Pagpakita sing Diosnon nga Debosyon sa Tigulang nga mga Ginikanan
“Patun-a anay [ang mga anak ukon mga apo] sa pagpakita sing diosnon nga debosyon sa ila kaugalingon nga panimalay kag maghatag sing nagakaigo nga balos sa ila mga ginikanan kag mga lolo kag mga lola, kay kalahamut-an ini sa itululok sang Dios.”—1 TIMOTEO 5:4.
1, 2. (a) Sin-o ang ginatudlo sang Biblia nga may salabton sa pag-atipan sa tigulang nga mga ginikanan? (b) Ngaa isa ka serioso nga butang kon patumbayaan sang Cristiano ining katungdanan?
SUBONG bata, ginsagod ka nila kag gin-amligan. Subong hamtong, ginpangita mo ang ila laygay kag pagsakdag. Apang karon nagtigulang na sila kag nagakinahanglan sing pagsakdag. Si apostol Pablo nagsiling: “Apang kon ang balo nga babayi may kabataan ukon mga apo, patun-a ini sila anay sa pagpakita sing diosnon nga debosyon sa ila kaugalingon nga panimalay kag maghatag sing nagakaigo nga balos sa ila mga ginikanan kag mga lolo ukon mga lola, kay kalahamut-an ini sa itululok sang Dios. Sa pagkamatuod kon ang bisan sin-o wala nagasakdag sang iya himata, labi na gid sang iya kaugalingon nga panimalay, napanghiwala niya ang pagtuo kag malain pa sa dimatinuohon.”—1 Timoteo 5:4, 8.
2 Linibolibo ka Saksi ni Jehova karon ang nagaatipan sa nagatigulang nga mga ginikanan. Ginahimo nila ini indi lamang bangod sa “kaluoy” (The Living Bible), ukon “katungdanan” (The Jerusalem Bible) kundi bangod sa “diosnon nga debosyon,” kon sayoron, pagsimba sa Dios. Ginakilala nila nga ang pagbiya sa mga ginikanan sa tion sang pagkinahanglan daw subong sa ‘pagpanghiwala sang [Cristianong] pagtuo.’—Ipaanggid ang Tito 1:16.
‘Dalha ang Imo Lulan’ sa Pag-atipan
3. Ngaa mahimo nga isa ka matuod nga hangkat ang pag-atipan sa mga ginikanan?
3 Ang pag-atipan sa tigulang nga mga ginikanan nangin isa ka mabudlay nga hangkat, labi na sa mga kadutaan sa Nakatundan. Ang mga pamilya masami nga nagalinapta. Nagsaka sing daku ang mga bili. Ang mga asawa masami nga may sekular nga mga trabaho. Sa amo, ang pag-atipan sa nagatigulang nga ginikanan isa ka daku nga hilikuton, labi na kon ang magahimo sini indi na bataon. “Singkwentahon na kami karon, nga may dalagku na kabataan kag mga apo nga nagakinahanglan man sing bulig,” siling sang isa ka utod nga babayi nga nagapanikasog sa pag-atipan sa iya ginikanan.
4, 5. (a) Ginapakita sang Biblia nga ang lulan sa pag-atipan masami nga maambitan upod kay sin-o? (b) Paano ang iban sang adlaw ni Jesus naglikaw sa salabton sa ila mga ginikanan?
4 Ginpakita ni Pablo nga ang salabton sarang maambitan sang “kabataan ukon mga apo.” (1 Timoteo 5:4) Apang, kon kaisa, ang mga anak indi maluyag ‘magdala sang ila lulan’ sa pag-atipan. (Ipaanggid ang Galacia 6:5.) “Nagsiling ang akon magulang nga utod nga babayi nga indi sia magpahilabot sa kahimtangan,” reklamo sang isa ka gulang. Apang ina bala nga dalanon kalahamut-an kay Jehova? Dumduma kon ano anay ang ginsiling ni Jesus sa mga Fariseo: “Si Moises nagsiling, ‘Tahura ang imo amay kag ang imo iloy’ . . . Apang kamo nagasiling, ‘Kon ang tawo magsiling sa iya amay ukon sa iya iloy: “Ang ikabulig ko sa inyo corban, (kon sayoron, regalo nga gindedikar sa Dios,)”’—wala na ninyo ginatuguti sia sa paghimo sing bisan ano sa iya amay ukon sa iya iloy, kag sa amo ginahimo ninyo ang pulong sang Dios nga wala sing pulos bangod sang inyo pinalatunlaton nga sugid.”—Marcos 7:10-13.
