Pagpabilin nga Suod sa Organisasyon ni Jehova
Gin-asoy ni John Barr
KATAPUSAN yadto nga bahin sang akon pagbiyahe sang nagligad nga tuig sa pagduaw sa balay sang nagligad nga Hunyo, sa eroplano halin sa Glasgow pa Aberdeen. Samtang ang amon eroplano nagasaka sa ibabaw sang berde nga kaumhan sang Scotland kag sa ibabaw sang daw uyaya nga river Clyde, ang akon painoino nagbalik sa tuig 1906 kag sa diutay nga minuro sang Bishopton, didto nayon sa bagatnan sang suba.
Abi ninyo, amo yadto ang tuig kag duog sang ang akon lola, si Emily Jewell, nagsugod sa pagbasa sang libro ni Charles T. Russell nga The Divine Plan of the Ages. Sa gilayon ang iya mga mata nabuksan sa kamatuoran nga ang Biblia wala nagatudlo sang doktrina sang kalayuhon nga impierno. Wala madugay nakita man sing iya duha ka dalagku na nga mga anak nga babayi si Bessie kag si Emily (ang ulihi nangin iloy ko) ang kapawa sang kamatuoran nga nagasilak sa gal-um sang dimatuod nga doktrina nga gintudlo sang United Free Church of Scotland. Sang 1908, ginbawtismuhan si lola bilang simbulo sang iya dedikasyon sa paghimo sang kabubut-on sang Dios, kag nagsunod ang iya mga anak nga babayi wala magdugay.
Ang akon amay amo ang takigrapo sa amo gihapon nga United Free Church sa Bishopton. Indi gid niya mabaton ang doktrina sang Trinidad, gani ang ministro sang iglesia nagtanyag sa pagbantala sing pinasahi nga sermon para sa iya kaayuhan sang isa ka Domingo. Amo gid yadto ang katapusan! Sang mabatian ang paathag, nakombinse karon ang akon amay nga ang Trinidad nga doktrina dimatuod. Naghalin sia sa iglesia kag ginbawtismuhan sang 1912 bilang simbulo sang iya dedikasyon kay Jehova. Pagkatapos sadto nagsaylo ang akon mga ginikanan paaminhan sa Aberdeen upod sa ila duha ka kabataan, si Louie kag si James, kag didto ako natawo sang 1913.
Ang akon painoino sang bata pa ako kag ang panikasog sang akon mga ginikanan nga padakuon kami nga tatlo ka kabataan “sa disiplina kag sa pagtudlo ni Jehova sa hunahuna” nagpabilin sa akon sang ang eroplano nagsugod sa pagpaubos sa ibabaw sang mga pukatod, mga suba, kag mga nalupyakan nga nakilala ko sang bata pa ako. (Efeso 6:4) Sining matahom kag mainit nga aga, ginpasalamatan ko gid kay Jehova ang paghanas sang akon mga ginikanan! Nahibaluan ko nga nakaamot ini sa akon pagpabilin pirme nga suod sa organisasyon ni Jehova.
Ang Kapuslanan sang Paghanas sa Pagkabata
Ang amon pamilya pirme nga malipayon kag nagahiusa. Kon may indi pag-ugyunay ang akon amay kag iloy, wala gid nila ginapakita ini sa atubangan namon nga kabataan. Naghatag ini sa amon indi lamang sing pagtahod sa amon mga ginikanan kundi sing matuod man nga paghidait kag kalig-onan sa sulod sang amon puluy-an.
Ang naluyagan ko gid anay amo ang mga get-together sang amon pamilya kon gab-i. Kami ang nagaaman sing kalingawan, subong sang pagkanta nga kami ang nagakompanyar kag paghampang sing mga board games subong sang Monopoly. Subong man, bisan daw ano kasako ang amon amay, wala gid sia nagakapaslawan sa paghinguyang sing tion upod sa amon sa halos kada adlaw, sa pagbasa sing mabaskog gikan sa Biblia kag sang mga publikasyon sang Watch Tower, subong man sing iban pa nga literatura nga mahapos kag mabudlay. Ining tanan nga butang naghupot sa amon pamilya nga suod samtang nagadaku kami.
