Kon Paano ang Bawtismo Makaluwas sa Aton

“Ang bawtismo . . . nagaluwas sa aton.”​—⁠1 PEDRO 3:​21, The Emphatic Diaglott.

1, 2. Ano bala ang kinahanglan sa wala pa ang isa magpabawtismo sa tubig?

SI Jehova may espesipiko nga mga kinahanglanon para sa mga nagapangita sing kaluwasan. Dapat sila magkuha sing sibu nga ihibalo, magtuo, maghinulsol sa ila mga sala, makombertir, maghimo sing dedikasyon sa Dios, kag magpabawtismo subong mga matinuohon. (Juan 3:​16; 17:​3; Binuhatan 3:​19; 18:8) Ang mga kandidato sa bawtismo dapat magkilala nga sa sadsaran sang halad ni Jesus ginhinulsulan nila ang ila mga sala kag nagdedikar sang ila kaugalingon kay Jehova. Dapat man nila hangpon nga ang dedikasyon kag bawtismo nagapakilala sa ila subong mga Saksi ni Jehova.

² Ang bug-os nga kahimusan sa bawtismo, lakip ining dayag nga ekspresyon sang pagtuo, kinahanglanon para sa kaluwasan. (Roma 10:10) Ginlig-on ini sang si apostol Pedro nagsulat: “Ang bawtismo . . . nagaluwas sa aton.” (1 Pedro 3:​21, ED) Apang paano gid bala naton dapat hangpon ining mga pulong? Ano bala ang ginapakita sang konteksto?

Kon Paano Nagaluwas ang Bawtismo

3. Sa imo kaugalingon nga mga tinaga, paano mo isumaryo ang 1 Pedro 3:​18-21?

³ Ginpakita ni Pedro nga subong ginbanhaw nga espiritu, si Jesus nagbantala sing nagatagudili nga mensahe sa malaut nga mga espiritu sa bilanggoan, mga demonyo nga natigana sa dayon nga pagkabilanggo para sa paghukom sa dakung adlaw ni Jehova. Naglapas sila paagi sa pagmateryalisar sa undanon nga mga lawas kag pagpangasawa sa mga babayi “sang naghulat sang pagpailob sang Dios sa mga adlaw ni Noe, sang ginaaman ang arka, diin pila lamang ka tawo, kon sayuron, walo ka kalag [si Noe, ang iya asawa, ang iya mga anak nga lalaki, kag ang ila mga asawa], ang naluwas sa tubig.” Si Pedro nagdugang: “Nga kaangay sini karon nagaluwas sa inyo, nga amo, ang bawtismo, (indi [lamang kinahanglanon] subong nga pagkuha sang higko sang unod, kundi subong nga pakiluoy sa Dios tungod sa matinlo nga konsiensia,) paagi sa pagkabanhaw ni Jesucristo.”​—⁠1 Pedro 3:​18-21; Genesis 6:​1, 2; 2 Pedro 2:​4; 2 Corinto 7:⁠1.

4. Ano ang ginapatuhuyan ni Pedro sang magsiling sia, “Nga kaangay sini”?

⁴ Ano bala ang buot silingon ni Pedro sang magsiling sia, “Nga kaangay sini”? Buot niya silingon nga ang bawtismo napasad sa pagtuo nga kaangay sa pag-amlig kay Noe kag sa iya panimalay, nga naluwas sa anaw nga naglaglag sadtong yara sa guwa sang arka. Subong nga si Noe nagkinahanglan sing pagtuo sa pagtukod sang arka, ang tanan nga nangin bawtismado nga mga disipulo ni Jesucristo kag mga saksi ni Jehova dapat may pagtuo agod mabatas ang mga pag-ipit batok sa ila sining walay pagtuo nga kalibutan kag sang dios sini, si Satanas nga Yawa.​—⁠Hebreo 11:​6, 7; 1 Juan 5:⁠19.

