawhan—Ngaa?

ANG matuod nga mga Cristiano karon malipayon nga katawhan. Sa pagkamatuod, nagaalagad kita sa “malipayon nga Dios,” si Jehova. (1 Timoteo 1:11) Ginahatagan niya kita sang iya espiritu, kag ang isa ka bunga sina nga espiritu amo ang kalipay.—Galacia 5:22.

Inang hanuot nga kalipay mapasibusibuon kag nagabatu sa pag-ipit. Halimbawa, si Jesucristo napaidalom sa kasakit sang paglansang kag sa kahuluy-an nga patyon subong manugpasipala. Apang “tungod sa kalipay nga ginbutang sa iya atubang nagbatas sia sang usok sang pag-antos.” (Hebreo 12:2) Nahibaluan ni Jesus nga sa atubangan niya napasad ang dakung kahigayunan kag pribilehiyo may kahilabtanan sa iya pag-alagad kay Jehova. Ang paghugod sa sining palaabuton nga mga pribilehiyo nagbulig sa iya nga mahuptan ang iya kalipay sa tunga sang pag-antos.

Luyag ni Jesus nga ang iya mga disipulo mangin malipayon man. Nagsiling sia: “Ining mga butang napamulong ko sa inyo, agod nga ang akon kalipay mangin yara sa inyo, kag ang inyo kalipay mabug-os.” (Juan 15:11) Matuod ini sa mga Saksi ni Jehova karon. Madamo ang mga rason nga kita malipayon nga katawhan. Nahibaluan naton ang kamatuoran, nga naghilway sa aton gikan sa pagpanguyapot sa disparatis kag butig nga relihiosong pagtuluohan. (Juan 8:32) Nian, nahibaluan man naton kon diin na kita sa lakat sang panahon kag nagakasadya sa malapit na matuman nga paglaum sang kaluwasan. (Lucas 21:28) Ginaamligan man kita gikan sa madamo nga mga palaligban—ang iban sini amo ang ginaliton paagi sa sekso nga mga balatian—nga ginaatubang sadtong wala nagabuhat sang pasad sa Biblia nga moralidad. Kita karon nagaagom sang pinakamaayo gid nga pagpakig-upod sa mga tawo nga interesado sa paghimo sang kabubut-on ni Jehova. Kag, huo, may daku kita nga pribilehiyo nga makigbahin sa pagbantala sang maayong balita sang Ginharian kag paghimo sing mga disipulo sa mga katulad-karnero.—Mateo 24:14; 28:19, 20.

Apang bisan pa matuod ini sa mga Saksi ni Jehova subong kabilogan, kamusta ikaw subong isa ka indibiduwal? Ngaa masiling nga may rason ka sa pagkalipay upod sa iban nga katawhan ni Jehova?

Pagkalipay sa Hilikuton nga Pag-ebanghelyo

Ang iban nabudlayan sa pagpakigbahin sa pamalaybalay nga hilikuton sa pagbantala. Ayhan nagapangalag-ag sila sa pagpalapit sa mga dumuluong kag sa pagsugod sing paghambalanay. Ukon ayhan nagabatyag sila nga indi sangkol sa pagtudlo sa iban. Amo bala sina ang ginabatyag mo kon kaisa? Kon amo, paano ka makasapo sing kalipay sa hilikuton nga pag-ebanghelyo?

Una sa tanan, hupti ang positibo nga panimuot. Madamo nga tawo ang nalipay nga magpamugon sa pila ka artista ukon kilala nga politiko. Apang daw ano pa gid ka daku nga kalipay ang aton nga magamit sang “Hari sang walay katubtuban,” nga si Jehova nga Dios mismo!—1 Timoteo 1:17.

Dumduma man nga indi na gid ini pagliwaton nga hilikuton. Hunahunaa lamang! Ang mga anghel mismo nagagiya kag nagatuytoy sa mga Cristiano diri sa duta sa ila mga panikasog nga makita ang mga katulad-karnero. (Bugna 14:6) Wala bala ini nagahatag sing kalipay sa imo tagipusuon?

Pagkalipay sa Pag-uswag sa Ginharian

Ang isa pa ka rason agod may positibo nga pagtamod sa hilikuton nga pagbantala amo ang maayong epekto nga dala sini. Ang Biblia nagatagna: “Ang diutay mangin isa ka libo, kag ang diutay mangin mabakud nga pungsod. Ako amo si Jehova, magapadali ako sini sa iya tion.” (Isaias 60:22) Ini nga saad ni Jehova natuman sa ulihi nga tion. Halimbawa, sang 1986 nga tuig sa pag-alagad, 225,868 ang ginbawtismuhan bilang simbulo sang ila bug-os kalag nga dedikasyon kay Jehova nga Dios. May pag-uswag nga 6.9 porsiento sa promedyo nga kadamuon sang nagapakigbahin sa pagpalapnag sang kamatuoran sang Biblia sa iban.