Kami lamang ang pamilya sang “kamatuoran” sa sadtong naaminhan nga bahin sang Scotland sadtong mga tinuig. Subong resulta, ang amon balay nakilal-an gid sang madamo nga nagalakbay nga mga tiglawas (mga peregrino, subong amo ang pagtawag sa ila sadto), sang Watch Tower Society, subong ni Albert Lloyd, Herbert Senior, kag ni Fred Scott. Ang iban naghalin pa gani sa ulong-talatapan sang Sosiedad sa Brooklyn, Nueva York, lakip si W. E. Van Amburgh kag si A. H. Macmillan. Ining mga pagduaw nangin importante nga mga butang sang bata pa ako.
Tubtob sa karon ginapasalamatan ko ang matuod nga espiritu sang pagkamaabiabihon nga ginpakita sang akon mga ginikanan. Nagpauswag ini sa pagkabuhi sang amon pamilya, kag bisan pa bata pa ako nagsugod ako sa pagpasangkad sang akon apresasyon sa bug-os nga asosasyon sang mga mag-ulutod. O, daw ano gid kadaku ang mahimo sang mga ginikanan sa pagpalambo sing mainit nga higot sang gugma sa ulot sang ila mga kabataan kag sang bug-os kalibutan nga asosasyon sang ila kauturan!
Paglandas sa Personal nga Problema
Samtang nagatin-edyer ako, nagdugang ang akon pagkamahuluy-on kag pagpain sa grupo. Samtang nagadaku ako, kapin pa nga binudlayan ako sa pagpakig-atubang sa mga tawo kag sa pagpakighambal sa ila. Ining pagkamahuluy-on nangin isa ka daku nga balagbag sa madamo nga paagi apang labi na sa pagpamatuod sang akon pagtuo paagi sa pagbantala sing maayong balita sang Ginharian.
Wala madugay sa tapos sang Inaway Kalibutanon I, ang akon lola kag ang akon iloy amo ang nangin una nga mga Saksi sa Aberdeen sa pagpakigbahin sa pamalaybalay nga ministeryo. Kami nga kabataan nagpakigbahin sa pagpanagtag sing mga tract, apang karon para sa akon ang aktuwal nga pagpakighambal sa mga tawo sa ila mga balay—isa gid ka butang nga tuhay! Isa gid yadto ka matuod nga hangkat. Apang nalandas ko ini sang ulihi. Indi ko gid malipatan ang isa ka Domingo sang hapon sang Nobiembre 1927 sang ginsilingan ko ang akon amay nga maupod ako sa iya sa pagpamalaybalay nga ministeryo. Amo yadto ang nahauna nga tion nga nakita ko ang mga luha sa nawong sang akon amay—mga luha sang kalipay sa sini nga kaso!
Naapektuhan Ako sang Trahedya sa Pamilya
Ang kalinong sang amon pamilya natublag sang gab-i sang Hunyo 25, 1929, sang 16 ako. Pagkatapos sang isa ka adlaw nga pag-alagad, ang akon iloy kag utod nga babayi nagdalidali sa pagpauli agod magluto sang palanyapunon sang akon amay. Sa hinali, nabungguan sang isa ka nagahagunos nga motorsiklo ang akon iloy, kag gindaldal sia sa dalan sa mga 40 ka yarda (37 m). Malala gid ang mga samad sa iya ulo amo kon ngaa wala na sia ginlauman nga mabuhi pa. Apang bangod sa mahigugmaon nga pag-atipan sang akon utod nga babayi nga si Louie sa madamo nga binulan, nag-ayo sia. Sang ulihi, nangin normal liwat ang pagkabuhi sang akon iloy tubtob nga napatay sia sang 1952.
