Ang Kabuhi kag Ministeryo ni Jesus

Mga Mamumugon sa Ulubasan

“MADAMO ang mga nahauna,” bag-o lang nasiling ni Jesus, “nga maulihi kag mga naulihi nga mahauna.” Karon ginailustrar niya ini paagi sa pagsugid sing isa ka sugilanon. “Ang ginharian sang langit,” umpisa niya, “kaangay sa agalon sang panimalay nga naglakat sa kaagahon pa sa pagsuhol sing mga mamumugon sa iya ulubasan.”

Si Jesus nagapadayon: “Sang nakapakigsugot [ang agalon sang panimalay] sa mga mamumugon sa isa ka denario ang adlaw, ginpadala niya sila sa iya ulubasan. Kag sang nagalakat sia sa mga ikatlong takna, nakita niya ang iban nga nagatindog nga wala sing ginahimo sa balaligyaan; kag nagsiling sia sa ila, ‘Kadto man kamo sa ulubasan, kag hatagan ko kamo sang nagakaigo.’ Gani nagkadto sila. Sang nagalakat sia liwat sa mga ikan-um kag ikasiam nga takna, naghimo sia sing subong man. Kag sa mga ikanapulog isa nga takna naglakat sia kag nakita niya ang iban pa nga nagatindog, kag nagsiling sia sa ila, ‘Ngaa bala nagatindog kamo diri sa bug-os nga adlaw nga wala sing ginahimo?’ Nagsabat sila sa iya, ‘Kay wala sing nagsuhol sa amon.’ Nagsiling sia sa ila, ‘Kadto man kamo sa ulubasan.’ ”

Ang agalon sang panimalay, ukon tag-iya sang ulubasan, amo si Jehova nga Dios, kag ang ulubasan amo ang pungsod sang Israel. Ang mga mamumugon sa ulubasan amo ang mga tawo nga ginpasulod sa Kasuguan nga katipan; sing ispisipiko sila amo ang mga Judiyo nga nagkabuhi sang panahon sang mga apostoles. Sa bug-os adlaw lamang nga mamumugon nga ginkasugtan ang kahimusan sa bayad. Ang bayad amo ang isa ka denario ang adlaw. Sanglit ang “ikatlong takna” amo ang alas 9:​00 s.a., yadtong gintawag sa ika-3, ika-6, ika-9, kag ika-11 nga takna nagpangabudlay lamang sing 9, 6, 3, kag 1 ka takna, sing pasunod.

Ang 12-ka-takna, ukon bug-os adlaw, nga mga mamumugon nagarepresentar sa Judiyong mga lider nga masako pirme sa relihioso nga serbisyo. Indi sila kaangay sang mga disipulo ni Jesus, nga, sa kalabanan nila nga pagkabuhi, namugon sa pangisda ukon iban pa sekular nga mga trabaho. Tubtob lamang sang tigragas sang 29 C.⁠E. nga ginpadala sang “agalon sang panimalay” si Jesucristo sa pagtipon sa ila nga mangin mga disipulo niya. Busa sila nangin “naulihi,” ukon ika-11 ka takna nga mga mamumugon sa ulubasan.

Sa katapusan, ang simbuliko nga adlaw sa pagpangabudlay natapos sang napatay si Jesus, kag nag-abot ang tion sa pagbayad sa mga mamumugon. Ang dikinaandan nga pagsulundan sa pagbayad sa naulihi nga mahauna ginsunod, subong sang ginpaathag: “Sang kahapunon na, nagsiling ang agalon sang ulubasan sa iya tulugyanan, ‘Tawga ang mga mamumugon kag bayari sila sang ila mga suhol, sumugod sa mga naulihi tubtob sa mga nahauna.’ Kag sang nag-abot yadtong mga ginsuholan sa mga ikanapulog isa nga takna, nagbaton ang tagsa ka tawo sing isa ka denario. Karon sang nag-abot ang nga nahauna, naghunahuna sila nga magabaton sing laban; apang ang tagsa ka tawo man nagbaton sing isa ka denario. Kag sang ila nabaton ini nagkumod sila batok sa agalon sang panimalay, nga nagasiling, ‘Ini nga mga naulihi nagpangabudlay sing isa ka takna lamang; kag ginhimo mo sila nga kaangay sa amon nga nagbatas sang kabug-atan sang adlaw kag sang tagiti nga init!’ Apang nagsabat sia sa ila, ‘Abyan, wala ako nagalimolimo sa imo. Wala bala ikaw magpakigsugot sa akon sa isa ka denario? Kuhaa ang imo kag lakat ka. Akon kabubut-on ang paghatag sa sining naulihi sing subong sa imo. Indi bala tugot sa akon ang paghimo sang buot ko sang akon? Ukon malain bala ang imo panulok bangod nga ako maayo?’ ” Sa paghinakop ginsulit ni Jesus ang punto nga ginsiling niya sang nagligad, nga nagasiling: “Gani ang mga naulihi mahauna, kag ang mga nahauna maulihi.”

Ang pagbaton sa denario natabo, indi sang napatay si Jesus, kundi sang Pentecostes 33 C.⁠E., sang si Cristo, ang “tulugyanan,” nagpasagahay sang balaan nga espiritu sa iya mga disipulo. Ining mga disipulo ni Jesus kaangay sang “naulihi,” ukon ika-11 ka takna, nga mga mamumugon.

Ang denario wala nagarepresentar sa dulot mismo nga balaan nga espiritu. Ang denario amo ang butang nga magamit sang mga disipulo diri sa duta. Butang ini nga mahimo nagkahulugan sang ila pangabuhian, sang ila kabuhi nga walay katapusan. Amo ini ang pribilehiyo nga mangin espirituwal nga Israelinhon, ginhaplas sa pagbantala nahanungod sa Ginharian sang Dios.

Sang ulihi namutikan sadtong ginpaobra sing una nga ang mga disipulo ni Jesus ginsuholan, kag nakita nila sila nga nagagamit sang simbuliko nga denario. Apang luyag nila ang labi pa sa balaan nga espiritu kag sa kaupod nga mga pribilehiyo sa Ginharian. Ang ila pagkumod kag pagpamatok nagkahulugan sang pagpamatok sa mga disipulo ni Cristo, ang “naulihi” nga mga mamumugon sa ulubasan.

Ang nahaunang-siglo nga katumanan amo lamang bala ang katumanan sang ilustrasyon ni Jesus? Indi, ang klero sang Cristiandad sa sining ika-20 ka siglo, bangod sang ila mga posisyon kag mga responsabilidad, amo ang “nauna” nga ginpaobra sa simbuliko nga ulubasan sang Dios. Ginkabig nila ang dedikado nga mga manugbantala nga nabuylog sa Watch Tower Bible and Tract Society nga mga “naulihi” sa pagbaton sing kinahanglanon nga asaynment sa pag-alagad sa Dios. Apang, sa katunayan, amo ini sila ang gintamay sang klero nga nakabaton sing denario​—⁠ang kadungganan nga mag-alagad subong hinaplas nga mga embahador sang langitnon nga Ginharian sang Dios. Mateo 19:​30⁠–​20:16.

◆ Ano ang ginarepresentar sang ulubasan? Sin-o ang ginarepresentar sang tag-iya sang ulubasan kag sang 12-ka-takna kag 1-ka-takna nga mga mamumugon?

◆ San-o natapos ang simbuliko nga adlaw sa pagpangabudlay, kag san-o ginhimo ang pagbayad?

◆ Ano ang ginarepresentar sang pagbayad sing denario?