Pagpadungog sa Dios sang Paglaum

“Si Jehova nagasiling: . . . ‘Ang mga nagapadungog sa akon padunggan ko, kag ang mga nagatamay sa akon tamayon.’”—1 SAMUEL 2:30.

1. Ano ang rason naton sa pagpadungog kay Jehova? (1 Timoteo 1:17; Bugna 4:11)

BANGOD sang mga paglaum nga matigayon naton, pasad sa Biblia, nagakabagay kag makatarunganon para sa aton nga padunggan “ang Dios sang paglaum,” “ang Dios nga nagahatag sing paglaum.” (Roma 15:13, King James Version; New World Translation) Ngaa amo sina? Paano kita, bisan pa diutay kag dihimpit nga mga tawo, makapadungog sa Daku nga Manunuga sang bug-os nga uniberso? Kag padunggan man bala niya kita?

2. Ano ang ginbatyag ni Jesus nahanungod sa kadungganan nga ginahatag sa Dios?

² Makatuon kita gikan sa kon ano ang natabo kay Jesus. Wala sa aton ang makapanghiwala nga luyag pirme ni Jesus nga padunggan kag himayaon ang iya Amay. (Juan 5:23; 12:28; 15:8) Sa katunayan, ginmulay ni Jesus ang mga Fariseo kag mga escriba nga ‘nagpadungog sa Dios sa ila mga bibig apang ang ila mga tagipusuon malayo sa iya.’ Talupangda palihog, ang indi nila pagpadungog sa Dios nagadalahig sa dinagakaigo nga mga motibo kag mga buhat. (Mateo 15:7-9) Apang, makasiling bala kita nga sa pagpadungog ni Cristo sa Dios, ang iya paglaum nadalahig? Kag ano ang reaksion ni Jehova sa sina nga pagpadungog?

3. Paano naton nahibaluan nga si Jesus naglaum kay Jehova?

³ Natandog si Jesus sa ginsiling ni David sa Salmo 16:10: “Indi mo pagbayaan ang akon kalag sa Sheol. Indi ka magtugot nga ang imo matutom makakita sing kaduluntan.” Bangod may paglaum sia nga mabanhaw, si Jesucristo makasiling sang makapulukaw nga mga pulong sa malaut nga nalansang sa tupad niya: “Sa pagkamatuod ginasiling ko sa imo karon nga adlaw, Mangin kaupod ko ikaw sa Paraiso.” (Lucas 23:39-43) Napatay sang ulihi ina nga malaut, gani wala niya masaksihan tatlo ka adlaw sang ulihi ang kompirmasyon sa paglaum ni Jesus nga banhawon. Apang ang isa nga nakasaksi nagreport: “Ining Jesus ginbanhaw sang Dios, nga sa sining katunayan kita tanan mga saksi.” (Binuhatan 2:31, 32) Matuod ini.

4. Ano nga kadungganan ang ginhimo kag nabaton ni Jesus? (Bugna 5:12)

⁴ Nahibal-an sang madamong ordinaryo nga mga tawo nga gin-alagaran ni Jesus nga nagakabagay sia sang pagtahod, ukon kadungganan. (Lucas 4:15; 19:36-38; 2 Pedro 1:17, 18) Nian napatay sia kaangay sang kriminal. Nagbalhin bala ina sang mga butang? Wala, kay si Jesus kalahamut-an sa Dios nga ginalauman niya. Busa, ginbuhi sia liwat ni Jehova. Ang kamatuoran nga ginbanhaw sang “Dios sang paglaum” ang iya Anak pa kabuhi kag ginpanaptan sia sing pagkadimamalatyon sa espiritu nga duog nagapamatuod nga ang Amay padayon nga nagapadungog sa iya Anak. Si Pablo nagasiling: “Nakita namon si Jesus . . . nga napurungpurungan sang himaya kag dungog bangod sang pag-antos sing kamatayon, nga paagi sa dibagay nga kaluoy sang Dios natilawan niya ang kamatayon tungod sa tagsa ka tawo.”—Hebreo 2:7, 9; Filipos 2:9-11.