Yadtong makapasubo nga eksperiensia naghimo sing importante gid nga butang sa akon—gintamod ko sing serioso ang akon kabuhi kag kon ano ang ginahimo ko sa sini. Sadto nga tig-ilinit nagsugod ako sa pagtuon sa Biblia sing madalom pa kay sang una—ginhimo ko ang kamatuoran nga akon kaugalingon. Amo ini ang daku nga pagbalhin para sa akon, kag gindedikar ko ang akon kabuhi sa pag-alagad kay Jehova. Apang, pagligad lamang sang pila pa ka tuig nga nakatigayon ako sing kahigayunan nga simbuluhan ang akon dedikasyon paagi sa pagpabawtismo sa tubig.
Pagsulod sa Bug-os Tion nga Pag-alagad
Sang makatapos ako sa pag-eskwela sang 1932, ginsugdan ko ang kurso sa paghanas sa mekanikal kag elektrikal nga pag-inhinyero. Sadto nga mga adlaw sa Britanya, wala sing pagpalig-on nga kasubong karon para sa mga pamatan-on nga magsulod sa bug-os tion nga pagbantala subong mga payunir. Apang, samtang nagaligad ang tinuig, nahibaluan ko kon sa diin ko dapat ihinguyang ang akon mga enerhiya—sa bug-os tion nga ministeryo.
Madumduman ko gid nga may tinon-an kami sang 1938 nga nagpadaku sa akon sang mga kaayuhan sang pagpabilin nga suod sa organisasyon ni Jehova kag sang personal nga pag-aplikar sang mga instruksion sini. Amo yadto ang mga guwa sang Watchtower nga magasin tuhoy kay Jonas nga nagpaathag sang mga eksperiensia nga iya inagihan sang magpalagyo sia gikan sa hilikuton nga ginpatuman sa iya. Ginpadulot ko gid ining leksion sa akon tagipusuon, kag nagdesisyon ako nga indi ko gid pagpangindian ang bisan anong tulumanon nga mag-abot sa akon paagi sa organisasyon ni Jehova. Wala ko marealisar sadto kon daw ano kadamo nga teokratikong mga tulumanon ang nagahulat sa akon agod tilawan ang akon pamat-od.
Nangayo ako sing tuytoy sa pangamuyo, kag ang sabat nag-abot paagi sa isa ka sorpresa nga sulat gikan sa ulong-talatapan sang Sosiedad sa London, nga ginaagda ako nga mangin katapo sang panimalay Bethel. Malangkagon nga ginbaton ko ang kahigayunan nga magsulod sa sadtong masangkad nga ganhaan padulong sa daku pa nga mga pribilehiyo sang pag-alagad. Sa amo, sang Abril 1939 nasapwan ko ang akon kaugalingon nga nagapangabudlay upod kay Harold King, nga sang ulihi nag-alagad subong misyonero sa China kag, bangod sang iya pagbantala didto, naghinguyang sia sing mga tinuig sa bilangguan sang mga komunista. Nagpangabudlay kami sa pag-asimbol sing transcription nga mga makina kag sing mga ponograpo nga gingamit sa pagpatokar sang narekord nga mga sermon sa ganhaan sang puluy-an sang mga tawo.
Ginahanduraw namon ni Harold ang tanan nga sahi sang tawo nga sa ulihi magapamati sa mensahe sang Ginharian paagi sa kasangkapan nga amon ginahimo. Sa sining paagi wala gid namon malimtan ang mangin resulta sang amon hilikuton. Kutob sadto, sa tanan nga nanuhaytuhay nga asaynment nga akon nabaton sa Bethel, nagtinguha ako sa paghupot sini nga pagtamod. Naghimo ini sang akon hilikuton nga makalilipay gid kag pirme nga makahulugan may kaangtanan sa pagbantala sing Ginharian nga hilikuton.
