Ang Dakung Pintor—Si Jehova!

“ANG mga pintor nagadrowing sing dimaisip nga mga pagbutlak sang adlaw kag mga pagtunod sang adlaw, kag ang ila mga binuhatan ginabaligya sing ginatos, ukon linibo pa, ka dolyar. Apang, si Jehova nga Dios, ang Dakung Pintor kag Ginhalinan sang mga pagbutlak sang adlaw kag mga pagtunod sang adlaw, nagahatag sa aton sing isa sa tagsa ka adlaw​—⁠sing walay bayad. Ang mga orihinal labaw gid katama sa mga kopya. Indi bala ini dapat maghatag sa aton sing rason nga apresyahon sia subong ang Manunuga?” Amo sina ang pangatarungan sang isa ka nagalakbay nga manugtatap sang mga Saksi ni Jehova sa Hawaii sa isa sang iya mga pamulongpulong sa kongregasyon.

Ang isa ka ateista nga babayi, nagduaw sa nahauna nga tion sa Kingdom Hall, nagtambong. Gintandaan niya ang pangatarungan sang ministro, apang ang mabaskog nga pangduhaduha nahanungod sa pagluntad sang Dios yara gihapon. Walay sapayan, samtang nagapauli sia halin sa obra sang halos duha ka tuig sang ulihi, naabtan sia sing trapiko sa masako nga oras. Naghimo ini sa iya nga matalupangdan ang matahom tan-awon nga pagtunod sang adlaw. Ang iya pensar nagbalik sa pamulongpulong sadtong nagalakbay nga manugtatap.

Sugilanon niya: “Sa baylo nga maugot bangod nga naabtan sang trapiko, natalupangdan ko ang matahom nga pagtunod sang adlaw, kag nagpahanumdom ini sa akon sang ginsiling sang humalahambal nahanungod sa pag-apresyar kay Jehova nga Dios subong Pintor kag Manunuga. Nagpahunahuna ini sa akon, ‘Ayhan matuod ang ginsiling niya; mahimo gid nga may Manunuga.’ Ginhunahuna ko ini samtang nagapauli ako, kag sadto nga gab-i gintawgan ko ang akon abyan nga nag-agda anay sa akon sa Kingdom Hall. Nagsugod ako sa pagtuon sa Biblia, kag karon ginasimba ko si Jehova subong ang akon Dios kag Manunuga.”

Kaangay sang salmista, wala lamang gin-apresyar sini nga babayi si Jehova subong ang Dakung Pintor sang pagpanuga kundi gin-amba man ang iya mga pagdayaw. Sulat sang salmista: “Dayawa ninyo si Jehova kutob sa kalangitan . . . Dayawa ninyo sia, adlaw kag bulan. Dayawa sia, kamo tanan nga bituon sang kapawa. . . . Magdayaw sila sang ngalan ni Jehova; kay nagsugo sia, kag natuga sila.”​—⁠Salmo 148:​1-5.