Mga Pamangkot Gikan sa mga Bumalasa

◼ Mahimo bala nga ang isa nga nagahimo sing dedikasyon sang iya kabuhi kay Jehova nga Dios makatarunganon nga magapatuhoy sini subong saad?

Ang mga tawo nga nagahigugma sa matuod nga Dios kag determinado sa pag-alagad sa iya sing bug-os dapat magadedikar sang ila kabuhi kay Jehova kag nian magapabawtismo. Samtang ang Biblia wala nagagamit sang tinaga nga “saad” (vow) nahanungod sa Cristianong dedikasyon, ang paghimo sina indi sayop.

Ang Aid to Bible Understanding nagapaathag nga sing Makasulatanhon ang isa ka saad “isa ka solemne nga promisa nga himuon ang pila ka buhat, magahimo sing halad ukon dulot, ukon magasulod sa pila ka pag-alagad ukon kahimtangan; isa ka panaad, positibo man ukon negatibo.” Ang iban nga saad sa rekord sang Biblia nagadalahig sa panaad nga himuon ang ginsambit nga dalanon kon may himuon anay ang Dios. Halimbawa, ang Numeros 21:2 nagasiling: “Ang Israel nagsaad sing saad kay Jehova kag nagsiling: ‘Kon sa pagkamatuod itugyan mo ini nga katawhan sa akon kamut, nian laglagon ko sing bug-os ang ila mga siudad.’” (Genesis 28:20-22; Hukom 11:30-39) Ang pagdedikar sang isa ka Cristiano sang iya kabuhi sa Dios pat-od nga indi isa ka saad nga may kondisyon. Wala sia nagasiling, kon hambalon pa: ‘Kon pahalipayon mo ako kag pahamungayaon karon, Jehova, kag igarantiya sa akon ang kabuhi nga walay katapusan sa bag-ong sistema sang mga butang, nagasaad ako nga alagaron ikaw sa akon bug-os nga kabuhi.’

Ang Biblia nagapresentar sang pila ka mga saad subong nga wala ginapangabay kag ginapangayo. Ang Wilson’s Old Testament Word Studies nagasiling tuhoy sa Hebreong tinaga nga nadalahig: “[na·daŕ ] pagsaad, nga amo, ang saad nga ihatag ukon himuon sing boluntaryo ang pila ka butang; ang pangunang ideya amo ang pagpahamtang.” Gani ang isa ka tawo boluntaryo nga nagasaad sa Dios. Busa kabay nga ipangatarungan nga ang pagkadedikado kag bawtismado nga disipulo sang isa ni Jesus indi isa ka panaad bangod ang Dios karon nagakinahanglan sing pagdedikar sang tanan nga maluyag sang Iya kahamuot.a

Apang, ang kamatuoran nga si Jehova may mga kinahanglanon agod ang isa ka indibiduwal mangin iya abyan wala nagakahulugan nga wala sing personal nga pagpili ang nadalahig. Ginsilingan ni Moises ang mga Israelinhon: “Nabutang ko sa atubangan mo ang kabuhi kag ang kamatayon, ang pagpakamaayo kag ang pagpakamalaut; busa pilia ang kabuhi agod nga magkabuhi ka, ikaw kag ang imo kaliwatan.” (Deuteronomio 30:19, 20; Salmo 15:1-5; ipaanggid ang Josue 24:15; 1 Hari 18:21.) Dumduma ang pulong ni Jesus: “Kari sa akon, tanan kamo nga ginabudlayan kag ginabug-atan, kag papahuwayon ko kamo. Itakud ang akon gota sa inyo, kag magtuon kamo sa akon, kay ako mapainubuson kag malulo sa tagipusuon, kag makakita kamo sing kapahuwayan sa inyo mga kalag.” (Mateo 11:28, 29) Dimakatarunganon bala ina nga kinahanglanon kag sugo? Ukon isa bala ini ka pangagda sang pagpahanugot sing boluntaryo nga sabat?

Si Jesus nabun-ag sa isa ka pungsod nga dedikado sa Dios; madamong bahin sang iya kabuhi kag kamatayon ang ginpat-od na nga daan sa tagna; kag ginhanda sang Dios ang isa ka lawas para kay Jesus nga ihalad. Apang, ang boluntaryo nga desisyon ni Cristo sa pagtanyag sang iya kaugalingon sa pinasahi nga pag-alagad makita sa iya pinamulong: “Nian nagsiling ako, ‘Yari karon! nagaabot ako (sa linukot nga tolon-an nga nasulat nahanungod sa akon) sa paghimo sang imo kabubut-on, O Dios.’” (Hebreo 10:5-10) Sa kaanggid nga paagi, ang tagsa ka indibiduwal dapat magapamat-ud sing personal nga mangin dedikado kag bawtismado nga Cristiano.

Dugang pa, ang mga Cristiano karon nakarealisar nga ang paggamit sang tinaga subong sang “saad” wala malatiri sa kon paano lamang ini ginahimo sa Biblia. Ang mga Saksi ni Jehova madugay na nga nagagamit sang “panaad sa pag-asawahay” sa mga kasal nga ginahiwat sa ila mga King­dom Hall.b Nahisanto ini sa kabilogan nga kahulugan sang “saad,” subong sang sa depinasyon: “solemne nga panaad ukon buhat, labi na sa dagway sang panumpa sa Dios.”—Oxford American Dictionary, 1980, pahina 778.

Busa, indi kinahanglan nga latiran ang kagamitan sang tinaga “saad.” Ang isa nga namat-od nga alagaron ang Dios mahimo magabatyag nga, para sa iya, ang iya bug-os nga dedikasyon katumbas sa personal nga saad—isa ka saad sang dedikasyon. Sia ‘solemne nga nagasaad ukon nagahimo sang pila ka butang,’ nga amo kon ano ang saad. Sa sini nga kaso, amo ini ang paggamit sang iya kabuhi sa pag-alagad kay Jehova, paghimo sang Iya kabubut-on sing matutom. Ina nga indibiduwal dapat magabatyag sing hanuot nahanungod sini. Dapat mangin subong ini sa salmista, nga, nagapatuhoy sa mga butang nga ginpanaad niya, nagsiling: “Ano bala ang ihatag ko kay Jehova tungod sa tanan niya nga kaayohan ayon sa akon? Magakuha ako sang tagayan sang kaluwasan kag magapanawag sa ngalan ni Jehova. Magabayad ako sang akon mga saad kay Jehova.”—Salmo 116:12-14; tan-awa man ang Salmo 50:14.

[Mga footnote]