Mga Pribilehiyo sa Pag-alagad
Wala madugay sa tapos ako mag-abot sa Bethel sa London, gintangdo ako nga company servant (karon ginatawag nagadumala nga manugtatap) sang isa ka kongregasyon nga may kapin sa 200 ka manugbantala. Antes sini, isa ako ka manugtatap sa kongregasyon sang napulo lamang ka manugbantala! Nian ako ang ginpaatipan sa Sound Department sang isa ka pungsudnon nga kombension nga ginhiwat sa Leicester sang 1941. Tubtob sini nga tion, diutay lamang ang akon eksperiensia sa sound.
Sang ulihi gin-asayn ako nga maglakbay subong alagad sa kauturan, nga karon ginatawag nga manugtatap sa sirkito. Anum lamang ang mga alagad sa Britanya sang ginsugdan ina nga hilikuton sang Enero 1943. Isa ka bulan lamang ang akon asaynment, apang natabo nga nagduaw ako sa mga kongregasyon sa kapin sa tatlo ka tuig. Sa tion sadtong mabudlay nga mga tinuig sang Inaway Kalibutanon II, ako ang nagtatap sa tatlo ka dalagku nga kombension—nga wala ko pa gid mahimo sang una.
Ang hilikuton sa paglakbay sadto nga mga adlaw tuhay sa karon. Pirme lang kami nagalakbay, kag ang paglakbay sa bug-os nga Britanya sa tion sadtong mga tinuig sang inaway mabudlay gid. Sing indi lamang makaisa, naggamit ako sing bisikleta sa isa ka bahin sang paglakbay sa ulot sang mga kongregasyon. Sa baylo sang pagduaw sa isa ka kongregasyon kada semana, subong sang ginahimo karon sang nagalakbay nga manugtatap, kon ang mga kongregasyon diutay lamang, tubtob sa anum sa ila ang ginaduaw namon sa isa ka semana!
Yari ang kinaandan nga iskedyul kada adlaw: Magmata sa alas singko y media; sa tapos sang pamahaw, maglakbay sa masunod nga kongregasyon agod mag-umpisa sa pag-usisa sang mga rekord sang kongregasyon sa alas otso. Ang hapon masami nga ginahinguyang sa pagministeryo sa latagon, ginasundan ini sa gab-i sang isa ka oras nga miting upod sa mga alagad sang kongregasyon kag dayon sing pamulongpulong sa kongregasyon. Malaka ako nagatulog nga temprano sa alas onse ukon gab-i pa sa sini kon ginasulat ko ang report para sa sadto nga adlaw tuhoy sa kongregasyon sa amo gihapon nga gab-i. Ang Lunes ginapain para sa pagkompleto sang mga report para sa semana, para sa personal nga pagtuon, kag sa paghanda para sa masunod nga semana.
‘Isa ka masako gid nga iskedyul sang isa ka semana,’ siling mo? Huo, apang, daw ano ka makapaladya batyagon nga ginapalig-on namon ang kauturan sa tion sadtong mga tinuig sang inaway nga wala sing pareho pirme nga suod nga pagpakig-angot sa organisasyon! Sa literal gid nga kahulugan, nakabatyag kami sing kaayawan nga nabuligan namon ang mga kongregasyon nga ‘maglig-on sa pagtuo.’—Binuhatan 16:5.
Nagbalik sa Pag-alagad sa Bethel
Ginpangabay ako nga magbalik sa pag-alagad sa Bethel sang Abril 1946. Nalipay ako sa sini, apang ginbatyag ko nga ang akon kabuhi nagmanggaranon sa espirituwal subong resulta sadtong tatlo ka tuig kag tunga sa paglakbay nga hilikuton. Labi pa nga naapresyar ko ang organisasyon karon, kag daw subong bala nga ginahimo ko ang ginlaragway sa Salmo 48:12, 13: “Magmartsa sa palibot sang Sion, kamo nga katawhan, kag maglibot sa sini, isipa ang mga torre sini. . . . Usisaa ang puluy-an nga mga torre sini.” Bangod sang akon kapin pa nga pagpakigkita sa katawhan sang Dios, ang akon gugma nagtubo sa “bug-os nga paghiliupod sang kauturan.”—1 Pedro 2:17.