5. Paano nga ang kaluwasan “paagi sa pagkabanhaw ni Jesucristo”?

⁵ Ang bawtismo mismo indi amo ang nagaluwas. Kag bisan pa dapat naton ‘kuhaon ang higko sang unod,’ ina lamang indi makaluwas sa aton. Sa baylo, ang kaluwasan amo ang “paagi sa pagkabanhaw ni Jesucristo.” Ang mga kandidato sa bawtismo dapat may pagtuo nga ang kaluwasan posible lamang bangod ang Anak sang Dios napatay sa mahalaron nga kamatayon kag ginbanhaw. Dapat man nila batunon si Jesus subong ang ila Ginuo nga may awtoridad sa paghukom sa buhi kag sa patay. “Yara sia sa tuo sang Dios,” siling ni Pedro, “nga nagkadto sa langit; kag ang mga anghel kag mga awtoridad kag mga kagamhanan napasakop sa iya.”​—⁠1 Pedro 3:⁠22.

6. Agod matigayon ang maayong konsiensia, ano ang dapat nga ginhimo sang kandidato sa bawtismo?

⁶ Ginbuylog man ni Pedro ang bawtismo upod sa “pakiluoy sa Dios tungod sa matinlo nga konsiensia.” Agod matigayon ang matinlo nga konsiensia, ang kandidato sa bawtismo dapat maghinulsol sa iya mga sala, magtalikod gikan sa sayop nga dalanon, kag maghimo sing bug-os nga dedikasyon kay Jehova nga Dios sa pangamuyo paagi kay Jesucristo. Kon ginahuptan sang isa ka bawtismado nga tawo inang maayong konsiensia paagi sa pagpahisuno sa mga talaksan sang Dios, nagapabilin sia sa isa ka naluwas nga kahimtangan nga wala nagakinahanglan sing nagatagudili nga paghukom ni Jehova.

Pagkalipikar Para sa Bawtismo

7. Tuhoy sa bawtismo, ano ang ginhimo sang mga misyonero sang Cristiandad?

⁷ Sang ginsugo ni Jesus ang iya mga sumulunod nga magbawtismo sing mga disipulo, wala niya sila pagsugoa nga wisikan ang mga dimatinuohon sing linibolibo. Apang ano bala ang ginhimo sang mga misyonero sang Cristiandad? Nahanungod sa India, ang Jesuita nga si Francis Xavier nagsulat sang 1545: “Sa ginharian sang Travancore . . . sa kalawigon nga pila ka bulan nabawtismuhan ko ang kapin sa napulo ka libo ka lalaki, babayi, kag kabataan. . . . Nagkadto ako sa mga minuro kag naghimo sa ila nga mga Cristiano.” Indi amo sina ang paagi ni Jesus sa ‘paghimo sing mga Cristiano.’ Ang mga tawo dapat makalipikar para sa bawtismo.

8. Ano ang ginasiling sang ginatawag nga kanon kuno ni Pablo nahanungod sadtong nagpresentar sang ila kaugalingon para sa bawtismo?

⁸ Bisan ang pila sa nagaangkon nga mga Cristiano sang pagkatapos sang mga apostoles nga panag-on nagpati nga yadtong nagpresentar sang ila kaugalingon para sa bawtismo dapat nakasugata sang estrikto nga mga kinahanglanon. Nahanungod sa mga kandidato sa bawtismo, ang di-Biblikanhon nga mga kanon, nga ginkunokuno sing sayop nga ginsulat ni Pablo, nagasiling: “Usisaa ang ila mga batasan kag ang ila kabuhi . . . Kon sila diminyo, indi sila pagtudlui sa paghimo sing pakighilawas, kundi sa pagminyo sing legal. . . . Kon magkari ang isa ka bigaon, ipabiya sa iya ang pagkasalamwanan, kay kon indi sikwaya sia. Kon magkari ang isa ka manughimo sing mga idolo, ipabiya sa iya ang iya palamugnan, ukon sikwaya sia. . . . Sia nga nakasala indi paghingadlan, . . . madyikero, manugbabaylan, astrologo, diwatahan, mahughiwit, . . . isa nga nagahimo sing mga anting-angting, salamangkero, manugtagna, manugpakot, manughimalad . . . , tilawi sila sa pila ka tion . . . kag kon bayaan nila inang mga buhat, batona sila; apang kon indi sila mag-ugyon sa sina, sikwaya sila.”