5. Sa anong pinasahi nga paagi ginpadunggan si Jesus, nga nagresulta sa anong dugang nga kadungganan sa Dios?

⁵ Si Jesus, nga nagpadungog kay Jehova, nagsambit sang isa ka pinasahi nga paagi diin ginpadunggan sia sang Amay. Sang magpakita sa iya matutom nga mga apostoles, nagsiling sia: “Ang tanan nga awtoridad ginhatag sa akon sa langit kag sa duta. Busa lakat kamo kag maghimo sing disipulo sa tanan nga pungsod, nagabawtismo sa ila sa ngalan sang Amay kag sang Anak kag sang balaan nga espiritu . . . Toloka! Kaupod ninyo ako sa tanan nga adlaw tubtob sa konklusion sang sistema sang mga butang.” (Mateo 28:19, 20) Gani dugang nga ginpadunggan sang Amay ang Anak paagi sa paghatag sa iya sing pinasahi nga awtoridad. Gamiton ini tungod sa mga tawo sa paghimo sang hilikuton nga magahatag sing kadungganan sa Isa nga ginpanikasugan ni Jesus nga padunggan. Nagakahulugan bala ini, nian, nga ang dihimpit nga mga tawo sa pila ka paagi makapadungog sa Amay kag sa amo mapadunggan man niya?

Mga Tawo Nagapadungog sa Dios

6. Nagakaigo bala ang maghandum nga padunggan, apang ano ang katalagman sa sini? (Lucas 14:10)

⁶ Ang kalabanan nga tawo halos wala nagahunahuna sa pagpadungog una sa Dios, kay mas interesado sila sa pagtigayon sing kadungganan para sa ila kaugalingon. Ayhan magasiling ang iban nga normal para sa aton ang kaluyag nga padunggan. May kamatuoran sa sini, kay normal ang maghandum sing maayo nga reputasyon, upod ang dungog halin sa sini. (1 Timoteo 3:2, 13; 5:17; Binuhatan 28:10) Apang, ang handum nga padunggan sang mga tawo madali nga mapasubrahan. Mapamatud-an ini sa madamo nga magahingamo sing kabantugan sa bisan ano nga bili ukon magahimo sang bisan ano nga butang agod indi mahuy-an.

7. Ngaa limitado ang balor nga padunggan sang mga tawo?

⁷ Kon hunahunaon mo ini, bisan ang pinakadaku nga dungog gikan sa mga tawo nagakadula, kay sa ulihi ang tanan nagakapatay. Ti, ang handumanan sang pila ka baganihan mahimo nga mapadunggan sa makadali, apang kalabanan sang mga patay nalimtan na. Pila kadamo nga tawo ang nakahibalo sang mga ngalan sang lolo sang ila mga lolo ukon nakahibalo kon sin-o ang mga lider sang ila pungsod sang nagligad nga isa ka gatos ka tuig? Sa pagkamatuod, ang isa nagkabuhi man anay ukon wala magkabuhi wala nagabalhin sang mga butang. Isa lamang sia ka pudyot nga yab-uk sa timbangan sang tion, isa ka diutay nga tulo sa ilig sang kabuhi. Kag bisan pa ginpadunggan sia sing makadali sang mapatay sia, wala sia makahibalo nahanungod sini. (Job 14:21; 2 Cronica 32:33; Manugwali 9:5; Salmo 49:12, 20) Ang lamang nga butang nga makahimo sing kinatuhayan amo ang pagtigayon sang paglaum nga ginaaman sang Dios, nagapadungog sa iya, kag ginapadunggan man. Makita naton ini sa kabuhi sang duha ka magkatubotubo sang dumaan nga Israel.