5 Kon indi luyag sang Judiyo nga magbulig sa iya imol nga mga ginikanan, masiling lamang sia nga ang iya mga pagkabutang “corban”—isa ka regalo nga para sa templo. (Ipaanggid ang Levitico 27:1-24.) Apang, wala sia ginaobligar sa gilayon nga ihatag ining ginapangangkon nga regalo. Sa amo mahimo pa niya mapanag-iyahan (kag wala sing duhaduha magamit) ang iya pagkabutang tubtob sa tion nga wala sing latid. Apang kon ang iya mga ginikanan nagakinahanglan sing pinansial nga bulig, nagatalikod sia sa iya katungdanan paagi sa pagsiling nga ang tanan nga ginapanag-iyahan niya “corban.” Ginpakamalaut ni Jesus ini nga paglimbong.
6. Ano ang mahimo nga magapahulag sa iban karon sa paglikaw sa ila mga katungdanan sa ila mga ginikanan kag kalahamut-an bala ini sa Dios?
6 Sa amo, ang isa ka Cristiano nga nagapamalibad agod makalikaw sa iya katungdanan indi makalimbong sa Dios. (Jeremias 17:9, 10) Matuod, ang pinansial nga mga problema, maluya nga lawas, ukon kaanggid nga mga kahimtangan mahimo nga magalimite sing daku sa mahimo sang isa para sa iya mga ginikanan. Mahimo nga pasulabihon sang iban ang ila mga pagkabutang, tion, kag pagkapribado sang sa kaayuhan sang ila mga ginikanan. Apang, daw ano ka salimpapaw nga ibantala ang Pulong sang Dios kag dayon himuon ini nga “wala sing pulos” bangod sang indi pagbulig sa aton mga ginikanan!
Pagbuligay sang Pamilya
7. Paano magkooperar ang mga pamilya sa pag-atipan sa nagatigulang nga ginikanan?
7 Ginarekomendar sang iban nga mga eksperto nga kon mag-utwas ang problema tuhoy sa tigulang nga ginikanan, ang pamilya mahimo magkomperensya. Mahimo nga pas-anon sang isa ka katapo sang pamilya ang daku nga bahin sang salabton. Apang paagi sa kalma kag makatarunganon nga pagpakigbahin sa “kompidensial nga paghambalanay,” ang mga pamilya masami nga makakita sing mga paagi nga mag-ambitay sa lulan. (Hulubaton 15:22) Ang iban nga nagapuyo sa malayo nga duog mahimo nga makaamot sa pinansial kag makaduaw sa tion kag tion. Ang iban mahimo makabulig sa sulod sang balay ukon makaaman sing transportasyon. Ti, ang pag-ugyon lamang nga duawon ang mga ginikanan sing regular mahimo nga isa ka mapuslanon nga amot. Ang isa ka utod nga babayi nga otsentahon na nagsiling tuhoy sa mga pagduaw sang iya mga anak, “Daw subong ini sang bulong nga makapapagsik!”
8. (a) Puwera bala ang mga katapo sang pamilya nga yara sa bug-os tion nga pag-alagad sa pag-ambit sa pag-atipan sa ila mga ginikanan? (b) Tubtob sa anong kasangkaron ang ginhimo sang iban nga yara sa bug-os tion nga pag-alagad agod mahimo ang mga obligasyon sa mga ginikanan?
8 Apang, mahimo nga ang mga pamilya magaatubang sing mabudlay nga problema kon ang isa ka katapo yara sa bug-os tion nga pag-alagad. Ang bug-os tion nga mga ministro wala nagapaiway sang ila kaugalingon gikan sa sina nga mga obligasyon, kag madamo ang nakahimo sing tumalagsahon nga mga panikasog sa pag-atipan sa ila mga ginikanan. Ang isa ka manugtatap sang sirkito nagsiling: “Wala gid namon mahanduraw kon daw ano kabudlay sa pisikal kag sa emosyon ang pag-atipan sa amon mga ginikanan, labi na nga sa amo man nga tion ginatinguhaan namon nga himuon ang ginakinahanglan sang bug-os tion nga pag-alagad. Sa pagkamatuod, gindala kami sa limite sang amon pagpailob kag nabatyagan namon ang pagkinahanglan sing ‘gahom nga labaw sa kinaandan.’” (2 Corinto 4:7) Kabay nga padayon nga sakdagon ni Jehova ang subong sina sa ila.