9. Ngaa ang mga gulang sang kongregasyon nagapakigsugilanon sa isa nga maluyag magpabawtismo?

⁹ Wala ginasunod sang mga Saksi ni Jehova ang dimakasulatanhon nga mga sinulatan, kaangay sang bag-o lang ginbalikwat, apang ang mga gulang nagapakigsugilanon sa mga maluyag magpabawtismo. Ngaa? Agod pat-uron nga ini sila mga matinuohon nga nakasugata sang balaan nga mga kinahanglanon kag nga nakahimo sing dedikasyon kay Jehova. (Binuhatan 4:​4; 18:​8; 2 Tesalonica 3:2) Ang paghinun-anon sa mga pamangkot sa libro nga Organisado sa Pagtuman sang Aton Ministeryo nagabulig sa pagpat-od kon bala ang isa kalipikado para sa bawtismo. Kon ang pila ka punto indi maathag sa iya, ukon wala niya mapahisanto ang iya kabuhi sa balaan nga mga talaksan, ang mga gulang nalipay sa paghatag sing espirituwal nga bulig.

10. Kon luyag naton magpabawtismo, ano dapat ang panimuot naton?

¹⁰ Kon ginaapresyar naton ang kalulo sang Dios sa pagbulig sa aton sa paghibalo nahanungod sa iya mga katuyuan, mangin kaangay kita sang mga tawo nga ginbantalaan ni Pablo sa Antioquia, Asia Minor. Walay sapayan sang Judiyong pagpamatok, “sang pagkabati sa mga pungsod [mga Gentil] [sang kahigayunan nga batunon sang Dios], nagkasadya sila kag ginhimaya ang pulong ni Jehova, kag ang tanan nga gintangdoan sa kabuhing walay katapusan nagtuo.” (Binuhatan 13:48) Ang mga nagtuo ginbawtismuhan.

Bawtismo sa Pamatan-on

11. Nagakaigo bala ang maghimo sing dedikasyon sa Dios subong isa ka lamharon, kag ngaa amo sina ang imo sabat?

¹¹ Yadtong “gintangdoan sa kabuhing walay katapusan” nagalakip sa mga pamatan-on. Matalupangdan nga bisan pa si Samuel kag si Juan Bautista gindebotar sa Dios sa wala pa mabun-ag, ang mga ginikanan indi makahimo sing dedikasyon para sa ila kabataan. (1 Samuel 1:​11, 24-28; 2:​11, 18, 19; Lucas 1:​15, 66) Apang subong resulta sang maayong paghanas sa Biblia, madamong pamatan-on ang nag-uswag tubtob sa bawtismo. Ang isa ka misyonero nga utod nga babayi nga ginbawtismuhan sang tin-edyer pa nagsulat: “Daw subong bala nga gindedikar ako nga mag-alagad sa akon Manunuga kutob sa edad gid nga narealisar ko nga nagaluntad sia, apang paagi sa pagtigayon sing sibu nga ihibalo nahanungod sa iya kag sa iya mga katuyuan, luyag ko magpabawtismo bilang naguwa nga pamatuod sa sinang katunayan. Apang, nagpangduhaduha si Nanay nga nahibaluan ko ang ginahimo ko, gani nagpanugda sia nga maghulat ako tubtob may iban pa nga handa magpabawtismo.” Nakita ang isa ka babayi nga maluyag magpabawtismo, kag ang utod nga babayi nagadugang: “Wala sing mga klase sang pinasahi nga pagtudlo para sa mga kandidato sadto anay, bisan pa nga ang gintangdo sang Sosiedad nga Ser­vice Director . . . nakigsugilanon sa akon sing malulo nahanungod sa pagkaserioso sang tikang nga himuon ko. Malangkagon nga nag-ugyon ako sa tanan nga kondisyon nga ginhatag, kag sa isa ka matahom nga Domingo sang aga sang Mayo 1921 [ang babayi] kag ako ginbawtismuhan.”