8. Sa anong siod nahulog si Eli may kahilabtanan sa paghatag sing kadungganan?

⁸ Si Eli amo ang isa. Gin-alagad niya ang Dios sa pinasahi nga posisyon subong mataas nga saserdote sa sulod sang 40 ka tuig kag may pribilehiyo man sa paghukom sa Israel. (1 Samuel 1:3, 9; 4:18) Apang, nagpakita sia sang ulihi sing kaluyahon nahanungod sa iya mga anak nga sanday Ofni kag Finees. Bisan pa mga saserdote, gin-abusuhan nila ang ila katungdanan paagi sa pagkawat sang mga bahin sang mga halad kag paagi sa pagbuhat sing imoral nga sekso. Sang ang ginhimo sang ila amay amo ang pagsaway lamang sa ila, ang Dios nagsiling nga si Eli ‘nagpadungog sang iya mga anak nga lalaki nga labaw pa sa akon.’ Nanaad si Jehova nga padayunon ang pagkasaserdote ni Aaron, apang utdon niya ang panimalay ni Eli gikan sa katungdanan sang mataas nga pagkasaserdote. Ngaa? Ang Dios nagapaathag: “Ang mga nagapadungog sa akon padunggan ko, kag ang mga nagatamay sa akon tamayon.”—1 Samuel 2:12-17, 29-36; 3:12-14.

9. Paano ginhatagan si Samuel sing kahigayunan nga padunggan si Jehova?

⁹ Sa kabaliskaran yara si Samuel. Ayhan nahibal-an mo nga sang bata pa katama gindala sia sang iya mga ginikanan agod mag-alagad sa tabernakulo sang Silo. Sang isa ka gab-i nakighambal si Jehova sa bata. Malipay ka sa pagbasa sini nga kasaysayan sa 1 Samuel 3:1-14, nagahanduraw nga nakabugtaw ining bata nga lalaki, indi bangod sang nagadaguob nga gahod, kundi bangod sang mahinay nga tingog nga nasaypan niya nga iya sang tigulang nga si Eli. Nian hunahunaa kon daw ano ka makapulunaw para sa bata nga si Samuel ang pagsugid sa tigulang nga mataas nga saserdote tuhoy sa pamat-od sang Dios nga silutan ang panimalay ni Eli. Apang ginhimo ini ni Samuel; ginpadunggan niya ang Dios paagi sa pagkamatinumanon.—1 Samuel 3:18, 19.

10. Bilang sabat nga mapadunggan, paano ginpadunggan sang Dios si Samuel?

¹⁰ Ginpadunggan ni Samuel si Jehova sa sulod sang tinuig subong manalagna, kag ginpadunggan sia sang Dios. Talupangda ini sa 1 Samuel 7:7-13. Gilayon nga ginsabat ni Jehova ang pangamuyo ni Samuel nga nagapangayo sing bulig nga lupigon ang mga Filistinhon. Indi ka bala magabatyag sing kadungganan sa pagtigayon sinang balaan nga pagkilala? Sang wala pagtumana sang mga anak ni Samuel ang pagpanguna niya, wala sia pagsikwaya sang Dios subong sang pagsikway niya kay Eli. Amo sini bangod ginhimo ni Samuel ang tanan nga masarangan niya sa pagpadungog sa Dios. Dugang nga nagapakita sini, wala pag-ugyuni ni Samuel ang pangabay sang mga tawo para sa isa ka tawhanon nga hari. (1 Samuel 8:6, 7) Gingamit sang Dios si Samuel sa paghaplas kanday Saul kag David. Sang mapatay si Samuel, ginpadunggan sia sang Israel paagi sa paglalaw. Apang, sing labi pa ka importante, ginpadunggan sia sang Dios paagi sa pagsambit sa iya sa Biblia sa tunga sang mga tawo sang pagtuo nga pakamaayuhon sing pagkabanhaw kag sang maayong mga butang nga gintigana sang Dios para sa ila. (Salmo 99:6; Jeremias 15:1; Hebreo 11:6, 16, 32, 39, 40) Wala bala ini nagapakita nga ang pagpadungog sa “Dios sang paglaum” may daku nga balor?

Padunggan Mo Bala ang “Dios sang Paglaum”?

