Ang Kabuhi kag Ministeryo ni Jesus

Ang Pagkakinahanglanon sang Pangamuyo kag Pagkamapainubuson

ANTES sini, sang sa Judea si Jesus, nagsugid sia sing paanggid tuhoy sa pagkaimportante sang padayon nga pagpangamuyo. Karon, sa iya hingapusan nga paglakbay padulong sa Jerusalem, ginapadaku niya liwat ang kinahanglanon nga indi mag-untat sa pagpangamuyo. Mahimo nga si Jesus sa Samaria pa ukon sa Galilea sang ginasugid niya sa iya mga disipulo ining dugang pa nga paanggid:

“Sa isa ka siudad may hukom nga wala sing kahadlok sa Dios kag wala sing pagtahod sa tawo. Apang may babayi nga balo sa sadto nga siudad kag nagkadto sia sing masunson sa iya, nga nagasiling, ‘Pat-ura nga makatigayon ako sing katarungan gikan sa akon kaaway paagi sa kasuguan.’ Ti, sang primero indi sia luyag, apang sang ulihi nagsiling sia sa iya kaugalingon, ‘Bisan wala ako mahadlok sa Dios ukon magtahod sa tawo, apang bangod nga ginagamo ako sining babayi nga balo, pat-uron ko nga makatigayon sia sing katarungan, agod nga indi na sia magbalikbalik sa akon kag basi magakag-as ako.’ ”

Nian gin-aplikar ni Jesus ang iya sugilanon, nga nagasiling: “Pamatii ninyo ang ginasiling sang hukom nga dimatarong! Sa pagkamatuod, nian, indi bala pagpaluntaron sang Dios ang katarungan para sa iya mga pinili nga nagatuaw sa iya sa adlaw kag gab-i, bisan pa mainantuson sia sa ila?”

Wala ginapahangop ni Jesus nga si Jehova nga Dios sa bisan anong paagi kaangay sadtong dimatarong nga hukom. Sa baylo, kon bisan ang dimatarong nga hukom magahumok sa dalayon nga pakiluoy, dapat indi gid pagduhaduhaan nga ang Dios, nga matarong kag maayo, magasabat kon ang iya katawhan indi mag-untat sa pagpangamuyo. Gani si Jesus nagpadayon: “Nagasiling ako sa inyo, himuon [sang Dios] ang katarungan sa madali.”

Ang katarungan masunson nga ginadingot sa mga timawa kag imol, samtang ang mga gamhanan kag manggaranon masami nga ginapaboran. Apang, ang Dios, indi lamang niya pat-uron nga masilutan sing makatarunganon ang malaut kundi nagapasalig man sia nga ang iya mga alagad pakig-angutan sing makatarunganon paagi sa paghatag sa ila sing kabuhi nga walay katapusan. Apang pila ka tawo ang nagapati nga himuon sang Dios ang katarungan sa madali?

Nagapatuhoy labi na sa pagtuo nga may kaangtanan sa gahom sang pangamuyo, si Jesus nagapamangkot: “Kon mag-abot ang Anak sang tawo, makakita gid bala sia sing pagtuo sa duta?” Bisan pa wala masabat ang pamangkot, ang ginapahangop mahimo nga ina nga pagtuo indi mangin kinaandan kon mag-abot si Cristo sa paggahom sa Ginharian. Apang, indi kita makahinakop nga indi ini magaluntad. Nagapakita ka bala sini?

Lakip sa mga nagapamati kay Jesus sadto amo ang pila nga sigurado gid sa ila pagtuo. Nagasalig sila sa ila kaugalingon nga matarong sila, kag ginatamay nila ang iban. Mahimo nga nagalakip ini sa iban sang mga disipulo ni Jesus. Gani ginapatuhoy niya ang masunod nga paanggid sa mga subong sina:

“Duha ka tawo ang nagsaka sa templo sa pagpangamuyo, ang isa Fariseo kag ang isa manugsukot sing buhis. Ang Fariseo nagtindog kag nagpangamuyo sa iya kaugalingon sing subong, ‘Dios ko, nagapasalamat ako sa imo nga ako indi subong sang iban nga mga tawo, nga mga malupigon, mga dimatarong, mga makihilawason, ukon subong man sining manugsukot sang buhis. Nagapuasa ako sing makaduha sa isa ka semana, nagahatag ako sing mga ikapulo sang tanan ko nga kinitaan.’ ”

Ang mga Fariseo kilala sa ila pagpadayawdayaw sa publiko sang ila pagkamatarong agod magpahamuot sa iban. Ang kinaandan nga mga adlaw sang ila ginabuotbuot nga mga pagpuasa amo ang Lunes kag Huebes, kag ginabayad nila ang ikapulo sang bisan diutay nga mga tanom-tanom sang latagon. Mga pila ka bulan antes sini, ang ila pagtamay sa kinaandan nga mga tawo ginpadayag sa tion sang Piesta sang mga Tabernakulo sang magsiling sila: “Ining kadam-an nga wala makahibalo sang kasuguan [kon sayoron, ang pagpatpat sang mga Fariseo sa sini] pinakamalaut.”

Sa pagpadayon sang iya paanggid, si Jesus nagasugid tuhoy sa sadtong “ginpakamalaut” nga tawo: “Apang ang manugsukot sing buhis nga nagatindog sa malayo indi gani makabayaw sang iya mga mata sa langit, kundi ginpukpok niya ang iya dughan, nga nagasiling, ‘Dios ko, kaluy-i ako nga makasasala.’ ” Bangod mapainubuson nga ginkilala sang manugsukot sing buhis ang iya mga sala, si Jesus nagasiling: “Nagasiling ako sa inyo, Ining tawo nagpauli sa iya balay nga kapin katarong sang sa sadto nga tawo; kay ang tagsatagsa nga nagapakataas sang iya kaugalingon paubson, apang ang nagapaubos sang iya kaugalingon pataason.”

Sa amo ginapadaku sa liwat ni Jesus ang kinahanglanon nga mangin mapainubuson. Bangod ginpadaku sa isa ka katilingban nga mabaskog gid ang impluwensia sang nagapakamatarong sa kaugalingon nga mga Fariseo kag pirme ginapadaku ang posisyon kag ranggo, indi makapakibot nga bisan ang mga disipulo Jesus naapektohan. Apang, daw ano kaayo nga mga leksion tuhoy sa pagkamapainubuson ang ginatudlo ni Jesus! Lucas 18:​1-14; Juan 7:⁠49.

◆ Ngaa ginhatag sang dimatarong nga hukom ang ginapangayo sang babayi nga balo, kag anong leksion ang ginatudlo sang paanggid ni Jesus?

◆ Ano nga pagtuo ang pangitaon ni Jesus kon mag-abot sia?

◆ Sa kay sin-o ginpatuhoy ni Jesus ang iya paanggid nahanungod sa Fariseo kag sa manugsukot sing buhis?

◆ Ano nga panimuot sang mga Fariseo ang dapat likawan?