12. Paano gintamod ni Utod Russell ang dedikasyon sang isa ka menor?

¹² Sang 1914, si C. T. Russell (presidente anay sang Watch Tower Society) nakabaton sing sulat diin ang isa ka masigka Cristiano namangkot kon bala ang iya 12-anyos nga anak nga lalaki dapat palig-unon nga maghimo sing dedikasyon sa Dios. “Kon ako sa imo,” sabat ni Russell, “indi ko pag-ipilit sa iya ang konsagrasyon [dedikasyon], apang huptan ko ini sa iya hunahuna subong ang lamang nagakaigo nga dalanon para sa tanan intelihente nga mga tawo nga nakatigayon sing ihibalo tuhoy sa Dios kag sa iya mahimayaon nga mga katuyuan . . . Kon wala ang konsagrasyon wala gid sing makatigayon sing kabuhi nga walay katapusan . . . Ang imo anak indi mahalitan paagi sa konsagrasyon, apang mahimo nga mabuligan sing daku. . . . Sin-o ang makasiling nga ang dies anyos nga bata indi makaapresyar sing bug-os kag sing talangkod sang lubos nga konsagrasyon sa panghunahuna kag hambal kag buhat? Makita ko nga ang akon lubos nga konsagrasyon ginhimo primero sing abanse diutay​—⁠ubos sa dose anyos ang edad.”

13. Ano ang ginasiling sining magasin sa mga pamatan-on sang nagligad nga mga 94 ka tuig?

¹³ Ang Zion’s Watch Tower sang Hulyo 1, 1894, nagsiling: “Sa tanan nga mahal nga mga kabataan kag mga pamatan-on nga nagtugyan sang ila tagipusuon sa Dios kag nagapanikasog sa adlaw-adlaw sa pag-ilog kay Jesus, ang WATCH TOWER nagapadala sang iya panamyaw. Kilala namon ang iban sang mga bata pa kaayo nga nagahigugma kay Jesus, kag wala mahuya sa pagtindog tungod kay Jesus sa tunga sang iban nga mga kabataan nga wala nagahigugma sa iya ukon nagatinguha sa pagpahamuot sa iya; kag nga maisog kag matutom sa Dios, bisan pa nga ginakadlawan kag ginakabig nga iban sang ila mga kabutho nga sa ila ginabantala nila ang maayong balita sang ginharian. Kag nalipay kami nga makita ang iban nga pamatan-on, nga maisog nga nagsikway sang kalibutan kag sang mga ambisyon kag mga pag-ipit sini, sa tunga sang labing matutom sadtong [nagdedikar] sang ila kabuhi sa Ginuo. Ang iban sang amon mga kabulig sa opisina, subong man ang madamo sang madinalag-on nga mga colporteur, mga bata pa gihapon sa edad.” Bisan bata ka pa, ngaa indi ipakighambal sa imo mga ginikanan ang nahanungod sa dedikasyon kay Jehova nga Dios?