11, 12. Ano ang dapat naton binagbinagon nahanungod sa pagpadungog kay Jehova, kag ano ang isa ka paagi nga mahimo naton ina?

¹¹ Ang mga kaso nanday Jesus kag Samuel, sa paghatag sang duha lamang ka halimbawa sa Biblia, nagapakita nga mahimo sang mga tawo nga padunggan ang ila “Dios sang paglaum” subong ang pinakamataas nga prioridad sa kabuhi. Kag inang duha ka halimbawa nagapakita nga paagi sa paghimo naton sina nagakaigo nga matinguhaan naton kag matigayon ang kadungganan gikan sa Dios. Apang paano mo ini himuon upod ang makatarunganon nga pasalig nga pahamut-an mo ang Dios, padunggan niya, kag matigayon ang imo napasad sa Biblia nga paglaum?

¹² Ang isa ka paagi amo ang pagtigayon sing matuodtuod kag matinahuron nga kahadlok sa indi pagpahamuot sa Dios. (Malaquias 1:6) Ayhan gilayon kita nga magaugyon sa sina nga pinamulong. Apang, dumduma ang mga anak nga lalaki ni Eli. Kon pamangkuton mo sila kon bala luyag nila padunggan ang Dios paagi sa matinahuron nga pagkahadlok sa ila, mahimo nga magasiling sila sing huo. Ang problema amo ang kon paano iaplikar sa matag-adlaw nga pagkabuhi ang aton handum nga padunggan ang Dios paagi sa pagkahadlok sa iya.

13. Iilustrar kon paano ang handum nga padunggan ang Dios paagi sa pagkahadlok sa iya makabulig sa aton.

¹³ Kon ginaatubang sing makasululay nga sitwasyon diin mahimo kita makapangawat ukon makahimo sing seksuwal nga buhat nga indi mahibal-an sang tanan, maapektuhan bala ang aton mga buhat sang aton handum nga padunggan ang Dios? Dapat naton palambuon ang balatyagon, ‘Bisan pa nga ang sala magapabilin nga tago, ang paghimo ko sina nga sala indi pagpadungog sa “Dios sang paglaum” nga ang ngalan akon ginadala.’ Kag ang kamatuoran amo nga ang sala indi pirme magapabilin nga tago, kaangay sang mga sala nga ginhimo sang mga anak nga lalaki ni Eli. Ginpakita ini sang ginsiling ni Pablo nahanungod sa “matarong nga paghukom sang Dios”: “Sia magahatag sa tagsa ka tawo suno sa iya mga buhat: sa ila nga paagi sa pagpailob sa maayong mga buhat nagapangita sing himaya kag dungog kag pagkadimadinulunton, magahatag sia sing kabuhing walay katapusan; apang sa mga mabinahinbahinon kag wala nagatuman sang kamatuoran kundi nagatuman sang pagkadimatarong may kasingkal kag kaalipungot.”—Roma 2:5-8.

14. Ano ang isa pa ka paagi nga mapadunggan naton ang Dios, kag ano ang mahimo naton mapamangkot sa aton kaugalingon?

¹⁴ Sa pihak nga bahin, ginasambit ni Pablo ang pagpakigbahin sa “maayong mga buhat,” nga nagapadungog sa Dios kag nagaresulta sa “himaya kag dungog” gikan sa iya. Ang nahaunang sahi sini nga buhat sa karon amo ang ginsiling ni Jesus sa Mateo 28:19, 20: ‘Maghimo sing mga disipulo sa tanan nga kapungsoran, nagabawtismo sa ila kag nagatudlo sa ila sa pagtuman sang tanan nga butang nga ginsugo ko sa inyo.’ Sa bug-os nga duta, minilyon ka Saksi ni Jehova ang aktibo sa sining nagapadungog sa Dios nga hilikuton sa pagbantala kag pagpanudlo. Madamo ang nagapanikasog nga mangin bug-os tion nga mga ministro subong mga payunir, sing permanente man ukon sa panahon sang bakasyon gikan sa sekular nga palamugnan ukon eskwelahan. Nagadumdom sini, ang kada isa sa aton makabenepisyo sa pagbinagbinag kon paano sia nagatindog kon tuhoy sa sining buhat. Ayhan mapamangkot mo, halimbawa, ‘Ginapadunggan ko bala ang “Dios sang paglaum” paagi sa pagpakigbahin sing bug-os sa pagbantala nga hilikuton?’