9. Ano nga pagpalig-on ang mahatag sa ila nga wala sing mapilian kundi biyaan ang bug-os tion nga pag-alagad agod maatipan ang mga ginikanan?
9 Apang, kon kaisa, sa tapos mabinagbinag ang tanan nga posibilidad, ang isa ka katapo sang pamilya wala sing mapilian kundi biyaan ang bug-os tion nga pag-alagad. Sing halangpunon, may yara sia nasamo nga mga balatyagon sa pagbiya sa iya mga pribilehiyo sa pag-alagad. ‘Nahibaluan namon nga Cristianong salabton namon nga atipanon ang akon tigulang na kag nagamasakit nga iloy,’ siling sang isa ka misyonero anay. ‘Apang kon kaisa indi ko mahangpan.’ Walay sapayan, dumduma nga ang ‘pagpakita sing diosnon nga debosyon sa panimalay kalahamut-an sa itululok sang Dios.’ (1 Timoteo 5:4) Dumduma, man, nga ang “Dios indi dimatarong nga malimot sang inyo binuhatan kag sang gugma nga ginpakita ninyo sa iya ngalan nga nag-alagad kamo sa mga balaan kag nagaalagad pa.” (Hebreo 6:10) Ang isa ka mag-asawa nga nagbiya sa madamo nga tuig sang bug-os tion nga pag-alagad nagsiling: “Ginatamod namon karon nga ang pag-atipan sa amon mga ginikanan subong ka importante sang kami anay yara sa bug-os tion nga pag-alagad.”
10. (a) Ngaa ang iban nagbiya sa bug-os tion nga pag-alagad nga wala sa husto nga tion? (b) Paano dapat tamdon sang mga pamilya ang bug-os tion nga pag-alagad?
10 Apang, ang iban mahimo nga nagbiya sa bug-os tion nga pag-alagad nga wala sa husto nga tion bangod ang ila mga paryente nagpangatarungan: ‘Wala kamo nahigot sa trabaho kag pamilya. Ngaa indi kamo makaatipan kay Dad kag kay Mom?’ Apang, indi bala ang pagbantala nga hilikuton ang labing hilingagawon nga hilikuton nga ginahimo karon? (Mateo 24:14; 28:19, 20) Sa amo ang mga yara sa bug-os tion nga pag-alagad nagahimo sing importante nga hilikuton. (1 Timoteo 4:16) Ginpakita man ni Jesus nga sa pila ka kahimtangan, ang pag-alagad sa Dios mahimo nga dapat unahon sang sa pamilya.
11, 12. (a) Ngaa ginlaygayan ni Jesus ang tawo nga ‘pabayaan ang patay nga maglubong sang ila patay’? (b) Ano nga mga kahimusan ang ginhimo sang iban nga mga pamilya nga may isa ka katapo nga yara sa bug-os tion nga pag-alagad?
11 Halimbawa, sang ginpangindian sang isa ka tawo ang pangagda nga mangin sumulunod ni Jesus, nga nagasiling: “Tuguti ako anay sa pagkadto kag sa paglubong sang akon amay,” si Jesus nagsabat: “Bayai ang mga patay [sa espirituwal] sa paglubong sang ila kaugalingon nga mga patay, apang lakat ka kag ibantala ang ginharian sang Dios.” (Lucas 9:59, 60) Sanglit ginalubong sang mga Judiyo ang ila patay sa adlaw nga napatay sila, indi posible nga ang amay sang tawo patay na. Mahimo nga luyag lamang sang tawo nga magpabilin upod sa iya nagatigulang nga amay tubtob nga mapatay ang iya amay. Apang, sanglit may yara iban nga mga paryente nga sarang makaatipan sa iya amay, ginpalig-on ni Jesus ang tawo nga “ibantala ang ginharian sang Dios.”