Walay duhaduha nga ining pag-uswag makita sa imo kaugalingon nga kongregasyon ukon sirkito. Ang mga bag-ohan nagakadto sa mga miting kag nagahimo sing kinahanglanon nga mga pagbalhin sa ila kabuhi agod maalagad ang Dios. Wala bala ini nagatudlo sa kamatuoran nga ang hilikuton nga pagbantala ginapakamaayo ni Jehova? Ang pagpakigbahin sa sining pag-uswag isa gid ka tuburan sang daku nga kalipay sa imo. Matuod, ayhan wala ka makatuon sing personal upod sa indibiduwal tubtob sa punto nga mabawtismuhan sia. Apang indi kita ang nagakuha sang kredito sa pagpasulod sa isa sa kamatuoran. ‘Ang Dios amo ang nagapatubo,’ siling ni Pablo. (1 Corinto 3:6-9) Ang tanan nga katapo sang kongregasyon may bahin sa pagbulig sa mga bag-ohan. Paano? Paagi sa pagtambong sa mga miting, pagkomento, maabiabihon nga pagtamyaw sa mga bag-ohan, kag paggawi sa paagi nga nagahimo sa kamatuoran nga makagalanyat.

Apang, ang mas daku nga kalipay sarang matigayon kon ikaw labi ka direkta nga nagapakigbahin sa hilikuton nga pagbantala sa pamalaybalay kag pagtuon sang Biblia sa puluy-an. Sang nagligad nga tuig, sa promedyo, 2,726,252 ka semanal nga pagtuon sa Biblia ang ginadumalahan. Ngaa indi manikasog sing labi sa pagpakigbahin sa sining malipayon nga hilikuton? Tanyagi sing pagtuon sa Biblia ang isa nga kilala mo, ayhan isa ka kaingod ukon indibiduwal nga napahamtangan mo sing literatura. Mangayo sing bulig kay Jehova nga makita inang katulad-karnero nga tawo.

Paglandas sa mga Upang sa Kalipay

Sa pagkamatuod, kon ang isa nagabatyag nga indi sangkol sa pagtudlo sa iban, mangin isa gid ini ka daku nga upang sa iya pagkalipay sa pag-alagad sa latagon. Apang, dumduma, nga ang “aton pagkanangin kalipikado sing nagakaigo naghalin sa Dios.” (2 Corinto 3:5) Kag paagi sa iya organisasyon si Jehova nagaaman sing madamong matahom nga bulig agod buligan kita nga makalipikar subong epektibo nga mga ministro.

Una sa tanan, madamo sa tunga naton ang nagaalagad sa Dios sing madugay na kag madamo sing eksperiensia sa pag-alagad sa latagon. Makaupod kita sa sining eksperiensiado nga mga ministro sa ila hilikuton kag makatuon gikan sa ila. Dugang pa, kada semana ang matahom nga mga panugda nagaguwa sa Ang Aton Ministero sa Ginharian. Nian yara ang publikasyon nga Reasoning From the Scriptures, nga nagaunod sang manggad sang impormasyon nga nagapatalom sang aton mga ikasarang sa pagbantala. Gamita ining mga kagamitan kag maghanda sing labi pa para sa pag-alagad sa latagon. Hunahunaa ang bag-o kag makawiwili nga mga paagi sa pagpakilala sang imo kaugalingon sa ganhaan. Ukon binagbinaga ang lainlain nga mga paagi sa pagganyat sa mga tagbalay sa paghambalanay. Samtang nangin labi ka epektibo sa latagon, ang imo kapagsik kag kalipay sa pagbantala walay duhaduha nga magadugang.

Ang ministeryo labi pa ka makalilipay kon masugilanon mo ang mga tawo. Sa iban nga mga teritoryo amo sini ang palaligban. Makapakigbahin ka bala sa pag-alagad sa latagon sa tion nga madamo nga tawo ang yara sa balay, subong kon gab-i? Nasapwan ini sang iban nga epektibo. Masugilanon mo man ang mga tawo bisan diin sila makita—sa mga dalan, nagapungko sa mga bangko sa parke, nagatinlo sang ila salakyan. Dumduma nga ang mga tawo nagakinahanglan sang kamatuoran kag nadalahig ang kabuhi. Magabulig ini sa pagpahulag sa imo nga malandas ang mga huyog nga mahuya. Bisan pa nga ang kalabanan nga tawo wala nagasabat sing kalahamut-an, ang mga nagasabat nagapahalipay sa aton sing daku.