15. Ano ang natabo sa iban nga mga Cristiano kon tuhoy sa pagpadungog kay Jehova paagi sa dayag nga minis­teryo?

¹⁵ Ang iban nga mga Cristiano nga sa sulod sang mga tinuig aktibo nga mga manugbantala amat-amat nga naghinay. Naayawan sila sa paghimo sing kis-a lang ukon dimasunson nga pagpakigbahin sa importante nga hilikuton sang paghimo sing disipulo. Wala namon ginatumod ang mga indibiduwal nga may limitasyon sa pisikal kag naghinay bangod sang mga epekto sang katigulangon. Luwas sa ila, nakita ang paghinay sa tunga sang mga Saksi nga lainlain sing edad. Sing makawiwili, wala ginapatuhuyan ni Pablo ang isa ka grupo sang edad sang ginpaandaman niya ang mga Cristiano bangod sa ‘pagpakaluya.’ Sa baylo, bisan ano man ang edad sang isa ka tawo, ang panguna nga bahin sang butang amo nga ang tayuyon nga pagpakigbahin sa ministeryo nagakinahanglan sing panikasog. Subong sang maathag nga natabo sang adlaw ni Pablo, ang iban sa karon nagapangatarungan, ‘Akon nahimo ang akon bahin sa sulod sang mga tinuig, gani sa karon ang mas bag-uhan nga mga Cristiano makapanikasog man.’—Galacia 6:9; Hebreo 12:3.

16. Ngaa makabenepisyo kita gikan sa pag-usisa sa aton kaugalingon nahanungod sini nga butang?

¹⁶ Ang mga naapektuhan sa sining paagi pat-od nga diutay lamang, apang ayhan mamangkot ka, ‘Ginabaton ko bala sing prangka ang amo sina nga huyog sa akon bahin? Kamusta ang akon pagpakigbahin sa ministeryo kon ipaanggid sang sa nagligad?’ May paghinay man ukon wala, dapat naton tanan dumdumon nga ang aton “Dios sang paglaum” nagasaad sa paghatag sing “himaya kag dungog kag paghidait sa tagsatagsa nga nagabuhat sing maayo.” (Roma 2:10) Si Pablo naggamit sing Griegong tinaga nga nagakahulugan sing “pagbuhat sing pila ka butang, pagpatubas, paghimo.” Daw ano ka nagakaigo nga likawan naton ang natabo sa mga Fariseo kag mga escriba, nga nagpadungog lamang sa Dios paagi sa bibig! (Marcos 7:6; Bugna 2:10) Busa, kon halin sa tagipusuon nga nagapakigbahin kita sing aktibo sa dayag nga ministeryo, ginapalig-on naton sa aton kaugalingon kag sa iban nga ang aton ginahimo may matuod nga paglaum. Ginapadunggan naton ang aton Manunuga kag Manughatag sing kabuhi. Kag malinya kita sa padunggan niya, sa karon kag sa walay katapusan.—Lucas 10:1, 2, 17-20.

Paagi sa Aton mga Pagkabutang

17, 18. Ano ang isa pa ka paagi nga mapadunggan naton ang Dios, kag ngaa ang pagpang-alag-ag sa paghimo sini indi makatarunganon?

¹⁷ Tuhoy sa isa pa ka paagi diin mapadunggan naton ang aton “Dios sang paglaum,” ang Hulubaton 3:9 nagasiling: “Padunggi si Jehova paagi sa imo mga pagkabutang kag sang nahauna nga mga bunga sang tanan mo nga patubas.” Ginabadbad ni Spur­rell ini nga bersikulo: “Himayaa si Jehova paagi sa imo manggad, kag sang pinakamaayo sang imo tanan nga pag-uswag.”—A Translation of the Old Testament Scriptures from the Original Hebrew.

