Paggahom sang Dios—Ang Labing Maayong Paagi
ANG maragtas sang mga pangulohan maathag nga nagapakita nga ang dihimpit nga mga tawo indi makagahom sing nagakaigo sa ibabaw sang iban nga katawhan. Subong ginsiling ni Lord Acton sang Inglaterra: “Ang gahom may huyog sa pagpalain kag ang bug-os nga gahom nagapalain sing bug-os.” Sa amo, subong ginasiling sang Biblia: “Ang tawo naggahom sa tawo sa iya kasamaran.”—Manugwali 8:9.
Sa ginsuguran, ginpagahom ni Jehova nga Dios ang tawo sa ibabaw sang mga sapat apang indi sa ibabaw sang iban nga mga tawo. Ginsilingan sang Dios ang iya una gintuga nga Anak sa mga langit: “Himuon ta ang tawo sa dagway naton, suno sa kaangay naton, kag pagahumon sila sa kaisdaan sang dagat kag sa kapispisan sang kahanginan kag sa kahayupan kag sa bug-os nga duta kag sa tagsa ka butang nga nagasaug sa duta.” (Genesis 1:26) Ang Manunuga sang tawo amo ang iya Manuggahom. Paano, nian, ina nagbalhin?
Sang magrebelde ang tawo sa hardin sang Eden, ginsikway niya ang Dios subong iya Manuggahom kag amo sini sugod sadto. (Genesis, kapitulo 3) Hayag ini sa dumaan nga Israel, ang pungsod nga ginpili sang Dios. Sang mangayo ang mga Israelinhon sing tawhanon nga hari, ginsilingan ni Jehova ang iya manalagna nga si Samuel: “Indi ikaw ang ila ginsikway, kundi ako ang ila ginsikway sa paghari sa ila.”—1 Samuel 8:7.
Ang paggahom sang Dios sa Israelinhon maayo gid. Paagi sa iya tiglawas nga si Moises, ginhatagan sila ni Jehova sing kasuguan nga nagpakita sing mahigugmaon nga konsiderasyon sa ila kaayuhan. Nag-amlig ini sa ila gikan sa madamo nga balatian kag nagsakdag sang pagpatugsiling sa mga tigulang, mga babayi nga balo, kag sa mga ilo. Ang Kasuguan nagpatuman sing pagtahod sa propiedad sang iban kag sing pagkabunayag sa negosyo. Ginapakamalaut sini ang pagkamaynadampigan, butig nga pagpamatuod, kag ang paghamham. Ang paggahom sang Dios matarong gid kag matadlong.
Nanaad si Jehova nga maggahom indi lamang sa Israel kundi sa tanan nga katawhan. Kuhaon niya gikan sa makasasala nga mga tawo ang gahom sa paghari sa ibabaw sang iban nga mga tawo kag ihatag ini sa iya bugtong nga Anak. Sa pagtagna sini, ang Dios nagsiling sa tagna ni Ezequiel: “Indi ini mapanag-iyahan sang bisan sin-o tubtob mag-abot sia nga amo ang may kinamatarong sa sini, kag ihatag ko ini sa iya.”—Ezequiel 21:27.
Kay Jesucristo ginhatag sang Dios ang kinamatarong sa paggahom sa katawhan subong tiglawas sang pagkasoberano ni Jehova. Bangod ang Ginharian sang Dios paagi kay Cristo amo ang labing maayong paagi sa paggahom sa tanan nga katawhan, gintudluan ni Jesus ang iya mga manugpalamati nga ipangamuyo ini. “Dapat kamo mangamuyo sing subong sini,” siling ni Cristo: “Amay namon nga yara sa langit, pakabalaanon ang imo ngalan. Magkari ang imo ginharian. Paghimuon ang imo kabubut-on sa duta subong sang sa langit.”—Mateo 6:9, 10.