Sang makabalik na ako sa Bethel, ginhatagan ako sing pribilehiyo sa pag-atipan sang pag-imprinta nga ginahimo sa aton imprintahan sa London kag sang ulihi nadalahig ako sa plate-making. Nian, sang Septiembre 1977 ginhatagan ako sing tumalagsahon nga pribilehiyo nga mangin katapo sang Nagadumala nga Hubon sang mga Saksi ni Jehova, sa Brooklyn, Nueva York, E.U.A.
Ginabaton ko nga kon kaisa daw luyag ko ‘malagyo’ gikan sa pila sang mabudlay nga mga tulumanon nga ginhatag sa akon. Apang ginadumdom ko dayon si Jonas kag ang sayop nga iya nahimo, kag ginasulit ko sa akon kaugalingon ang dalayawon nga saad sa Salmo 55:22: “Itungtong kay Jehova ang imo lulan, kag sia magaalay-ay sa imo. Indi sia magtugot nga malingkang ang matarong.” Napamatud-an ko nga matuod gid ining mga pulong!
Wala gid ginapangabay ni Jehova ang bisan sin-o sa aton nga himuon ang isa ka butang nga nahibaluan niya indi naton masarangan. Apang, paagi lamang sa iya kusog nga mahimo naton ang ginapahimo niya sa aton. Kag isa pa—kon ginahigugma mo gid ang imo kauturan nga nagapangabudlay upod sa imo, magasupurta sila sa imo kag magasakdag sa imo, nga nagapangabudlay upod sa imo agod magbulig sa imo sa pagdala sang imo lulan nga hilikuton.—Sofonias 3:9.
Hamili nga mga Kaangtanan
Sa pagkamatuod, may yara pirme Cristianong kauturan nga imo ginahigugma sing pinasahi. Ang isa sini amo si Alfred Pryce Hughes, nga napatay sang 1978. Ang sugilanon sang iya kabuhi nagguwa sa Abril 1, 1963, nga guwa sang The Watchtower. Sa madamo nga tuig nag-alagad sia subong alagad sang sanga, kag sang ulihi subong katapo sang Komite sang Sanga. Ginhigugma gid sia sang kauturan sa Britaniko nga latagon bangod sang iya daku nga pagtahod sa organisasyon ni Jehova kag sang iya katutom sa sini kag sang iya gugma sa tanan nga kauturan. Ang isa pa ka butang amo ang iya gugma sa pagministeryo sa latagon. Wala gid ini mag-ugdaw sa bug-os niya nga kabuhi, walay sapayan kon ano man nga salabton ang iya abagahon. Ang pagpangabudlay upod sa matutom nga kauturan kaangay ni Pryce may daku gid nga kahulugan sa akon, nagpalig-on sang akon determinasyon nga magpabilin nga suod sa organisasyon ni Jehova kag aktibo sa ministeryo.
Sang Oktubre 29, 1960, nagsulod ako sa isa ka hamili gid nga kaangtanan upod sa madugay na nga makugi nga payunir kag misyonero sang ika-11 nga klase sang Gilead, nga sadtong tion nagaalagad sa Ireland. Sadto nga petsa si Mildred Willett kag ako ginkasal, kag kutob sadto nangin matutom sia nga supurta sa akon sa pag-alagad sa Bethel.
Sa wala pa mapatay ang iloy ni Mildred sang 1965, ginlaygayan niya ang iya anak nga babayi nga indi gid ‘mangimon kay Jehova.’ Pirme gid ginadumdom ni Mildred ang laygay sang iya iloy, kag nakabulig ini sa iya nga indi madiskontento kon sa masami kinahanglan ako mag-overtime. Nakabulig ini sing daku sa akon nga himuon sing malipayon ang dugang pa nga mga asaynment nga nag-abot sa akon. Pareho kami nga nakaambit sa madamo sang makapaladya nga mga eksperiensia sa ministeryo.