Ang Katungdanan sang mga Ginikanan

14. Anong mga benepisyo ang natigayon sang mga pamatan-on nga naghimo sing dedikasyon kay Jehova?

¹⁴ Binagbinaga ang mga benepisyo nga natigayon sang mga kabataan nga nakatigayon sing panuytoy sang mga ginikanan nga nagadul-ong tubtob sa bawtismo. (Efeso 6:4) Ang paghunahuna sa espirituwal nga mga butang nagabulig sa ila sa paglikaw sa kalibutanon nga mga siod kag mga pagsulay. (1 Juan 2:​15-17) Wala sila mag-ani sing mapait nga alanyon nga nagaresulta gikan sa ‘pagsab-ug sa unod.’ (Galacia 6:​7, 8) Sanglit gintudluan sila sa pagkabuhi sing diosnon nga kabuhi, ginapasundayag nila ang mga bunga sang espiritu sang Dios. (Galacia 5:​22, 23) Subong dedikado sa Dios, natigayon nila ang suod nga kaangtanan upod sa iya. Kag bangod naton-an nila ang “magsalig kay Jehova,” ginatuytuyan sila sang langit­non nga kaalam kag nagalakat sa mga paagi sang kalipay kag paghidait.​—⁠Hulubaton 3:​5, 6, 13, 17.

15. Ano ang himuon sang mga ginikanan agod madihon ang kabuhi sang ila mga kabataan?

¹⁵ Sanglit ang dedikasyon kay Jehova mapuslanon katama sa mga pamatan-on, dapat himuon sang Cristianong mga ginikanan ang tanan nga masarangan nila sa pagdihon sa kabuhi sang ila mga kabataan. Kaangay kay Timoteo, ang mga kabataan sarang matudluan sang Kasulatan kutob sa pagkalapsag agod nga sila ‘magapadayon sa mga butang nga naton-an nila kag nahaylo nga patihan.’ (2 Timoteo 3:​14, 15) Sarang mapalibutan sang diosnon nga mga ginikanan ang ila kabataan sang impluensia sang ila kaugalingon huwaran nga pagkabuhi, nagapaambit sa ila mga kabataan sang ihibalo nga subong sang mahatag sang ila mismo kaangtanan upod sa Dios, eksperiensia, kag hamtong nga desisyon. Kon gintuytuyan sing nagakaigo, ining mga panikasog indi malipatan sang mga kabataan.​—⁠Hulubaton 22:⁠6.

16. Ano dapat ang makita sang imo mga kabataan sa imo huwaran kag panudlo?

¹⁶ Paagi sa huwaran kag panudlo, buligi ang inyo kabataan sa paghangop kon daw ano kaathag nga ginkurit ang linya sa ulot sang organisasyon ni Jehova kag sang iya ni Satanas. Ipakita sa ila nga indi mahimo nga magkompromiso upod sining kalibutan, nga dapat sikwayon sang mga Cristiano ang iya malimbungon nga mga buhat, didiosnon nga mga kalipayan, mga ambisyon, kag mga pagpakig-upod. (1 Corinto 15:​33; 2 Corinto 4:2) Paagi sa inyo panimuot, subong man sang inyo panudlo kag halimbawa, ipakita sa inyo kabataan kon daw ano ka walay pulos ang mga kalipayan sang kalibutan, kon daw ano kabuang ang katawhan sang kalibutan kon ipaanggid sa mga Saksi ni Jehova. Ipaathag kon paano kamo gintuytuyan sang Dios paagi sa iya balaan nga espiritu, ginpunggan kamo sa pagkadto sa banas nga nagapadulong sa kasisit-an, ginsakdag kamo sa panahon sang kasisit-an kag kasubo. Indi gid magsala sa paghunahuna nga kon ang imo mga kabataan gintugutan sa pagdalagan sa kalibutanon nga mga banas sang bugal, ambisyon, pagpatuyang, kag kabuang, sila mangin mga matinuohon. Sa wala pa masiod sining kalibutan ang inyo mga kabataan, amligi sila gikan sa malaut nga mga impluensia sini kag buligi sila sa pagsentro sang ila mga pagpalangga kag mga paglaum kay Jehova.