Apang, ang isa sa labing daku nga bulig sa paghupot naton sing kalipay amo ang pangamuyo. Pangabaya kay Jehova ang iya espiritu nga pabakuron kag palig-unon ka. Si Pablo nagsiling: “Makahimo ako sang tanan nga butang sa iya nga nagapabakud sa akon.” (Filipos 4:13) Amo man sina ang batyagon naton samtang ginaton-an naton ang magsalig sing labi kay Jehova.

Pagbatas Subong Malipayon nga Katawhan

Madamo ang wala nagaapresyar sang aton hilikuton. Nahibaluan ni Jesus nga amo sini ang matabo. Gani sang ginpalakat niya ang iya mga sumulunod agod magbantala, ginlaygayan niya sila: “Kon sin-o ang indi magbaton sa inyo ukon magpamati sang inyo mga pulong, sa pagguwa ninyo didto sa sadtong balay ukon siudad itaktak ninyo ang yab-ok sa inyo mga tiil. . . . Yari karon! ginapadala ko kamo subong sang mga karnero sa tunga sang mga lobo; busa magmaalam kamo subong sang mga man-ug kag magwalay daya kamo subong sang mga salampati.” Si Jesus nagsiling man: “Bisan pa ang mga buhok sa inyo ulo naisip ang tanan. Busa dili kamo mahadlok.”—Mateo 10:11-16, 30, 31.

Ini nga mga pulong nagabulig sa aton sa pagbatas sing malipayon. Ginabuligan kita sini sa paghibalo nga kon masugata naton ang mga tawo nga wala nagaapresyar sang aton mga panikasog tungod sa ila, ginapakilala gihapon naton ang ngalan ni Jehova; ginadayaw gihapon naton sila. (Salmo 100:4, 5) Sing makawiwili, kon kaisa ang mga tagbalay nga wala nagabukas sang ganhaan mabatian nga nagasiling sa iban: “Mga Saksi ni Jehova.” Huo, bisan pa wala nagahambal, ang ngalan ni Jehova ginapadaku, kag ang mga tawo nakabaton sing kahigayunan nga batunon ukon sikwayon ang kamatuoran. (Mateo 25:31, 32) Gani bisan ang dimasinapakon nga mga teritoryo mabatas sing malipayon.

Luwas pa, wala gid kita makahibalo basi ina nga mga indibiduwal nagbag-o sing panimuot. Isa ka adlaw, ang isa ka babayi nga nagtabog anay sa iya ganhaan sang isa ka Cristianong babayi sa madamo nga beses namangkot sa sister kon may bag-o sia nga literatura. Nakibot ang sister kag nagkomento nga wala pa gid anay magbaton sing literatura sa Biblia ang babayi. Ang babayi nagpaathag nga ang iya bana nagatrabaho upod sa isa ka tawo nga nagatuon sang Biblia sa mga Saksi ni Jehova. Ginhatagan niya sia kag ang iya bana sing isa sa mga publikasyon sang Watch Tower Society. Tungod sa pagkamausisaon, ginbasa ini sang babayi kag nahibaluan nga ang mensahe amo ang kamatuoran. Gani namat-od sia dayon nga sa masunod nga tion nga magaduaw ang Saksi pasudlon niya sia. Isa ka pagtuon sang Biblia sa puluy-an ang nasugdan, kag ang babayi nangin isa ka dedikado nga saksi ni Jehova sang ulihi!

Busa may daku kita nga pribilehiyo—isa ka malipayon nga pribilehiyo—nga mabantala ang lamang nga mensahe sang paglaum sa kalibutan. Kag ang hilikuton nga pagbantala amo ang asaynment nga ginhatag sa aton sang Dios sa sining katapusan nga mga adlaw. Dapat ini himuon sa wala pa mag-abot ang katapusan. (Mateo 24:14) Daw ano kalawig ini sa wala pa matapos ang malaut nga sistema ni Satanas? Nahibaluan naton nga ang katapusan magaabot sing ulihi. (Ipaanggid ang Habacuc 2:3.) Sa karon, may tion pa para sa iban nga magtuon sang kamatuoran. Himuslan naton ining nabilin nga tion kag mangin makugi sa aton hilikuton nga pagbantala. Kag magtigayon kita sing positibo nga panimuot, nagapangabudlay sing lakas agod ‘maluwas ang aton kaugalingon kag yadtong nagapamati sa aton.’ (1 Timoteo 4:16) Bangod sini, magapabilin kita nga malipayon nga katawhan nga nagapakigbahin sa pag-uswag sang Ginharian.

[Laragway sa pahina 23]

Ang aton hilikuton sa pag-ebanghelyo tuburan sang matuod nga kalipay—bisan kon ang mga tawo wala nagasabat sa mensahe sang Ginharian