Ang isa ka hoben pa nga mag-asawa nga amon ginatun-an sing Biblia, halimbawa, madasig nga nag-uswag tubtob sa punto nga nagdedikar sila kag nagpabawtismo kag regular nga nagpakigbahin sa ministeryo. Malipayon gid kami! Nian, sa hinali, sa wala sing kabangdanan, nag-untat sila sa pagpakig-upod. Pareho kami ni Mildred nga nangluya, kag nagpalibog kami kon sa diin kami nagsayop sa paghanas sa ila. Pirme kami nangamuyo kay Jehova nga buksan pa niya ang ila tagipusuon agod pamatud-an ang ila gugma sa kamatuoran. Mahanduraw bala ninyo ang amon kalipay sang makabaton kami sing sulat gikan sa sining mag-asawa pagligad sang mga napulo ka tuig nga nagasugid sa amon nga aktibo na sila liwat kag ang ila balay isa ka sentro sang Pagtinuon sa Libro?
Ang bana nga si Will nagsulat: “Luyag ko pasalamatan kamo sa tanan nga bulig kag mahigugmaon nga konsiderasyon nga ginhatag ninyo sa amon . . . Ako ang salaon sa akon pagpalayo, indi husto ang apresasyon sang akon tagipusuon . . . Nakasapo kami sing daku nga kalipay sa pagbalik sa organisasyon ni Jehova . . . Ginasulatan ko kamo karon nga gab-i nga ginadumdom ang makalilipay nga nagligad naton, kag kabay nga pakamaayuhon gihapon kamo ni Jehova sa inyo pag-alagad sa iya.”
Sa isa pa ka sulat, ang isa ka iloy nagsulat sa amon tuhoy sa iya anak nga si Mike: “Nalipay gid ako nga ginpapungko sia sang mga anghel sa tupad ninyo.” Ano ang buot niya silingon? Bueno, si Mike nagkadto sa kombension upod sa iya iloy kag manghod nga lalaki, apang indi gid sia interesado sa kamatuoran. Natalupangdan ni Mildred ang solterito nga nagaisahanon kag nakighambal sia sa iya. Nian gin-agda namon sia kag ang iya utod nga magkadto sa Bethel sa London kag tan-awon ang amon ginahimo didto.
Sang ulihi, nag-abot si Mike, kag ang iya nakita nagpukaw sang iya interes nga magpadayon sa pagtuon sing Biblia. Ang resulta? Isa na sia karon ka gulang sa kongregasyon, kag ang iya asawa kag duha ka anak nga lalaki aktibo tanan sa ministeryo. Sang nagligad nga tion ang asawa ni Mike nagsulat: “Pirme ginasambit [ni Mike] ang pagpakigkita niya sa inyo . . . Nahamuot gid sia sa inyo kaayo kag interes sa iya.”
Kon ang akon asawa kag ako makabaton sing sulat sang apresasyon gikan sa isa kaangay ni Will ukon ni Mike nga amon nabuligan, ang amon tagipusuon nagaawas sa pagpasalamat kay Jehova! Daw ano ka dimabilihan nga mga padya inang “mga sulat sang rekomendasyon”—ang tanan bahin sang kalipay nga nabaton gikan sa pagpabilin nga suod sa organisasyon ni Jehova.—2 Corinto 3:1-3.
Pag-alagad sa Ulong-Talatapan
“Isa ka pungsod sa iya kaugalingon.” Amo sina ang paglaragway sang editor sang isa ka pamantalaan sa Brooklyn Heights sa daku nga pamilya sang kapin sa 3,500 ka Saksi nga nagapuyo sa bug-os kalibutan nga long-talatapan sang mga Saksi ni Jehova sa Brooklyn, Nueva York, kag sa Watchtower Farms nga mga isa ka gatos ka milya (160 km) sa upstate Nueva York. Sa pagkamatuod, ang mga hinaplas ni Jehova isa ka espirituwal nga pungsod sa mga mata ni Jehova! Sa karon, ang kadam-an gikan sa madamo nga pungsod sang kalibutan nagapanong kag nagasiling sa sini nga pungsod: “Magaupod kami sa inyo, kay nabatian namon nga ang Dios nagaupod sa inyo.”—Zacarias 8:23; 1 Pedro 2:9.