Paagi sa pagpakig-angot ni Jesus sa mga tawo, ginpakita niya kon mangin ano nga sahi sang manuggahom sia. Maluluy-on gid si Cristo, kay ‘sang makita niya ang mga kadam-an, naluoy sia sa ila, kay nasamad sila kag nag-aplaag subong sang mga karnero nga wala sing manugbantay.’ (Mateo 9:36) Ginpakita ni Jesus ang pagkadalom sang iya gugma para sa iya mga sumulunod sang magsiling sia: “Nagahatag ako sa inyo sing bag-ong sugo, nga maghigugmaanay kamo; subong nga ako naghigugma sa inyo, nga kamo man maghigugmaanay.” (Juan 13:34) Daku gid ang gugma niya sa mga tawo sa bagay nga handa sia nga ihatag ang iya kabuhi subong gawad. Bangod sina nga halad, ang bisan sin-o nga magabaton sini mahimo mahilway gikan sa sala, balatian, kag kamatayon pa gani.—1 Juan 2:1, 2; Bugna 21:1-4.
Nagatagna kon paano ang paggahom sang Dios paagi kay Jesucristo mangin matarong, matadlong, kag mahidaiton, si manalagna Isaias gin-inspirar sa pagsulat: “Kay sa aton natawo ang isa ka bata, sa aton ginhatag ang isa ka anak nga lalaki; kag ang prinsipenhon nga paggahom mangin sa iya abaga. Kag tawgon ang iya ngalan Makatilingala nga Manuglaygay, Dios nga Gamhanan, Dayon nga Amay, Prinsipe sang Paghidait. Nahanungod sa kabuganaan sang prinsipenhon nga paggahom kag sang paghidait wala sing katapusan, sa trono ni David kag sa iya ginharian sa pagpalig-on sini kag sa pagtib-ong sini sa katarungan kag sa pagkamatarong, kutob karon tubtob sa walay katubtuban. Ang kakugi ni Jehova sang kasoldadosan magahimo sini.”—Isaias 9:6, 7.
Ang mga tiglawas sa duta sang paggahom sang Dios mangin kaangay sang mga tawo nga nagapakita karon sang mahigugmaon nga mga kinaiya ni Jesus subong mga manugtatap sa matuod nga Cristianong kongregasyon. Indi kaangay sang mapiguson nga mga klero, ining mga lalaki nagapakita sing mahigugmaon nga kabalaka sa panong, subong gid ni Jesucristo. Tuhoy sa sinang diosnon nga mga lalaki, si manalagna Isaias nagsulat: “Yari karon! Ang isa ka hari magahari sa pagkamatarong; kag ang mga prinsipe magagahom sa katarungan.” (Isaias 32:1) Ina nga mga tiglawas sang paggahom sang Dios magaalagad man para sa mga katuyuan sang Dios sa bag-ong kalibutan.—Salmo 45:16.
Malapit Na ang Dakung Pagbalhin!
Sa indi pa maggahom ang Ginharian sang Dios sa ibabaw sang katawhan nga indi masuay, dapat mahanabo anay ang dakung pagbalhin. Tapuson sining pagbalhin ang pagbinahinbahin sang mga pungsod. Sa baylo sang nagasumpakilay nga mga pangulohan sang tawo, mangin isa lamang ang matarong nga langitnon nga pangulohan nga nagahiusa sa katawhan subong isa ka katawhan nga nagakabuhi sa paghidait. Nagatagna sini, si manalagna Daniel nagsulat: “Sa mga adlaw sadto nga mga hari magapatindog ang Dios sang langit sing ginharian nga dili gid malaglag. Kag ang ginharian indi pag-ibilin sa iban nga katawhan. Dugmukon sini kag papason ini tanan nga ginharian [mga pangulohan sang tawo], kag ini magapadayon sa wala sing katubtuban.”—Daniel 2:44.
Ang paggahom sang Dios amo lamang ang sabat sa mga problema sang mga pangulohan nga nagaatubang sa katawhan karon. Ang kahimtangan karon sang katawhan nagabutang sang ila gid pagkabuhi sa katalagman! Kag wala sing solusyon ang tawo. Busa, maalamon nga pamatian ang solusyon sang Biblia kag paabuton nga may pagsalig ang tion nga malapit na kon ang matarong nga katawhan magakalipay sa idalom sang indi masuay kag bulahan nga paggahom sang Dios.
[Piktyur sa pahina 6]
“Ang isa ka hari magagahom sa pagkamatarong”