12 Nasapwan man sang iban nga mga pamilya nga kon magkooperar ang tanan nga katapo, masami nga mahimos nga ang isa nga yara sa bug-os tion nga pag-alagad makaambit sa pag-atipan sa iya ginikanan nga wala ginabiyaan ang bug-os tion nga pag-alagad. Halimbawa, ang iban sang bug-os tion nga mga ministro nagabulig sa ila mga ginikanan sa talipuspusan sang semana ukon sa tion sang bakasyon. Sing makawiwili, madamo nga tigulang nga mga ginikanan ang nag-insister nga ang ila mga anak magpabilin sa bug-os tion nga pag-alagad, bisan pa nagkahulugan ini sing daku nga pagsakripisyo sa bahin sang mga ginikanan. Bugana nga ginapakamaayo ni Jehova ang mga nagauna sang mga interes sang Ginharian.—Mateo 6:33.
“Kaalam” kag “Paghantop” Kon Maglumon ang mga Ginikanan
13. Ano nga mga palaligban ang mahimo mag-utwas kon ang ginikanan gin-agda nga maglumon upod sa iya kabataan?
13 Ginhimos ni Jesus nga ang iya balo nga iloy magpuyo upod sa iya tumuluo nga mga paryente. (Juan 19:25-27) Madamo man nga mga Saksi ang nag-agda sa ila mga ginikanan nga maglumon sa ila—kag nakaeksperiensia sing madamo makalilipay nga tion kag pagpakamaayo subong resulta. Apang, masami nga ang pagpalumon sa ginikanan isa ka butang nga makapaluya para sa tanan nga nadalahig bangod sang indi magsaho nga mga estilo sang pagkabuhi, limitado nga pagkapribado, kag sang kabudlayan sa pag-aman sing adlaw-adlaw nga pag-atipan. “Ang pag-atipan kay Mom labi pa nga nagpahuol sa akon,” siling ni Ann, nga ang iya ugangan nga babayi nagaantos sa Alzheimer’s disease. “Kon kaisa nagakadula ang akon pailob kag makahambal ako sing masakit kay Mom—kag labi pa nga ginatublag ako sina.”
14, 15. Paano ang “kaalam” kag “paghantop” makabulig sa ‘pagpalig-on’ sa isa ka pamilya sa idalom sining mga kahimtangan?
14 Si Solomon nagsiling nga “paagi sa kaalam ginapatindog ang balay, kag paagi sa paghangop ginapalig-on ini.” (Hulubaton 24:3) Si Ann, halimbawa, nagtinguha nga mangin kapin ka mahinangpanon sa problema sang iya ugangan nga babayi. “Pirme ko ginatandaan nga may balatian sia kag wala niya ginahungod ang iya ginahimo.” Sa gihapon, “nagakasandad kita sa madamo nga butang. Kon ang bisan sin-o wala nagakasandad sa pulong, himpit sia nga tawo.” (Santiago 3:2) Apang kon mag-utwas ang pagsumpakilay, magpakita sing kaalam paagi sa pagdumili nga tugutan ang kaugot nga magbaskog ukon magsilabo ang kaakig. (Efeso 4:31, 32) Hambali ang mga butang subong isa ka pamilya, kag mangita sing mga paagi nga mahimo ang mga pagkompromiso ukon mga pagpasibu.
15 Ang paghantop nagabulig man sa isa sa pagkomunikar sing epektibo. (Hulubaton 20:5) Ayhan nabudlayan ang isa ka ginikanan sa pagpasibu sa rutina sang bag-o nga puluy-an. Ukon ayhan bangod sang indi maayo nga desisyon, may huyog sia nga indi magkooperar. Sa idalom sang pila ka kahimtangan, mahimo nga wala sing mapilian kundi maghambal nga may kalig-on. (Ipaanggid ang Genesis 43:6-11.) “Kon indi ko pagpangindian ang akon iloy,” siling sang isa ka utod nga babayi, “gastuhon niya ang tanan niya nga kuwarta.” Apang, nasapwan sang isa ka gulang nga kon kaisa makapaangga sia sa iya iloy. “Madamo nga beses nga kon mapaslawan ang akon pangatarungan, nagasiling lamang ako, ‘Mom, mahimo mo bala ini sa akon, palihog?’ kag nagapamati sia.”