Maapresyar bala ninyo, nian, kon daw ano ka makakulunyag nga ang akon asawa kag ako nangin permanente nga bahin sining dakung panimalay Bethel? Masiling ko nga wala sing pagpangalag-ag nga ang nagligad nga walo ka tuig sang akon kabuhi amo ang labing talalupangdon sa akon bug-os nga teokratikong eksperiensia. Mabatyagan mo diri ang pulso sang kitaon nga organisasyon ni Jehova; diri ginahanda ang espirituwal nga kalan-on kag dayon ginapadala sa apat ka pamusod sang duta; diri mo makita ang espiritu ni Jehova nga nagapanghikot sa paggiya kag sa pagtuytoy sa daku nga mga desisyon nga dapat himuon; kag diri mo mabatyagan kay sa bisan anong duog ang nagadugang nga pamatuod sang pagpakamaayo ni Jehova sa hilikuton sang pagbantala sang Ginharian kag paghimo sing disipulo. Ining tanan nga eksperiensia kag mga impresyon sining karon lang naghatag sa akon sing dugang nga pangpapagsik nga magpabilin sing suod pa sa katawhan ni Jehova.
Nasaysay ko ang diutay lamang nga bahin sang akon mga eksperiensia sa kabuhi. Apang, mahimo makabulig ini sa inyo sa paghangop kon ngaa, sang maghugpa ang eroplano nga ginsakyan ko sa Aberdeen Airport sadtong mainit nga aga sang Hunyo, nagpasalamat gid ako kay Jehova nga bahin gihapon ako sang aton mahigugmaon nga asosasyon sang mga mag-ulutod sa bug-os nga kalibutan. Samtang nagalakbay ang eroplano ginpalab-as ko ang akon mga tinuig sa kamatuoran, kag nagpahanumdom ini sa akon sa liwat kon daw ano ka mapuslanon nga sa tion kag tion dumdumon naton ang aton madamo nga pagpakamaayo sa kamot ni Jehova.—Salmo 40:5.
Ginsugat ako sang akon utod nga babayi nga si Louie—matutom gihapon, makugi, kag maunungon pagligad sang kapin sa 60 ka tuig sang dedikado nga pag-alagad kay Jehova. Ginpasalamatan ko si Jehova sa sinang dugang pa nga pagpakamaayo, kay wala bala si apostol Pablo nagsiling nga ang katutom amo ang ginapangita ni Jehova sa tanan niya nga “mga tulugyanan”? (1 Corinto 4:2) Daw ano ka dakung pagpalig-on nga mahatag sang isa ka katapo sang pamilya sa isa paagi sa pagpabilin nga matutom!
Si Moises nangamuyo anay: “Tudlui kami sa pag-isip sang amon mga adlaw agod nga makaagom kami sing tagipusuon nga may kaalam.” (Salmo 90:12) Samtang si Mildred kag ako nagatigulang, ginaapresyar namon ang kinahanglanon nga magsalig pirme sa kaalam ni Jehova agod nga magamit namon ang amon kabuhi sa paagi nga magapakita sang amon gugma sa iya kag sa amon kauturan. Malipayon nga ginapakita sa aton ni Jehova ina nga paagi kon magpabilin kita nga suod sa iya organisasyon.
[Laragway sa pahina 28]
Si John Barr (sa unahan sa wala) sang mga tuig 1930, upod sa iya utod nga babayi, utod nga lalaki, kag mga ginikanan
[Laragway sa pahina 31]
Si John Barr karon, upod sa iya asawa nga si Mildred