Pagtan-aw Pagkatapos sang Bawtismo

17. (a) Ngaa bala ang iban sang bawtismado nga mga Cristiano nagluya sa espirituwal? (b) Paano naton dapat tamdon ang aton dedikasyon?

¹⁷ Bata man ukon tigulang, walay duhaduha nga ang kandidato sa bawtismo maluyag nga magpabilin nga matutom kay Jehova. Gani ngaa ang iban sang bawtismado nga mga Cristiano nakaeksperiensia sing espirituwal nga pagluya? Bisan pa nga ang nanuhaytuhay nga mga rason mahimo nga nadalahig, may isa ka sadsaran nga kabangdanan​—⁠ang kapaslawan sa paghangop sa kahulugan sang dedikasyon. Indi ini isa ka butang sang pagdedikar sang aton kaugalingon sa isa ka buluhaton. Mahimo ini nga maghimo sa aton nga masako apang indi maghimo sa aton nga espirituwal nga mga tawo. Dapat naton dumdumon nga nagdedikar kita indi sa isa ka buluhaton kundi sa isa ka Persona​—⁠kay Jehova nga Dios. Nagabulig ini sa aton sa paglikaw sa sayop nga tamdon ang aton dedikasyon subong isa ka mekanikal nga tikang nga himuon naton antes masugdan ang hilikuton. Ang paghimo sing dedikasyon dapat tamdon subong pagsulod sa importante nga kaangtanan nga dapat pirme amligan kag huptan. Nahanungod sini, si Jesucristo ang halimbawa naton. Nagapabutyag sang iya tinagipusuon nga panimuot sang ginpresentar ang iya kaugalingon kay Jehova amo ang matagnaon nga mga pulong: “Nagakari ako . . . Sa paghimo sang imo kabubut-on, O Dios ko, nagakalipay ako, kag ang imo kasuguan yari sa sulod sang akon tagipusuon.”​—⁠Salmo 40:​6-8; Hebreo 10:​5-10.

18. Paano nga ang kasuguan sang Dios yara sa sulod sang “tagipusuon” ni Jesus?

¹⁸ Paano bala nga ang kasuguan ni Jehova yara sa sulod sang “tagipusuon” ni Jesus? Ginsilingan niya ang Judiyong escriba nga si Jehova nga Dios naton isa kag wala na sing iban, busa nagapadaku sang pagkasupremo ni Jehova. Nian ginpakita ni Jesus nga ang kahulugan sang kasuguan sang Dios nagalakip sang paghigugma kay Jehova upod ang aton bug-os nga tagipusuon, paghangop, kag kusog, samtang ginahigugma ang aton isigkatawo subong sang aton kaugalingon. (Marcos 12:​28-34) Amo sina ang sadsaran nga rason kon ngaa si Jesus nakasiling, ‘nagakalipay ako sa paghimo sang kabubut-on sang Dios.’ Nagpabilin sia sa iya dalanon sing matutom walay sapayan sang labing dalagku nga mga pagtilaw kag mga pag-antos, indi lamang bangod nakita niya ini subong isa ka maayong buhat kundi bangod may yara sia suod nga kaangtanan kay Jehova nga Dios. Kon ginakilala man naton ang pagkasupremo ni Jehova kag ginahigugma sia upod ang dimabugto nga kasuod, magapahisuno kita sa aton dedikasyon kag bawtismo.