16. Ngaa dapat magpakita ang mahigugmaon nga bana sing “paghantop” sa iya asawa? Paano niya mahimo ini?
16 Sanglit masami nga asawa ang nagadala sang daku nga bahin sang lulan sa pag-atipan, ang mahinantupon nga bana dapat magbantay nga indi sia magluya—sa emosyon, sa pisikal, ukon sa espirituwal. Ang Hulubaton 24:10 nagasiling: “Nasapwan mo bala ang imo kaugalingon nga napunaw sa adlaw sang kapiutan? Ang imo kusog diutay.” Ano ang mahimo sang bana agod mapasag-uli ang kapagsik sang iya asawa? “Pagpauli sang akon bana,” siling sang isa ka utod nga babayi, “ginaagbayan niya ako kag ginasilingan nga ginaapresyar gid niya ako. Indi ko mahimo ini kon wala sia!” (Efeso 5:25, 28, 29) Mahimo man sia makatuon sing Biblia upod sa iya asawa kag regular nga makapangamuyo upod sa iya. Huo, bisan sa idalom sining mabudlay nga mga kahimtangan, ang pamilya sarang “mapalig-on.”
Balay Para sa Pag-atipan sa mga Tigulang
17, 18. (a) Napilitan ang iban nga mga pamilya sa paghimo sing ano nga tikang? (b) Sa amo nga mga kaso, paano ang dalagku na nga kabataan makabulig sa ila mga ginikanan sa pagpasibu?
17 Ang isa ka gerontologist nagsiling: “Nagaabot ang tion nga ang pamilya wala sing kalantip ukon kuwarta sa pag-atipan sa [ginikanan] sa balay.” Suno sa isa ka bana: “Nagdangat ini tubtob sa punto nga ang lawas sang akon asawa nagluya bangod sa pag-atipan sa akon Mom sing 24 ka oras. Wala kami sing mapilian kundi ibutang si Mom sa balay para sa mga tigulang. Apang nagasakit gid ang amon dughan sa paghimo sini.”
18 Ang pag-atipan sang balay para sa mga tigulang mahimo nga amo ang labing maayo nga pag-atipan sa idalom sang mga kahimtangan. Apang, ang mga tigulang nga ginapasulod sa sina nga mga balay masami nga nagumon kag akig, nagabatyag nga sila ginbiyaan. “Ginpaathag namon sing maayo kay Mom kon ngaa dapat namon himuon ini,” siling sang isa ka utod nga babayi nga tawgon naton Greta. “Nakatuon sia sa pagpasibu kag ginatamod niya karon ini nga duog subong puluy-an.” Paagi sa regular nga mga pagduaw, mahapos nga makapasibu ang mga ginikanan kag magapamatuod sa pagkamatuod sang imo gugma sa ila. (Ipaanggid ang 2 Corinto 8:8.) Kon problema ang kalayuon, makig-angot paagi sa telepono, sulat, kag mga pagduaw sa tion kag tion. (Ipaanggid ang 2 Juan 12.) Apang, ang pagkabuhi sa tunga sang kalibutanon nga mga tawo may mga kakulangan. Mangin ‘mahunahunaon sang ila espirituwal nga mga kinahanglanon.’ (Mateo 5:3) “Ginahatagan namon si Mom sing materyal nga mabasa niya, kag ginatinguhaan namon nga hambalan upod sa iya ang espirituwal nga mga butang kon mahimo,” siling ni Greta.
19. (a) Ano nga paghalong ang himuon sa pagpili kag sa pag-usisa sang balay para sa mga tigulang? (b) Paano makabenepisyo ang isa ka Cristiano sa paghimo sang iya labing masarangan sa pag-atipan sa isa ka ginikanan?
19 Ang The Wall Street Journal nagreport tuhoy sa pagtuon sa 406 ka balay para sa mga tigulang sa E.U. nga sa diin “mga ikalima nga bahin ang gintamod nga makatalagam sa mga pumuluyo kag halos katunga lamang ang nakatuman sa kasarangan nga mga talaksan.” Masubo hambalon, ina nga mga report kinaandan. Gani kon kinahanglanon ang balay para sa mga tigulang, maghalong sa pagpili. Duawa sing personal agod tan-awon kon matinlo ini, namentinar sing maayo, may sangkol nga mga manugtatap, may palibot nga subong sa puluy-an, kag may nagakaigo nga kalan-on. Usisaa sing maayo sa mahimo nimo ang pag-atipan nga ginahimo sa imo mga ginikanan. Mangin sumalakdag nila, nga ginabuligan sila nga likawan ang makasalaw-a nga mga kahimtangan nga mahimo mag-utwas, subong sang may kaangtanan sa kalibutanon nga mga piesta opisyal ukon kalingawan. Paagi sa paghimo sang imo labing masarangan sa pag-aman sa imo mga ginikanan sang labing maayo nga pag-atipan sa idalom sang mga kahimtangan, mapaiway mo ang imo kaugalingon sa sukma sang konsiensia nga makatublag sa imo.—Ipaanggid ang 2 Corinto 1:12.