¹⁸ Bangod kay ang nanuhaytuhay nga mga klerigo nangin kilala bangod sang ila sobra nga kakagud kag maluho nga estilo sang kabuhi, madamong indibiduwal ang nagapangalag-ag sa pagpadungog sa mga iglesia kag relihiosong mga organisasyon nga ang tuyo maathag nga amo lamang ang pagtigayon sing manggad. (Bugna 18:4-8) Apang, ina nga mga abuso wala nagabalhin sang pagkamaminatud-on sang Hulubaton 3:9. Nahisanto sa sinang inspirado nga laygay, paano naton magamit ang aton “mga pagkabutang” sa “pagpadungog kay Jehova,” ang aton “Dios sang paglaum”?

19. Iilustrar kon paano gin-aplikar sang iban ang Hulubaton 3:9?

¹⁹ Nasapwan sang mga Saksi ni Jehova nga ang madamo pa nga tawo nga nagasabat sa mensahe sang Ginharian nagakinahanglan sing pagpasangkad sang mga King­dom Hall ukon pagpatindog sing mga bag-o. Yari diri, nian, ang isa ka paagi sa ‘paghimaya kay Jehova paagi sa aton manggad.’ Ang mga batan-on kag mga tigulang nakigbahin sa paghimo sini, subong sang personal nga pamat-od nga mag-amot sa mga pundo sa pagpatindog. Agod matuman inang sekreto nga pamat-od nagakinahanglan ini sing personal nga disiplina ukon sing pila ka sakripisyo, labi na kon ang pagplano kag pagtapos sa isa ka proyekto sang tinukod nagadugay sing malawig nga dag-on sang tion. (2 Corinto 9:6, 7) Apang, ang paggamit sang mga pundo sa sining paagi tunay nga nagapadungog kay Jehova, kay ang mga King­dom Hall amo ang mga lugar diin ang mga Cristiano nagasimba sa iya kag diin sila kag ang ila mga kaupdanan nagakuha sing ihibalo nahanungod sa Dios. Ang pinamulong ni Jesus sa Mateo 6:3, 4 nagahatag sa aton sing maayong rason sa pagsalig nga padunggan sang Dios ang mga nagapadungog man sa iya.

20. (a) Ngaa nagakaigo ang pag-usisa sa kaugalingon sa pag-aplikar sang Hulubaton 3:9? (b) Anong mga pamangkot ang mahimo naton mapamangkot sa aton kaugalingon?

²⁰ Apang, mag-andam: Ang mga Fariseo kag mga escriba, nga siling ni Jesus wala nagabutang nga una sang pagpadungog sa Dios, nagsiguro nga sila amo ang una nga makabenepisyo gikan sa ila manggad. Gani ang laygay sa Mateo 15:4-8 nagarekomendar nga usisaon naton ang aton kaugalingon tuhoy sa ‘pagpadungog kay Jehova paagi sa aton mga pagkabutang.’ (Jeremias 17:9, 10) Halimbawa, ang Cristiano nga nagmanggaranon paagi sa iya negosyo mahimo mangatarungan sa pagtrabaho pirme sing bug-os tion agod makasupot sing dugang pa. Ayhan mangatarungan sia, ‘Ang iban nagasulod sa payunir nga ministeryo ukon nagasaylo sa pag-alagad kon diin ang mga manugbantala labi nga kinahanglanon, apang ang akon pinasahi nga paagi sa pag-alagad sa Dios amo ang pagsupot sing dugang pa kag nian agod may daku nga maamot.’ Ayhan daku ang mahimo sang iya mga amot. Apang maayo nga magapamangkot sia, ‘Ang akon personal bala nga estilo sang kabuhi nagapakita nga ang paggasto sang kuarta sa pagpadungog sa Dios amo ang akon nahauna nga motibo sa pagsupot sing dugang pa gid?’ (Lucas 12:16-19; ipaanggid ang Marcos 12:41-44.) Kag, ‘Mahimus ko bala ang akon mga hilikuton agod personal nga makapakigbahin sing daku pa sa labing importante nga hilikuton sa aton adlaw—nga nagabantala sang maayong balita?’ Sa pagkamatuod, bisan ano man ang aton kahimtangan sa kabuhi, mausisa naton ang aton mga motibo kag mga buhat kag makapamangkot, ‘Paano ko labi nga mapadunggan sing bug-os ang akon Manughatag sing kabuhi kag “Dios sang paglaum”?’