19. Ano ang labot sa ulot sang aton kaangtanan kay Jehova kag sa buluhaton nga ginahimo naton?

¹⁹ Sa pagkamatuod, may yara kaangtanan sa ulot sang aton kaangtanan sa Dios kag sa buluhaton nga ginahimo naton. Ginapadayag naton ang gugma kay Jehova paagi sa paghimo sang hilikuton nga pagbantala sang Ginharian. Sa sining bahin, si anhing Grant Suiter, isa anay ka katapo sang Nagadumala nga Hubon sang mga Saksi ni Jehova, nagsulat: “Samtang ginapamatian ko [ang isa ka nagalakbay nga manugtatap] nga nagahambal nahanungod sa mga pribilehiyo sa pag-alagad kay Jehova kag sa responsabilidad sa paghimo sini, narealisar ko kon ano ang dapat ko himuon kag kon ano ang luyag ko himuon. Busa naghimo ako sing personal nga dedikasyon kay Jehova, kag sa amo man nga tion ginhimo man ina sang iban nga katapo sang akon panimalay. Sang Oktubre 10, 1926, sa San Jose, California, kami tanan dulungan nga nagsimbulo sang amon dedikasyon kay Jehova nga Dios paagi sa pagpatugmaw sa tubig. . . . Pagkatapos sang bawtismo . . . ang akon amay nagsiling sa gulang nga nagadumala sa bawtismo: ‘Nagaguwa kamo nga dala ang literatura, indi bala? Luyag man namon himuon ina nga buluhaton karon.’ Gani ang amon panimalay nagsugod sa pag-alagad sa latagon.” Sa karon, ang kalipikado nga mga tawo nagasugod sa pagpakigbahin sing serioso sa pag-alagad sa latagon sa wala pa mabawtismuhan.

Ang Bawtismo Makaluwas sa Aton

20, 21. (a) Sa anong mga paagi ‘gintandaan’ ang mga ulipon ni Jehova? (b) Ano ining “tanda,” kag ano ang kahulugan sang pagtigayon sini?

²⁰ Paagi sa aton mga binuhatan, sarang naton mapakita nga “kita iya ni Jehova.” Ti, ang kaluwasan nasandig sa pagpangabudlay sing matutom subong iya dedikado nga mga ulipon! (Roma 6:​20-23; 14:​7, 8) Sadtong dumaan nga panahon, ang mga ulipon masami nga ginatandaan sa agtang. Paagi sa pagbantala nga hilikuton karon, ang antitipiko nga ‘lalaki nga napanaptan sing lino’​—⁠ang nagkalabilin sang hinaplas nga mga sumulunod ni Jesus​—⁠‘nagatanda’ sadtong makalampuwas sa katapusan sining sistema. Sa sining buluhaton ang hinaplas ginabuligan sang ila mga kaupod, ang “iban nga mga karnero.” (Ezequiel 9:​1-7; Juan 10:16) Kag ano bala ang “tanda”? Amo ini ang pamatuod nga kita dedikado kay Jehova kag mga bawtismado nga disipulo ni Jesus nga may katulad-Cristo nga personalidad.

²¹ Importante ini labi na karon nga kita may “tanda” kag huptan ini, kay madugay na kita sa “tion sang katapusan.” (Daniel 12:4) Agod maluwas dapat kita ‘magbatas tubtob sa katapusan’ sang aton karon nga kabuhi ukon sining sistema. (Mateo 24:13) Kon magpabilin lamang kita nga matutom subong mga saksi ni Jehova nga ang bawtismo makaluwas sa aton.

Mga Pamangkot sa Repaso

◻ Agod maluwas, ano ang ginakinahanglan sa aton?

◻ Ngaa ginasugilanon sang mga gulang ang mga maluyag magpabawtismo?

◻ Ano ang himuon sang mga ginikanan agod hatagan ang ila mga kabataan sing espirituwal nga panuytoy nga nagadul-ong tubtob sa bawtismo?

◻ Nagahimo bala kita sing dedikasyon sa isa ka buluhaton?

◻ Paano ang bawtismo nagaluwas sa aton?

[Piktyur sa pahina 16]

Nahibaluan mo bala kon paano ang bawtismo katumbas sa pag-amlig kay Noe kag sa iya panimalay sa arka?

[Piktyur sa pahina 18]

Ang dedikasyon kag bawtismo nagabenepisyo sa mga pamatan-on. Nahibaluan mo bala kon paano?