Masinadyahon nga mga Manughatag, Masinadyahon nga mga Manugbaton
20. Ngaa importante nga ang kabataan mangin masinadyahon nga mga manughatag?
20 “Mabudlay gid,” siling sang isa ka Cristianong babayi nahanungod sa pag-atipan sa iya mga ginikanan. “Ako ang nagaluto para sa ila, nagapaninlo, nagaatubang sa makapahibi nga mga kahimtangan, nagailis sang hapin sa katre kon maihian nila.” “Apang ano man ang nahimo namon para sa ila,” siling sang iya bana, “ginhimo namon ini sing malipayon—sing masinadyahon. Nagtinguha kami nga indi gid makabatyag ang amon mga ginikanan nga ginakaugtan namon ang pag-atipan sa ila.” (2 Corinto 9:7) Ang mga tigulang masami nga nagapaganot sa pagbaton sing bulig kag indi nila luyag nga mangin lulan sa iban. Sa amo importante gid ang panimuot nga imo ginapakita.
21. (a) Paano ang mga ginikanan mangin masinadyahon nga mga manugbaton? (b) Ngaa maalamon para sa ginikanan nga magplano sing abanse para sa iya pagtigulang?
21 Sa amo man nga tion, importante man ang panimuot nga ginapakita sang mga ginikanan. Ang isa ka utod nga babayi nagsiling: “Wala gid makontento ang akon Mom sa bisan ano nga nahimo ko para sa iya.” Gani, mga ginikanan, likawi ang mangin dimakatarunganon ukon pagkadimakontento. Kay, ang Biblia nagasiling “ang kabataan indi dapat magtipon para sa ila mga ginikanan, kundi ang mga ginikanan para sa ila mga anak.” (2 Corinto 12:14) Ang iban nga mga ginikanan nagauyang sang ila manggad kag nangin dikinahanglanon nga lulan sa ila mga anak. Apang, ang Hulubaton 13:22 nagasiling: “Ang maayong tawo nagabilin sing palanublion sa mga anak sang iya anak.” Sa kasangkaron nga mahimo, ang mga ginikanan sarang makaplano, kon amo, para sa ila pagtigulang, abanse nga nagatigana sing pundo kag nagahimo sing pila ka kahimusan para sa pag-atipan sa ila.—Hulubaton 21:5.
22. Paano dapat tamdon sang isa ka tawo ang mga panikasog nga iya ginahinguyang sa pag-atipan sa iya nagatigulang nga mga ginikanan?
22 Nagakaigo ang ginpamulong ni Pablo sang magsiling sia nga ang pag-atipan sa mga ginikanan isa ka ‘takus nga balos.’ (1 Timoteo 5:4) Suno sa isa ka utod nga lalaki: “Gin-atipan ako ni Mom sa sulod sang 20 ka tuig. Ano ang nahimo ko nga mapaanggid sa sina?” Kabay nga ang tanan nga Cristiano nga may tigulang nga mga ginikanan mapahulag sa sini man nga paagi sa ‘pagpakita sing diosnon nga debosyon sa puluy-an’ nga nakahibalo nga sila padyaan sing bugana sang Dios nga nagasaad sa mga nagatahod sa ila mga ginikanan: “Magkabuhi ka sing malawig sa duta.”—Efeso 6:3.
Mga Punto nga Dumdumon
◻ Paano ang iban sang adlaw ni Jesus nagtinguha sa paglikaw sa ila salabton sa ila mga ginikanan?
◻ Sin-o ang dapat mag-atipan sa tigulang nga mga ginikanan, kag ngaa?
◻ Ano nga mga problema ang maeksperiensiahan sang mga pamilya kon maglumon ang ginikanan, kag paano ini malandas?
◻ Ngaa mahimo nga kinahanglanon ang balay para sa mga tigulang, kag paano mabuligan ang mga ginikanan sa pagpasibu sa sini?
[Laragway sa pahina 15]
Sarang magkomperensya ang pamilya agod hambalan kon paano maambitan ang pag-atipan sa ginikanan
Laragway sa pahina [17]
Kon kinahanglan ang balay para sa mga tigulang, ang regular nga mga pagduaw importante sa emosyonal kag espirituwal nga kaayuhan sang mga tigulang