Ang Kabuhi kag Ministeryo ni Jesus

Ginpakamaayo sing Dugang nga Instruksion

BAG-O lang makabaton ang mga disipulo sing paathag tuhoy sa paanggid sang manugsab-ug. Apang luyag nila nga makahibalo sing dugang pa. “Saysayi kami,” pangabay nila, “sang paanggid sang mga gamhon sa uma.”

Daw ano ka tuhay ang panimuot sang mga disipulo gikan sa iya sang iban nga kadam-an sa higad sang baybay! Yadto nga mga tawo wala sing hanuot nga handum sa paghibalo sang kahulugan sa likod sang mga paanggid, naayawan na sa pagbalay lamang sa mga butang nga ginhatag sa ila. Nagapaanggid sa mga tumalambong sa higad sang baybay sa iya mausisaon nga mga disipulo, si Jesus nagsiling:

“Sa talaksan nga ginataksan ninyo takson kamo, kag kapin pa ang idugang sa inyo.” Ang mga disipulo takus sa hanuot nga interes kag igtalupangod ni Jesus kag gani ginpakamaayo sa pagbaton sing dugang nga instruksion. Busa, bilang sabat sa pamangkot sang iya mga disipulo, si Jesus nagapaathag:

“Ang nagasab-ug sang maayong binhi amo ang Anak sang tawo; ang uma amo ang kalibutan; kag ang maayong binhi amo ang mga anak sang ginharian; apang ang mga gamhon amo ang mga anak sang malaut, kag ang kaaway nga nagsab-ug sa ila amo ang Yawa. Ang tig-alani amo ang konklusion sang sistema sang mga butang, kag ang mga mangangani amo ang mga anghel.”

Sa tapos mapakilala ang tagsa ka bahin sang iya ilustrasyon, si Jesus naglaragway sang resulta. Sa konklusion sang sistema sang mga butang, sia nagasiling, “ang mga mangangani,” ukon mga anghel, magapain sang katulad gamhon nga butig nga mga Cristiano gikan sa matuod nga “mga anak sang ginharian.” Ang “mga anak sang malaut” pagatandaan nian para sa kalaglagan, apang ang mga anak sang Ginharian sang Dios, “ang mga matarong,” magaiwag sing masanag sa Ginharian sang ila Amay.

Masunod nga ginpakamaayo ni Jesus ang iya mausisaon nga mga disipulo sing tatlo pa ka paanggid. Una, siling niya: “Ang ginharian sang langit kaangay sang isa ka bahandi nga natago sa latagon, nga nakita sang isa ka tawo kag gintago; nian sa kalipay nagalakat sia kag nagabaligya sang tanan niya kag nagabakal sadtong latagon.”

“Liwat,” padayon niya, “ang ginharian sang langit kaangay sang isa ka manugpatikang nga nagpangita sing maayong mga mutya. Nga, sang pagkakita niya sang isa ka mutya nga bilidhon, naglakat kag ginbaligya ang tanan niya kag ginbakal ang mutya.”

Si Jesus mismo kaangay sang tawo nga nakakita sang bahandi nga natago kag kaangay sang manugpatikang nga nakakita sang isa ka mutya nga bilidhon. Ginbaligya niya ang tanan, kon hambalon pa, ginbayaan ang dungganon nga posisyon sa langit agod mangin kubos nga tawo. Nian, subong tawo sa duta, nag-antos sia sing pasipala kag madinumtanon nga paghingabot, nagapamatuod nga takus mangin Gumalahom sang Ginharian sang Dios.

Ang hangkat ginbutang man sa atubangan sang mga sumulunod ni Jesus nga ibaligya ang tanan nga butang agod matigayon ang dakung padya nga mangin kaupod nga gumalahom ni Cristo ukon dutan-on nga sakop sang Ginharian. Kabigon bala naton ang pagpakigbahin sa Ginharian sang Dios nga labi pa ka bilidhon sang sa bisan ano nga butang sa kabuhi, subong bilidhon nga tinago ukon hamili nga mutya?

Sa katapusan, ginpaanggid ni Jesus “ang ginharian sang mga langit” sa isa ka pukot nga nakakuha sing sarisari nga mga isda. Sang ginpainpain ang isda, ang mga malain ginpilak apang ang mga maayo gintipon. Gani, si Jesus nagsiling, mangin subong sina sa konklusion sang sistema sang mga butang; ang mga anghel magapain sang malaut gikan sa matarong, nagatigana sang mga malaut para sa kalaglagan.

Ginsugdan mismo ni Jesus ining proyekto sa pagpangisda, nagatawag sang iya nahaunang mga disipulo nga mangin “mga mangingisda sang tawo.” Sa idalom sang angheliko nga pagtuytoy, ang hilikuton sa pagpangisda nagapadayon sa sulod sang mga siniglo. Sa katapusan nag-abot ang tion sa pagsangya sang “pukot,” nga nagasimbulo sa mga organisasyon sa duta nga nagaangkon nga Cristiano.

Bisan pa nga ang malain nga isda gintigana sa kalaglagan, sing mapasalamaton sarang kita maisip sa tunga sang ‘maayong isda’ nga pagatipunon. Paagi sa pagpakita sing kaanggid kahanuot nga handum subong sang iya sang mga disipulo ni Jesus para sa dugang nga ihibalo kag paghangop, pagapakamaayuhon kita indi lamang sing dugang nga instruksion kundi sing pagpakamaayo sang Dios nga kabuhi nga dayon. Mateo 13:36-52; 4:19; Marcos 4:24, 25.

◆ Ano ang kinatuhayan sang mga disipulo sa mga kadam-an sa higad sang baybay?

◆ Sin-o ukon ano ang ginarepresentar sang nagasab-ug, sang uma, sang maayong binhi, sang kaaway, sang tig-alani, kag sang mga mangangani?

◆ Anong tatlo ka dugang nga paanggid ang ginhatag ni Jesus, kag ano ang maton-an naton gikan sa sini?