21. Ano ang palaabuton naton kon ginapadunggan naton si Jehova karon?

²¹ Indi kita pagpaslawon ni Jehova. Daw ano katahom nga paglaum nga ayhan masiling niya sa karon kag padayon sa ulihi, sa aton ang ginsiling niya anay sa matutom nga Israel: “Tungod nga bilidhon ka sa akon panulok, kag dungganon, kag ginhigugma ko ikaw”! (Isaias 43:4) Nagasaad man Sia sing “kabuhi nga walay katapusan sa mga nagapangita sing himaya kag dungog.” Ginapatuhoy niya ini nga saad sa mga nagabatas sa “maayong buhat.” Isa gid sia ka “Dios sang paglaum”!

Paano Mo Sabton?

◻ Tuhoy sa mga tawo nga nagapadungog kay Jehova, ano ang maton-an naton gikan sa halimbawa ni Jesus?

◻ Paano magkatuhay si Eli kag si Samuel nahanungod sa pagpadungog sa Dios?

◻ Ano ang pila ka paagi nga sarang mo mapauswag ang kadungganan nga ginahatag mo sa Dios, kag ano nga sabat ang mahimo nga mabaton mo?

◻ Ano nga palaabuton ang nagahulat sa mga nagauna sa pagpadungog sa aton “Dios sang paglaum”?

[Kahon sa pahina 20]

Mga Sulat Nahanungod sa mga Amot

Yari ang iban sa mga ginbalikwat gikan sa mga sulat nga nabaton sang opisina sang Watch Tow­er So­cie­ty sa Brook­lyn, Nueva York:

“Ang akon ngalan amo si Abijah. Nuebe anyos ako. Ginahatag ko ang $4 para sa mga kauturan nga nagapangabudlay sa mga King­dom Hall. Magamit nila ini sa pagbakal sing kahoy ukon sing dulse, sila na ang bahala.”—Oregon.

‘Makita ninyo nga nalakip ang akon personal nga tseke. Lampas na sa 96 anyos ang akon edad kag mapigaw sing palamatin-an, apang nalipay gid ako sa pagsupot sang akon kuarta para sa sini. Huo, nahibaluan ko, nagagamit ako sing segunda mano nga awto, kag wala ako nagakadto kon tigtulugnaw sa Florida ukon California. Diutay lang ang akon mahimo sa pagdala sang maayong balita sang Ginharian nga ginabantala paagi sa pagpanuktok sa mga ganhaan. Apang paagi sa pagsupot sang akon kuarta kag sa pagpadala sang iban sa inyo, nagabatyag ako nga sa gihapon nagapakigbahin ako sa sini.’—Ohio.

‘Salamat sa inyo bangod sang tanan nga ginhimo ninyo para sa King­dom Hall. Ini nga kuarta [$5] magabulig sa inyo sa mga libro kag sa Ang Lalantawan para basahon namon. Ang kuarta naghalin sa akon alkansiya. Salamat sa School brosyur nga nagasugid sa amon nahanungod sa mga druga.’

“Makita ninyo nga nalakip ang isa ka tseke. Ang duha ka gatos ka dolyar sini para sa Pundo sa Pagpatindog sang King­dom Hall. Ang nabilin pagagamiton sa bisan ano nga nakita ninyo nga nagakabagay agod pauswagon ang pagbantala nga hilikuton.”—Missouri.